ཚེ་རིང་སྟོབས་ལྡན
སྨུག་སྤྲིན་ལང་ལོང་འཁྲིགས་བའི་སྦྲིན་ནག་གི་གསེབ་ནས།།
རྟ་བདུན་དབང་བོའི་འཛུམ་ཟེར་དྲོད་ཁོལ་གྱིས་བྱོན་ན།།
བྱམས་ལྡན་དྲིན་ཅན་མ་ལོའི་འཇམ་མཉེན་གྱི་ལག་པའི།།
ཁོ་བོའི་མགོ་ལ་བྱིལ་བྱིལ་གནང་བ་དེ་དྲན་བྱུང།།
གློག་འོད་ཆེམ་ཆེམ་རྒྱུ་བའི་གྲོང་ཁྱེར་གྱི་དབུས་སུ།།
སོས་དལ་བག་ཕེབས་བདེ་དགའི་འོ་འཚོ་དེ་མེད་པས།།
དྲིན་ཅན་མ་ལོ་བཞུགས་ལའི་སྦྲ་ནག་གི་ཕུགས་སུ།།
འགྲོ་འདོད་འདེན་པ་དྲག་པོ་དབང་མེད་དུ་སྐྱེས་བྱུང་།།
འཁྱག་བསིལ་ནམ་ཟླ་སྡུག་པོའི་དྲག་ཆར་གྱི་ཁྲོད་ནས།།
ཁེར་རྐྱང་འདབ་རྫབ་བར་གྱི་དཀའ་སྡུག་དེ་བསམ་ན།།
བསྐྱམས་པའི་རྨ་ཆུ་ལི་མའི་འགྲམ་རྒྱུད་ཀྱི་གྲོང་ནས།།
མ་བཙུར་མིག་ཆུའི་ཐིགས་པ་ཆུ་རྒྱུན་ལ་འདས་སོང་།།
སྟོན་གྱི་སྡོང་ལོ་འཐོར་ལའི་མྱ་ངན་གྱི་ཀློང་ནས།།
ཁུ་བྱུག་རྒྱང་ལ་འཕུར་བའི་སྟ་གོན་དེ་མཐོང་ན།།
ལག་པའི་འགྲམ་པ་བསྐྱོར་བའི་ངང་ཚུལ་དེའི་ཁྲོད་ནས།།
སུན་སྣང་ལུས་ལ་འདྲེས་པའི་བཟོ་ལྟ་ཞིག་ཐོན་བྱུང་།།
འཛིན་མའི་ཁ་དོག་འགྱུར་བའི་སྐྱོ་གདུང་གི་ལོ་ཟླ།།
མ་ལོའི་ལྷག་བསམ་དྲན་པའི་མིག་ཆུ་ཡི་གཏམ་རྒྱུད།།
དགོང་ཁའི་མཚམས་སྤྲིན་དམར་པོའི་འགྲུལ་བཞུད་དང་ལྷན་དུ།།
དྲིན་ཅན་མ་ལོར་ཐེངས་གཅིག་འཇལ་ན་རང་བསམ་བྱུང་།།
ངེད་དྲ་བ།
|