ཀ་ཁའི་ཡུམ་ཆེན་ཆོས་ཀྱི་སྒྲོན་མེ་ཞིག །
ཁ་བའི་མུན་པ་སེལ་ལ་བསམ་བཞིན་བལྟམས། །
ག་བུར་འཛིན་པའི་མདངས་ལྡན་སམ་བྷོ་ཊ། །
ང་རོའི་རྨོངས་པ་གསལ་བྱེད་སྲིད་པའི་མིག །
ཅ་ཅོ་མ་འདྲེས་བོད་ཀྱི་མིང་ཚིག་རྣམས། །
ཆ་ཤས་ཡོངས་རྫོགས་སྟོན་པའི་དཔེ་བྱེད་བཞིན། །
ཇ་ཆང་བདུད་རྩིའི་སྙིང་བོ་རིག་པའི་བཅུད། །
ཉ་གང་ཟླ་བ་གཞོན་ནུའི་འཛུམ་ཞལ་བཞིན། །
ཏ་ལའི་ལོ་མ་འཁྲིགས་པའི་དགའ་ཚལ་ན། །
ཐ་སྙད་རིག་གནས་གེ་སར་ཅིར་ཡང་དགོད། །
ད་དུང་རྟེན་འབྱུང་རྒྱུ་མར་ངོ་སྤྲོད་ཅིང་། །
ན་བུན་རྨོངས་པའི་མུན་པ་ཁྱེད་ཀྱིས་སེལ། །
པ་ཊུ་བྱེ་བ་འབྱུང་བའི་ཡུམ་ཆེན་དང་། །
ཕ་ཤུལ་འཛིན་པའི་སྲོག་གི་ཀ་བ་ཞིག །
བ་ལ་ཧ་ལྟར་སྲིད་པའི་གཅོང་རོང་ལས། །
མ་ལུས་སེམས་ཅན་སྒྲོལ་བའི་དེད་དཔོན་ཞིག །
ཙཀྲས་སྒྱུར་བ་དང་པོའི་སྲིད་དང་དབང་། །
ཚ་ཟེར་ཅན་གྱིས་ཉིན་མོར་བྱས་པ་བཞིན། །
ཛ་ཡའི་བསྟན་པ་ལྷ་མིའི་སེམས་ཀྱི་སྨན། །
ཝ་ལེར་ཡིད་ལ་འཆར་བའི་བྱེད་པོ་བཞིན། །
ཞ་ལུ་ལ་སོགས་ཁྲི་སྐོར་བཅུ་གཉིས་པོ། །
ཟ་མ་ཏོག་ཏུ་བཅུག་བཞིན་འཐོར་མེད་བྱས། །
འ་ཆད་འུ་ཐུག་གཞན་དབང་གྱུར་ན་ཡང་། །
ཡ་བྲལ་མ་གྱུར་ཆོལ་གསུམ་གཅིག་ཏུ་སྡུད། །
ར་བ་གངས་ལ་བཅོལ་བའི་སྨན་ལྗོངས་ནས། །
ལ་འུར་བདེན་དཔང་སྟོན་པའི་དབྱངས་གསལ་གྱིས། །
ཤ་ཁྲག་རུས་པའི་མཆོད་རྫས་བཤམས་དང་ལྷན། །
ས་ཆེན་ཁྱོན་འདི་རེ་ཞིག་འདར་བར་བྱས། །
ཧ་ཤང་མ་ཧ་ཡ་ནའི་རྣམ་ཐར་གྱི། །
ཧ་ལམ་རྗེས་སུ་བསྙེག་ལ་མི་རིང་བས། །
ཨ་མ་ནོར་འཛིན་སྒེག་མོའི་སྤྱི་གཙུག་ཏུ། །
ཨ་དོན་འགྱུར་མེད་བརྟན་པའི་དར་ཆེན་འཛུགས། །
| 