༼དུག་ཞགས།༽
----------སྤྱི་ཟླ་བཞི་བའི་ཚེས་གཅིག
༡
ཁ་སང་ནི་སྤྱི་ཟླ་བཞི་བའི་ཚེས་གཅིག་ཡིན་པ་དང་ཉི་མ་དེ་ནི་འཛམ་གླིང་གི་དུས་ཆེན་མང་གྲས་ཀྱི་གཅིག་ཡིན་པ་ཕལ་ཆེར་སུས་ཀྱང་ཤེས་ཀྱིན་ཡོད་པ་རེད།འོན་ཀྱང་ཤེས་བཞིན་དུ་གཡོ་འོག་ཏུ་ཚུད་འགྲོ་བའི་མི་དེ་དག་ནི་ངོ་མ་སྙིང་མ་རྗེ།སྤྱིར་ན་རྫུན་བཤད་པ་ནི་མི་ཐ་ཤལ་བ་དག་གི་སྤྱོད་པ་ཞིག་ཡིན་ཡང་དེ་ལ་ཆེད་དུ་དུས་ཆེན་ཞིག་དགོས་པ་ལ་རྒྱུ་མཚན་མེད་པ་ཞིག་ག་ལ་ཡིན།
དེའི་ཕྱིར་ཉི་མ་འདི་དམ་འཛིན་བྱེད་མཁན་གྱི་མི་གྲངས་འཛམ་གླིང་ཐོག་གི་བརྒྱ་ཆའི་དགུ་བཅུ་ཡན་ཟིན་འདུག་པ་འདྲ།
དེ་ཡིས་ཅི་ཞིག་མཚོན་ཐུབ་པ་ཡིན་ཟེར་ན་མིའི་རིགས་ཕྱིར་རྨོངས་པའི་ཕྱོགས་སུ་ཆས་པ་དང་སེམས་པ་ཡོངས་སུ་ཁ་དོག་ནག་པོ་ཞིག་གིས་ཁེབས་ཡོད་པ་མཚོན་ཡོད།ཁ་དོག་ནི་ཁ་དོག་རང་ཡིན་ཡང་།ངས་བརྗོད་པའི་ཁ་དོག་ནི་སེམས་ཀྱི་ཁ་དོག་ཅིག་ཡིན་པས་སྣང་མེད་དུ་བཞག་ན་ག་ལ་ཆོག།
༢
ནམ་ལངས་མ་ཐག་ནས་ཕན་ཚུན་བར་རང་ནུས་ཡོད་ཚད་ཕུད་ནས་བསླུ་བྲིད་བྱེད་གང་ཐུབ་དང་།ཁ་པར་སོགས་དེང་རབས་ཀྱི་འཕྲུལ་ཆས་དེ་དག་བཀོལ་ནས་རྫུན་སྨྲ་ཅི་ཐུབ་ཀྱི་ལུས་སུ་ཞུགས་ནས་ཁོམ་ལོང་ཞིག་ཡོད་པ་མ་རེད།གལ་ཏེ་ཉི་མ་འདི་ལ་སྟབས་མ་ལེགས་པར་རྫུན་བཤད་པའི་རྐྱེན་གྱིས་མི་ཞིག་ཤི་སོང་ན་ཁྲིམས་ལུགས་ཀྱིས་ཇི་ལྟར་ཐག་གཅོད་བྱེད་སྲིད། རྫུན་བཤད་མཁན་གྱི་མི་དེ་ལ་གནས་ལུགས་ཧ་ཅང་ཆེན་པོ་ཞིག་འདུག་པ་ཀུན་གྱིས་ལེ་ཤེས།དེ་ནི་རྫུན་བཤད་པའི་དུས་ཆེན་གྱི་ཉི་མ་ཡིན་པས་སོ།།
༣
