ཀིརྟིའི་ནང་བསམ།
མ་ཟས་གཙང་མའི་རྩམ་དྲི་མ་བསྣོམས་པར།།
རི་སྤྱང་ལྟ་བུར་རློན་ཤ་ཟ་བཞིན་དུ།།
གདུང་རྒྱུད་དག་མར་ནག་ཐིག་ཕབ་མཁན་དེས།།
འཆར་སྒོའི་ཡིད་ལ་བདེ་བ་ཇི་ལྟར་སྟེར།།
ཡངས་པའི་སྤང་ཐང་འཕྲུལ་ཆས་རྩལ་གྱིས་བཅོམ།།
དྭངས་གཙང་གངས་ཆུ་བསིལ་མའི་བཞུར་རྒྱུན་བཅད།།
འཛིན་མའི་གཅེས་ནོར་རི་དྭགས་སྲོག་ཆག་བསད།།
གནས་སྡོད་བུ་ལོའི་སེམས་གཤིས་ཅི་ལ་བདེ།།
མཐུན་ལམ་སེམས་ཀྱི་མེ་ཏོག་བ་མོས་བཅོམ།།
མཐུན་སྒྲིལ་གསེར་ཟམ་ཡངས་པོ་དགྲ་སྟས་བཅད།།
མཐུན་པའི་བརྩེ་ཞེན་བུ་མོ་སྒོར་གྱིས་བསླུས།།
མཐུན་སེམས་དུང་བའི་བུ་ལོ་ཅི་ལ་བདེ།།
མཁས་མཁས་ཡང་རྩེར་སོང་ཡང་ཁྲིམས་ཀྱིས་མནར།།
བཙུན་བཙུན་ཚུལ་ལྡན་དག་ཀྱང་གཡོ་རྒྱུས་བསླད།།
བཟང་བཟང་མཛད་འཕྲིན་ཅན་ཡང་འོག་ཏུ་བཅུག།
དེའི་ཕྱིར་བློ་ལྡན་མིག་ཟུང་ཅི་ལ་བདེ།།
ཕ་ལོའི་བུ་ཆུང་སུག་བཞིའི་རྗེས་ལ་སྙེགས།།
མ་ལོའི་གཅེས་མ་ལྷས་རའི་འདབས་ན་ལུས།།
བོད་མིའི་སྐད་ཡིག་ཕྲ་ནས་ཕྲ་རུ་སོང་།།
ལྗོངས་འདིར་སྐྱ་རེངས་གསར་བ་ཇི་ལྟར་བྱུང་།།
བདེན་པའི་རང་མདངས་ཉི་ལྟར་གསལ་བར་ཤོག།
ཨ་ཕའི་ཀི་སྒྲས་རི་ལུང་འགེང་བར་ཤོག།
ཨ་མའི་བཞོ་དབྱངས་མི་ཡུལ་གྱེར་བར་ཤོག།
བུ་ལོའི་མདུན་ལམ་ཤེས་བྱར་བརྩོན་པར་ཤོག།
བསླད་མེད་དྲང་བདེན་ཡངས་པོའི་མདུན་ལམ་དུ།།
ཨ་མའི་བུ་ལོས་རྒྱུ་ཕྱོགས་མི་ནོར་བར།།
སྐྲ་ལོ་རླུང་ཟད་མགོ་རུས་མ་འཐོར་བར།།
ཞུམ་མེད་སྙིང་གི་གནས་ལུགས་གླེང་ན་བསམ།།
