_____སི་པ་ཏ་ཁེའི་འོས་ལངས་ཆེན་མོའི་སྐོར།

       མིའི་རིགས་ལོ་རྒྱུས་ཀྱི་ཤོག་ལྷེ་གང་ལ་བལྟས་ཀྱང་རོ་མ་ཞེས་པའི་ཡི་གེ་དེ་གཉིས་མ་ཐོན་ས་མེད། ལོ་རྒྱུས་བརྡ་དོན་ཡིན་པའི།དམག་འཁྲུག་གི་རུ་མ་ཡིན་པའི། ཆབ་སྲིད་ཀྱི་གཟུགས་མཚོན་ཡིན་པའི་ཡི་གེ་དེ་གཉིས་ལ་གང་འདྲའི་བློས་མི་འཆུན་པའི་ནང་དོན་མོད་པོ་ཞིག་སྦས་ཡོད་པ་རེད་ཨང་།  སུ་ཞིག་རོ་མ་ལ་གདེང་མ་འཐོབ་པ་ཡིན་ན། གང་དེས་འགྲོ་བ་མིའི་རིགས་ཀྱི་ལོ་རྒྱུས་རྣལ་མ་ཞིག་ཁྱོན་ནས་ཤེས་ཐབས་མེད་དོ།།རོ་མ་ཞེས་པས་གནའ་རབས་ཤིག་སྟོན།རོ་མ་ཞེས་པས་བཙན་རྒྱལ་ཞིག་མཚོན།རོ་མ་ཞེས་པས་མཁར་རོ་ཞིག་འཆད།རོ་མ་ཞེས་པས་ལྷ་སྒྲུང་ཞིག་མགུར། རོ་མ་ཞེས་པས་འོས་ལངས་ཤིག་དྲན་དུ་འཇུག་ལ། རོ་མ་ཞེས་པས་དབང་བསྒྱུར་ཞིག་གོ་བར་ཡང་བྱེད།མ་གཞི་བཤད་ན།མི་རྣམས་ཀྱིས་རང་དབང་གི་ཆེད་དུ་བཏོན་པའི་ཁྲག་ཐིགས་དང་བོ་འང་རོ་མའི་ཡུལ་ལུང་ག་ཤེད་མོ་ཞིག་ཏུ་ཡིན་སྐད་གོ་ལ། དྲང་བོར་སྨྲས་ན།  གང་ཟག་དག་གིས་མངའ་སྡེ་ཆེན་པོར་ཁ་གཏད་འཇལ་བའི་ཁྲོམ་སྐོར་སྔོན་གྲས་ཀྱང་རོ་མའི་གནས་ས་ག་གེ་མོ་ཞིག་ནས་བྱས་སོང་སྐད། དམྱལ་བ་ཟེར་ཡང་དེ་འདྲའི་སྡུག་བསྔལ་མེད་ཅེས་པའང་རོ་མའི་ལོ་རྒྱུས་ དུམ་ཚན་ཞིག་ལ་དཔེ་བླངས་ན་ངོ་འཕྲོད་པ་སླ་ཞིང་། སྲིན་པོ་གདོང་དམར་གྱི་རྒྱལ་ཁམས་ཞེས་པའང་བོད་ལས་ད་དུང་རོ་མ་བ་ལ་སྦྱར་ན་ཤིན་ཏུ་ནས་ཀྱང་འབྱོར།རོ་མ་དེ་ལྟར་དམུ་རྒོད་ཡིན་ལ།རོ་མ་དེ་ལྟར་དཔའ་རྒོད་ཀྱང་ཡིན་པ་རེད།རོ་མ་དེ་ལྟར་དེ་ལྟར་བླུན་རྨོངས་བྱེ་ཐང་ན་འཚོ་མོད།  རོ་མ་དེ་ལྟར་ཤེས་དཔལ་དར་ཟམ་དུའང་བརྒལ་སོང་།རོ་མ་བའི་མི་དག་ལ་རྭ་ཅོ་དང་མཇུག་མ་ཡོད་ཅེས་ལབ་ན་འུད་དུ་འགྲོ་ལས་ཆེ་མོད།  