ཁམས་རི་ཚེ་རྡོར།

སྨུག་པའི་དར་ཟབ་གཡོ་བ་འཇམ་བསིལ་དྲི་བཞོན་མཛའ་ན་མོས། །

སློབ་རའི་ནེ་གསིང་འགྲིམ་བཞིན་འདབ་ལྡན་སིམ་པར་བྱས་པ་ན། །

ཡིད་འཕྲོག་ཚངས་པའི་སྲས་མོ་དཔྱིད་དཔལ་བསུ་བའི་ཕོ་ཉར་བརྫུས། །

རྒྱུད་དྲུག་དབྱངས་ཀྱི་མཆོད་པ་བསིལ་རླུང་གཞོན་ནུའི་ཕྲག་པར་བཀལ། །

དགའ་བའི་ཉམས་ལྡན་སྡོང་བོའི་སོར་མོ་རྡེབ་བཞིན་ལྡེམས་ལྡེམ་གཡོ། །

ཤེས་རབ་རིག་པས་རབ་བཟི་བློ་འཛིན་གཞོན་ནུ་ཤིག་ཤིག་འགུལ། །

ཚེམས་དཀར་མུ་ཏིག་ཕྲེང་འཛིན་མཆུ་སྒྲོས་གར་གྱི་ལྷ་མོས་ཀྱང་། །

མཉེན་ལྕུག་འཁྲིལ་ལྡན་འཇམ་སྲབ་ལྗགས་ཀྱི་དར་དཔྱང་གློག་ལྟར་བསྐྱོད། །

འགྲིག་འཛིན་བུང་བའི་ཁྱུ་ཚོགས་ཕྱོགས་དང་ཕྱོགས་སུ་ལྡིང་བ་ན། །

བློ་འཛིན་སྟོང་གི་དབྱངས་སྙན་མཚམས་སྤྲིན་གསར་བའི་ཕང་བར་འདེགས།

བྱམས་བརྩེའི་དབྱིག་གི་ཁུ་བ་ཀུན་གསལ་བུ་མོའི་མངལ་ལས་དྲངས། །

གནའ་དེང་རིག་པའི་འོད་སྐོར་ཡིད་འོང་སློབ་རའི་ཚལ་དུ་འཁྱིལ། །