བླ་མ་སྐྱབས།
མཛེས་སྡུག་སྟོང་གིས་བྱུགས་པའི་སུམ་རྩེན་གཉིས་བ།།
པིར་གྱིས་འཁྱུག་འགྲོས་ངོམ་འདྲའི་དྲི་ཟའིཡུལ་མཆོག།
དགའ་ཞིང་ཡུལ་དུ་འབོད་པའི་ཕ་ཡུལ་མགོ་ལོག།
ཀུན་ཀྱིས་སྨོན་སེམས་ཤོར་སའི་གླིང་གི་ཕ་ས།།
སྒོ་ཕྱུགས་རྟ་ནོར་ལུགས་གསུམ་འཕེལ་ཀ་རྒྱས་ཤིང༌།།
རིན་ཆེན་གཏེར་མཛོད་སྨན་སྣའི་ཐོན་ཁུངས་འཛོམས་ལ།།
གངས་དཀར་ལྷུན་པོའི་རྩེ་མོ་དགུང་ལ་ཟུག་ས།།
གཞོན་སྐྱེས་ང་ཡི་སྐྱིད་པའི་ཕ་ས་ཕ་ཡུལ།།
གནའ་དེང་ཟུང་གི་རིག་གནས་རྒྱུད་འཛིན་བྱས་ཤིང༌།།
རང་རིགས་སྲོལ་རྒྱུན་བཟང་བོ་གཙུག་ཏུ་བཀུར་ཞིང༌།།
མཐུན་སྒྲིལ་གསེར་གྱི་ཐག་པ་དམ་དུ་སྦྲེལ་ས།།
སློབ་ཕྲུག་ང་ཡི་སྐྱིད་པའི་རུ་སྡེ་ཕྱུག་མོ།།
བསྟོད་ཚིག་མེ་ཏོག་ཕྲེང་མཛེས་མཁའ་ལ་གཏོར་ཞིང༌།།
སྙན་པའི་དབྱངས་རྟ་ཕྲ་མོ་ངག་གིས་འགུག་བཞིན།།
མཛེས་སྡུག་ཡིད་དུ་འོང་བའི་རྨ་ཡུལ་མགོ་ལོག།
ཨེ་མ་བདག་གི་ཕ་ཡུལ་འདི་ལྟར་བསྔགས་སོ།།
གྱེས་བྲལ་གྱི་རྨ་ཁ།
བརྩེ་བའི་སྙིང་གཏམ་དྲོད་མོའི་ཚིག་གི་མགོ་རྐང་བསྒྲིགས་སའི་རི་གྲོང་དང་གྱེས་ཏེ།།
མ་འོངས་ཁོ་མོའིཕུགས་འདུན་གྱི་ཆེད་དུ་རྒྱང་རིང་ཡུལ་ཕྱོགས་ལ་གཏད་ནས།།
གྱེས་བྲལ་ཟེར་བའི་ཐ་སྙད་བཙན་པོ་དམར་ཆུང་སྙིང་གི་ཟབ་ས་རུ་བསྒོམ་བཞིན།།
ཆུང་འདྲིས་སེམས་རྩ་གཉོམ་པོ་བསྐྱུར་ནས་རི་ཆུ་སྟོང་གི་ཕ་རོལ་ལ་ཆས་སོང༌།།
ཁ་སང་གསང་བའི་སྐད་ལམ་བརྒྱུད་ནས་རེ་སྒུག་དམ་བཅའི་དབུ་ཁྱུད་དེ་བྲིས་ཤིང༌།།
དེ་རིང་གྱེས་བའི་སྐྱོ་གར་ཁྲོད་ནས་མིག་ཆུའི་བཞུར་རྒྱུན་རྨ་ཀླུང་ལ་འདྲེས་དུས།།
ལྷམ་འཛོམས་སྐལ་བ་ནམ་ཡོད་བསམ་བཞིན་སྐྱབས་གསུམ་ལྷ་ལ་སྨོན་ལམ་དེ་བཏབ་ནས།།
ཉམ་ཆུང་ཚིག་གི་འོ་དོད་འདོན་བཞིན་སུན་སྣང་ཁྲོད་ནས་དངན་པ་རེ་ཤོར་སོང༌།།