ཁོང་ཚོའི་ཕོ་ཤར་དག་གི་སྨིན་མའི་ཁྲོ་མདུད་དང་དཔུང་བའི་ཤ་རྒོད་ནི་ང་རང་ཚོའི་གནག་ཕྱུགས་ཀྱི་རྭ་ཅོ་དང་མཇུག་མ་ལས་ཀྱང་ལྡབ་ཀྱི་སྦོམ་པོ་ཡོད་པ་རེད། ཁོང་ཚོའི་བུད་མེད་དག་ལའང་འདོད་སྡང་གི་རྣམ་འགྱུར་ཧང་སང་བ་རེ་བསྟན་རྒྱུ་ཡོད་ཁར།གློ་བུར་གློ་བུར་གད་རྒྱངས་དྲག་པོ་རེ་གཡལ་ཚེ་འུ་ཅག་གི་མི་རྐང་གླིང་བུ་ཞེས་པའི་དཔེ་འཇོག་དེས་ནི་ཆ་ཡི་ཆ་ཙམ་ཡང་མཚོན་ཐབས་ཡོད་པ་མ་རེད།མི་རྣམས་ཀྱིས་སོ་སོའི་མི་སྡུག་པ་དང་དྲག་པོའི་ཆ་དེ་ཡོངས་སུ་མཐོང་འདོད་ན།མི་རྣམས་ཀྱིས་སོ་སོའི་རང་བཞིན་དངོས་མ་དང་གཤིས་ལུགས་རྣལ་མ་དེ་ཀུན་ནས་རྟོགས་བསམ་ན།མི་ནི་གཅན་གཟན་ཞིག་དང་བདུད་རྒན་ཞིག་དང་ཉ་སྲིན་ཞིག་ཡིན་ཚུལ་ལ་ངེས་པ་གཏིང་ཚུགས་སུ་འགྲོ་བར་སྙམ་ན་ནི།  རོ་མ་བཙན་རྒྱལ་ཆེན་མོའི་སྐབས་ཀྱི་ལོ་རྒྱུས་རེ་ཟུང་ཙམ་ཧ་གོ་བས་ཀྱང་ཆོག་པ་ཡིན་ནོ།།སི་པ་ཏ་ཁེའི་འོས་ལངས་ཆེན་མོ(Spartacus//斯巴达克斯) ཡང་གནའ་བོའི་རོ་མ་བའི་ན་ནག་དང་ཁ་ཆར་མཚོན་པའི་ལོ་རྒྱུས་ཀྱི་ཤོག་ལྷེ་ཞིག་ཡིན་ཞིང་། མིའི་རིགས་ཀྱི་རོ་མ་བའི་སྐད་སྒྲ་དང་གད་རྒྱངས་མཚོན་པའི་དཔའ་བོའི་རྟགས་ཐམ་ཁེ་རུ་མ་ཞིག་ཀྱང་ཡིན་པ་རེད།  དུས་རབས་འདིའི་སྟོང་ལོ་བཅུ་བར་བསྐྲུན་པའི༼ཁྲག་དང་བྱེ་མ༽(血与沙)ཞེས་པའི་གློག་བརྙན་འདིས་ནི་ལོ་རྒྱུས་ཀྱི་དོན་རྐྱེན་དེ་ཀ་མངོན་སུམ་ལས་ཀྱང་མངོན་སུམ་དུ་བསེད་ཐུབ་ཡོད་པར་མ་ཟད།  འཁྲབ་པ་དང་བརྫུས་པའི་ཤུལ་མེད་ལ། བཅོས་པ་དང་བསྒྱུར་པའི་ཞད་ཀྱང་ཡོད་པ་མ་རེད།ཁོ་བོས་བལྟས་ན་གློག་བརྙན་འདིའི་འཁྲབ་ཁྲིད་པ་དང་འཁྲབ་སྟོན་པ་དག་ལ་རོ་མ་བའི་བླ་ཞུགས་ཡོད་པ་འདྲ་ཞིང་།རོ་མ་བའི་གཤེད་འཁོར་བའང་ཡིན་པ་འདྲ།གློག་བརྙན་འདི་ལ་བལྟས་ཤིང་ལྟ་དུས་ན་ངའི་དྲན་ཡུལ་དུ་གཟུགས་འདས་རིག་པའི་འགྲེལ་སྟངས་རིགས་ཤིག་ལས་ཅི་ཡང་འཁོར་རྒྱུ་མེད་སོང་། འདི་ཡི་འཁྲབ་སྟོན་པ་གཙོ་ཕལ་ཐམས་ཅད་ནི་དེ་དེ་བཞིན་དུ་ངུ།དེ་དེ་བཞིན་དུ་དགོད།དེ་དེ་བཞིན་དུ་འཁྲིག་པ་སྤྱོད།དེ་དེ་བཞིན་དུ་གསོད་རེས་བྱེད།ད་ཕན་ཆད་མི་ཡུལ་འདིར་འདི་འདྲའི་ཇི་མ་ཇི་བཞིན་དང་།ཨ་ན་མ་ན་དང་།  