ཁམས་རི་ཚེ་རྡོར།

དཔྱིད་ཉི་རྒན་པོ་སྒེའུ་ཁུང་འགྲམ་ནས་ཡོལ། །

མི་ཚེའི་དངས་མ་གློག་བརྙན་དཔའ་བོས་འཐུང་། །

དྲིན་ཆེན་སྒོར་མོ་བརྡ་འཕྲིན་ཇག་པས་ཕྲོག །

རིག་པའི་བུ་ཆུང་སྐྱོ་བའི་ཨ་ཐང་ཆད། །

རྩམ་ཁུག་ཆུང་ཆུང་གཉེར་མ་རུག་གེར་ཉལ། །

སྦྲང་མའི་མཆུ་རྩེ་མར་ཀོག་སྟེང་དུ་བདར། །

དྲན་པའི་མུན་པ་ཇ་ཕོར་ཕྱི་ན་འཐིབས། །

གདུང་བའི་དུད་པ་ཚོར་བའི་ཁམས་ལ་འཁྲིགས། །

བརྗོད་དོན་ཟབ་མོ་བྱང་ཁོག་སྟོད་ནས་ཡལ། །

ལ་དོན་ཁ་ཤས་ཀླད་པའི་ནང་དུ་འཚངས། །

དག་ཆ་ཐན་ཐུན་གློག་གི་རྟ་ལ་བསྐྱོན། །

དྲེགས་པའི་གླང་བོ་སྤྲིན་པའི་གསེབ་ན་འཕྱོ། །

ཕ་ཡུལ་ཟིན་ཐོ་ཀློག་པའི་རྒྱང་རིང་ནས། །

ཁུ་བྱུག་བུ་མོའི་ཅོང་སྐད་རླུང་གིས་ཁྱེར། །

སྒེའུ་ཁུང་ཡོལ་བ་རལ་བའི་བུ་ག་ནས། །

དཔྱིད་རླུང་འཆམ་པོ་སྙིང་ལ་སིབ་སིབ་ཐིམ། །

དགུང་ཁའི་ཉི་མའི་ཟེར་ཐག་མཁའ་ལ་བསྲིངས། །

མུན་པའི་ཇག་པ་མདུན་རིའི་ཕག་ནས་འཇབ། །

ལྗང་ལོའི་སྙིང་གཏམ་སྐྱུགས་པའི་དགའ་མ་འདིས། །

སྐྱོ་བའི་མིག་ལ་འཕྱ་བའི་འཛུབ་མོ་ཀེར། །