མཐུ་སྟོབས་རྡོ་རྗེ།
----དྲན་པའི་པགས་བསྟན་ཁུག་ནས་བློ་སེམས་འགྱུར་ནི་མ་དགོས་དྲན་གདུང་ཇེ་རྣོ་རེད།
༠༡
བྱེ་མའི་གྲོང་གི་སྨུག་རྒྱུ།།
མིག་ནས་ཡལ་རྒྱུ་མ་བྱུང་།།
སྙིང་གི་དགའ་སའི་ཁྱོད་རང་།།
སེམས་ནས་འབོར་ཐབས་མ་བྱུང་།།
༠༢
དུས་ཚོད་ཐག་སྒྲའི་ཁྲོད་ཀྱི།།
ལོ་ཟླ་རྒས་རྒྱུ་མ་བྱུང་།།
ཉིན་སྒུག་མཚན་སྒུག་ངོགས་ཀྱི།།
བརྩེ་དུང་ག་འདྲ་འདུག་གམ།།
༠༣
བརྩེ་བ་དམར་པོ་དང་ནི།།
དུངས་བ་ལྗང་ཁུའི་ལོ་རྒྱུས།།
ནག་ཆུང་ཡི་གེར་ཕབ་པ།།
ཁྲི་ལོར་བརྟན་པའི་སྨོན་ལམ།།
༠༤
དབྱར་འདིའི་ཚ་རླབས་འཕྱུར་ན།།
བརྩེ་དུང་བསིལ་བསིལ་རླུང་བུ།།
དགུན་འདིའི་གྲང་རླབས་རྒྱུ་ན།།
བརྩེ་དུང་དྲོད་འཇམ་ཚར་རུ།།
༠༥
བརྩེ་དུང་འཚོ་བ་མུན་ན།།
བརྩེ་དུང་མིག་ཆུའི་བདག་མོ།།
བརྩེ་དུང་འཚོ་བ་གསལ་ན།།
བརྩེ་དུང་སྤྲོའི་བརྒྱའི་བདག་མོ།།
༠༦
གོང་གི་བཙུན་པ་བཙུན་མོས།།
སྡོམ་ཁྲིམས་ནན་གྱིས་སྲོང་ནས།།
བཀའ་ཆོས་ནན་གྱིས་བཀླགས་ན།།
བརྩེ་དུང་མཁྱེན་ས་མ་རེད།།
༠༧
སྤང་གི་ལུ་གུ་ཡིན་ན།།
རྩེད་འཇོའི་འགན་འཁྲི་མ་རྟོགས།།
ང་ཡི་བརྩེ་དུང་ལོངས་སྤྱོད།།
ངོས་གནས་ཚོར་ས་མ་རེད།།
༠༨
གཡོན་གྱི་ལྡེམ་མྱུར་ཅན་གྱི།།
བུ་མོ་ཕོ་བརྒྱའི་བདག་མོས།།
ང་ཡི་བརྩེ་དུང་རིན་ཆེན།།
ཡང་སྙིང་ཤེས་ས་མ་རེད།།
༠༩
མི་རྟག་སྒྱུ་མའི་རུམ་ནས།།
ཨ་ཕོས་རྨི་ལམ་རྨིས་ཡོད།།
རྨི་ལམ་གཤོག་པ་ཅན་པོ།།
རྨི་ལམ་ཀུན་གྱི་རྨི་ལམ།།
༡༠
མཚན་མོའི་བཅུ་དྲུག་ཟླ་བ།།
ཉ་གང་ཟླ་བའི་དཀྱིལ་འཁོར།།
རྒྱུ་སྐར་གང་གིས་འགྲན་ནུས།།
ང་ཡི་བྱམས་པ་འདྲ་འོ།།
༡༡
སྙིང་གཏམ་ཁ་བཏགས་དཀར་བོ།།
སེམས་ཀྱི་གསང་གཏམ་མཉམ་དུ།།
བཀྲ་ཤིས་ཉིན་མོ་ཞིག་ལ།།
ལེགས་པར་མཆོད་ནས་སྒུག་ཡོད།།
༡༢
སྒུག་སྒུག་ལོ་ཟླའི་ངོ་གདོང་།།
ཁ་དོག་མང་བོར་འགྱུར་ཐལ།།
ཕྲན་གྱི་སེམས་པ་དམར་ཆུང་།།
ད་དུང་སྔོན་གྱི་དེ་ཡིན།།
༡༣
རྟ་ཕོ་སྒྲོག་གིས་བཅིངས་མིན།།
བདག་པོའི་གཤིས་དང་བསྟུན་ཡོད།།
ཁྱོད་དང་ཕྲན་གྱི་བརྩེ་དུང་།།
རང་མོས་སྙན་ངག་རང་མོ།།
༡༤
མི་ཕོ་སྐྱ་བོ་ང་དང་།།
མི་མོ་ཁྱོད་ཀྱི་ལས་དབང་།།
དར་སྐུད་གཅིག་ཏུ་མེད་ན།།
ཚེ་སྔོན་ལས་ཀྱི་རྒྱུ་འོ།།
༡༥
ཁྱེད་ནི་སྤྲིན་པ་ལང་ལོང་།།
ང་ནི་རླུང་བུ་ལྡོམ་པོ།།
ཁྱེད་རྗེས་སྙེགས་སྙེགས་མཛད་ནས།།
ཐོབ་བྱ་བརྩེ་དུང་བྲོ་བ།།
༡༦
ཁྱོད་རང་དགའ་བའི་མི་དེ།།
ང་རང་ཡིན་པ་མི་འདུག།
ཆུ་མོ་མ་ཆད་བར་དུ།།
ཉ་མོས་འཁྱུག་རྩལ་སྟོན་རྒྱུ།།
༡༧
དེ་རིང་ཁྱོད་རང་དྲན་ནས།།
དྲན་པ་ཕྱི་རུ་ཕུད་དེ།།
མཚོ་མོར་གྲུ་ཞིག་འཕང་ངོ་།།
ཚོར་བ་དམར་རྗེན་མ་འོ།།
༢༠༡༣ལོའི་ཟླ༧པའི་ཚེས༣༡ཉིན་བླ་བྲང་ནས་རྫོགས་པའོ།།
ངེད་དྲ་བ།