གཅིག་པ་གཅིག་རྐྱང་གི་གློག་བརྙན་ཞིག་ནི་བསྟན་པ་ལྟ་ཞོག་གོ་བ་ཙམ་ཡང་མེད་དོ།།ལོ་རྒྱུས་སུ་འཁོད་པ་ལྟར་ན།གནའ་བོའི་དུས་སུ་རོ་མ་བས་རྟག་ཏུ་ཕྱི་ཕྱོགས་ལ་དམག་འཁྲུག་བསླངས་ཀྱི་ཡོད་ཅིང་།  མངའ་ཁོངས་རྒྱ་བསྐྱེད་དང་འབངས་མིར་བརྙས་བཅོས་བྱེད་པའི་སྦྱོར་བ་སྣ་ཚོགས་ལག་ཏུ་བསྟར་བ་དང་།ཨི་ཐ་ལིའི་བྲན་གཡོག་རྣམས་ཉིན་རེ་བཞིན་ཇེ་མང་དུ་བཏང་སྟེ།  བྲན་བདག་གི་མཁར་གཞིས་བཟོ་སྐྲུན་བགྱིས་པའི་ཁར་ཡ་ང་སྙིང་རྗེ་བྲལ་བའི་ཁྲིམས་ཆད་མང་བོའི་སྲོལ་ཕྱེས་ཤིང་། ཁོང་ཚོས་ནམ་ཡང་བྲན་གཡོག་ནི་བྱོལ་སོང་དང་རྡོ་བ་ཙམ་ལས་ཆ་མི་འཇོག་པ་དང་། བྲན་གཡོག་ནི་བྲན་གཡོག་རང་སྟེ། ནམ་ཡང་སྐད་ཆ་བཤད་ཤེས་པའི་ལག་ཆ་ཙམ་ལས་མ་ཡིན་ནོ་ཞེས་སྨྲ།བྲན་གཡོག་དག་གི་སུག་པར་ལྕགས་ཀྱི་འཆིང་རྒྱ་ཡོད་ཅིང་།  དེའི་སྟེང་བདག་བཟུང་ཞིག་དང་། བདག་རང་འབྲོས་སུ་མ་འཇུག་གོ།ཞེས་པའི་ཡི་གེ་བསྐོས་པ་རེད།ཁོ་ཚོས་ནམ་ཡང་བྲན་གཡོག་ནི་བྲན་གཡོག་གོ་ཞེས་སྨྲ་ཞིང་། དེ་ཚོའི་བུ་རབས་ཚ་རྒྱུད་དག་ཀྱང་བྲན་གཡོག་རྐྱང་ཡིན་པ་རེད།གཡོག་རྒས་པོ་རྣམས་བས་མཐའ་རུ་དེད་དེ་ལྟོགས་གྲིར་གསོད་བཞིན་ཡོད་ལ། བྲན་བདག་གམ་དབང་སྒྱུར་བ་རྣམས་སྤྲོ་བོ་ཡོང་ཆེད་དུ་ཁོད་ཆེ་ཞིང་མཐའ་ཡས་པའི་གོ་ར་ཆེན་མོ་ཞིག་བསྐྲུན་ཡོད་པར།དུས་དང་དུས་སུ་གྱད་མི་དག་ལ་གོ་མཚོན་སྤྲད་དེ་རྒྱག་རེས་བྱེད་དུ་འཇུག་པ་དང་། སྐབས་དང་སྐབས་སུ་གྱད་མི་དག་རེ་རེ་བཞིན་བཀྲེན་པའི་གཅན་གཟན་ཚོགས་ལ་གཡེངས་དུ་འཇུག་པ་དང་།སོ་ཤད་བརྒྱབ་དུ་འཇུག་པ་དང་།སྡེར་ལྕག་འཕེན་དུ་འཇུག་པ་དང་།མགོ་ སུག་འཆའ་རུ་འཇུག་པ་སོགས་བྱེད།  གྱད་མི་དག་དུད་འགྲོ་མི་བསྲུན་པ་དང་གཅན་གཟན་གཏུམ་པོ་དག་ལ་འཐབ་དུས།མི་རོ་དང་ཟོག་རོ་ཅི་ཞིག་ལྷགས་ཀྱང་ཁོ་རང་ཚོས་ཐལ་མོ་བརྡབས་ཏེ་ཧ་ཧ་དགོད། རྒྱུན་པར་གྱད་མི་དག་ལ་དེ་ལུགས་ཀྱི་སྦྱོང་བརྡར་ཡང་སྤྲོད་ཀྱི་ཡོད་ཅིང་།  