གླིང་སྒྲུང་གཅེས་བཏུས།
«གླིང་གེ་སར་རྒྱལ་པོའི་སྒྲུང»ནི་བོད་མི་རིགས་ཀྱིས་བསྐྲུན་པའི་རླབས་ཆེ་བའི་དཔའ་བོའི་སྙན་རྩོམ་རིང་མོ་ཞིག་ཡིན་ལ། དེའི་ལོ་རྒྱུས་ཀྱི་རྒྱུན་རིང་ཞིང་གཏམ་རྒྱུད་ཀྱི་རྫོངས་མཐུག་ལ་གནའ་བོའི་བོད་མི་རིགས་ཀྱི་དམངས་ཁྲོད་རིག་གནས་ཀྱི་གྲུབ་འབྲས་གལ་ཆེན་ཞིག་ཡིན། སྤྱི་ལོ1983ལོར་རྒྱལ་ཁབ་ཀྱིས་ལོ་རྒྱུས་སྙན་རྩོམ་རིང་མོ«གླིང་གེ་སར་རྒྱལ་པོའི་སྒྲུང»འཚོལ་བསྡུ་ལེགས་སྒྲིག་བྱེད་པ་དེ་རྒྱལ་ཁབ་ཀྱི་ཚན་རིག་ཞིབ་འཇུག་གི་རྣམ་གྲངས་གཙོ་བོར་བཞག སྤྱི་ལོ2013ལོའི་ཟླ8པའི་ཟླ་མཇུག་ཏུ་རིག་གནས་པ་དང་ཞིབ་འཇུག་པ་མི་རབས་འགའ་ཡིས་མཉམ་དུ་འབད་བརྩོན་བྱས་པར་བརྟེན་ནས། བོད་ཡིག་གི«གླིང་སྒྲུང་གཅེས་བཏུས»(པོད40)ལེགས་སྒྲིག་པར་སྐྲུན་བྱེད་པའི་བྱ་བ་ལེགས་འགྲུབ་བྱུང་ཞིང་། དུས་ཡུན་ཏག་ཏག་ལོ་ངོ30འགོར།
གསར་འགོད་པ་ཀྲུང་གོ་སྤྱི་ཚོགས་ཚན་རིག་ཞིབ་འཇུག་གླིང་གི་ཞིབ་འཇུག་པ་འཇམ་དཔལ་རྒྱ་མཚོའི་སྡོད་ཡུལ་དུ་སླེབས་སྐབས་ཁོང་དགའ་སྤྲོས་ཁེངས་ཤིང་། གླིང་སྒྲུང་གཅེས་བཏུས་ཀྱི་ལས་གཞིའི་འགན་ཁུར་མི་སྣ་དང་གཙོ་སྒྲིག་པ་ཡིན་པའི་ཆ་ནས། ཁོང་གིས་འདི་ནི་རང་རྒྱལ་གྱི«གླིང་གེ་སར་རྒྱལ་པོའི་སྒྲུང»གི་ལས་དོན་ཐད་ནས་རྡོ་རིངས་ལྟ་བུའི་དོན་སྙིང་ལྡན་པའི་གྲུབ་འབྲས་ཤིག་ཡིན་ལ། དེ་ནི་ཀྲུང་ཧྭ་མི་རིགས་ཐུན་མོང་གི་རིག་གནས་ཀྱི་རྒྱུ་ནོར་དང་བསམ་པའི་ལོངས་སྤྱོད་ཡིན་ཞེས་ཟེར།
གླིང་སྒྲུང་གཅེས་བཏུས་དེར་བསྡོམས་པས་པོད40ཡོད་པ་དང་དེབ51ཡོད། པོད་ལ་ལར་སྟོད་ཆ་དང་སྨད་ཆ། ཡང་ན་སྟོད་ཆ་དང་བར་ཆ། སྨད་ཆ་གསུམ་ཡོད་ལ། བར་བཅུག་རི་མོ་སུམ་བརྒྱ་དང་དྲུག་ཡོད་པ་དང་སྙན་ཚིག་རྐང་བ་འབུམ་དྲུག་ཙམ་ཡོད་ཅིང་། དེབ་ཀྱི་ཁ་གྲངས་དང་ཡིག་གྲངས་གཉིས་ཀྱི་ཆ་ནས་སྔོན་གྱི་འཆར་གཞི་ལས་བརྒལ་ཡོད།
|