༧ལོ་རེའི་བོད་ཟླ་བཅུ་བའི་ཚེས་ཉེར་ལྔ་ཉིན་ནི་བདག་ཅག་གི་དཔལ་ལྡན་བླ་མ་དམ་པ་ཁམས་གསུམ་ཆོས་ཀྱི་རྒྱལ་པོ་འཇམ་མགོན་བླ་མ་ཙོང་ཁ་བ་ཆེན་མོ་དགོངས་པ་ཆོས་ཀྱི་དབྱིངས་སུ་ཞི་བར་གཤེགས་པའི་དུས་ཆེན་ཡིན་པས་རང་ཅག་བུ་སློབ་རྣམས་ཀྱིས་རྗེ་༧ཙོང་ཁ་བ་ཆེན་མོ་རྗེས་དྲན་གྱི་ཆེད་གླིང་མེ་༼ གླིང་བར་དུ་སྒྲོན་པའི་མཆོད་མེ་༽འབུལ་བ་དང་འབྲེལ་བར་སྡིག་སྤོང་དགེ་སྒྲུབ་ལ་འབད་ན་བསོད་ནམས་དཔག་ཏུ་མེད་པ་འཐོབ་པས་དེ་དོན་ཐུགས་ལ་འཇོག་པར་ཞུ།

    རྗེ་ཙོང་ཁ་པ་ཆེན་པོ་བློ་བཟང་གྲགས་པ་ནི་བོད་རབ་བྱུང་དྲུག་པའི་མེ་བྱ་ཕྱི་ལོ་༡༣༥༦ལོར་མདོ་སྨད་སའི་ཆ་ཤར་ཙོང་ཁའི་ཡུལ་ཏེ་དེང་གི་མཚོ་སྔོན་ཞིང་ཆེན་གྱི་ཁོངས་སྐུ་འབུམ་དགོན་པ་ཆགས་ཡུལ་དེར་ཡབ་ད་ར་ཁ་ཆེ་ཀླུ་འབུམ་དགེ་དང་ཡུམ་ཤིང་བཟའ་ཨ་ཆོས་གཉིས་ཀྱི་སྲས་སུ་སྐུ་བལྟམས། དགུང་ལོ་གསུམ་ལ་བཞེས་སྐབས་ཀརྨ་རོལ་བའི་རྡོ་རྗེ་ལས་དགེ་བསྙེན་གྱི་སྡོམ་པ་བཞེས་ཤིང་མཚན་ལ་ཀུན་དགའ་སྙིང་པོ་ཞེས་གསོལ། དགུང་ལོ་བདུན་པར་ཆོས་རྗེ་དོན་གྲུབ་རིན་ཆེན་པས་མཁན་པོ་མཛད་པ་དང་། ཏ་དབེན་གཞོན་ནུ་སེང་གེའི་སློབ་མ་གཞོན་ནུ་སེང་གེའི་སློབ་མ་མཛད་དེ་དགེ་ཚུལ་གྱི་སྡོམ་པ་བཞེས་ནས་མཚན་བློ་བཟང་གྲགས་པ་ཞེས་གསོལ། དགུང་ལོ་བཅུ་དྲུག་ལ་སོན་སྐབས་ཆབ་མདོ་བརྒྱུད་དབུས་སུ་ཕེབས། དགུང་ལོ་བཅུ་བདུན་པའི་སྟེང་དབུས་སུ་བྱོན་ནས་ཚལ་གུང་ཐང་དུ་དཀོན་མཆོག་སྐྱབས་ཀྱི་དྲུང་ནས་སྨན་དཔྱད་ཡན་ལག་བརྒྱད་པའི་གཞུང་ལ་སྦྱང་བ་གནང་། ཆུ་གླང་ཕྱི་༡༣༧༣ལོའི་སྟོན་དུས་འབྲི་གུང་མཐིལ་དུ་ཕེབས་ནས་སྤྱན་སྔ་ཆོས་ཀྱི་རྒྱལ་པོ་མཇལ་ཞིང་། ཐེག་ཆེན་སེམས་བསྐྱེད་སོགས་ཞུ་གནང་མཛད། དགུང་ལོ་བཅུ་དགུ་པར་གསང་ཕུའི་གླིང་སྟོད་ཆོས་གྲྭར་ཞུགས་ནས་ཕར་ཕྱིན་གྲྭ་སྐོར་མཛད། དགུང་ལོ་ཉི་ཤུ་རྩ་གཅིག་པར་གཙང་ཕྱོགས་སུ་ཕེབས་ནས་ཉ་དབོན་ཀུན་དགའ་དཔལ་བཟང་དང་། ཆོས་རྗེ་ཕྱོགས་ལས་རྣམ་རྒྱལ། མ་ཏི་པཎ་ཆེན་བློ་གྲོས་རྒྱལ་མཚན། རྗེ་བཙུན་རེད་མདའ་བ་གཞོན་ནུ་བློ་གྲོས། རྗེ་བཙུན་ཆོས་ཀྱི་དཔལ་བ། ས་སྐྱ་བསོད་ནམས་རྒྱལ་མཚན། སྣར་ཐང་ལོ་ཙཱ་པ་སོགས་བསྟེན་ནས་གཞུང་ཕར་ཚད་སོགས་དཔྱིས་ཕྱིན་པ་གསན་སྦྱོང་མཛད་པས་མཁས་པའི་གྲགས་པ་ཐོབ། དགུང་ལོ་ཉེར་ལྔའི་ཐོག་ཕར་ཕྱིན་ཊཱིཀྐ་མཛད། དགུང་ལོ་ཉི་ཤུ་རྩ་བདུན་པར་ཡར་ལུང་དུ་ཕེབས་ནས་མཁན་ཆེན་དཀའ་བཞི་ཚུལ་ཁྲིམས་རིན་ཆེན་གྱི་དྲུང་ནས་བསྙེན་རྫོགས་ཀྱི་སྡོམ་པ་བཞེས།རྩེད་ཐང་གི་ཆོས་གྲྭར་ཞུགས་ནས་དཀའ་ཆེན་བཞིའི་གྲྭ་སྐོར་གནང་། དགུང་ལོ་ཉེར་དགུ་པར་ལྷ་སར་ཕེབས་ཏེ་ཚལ་གུང་ཐང་དུ་བཀའ་འགྱུར་ཞིབ་གཟིགས་གནང་། དགུང་ལོ་སོ་བརྒྱད་ཐོག་རྫིང་ཕྱིའི་བྱམས་པ་ཞིག་གསོ་མཛད། དགུང་ལོ་སོ་དགུ་པར་གཉལ་སྡོད་རབ་གྲོང་དུ་དཀའ་བཅུའི་གྲྭ་སྐོར་མཛད། དགུང་ལོ་ཞེ་དྲུག་ཐོག་རྭ་སྒྲེང་དུ་བྱང་ཆུབ་ལམ་རིམ་ཆེན་མོ་དང་། དགུང་ལོ་ཞེ་དགུར་སྔགས་རིམ་ཆེན་མོ་སོགས་མཛད། དགུང་ལོ་ང་གསུམ་སྟེང་ཆོ་འཕྲུལ་སྨོན་ལམ་ཆེན་མོའི་སྲོལ་བཏོད། འབྲོག་རི་བོ་དགའ་ལྡན་ཕྱག་བཏབ། དགུང་ལོ་ང་དགུ་པར་དགའ་ལྡན་ཡངས་པ་ཅན་གྱི་རྨང་བཏིངས། འགྲེལ་བ་བཞི་སྦྲགས་མཛད། དགུང་ལོ་རེ་གཅིག་ཐོག་དགའ་ལྡན་ཡངས་པ་ཅན་རྟེན་དང་བརྟེན་པར་བཅས་པར་གྲུབ་པའི་རབ་གནས་མཛད་པ་སོགས་གྲུབ་མཐའ་ཀུན་ལ་རིས་མེད་ཀྱིས་སློབ་གཉེར་མཛད་ནས་ཕྱི་རུ་ཉན་ཐོས་ཀྱི་སྤྱོད་པ་ཞི་ཞིང་དུལ་བ་དང་། ནང་དུ་རིམ་གཉིས་ཀྱི་རྣལ་འབྱོར་ལ་གཞོལ་བའི་ལྟ་སྤྱོད་གཙང་མའི་ལུགས་བཟང་སྤེལ་ཏེ་གངས་ཅན་སྐྱེ་འགྲོ་ཀུན་གྱིས་གཙུག་ཏུ་བཀུར་ཞིང་མཐའ་དབུས་སྐྱེ་འགྲོ་ཀུན་གྱིས་གུས་ཤིང་བཏུད་པའི་གནས་སུ་གྱུར། ཆོ་འཕྲུལ་སྨོན་ལམ་དང་དགའ་ལྡན་སྒྲུབ་མཆོད་ཆེན་མོ། གཉལ་གྱི་ལུང་ར་ཆེན་མོ། རྫིང་ཕྱིའི་བྱམས་པ་ཞིག་གསོ་བཞི་ནི་རྗེའི་མཛད་ཆེན་བཞིར་གྲགས། མཐར་དགུང་གྲངས་རེ་གསུམ་པ་རབ་བྱུང་བདུན་པའི་ས་ཕག་ཕྱི་ལོ༡༤༡༩ལོའི་ཟླ་བཅུ་པའི་ཚེས་ཉེར་ལྔ་ཉིན་ལ་གཟིམ་ཁང་འོད་སྦུག་ཏུ་སྐུ་མྱ་ངན་ལས་འདས། གསུང་འབུམ་པོད་བཅུ་དགུ་བཞུགས།

         燃灯节今天是农历十月二十五日，是藏传佛教格鲁派创始人宗喀巴大师的圆寂日、格鲁派寺院为纪念大师把这一天定为燃灯节。燃灯节万供法会也是藏传佛教格鲁派寺院的重大节日。宗喀巴（1357___1419)藏传佛教格鲁派的创立者，（公元1419年10月25日）享年63岁。