ཉི་མ་རེ་རེར་ཁྲག་བཞུར་བ་དང་བྱེ་མ་བཞུར་བ་དང་ཚེ་སྲོག་བཞུར་བ་ནི་གནའ་བོའི་རོ་མ་བའི་ལོ་རྒྱུས་ཀྱི་ངོ་གདོང་དངོས་ཡིན་པ་རེད། སྐབས་དེའི་དབང་སྒྱུར་བའམ་བྲན་བདག་རྣམས་ལ་ནི་འདི་ལས་ལྷག་པའི་ལྟད་མོ་དགའ་རབས་ཤིག་ཁྱོན་ནས་མེད་ཚོད་ཡིན་ཨང་།སྐབས་དེ་ཤེད་ཅིག་སྟེ།སྤྱི་ལོ་སྔོན་གྱི་137ལོ་ནས132ལོའི་བར་དུ།ཞི་ཞི་ལི་ནས་བྲན་གཡོག་གི་འོས་ལངས་ཐེངས་དང་བོ་བསླངས་པ་དང་།སྤྱི་ལོ་སྔོན་གྱི104ལོ་ནས101ལོའི་བར་དུ་ཞི་ཞི་ལི་ནས་བྲན་གཡོག་གི་འོས་ལངས་ཐེངས་གཉིས་ལ་བསླངས་པ་རེད།ཐེངས་སྔ་ཕྱིའི་འོས་ལངས་འདི་གཉིས་ཀྱི་ཁྲོད་རོ་མ་བའི་རང་དབང་རྩོད་པའི་མི་སེར་གྱི་གྲངས་ཀ་གྲོག་ཚང་བཞིན་བརྡོལ་བར་མ་ཟད།བྲན་བདག་གམ་དབང་སྒྱུར་བ་སྐོར་ཞིག་ལ་བསམ་ཡུལ་ལས་འདས་པའི་རྒོལ་རྡུང་དྲག་པོ་ཐེབས་པ་དང་།བྲན་གཡོག་མང་བོར་ཡང་འཇིགས་སུ་རུང་བའི་བསད་རྨས་ཚབས་ཆེན་བྱུང་སོང་བ་རེད།ཏག་ཏག་སྐབས་འདི་འདྲ་ཞིག་ལ།གནའ་བོའི་ལོ་རྒྱུས་སྒང་གི་ཆེས་གཞི་རྒྱ་ཆེ་བའི་བྲན་གཡོག་འོས་ལངས་ཏེ། གནམ་ལ་ཁྲག་གི་ན་བུན་འཐིབས་ཤིང་ས་ལ་བྱེ་མའི་རྒྱ་མཚོ་འཕྱུར་བའི་གྱེན་ལོག་དམག་འཁྲུག་ཆེན་མོ་སྟེ།མིའི་རིགས་ལོ་རྒྱུས་ཀྱི་མཚམས་འབྱེད་རྡོ་རིང་ལྟ་བུའི་སི་པ་ཏ་ཁེའི་འོས་ལངས་ཆེན་མོ་འགོ་བརྩམས་སོང་བ་རེད། དོན་དམ་དུ་སི་པ་ཏ་ཁེ་ཞེས་པ་ནི་ཨར་ཀན་ཕྱེད་གླིང་ཤར་བྱང་གི་གང་ཟག་དཀྱུས་མ་ཞིག་གི་མིང་འདོགས་རེད་ལ།དོན་དམ་དུ་སི་པ་ཏ་ཁེ་ཞེས་པ་ནི་རོ་མ་བས་གྱད་དམག་རྭ་བ་ཞིག་ཏུ་བཙོང་བའི་བྲན་གཡོག་སྤྱིར་བཏང་བ་ཞིག་གི་འབོད་མིང་རང་རེད།  