སྟོན་མཇུག་སྡོང་ལོ་སེར་པོ་ངེས་མེད་རླུང་བུས་གཏུག་རྩུབ་རྒོད་པོ་ཡིས་གཏོར་ཞིང༌།།
ཁ་ཆར་བུ་ཡུག་འཚུབ་མས་ཁེར་རྐྱང་བུ་ལོའི་སེམས་ལ་གྲང་ཤ་རེ་སྦྱིན་དུས།།
རེ་བའི་འདུན་མ་ཞིག་གི་ཆེད་དུ་ཆས་པའི་རྒྱང་བཞུད་ཁྱེད་རིང་ནི་དྲན་ནས།།
སེམས་པའི་ཕྱི་ནང་ཀུན་ཏུ་བཅོས་མེད་སྡུག་གི་རྨ་ཁ་ཟབ་མོ་ཞིག་བཟོས་བྱུང་།།
འོན་ཏེ་ཁྱེད་ཀྱིས་བཞག་པའི་མི་འགྱུར་དམ་བཅའ་བརྟན་པོ་སྙིང་ཁོང་ལ་ཉར་ཞིང༌།།
འུ་གཉིས་འགྲོགས་སའི་རི་གྲོང་འདི་ནས་གཏན་དུ་བརྩེ་ལྡན་ཁྱེད་རང་ལ་བསྒུག་བཞིན།།
དྲན་འཛིན་བདག་མོའི་དུང་གཏམ་སྨྱུག་རྩེའི་འཁྱུག་འགོས་ཁྲོད་ནས་ཤོག་ངོས་ལ་ཕབ་ནས།།
རྒྱང་རིང་ཡུལ་གྱི་ཁྱོད་ལ་གྱེས་བྲལ་གདུང་བའི་གསང་འཕྲིན་འདི་བསྐུར་བྱུང་།།
མ་ཡུམ་སློབ་གླིང་།
ཨ་མྱེས་ཁྱུང་མགོན་འདབས་ཀྱི་གྲོང་ཚོ་ན།།
ཀ་ཁའི་དབྱངས་རྟ་སྙན་མོ་ཕྱོགས་བཞིར་ཁྱབ།།
མཐུན་སྒྲིལ་ལག་རྡང་སྦྲེལ་བའི་སློབ་གྲོགས་ཚོས།།
བརྩོན་པ་རྒྱུན་ཆད་མེད་པར་འབད་བཞིན་མཆིས།།
རྨ་ཀླུང་སྔོན་པོ་བཞུར་བའི་གཡས་རོལ་ན།།
མི་རིགས་མཐུན་སྒྲིལ་གླེང་བའི་ལ་རྒྱ་བ།།
ཕ་སྐད་གཙང་མ་བཤད་པའི་བཤེས་གཉེན་ཚོས།།
རང་རེའི་རིགས་ལ་ཞབས་འདེགས་ཞུ་བཞིན་ཡོད།།
ཕྱོགས་བཞི་གྱང་གིས་བསྐོར་བའི་སློབ་གླིང་འདིར།།
ཕྱོགས་བཞི་མཚམས་བརྒྱད་སློབ་མ་ཡོངས་འདུས་ནས
ལྔ་ཟུང་ཤེས་བྱའི་གནས་ལ་བརྩོན་བཞིན་དུ།།
མ་འོངས་གངས་རིའི་བདེ་སྡུག་བསམ་བཞིན་ཡོད།།
བུ་ཕྲུག་གཉོམ་ལག་རྒྱས་པའི་ཕ་ཁྱིམ་འདིར།།
ལྷག་བསམ་འོ་མ་དཀར་བའི་གཤེས་གཉེན་དང་།།
བརྩོན་པ་ཆུ་རྒྱུན་འདྲ་བའི་སློབ་བུ་ཚོས།།
ཁ་བ་ཅན་གྱི་ལ་རྒྱ་འཛིན་བཞིན་ཡོད།།
ངེད་དྲ་བ།
|