ངས་ཁ་སང་གི་ཉི་མ་དེ་ལ་རྫུན་བཤད་ན་མི་འདོད།ཁྱོད་ཀྱིས་རྫུན་བཤད་ནས་ངའི་མགོ་བསྐོར་བར་ཁོང་ཁྲོ་ཡང་ལངས་སྲིད།ཡིན་ན་ཡང་ང་ལ་ཐབས་བཀོད་མི་འདུག ང་རང་ཁེར་རྐྱང་ཡིན་པས་གནས་ལུགས་ཀྱིས་ཀྱང་ང་རང་རྒྱང་ཕུད་གཏོང་གིན་ཡོད་པ་རེད།དོན་ངོ་མར་གནས་ལུགས་ཀྱིས་ང་རང་རྒྱང་ཕུད་བཏང་བ་མ་ཡིན་ལ་དེ་ནི་གནས་ལུགས་ཀྱིས་གནས་ལུགས་རྒྱང་ཕུད་བཏང་བ་རེད།ད་ལྟ་འཇིག་རྟེན་ལྟ་ཚུལ་ཀྱང་རྫུན་གྱིས་ཁེབས་པའི་སྐབས་འདིར་ང་ཚོར་དགོས་པ་ནི་རྫུན་གྱི་དུས་ཆེན་མ་ཡིན་པར་བདེན་གཏམ་རྐྱང་རྐྱང་བཤད་པའི་དུས་ཆེན་ཞིག་དང་ཡིན་གཅིག་མིན་གཉིས་གནས་ལུགས་བརྩི་དགོས་པའི་དུས་ཆེན་ཞིག་མིན་དོན་ཅི།
༤
མི་རྫུན་མ་དང་དངོས་པོ་རྫུན་མ་སོགས་རྫུན་ལ་རིགས་ཧ་ཅང་མང་བོ་ཡོད་པ་རེད།སྤྱིར་ན་རྫུན་མ་མེད་ན་དག་མ་མེད་པའི་བཤད་སྲོལ་ཡོད་ཀྱང་དེང་དུས་རྫུན་མ་མང་བ་ཚབས་ཆེ་ལ་དག་མ་ནི་དཀོན་མོའི་ནང་གི་དཀོན་མོ་ཡིན་འདུག
དེའི་ཕྱིར་དེ་རིང་གི་ཉི་མ་འདི་ལ་རྫུན་བཤད་ནས་མི་ཞིག་གཡོ་འོག་ཏུ་ཚུད་པར་བྱས་པ་ནི་དོན་ངོ་མར་ཁྱོད་ཀྱིས་རང་ཉིད་རྫུན་མ་ཡིན་པ་ར་སྤྲད་པ་རེད།
ཁྱོད་ཀྱིས་རང་ཉིད་མི་རྫུན་མ་ཞིག་ཡིན་པ་ཁྱབ་བསྒྲགས་བྱས་པ་རེད།
༥
གལ་ཏེ་དེ་རིང་བཞི་བའི་ཚེས་ཉེར་གསུམ་ཡིན་ན།དེ་ནི་འཛམ་གླིང་གི་དཔེ་ཀློག་དུས་ཆེན་ཡིན་ལ་འཛམ་གླིང་ཐོག་གི་མི་གྲངས་ཕྱེད་ཀ་ཙམ་གྱིས་ཤེས་སམ།འདི་ལྟར་མི་མང་བོ་ཞིག་ཁོམ་ལོང་མེད་པར་དུས་ཆེན་དེ་རོལ་བ་མཐོང་ཚེ།གནས་ལུགས་ཀྱང་ཤུགས་ཆེན་པོས་འབར་སྲིད་པ་ཐེ་ཚོམ་མེད་ཀྱང་ཉི་མ་དེ་ནི་ཧ་ཅང་ལྷིང་འཇགས་ངང་བཞུར་འགྲོ་བ་བཤད་མ་དགོས། དེའི་ཕྱིར་ང་ཁ་སང་ལ་སུན་གྱིན་ཡོད།
སྤྱི་ལོ༢༠༡༠ལོའི་ཟླ༤བའི་ཚེས༢༣ཉིན་དཔྱི་ཁོག་ནས།
མི༢༠༡༢ལོའི<<མི་ཚེའི་འགན་འཁྲི>>ལས།
|