དོན་དམ་དུ་སི་པ་ཏ་ཁེ་ཞེས་པ་ནི་བྲན་གཡོག་ཡིན་པ་ནས་བྲན་གཡོག་མ་ཡིན་པ་དང་།རང་དབང་མེད་པ་ནས་རང་དབང་ཡོད་པ་དང་།སྡར་མ་སྙིང་ཆུང་ནས་དཔའ་བོ་རྟུལ་ཕོད་ཅན་དུ་འཕགས་པའི་གང་ཟག་སོ་སྐྱེས་ཤིག་གི་དྲང་བདེན་མཚན་བྱང་རེད། ཁོ་རང་འགྲོ་བ་མིའི་རིགས་ཀྱི་ལོ་རྒྱུས་ཀྱི་ཁ་རྒྱན་ལྟ་བུ་ཞིག་ཏུ་འགྲོ་དགོས་དོན་དང་།  ཁོ་རང་སྐྱེ་བོ་རྣམས་ཀྱི་སེམས་ཁོང་དུ་གཏན་ནས་ཡལ་བ་མེད་དོན་དང་།ཁོ་རང་དྲང་བདེན་འོས་ལངས་ཆེན་མོ་ཞིག་གི་བརྡ་དོན་རང་དུ་ཆགས་དགོས་དོན་ནི་ག་རེ་ཡིན་ནམ་ཞེ་ན།  སི་པ་ཏ་ཁེ་ལགས་ཀྱིས་དངོས་སུ་རང་ཉིད་ཀྱི་རྩ་དོན་ལ་བཞག་པའི་སྐད་ཆ་ཚིག་དུམ་གཅིག་པོ་འདིས་ཤེས་ཐུབ་སྟེ། ཇི་སྐད་དུ། ང་ཚོ་དབང་སྒྱུར་བའི་སྤྲོ་སྐྱིད་ཀྱི་དོན་དུ་འཆི་བ་ལས་རང་དབང་གི་ཆེད་དུ་དམག་འཁྲུག་བརྒྱབ་སྟེ་ཤི་བས་དགའ་ཞེས་པའོ།།སྤྱི་ལོ་སྔོན་གྱི་དུས་རབས་དེ་འདྲ་ཞིག་ལ་སི་པ་ཏ་ཁེ་ཡིས་ཤར་འདུལ་དང་བྱང་འཐབ་བྱས་ཤིང་། ནུབ་འགོག་དང་ལྷོ་སྐྱོད་བརྒྱབ་སྟེ། ཝེ་སུའུ་ཝེའི་མེ་རི་ཆེན་པོའི་ཀླད་ནས་སྐྱེ་བོ་རྣམས་རང་དབང་དང་འདྲ་མཉམ་གྱི་ཕྱོགས་སུ་ལམ་ཁྲིད་པ་ཡིན་ཞིང་།དེ་ནས་བཟུང་མི་སེར་བྱེ་བ་མང་བོའི་ཡིད་ཆེས་ཀྱང་ཁོང་གི་རྗེས་སུ་ཞུགས་སོང་བ་རེད། སྤྱི་ལོའི་རྗེས་ཀྱི་སྟོང་ལོ་འདི་འདྲ་ཞིག་ལའང་། སི་པ་ཏ་ཁེ་མི་སྒེར་ཡིན་ནའང་འདྲ།སི་པ་ཏ་ཁེའི་འོས་ལངས་ཆེན་མོ་ཡིན་ནའང་འདྲ།མིའི་རིགས་ལོ་རྒྱུས་ཀྱི་དོན་རྐྱེན་ཆེན་པོ་ཞིག་ཡིན་པར་ངེས་པ་རྙེད་དེ། ལ་ལས་དཔེ་དེབ་ཏུ་བྲིས། ལ་ལས་རི་མོ་ལ་ཕབ། ལ་ལས་གློག་བརྙན་དུ་བསྟན་པ་སོགས་བྱས་ཏེ་སྐྱེ་བོ་རེ་རེའི་སེམས་ཁོང་ལ་སི་པ་ཏ་ཁེ་གསོན་པོ་ཞིག་བརྐོ་བཞེངས་མཛད་པ་འདིར་ཇི་འདྲའི་རྒྱུ་མཚན་ཡོད་པ་ལ་ཨང་།༼ཁྲག་དང་བྱེ་མ༽ཞེས་པའི་གློག་བརྙན་འདི་ནི་ང་ཚོ་རྒྱུན་པར་བལྟ་དགའ་བའི་རྒྱོབ་རྒྱོབ་སོད་སོད་ཀྱི་འོད་འཁོར་རྫུན་མའི་གྲས་ལ་མ་འཇོག་ཀྱེ།  མི་ལ་གཤོག་པ་ཐོགས་ཤིང་ཤི་རྒྱུ་རྒས་རྒྱུ་མེད་པའི་ཆོ་འཕྲུལ་ཡ་མ་བརླའི་རིགས་ཀྱང་འདི་ན་ཨེ་ཡོད་མ་བསམ། ལར་འདི་ནས།གཤགས་པ་ཚལ་བ་དུམ་བུར་བྱེད་ཅིང་།བཅད་པ་རིལ་རིལ་ལོག་ལོག་ཏུ་གཏོང་།ཁྲག་རྒྱང་ངེར་བཞུར་ཞིང་།རྣ་ལྷབ་བེ་གཅོད་ལ།ནུ་མ་དཀར་ཆིལ་ལེ་གཏེད་ཅིང་།མིག་རིལ་ཚིལ་བུ་དང་བཅས་ཏེ་དབྱུང་བར་བྱེད་པ་ཞིག་ཡིན་པས།དེ་ཙམ་གྱིས་ཀྱང་ང་ཚོ་བོད་ཀྱི་ལྟད་མོ་མ་རིག་པའི་ལྟད་མོ་བ་དག་ཁ་གདངས་སྟེ་སྣབས་ལུག་ཏུ་འཇུག་སྲིད་མོད།གློག་བརྙན་རང་ངོས་ཀྱི་བསམ་བློ་དང་སྒྱུ་རྩལ་ནི་དེ་ཙམ་གྱི་ག་ལ་ཚད་དེ།མིའི་བག་ཞ་བའི་སྡོམ་དང་སྦལ་བ།འབུ་ནག་དང་ཤ་སྦྲང་ཡོངས་རྫོགས་འདི་ནས་བསྐྱུགས་ཙམ་ཞིག་གང་ནའང་བསྐྱུགས་མེད་ལ།མིའི་བག་ལ་ཞ་བའི་རི་མོ་དང་རོལ་མོ།བརྡ་དང་རྣམ་འགྱུར་སྣ་ཚོགས་འདི་ནས་གསལ་ཙམ་ཞིག་གང་ནས་ཀྱང་མི་གསལ་ལོ།། གློག་བརྙན་འདིས་རིང་བ་བསྐལ་བའི་གཏིང་ཕུག་གི་འོད་གསལ་མཚོན་ཡོད་ཅིང་།ཉེ་བ་འགྲོ་བའི་སེམས་ཁམས་ཀྱི་ཆག་འཇིག་སྦྲུམ་ཡོད་ལ།ས་གཞི་ཁ་འཁྱགས་གཏིང་འཁྱགས་ཀྱི་དར་ཐོག་ལ་རྐང་བ་བཙུགས་ཏེ། ཕྱིར་ཞིང་ཕྱིར་ཞིང་གྲུ་བཞི་གླིང་བརྒྱད་ལོ་རྒྱུས་སུ་འགྲེལ་ཞིང་།སྟེང་འོག་འཕྲེད་ཐུར་སྒྱུ་རྩལ་དུ་བསྟབས་སོང་ཡོད་པ་རེད།  

        གློག་བརྙན་འདིར་དགའ་བོ་ད་མཁན་དག་གིས།དྲ་བའི་སྟེང་ནས་འཚོལ་གཤེར་བགྱིས་ཚེ་དབྱིན་སྐད་དང་རྒྱ་ཡིག་ཤན་སྦྱར་ཅན་རྙེད་ཐུབ་པ་དང་།སི་པ་ཏ་ཁེའི་འོས་ལངས་ཆེན་མོའི་སྐོར་གྱི་གློག་བརྙན་བརྩམས་ཆོས་འདིས་འཛམ་གླིང་སྒང་ལ་ཐེབས་པའི་གཡོ་སྐྱོམ་སོགས་ལས་སླ་བོས་ཤེས་ཐུབ་པ་མ་ཟད།འདིར་བལྟས་པ་ཙམ་གྱིས་སྐྱེ་བོ་མང་བོའི་སེམས་ཁམས་ལ་རང་དབང་གི་མེ་སོན་སྦར་བྱུང་ཚུལ་དང་།དང་བོ་ནས་ཨ་རིའི་སྲིད་གཞུང་སོགས་ཀྱིས་གློག་བརྙན་བརྩམས་ཆོས་འདིར་བཟུང་བའི་ཞེད་སྣང་སོགས་ཀྱང་ཇི་བཞིན་དུ་མཐོང་བར་འགྱུར་རོ།།

                                                              ༢༠༡༢ལོའི<<མི་ཚེའི་འགན་འཁྲི>>ལས།