«མཁས་དབང་མི་ཉག་མགོན་པོའི་གསུང་རྩོམ་ཕྱོགས་བསྒྲིགས»།
ཚོགས་ཞུགས་མི་སྣའི་མཉམ་པར།
མཁད་དབང་མི་ཉག་མགོན་པོ།
2013ལོའི་ཟླ 11 པའི་ཚེས29ཉིན་གྱི་སྔ་དྲོ། ༼ བོད་ཡིག་དཔེ་རྙིང་སྲུང་སྐྱོབ་དང་མཁས་དབང་མི་ཉག་མགོན་པོའི་གསུང་རྩོམ་ཕྱོགས་བསྒྲིགས་པར་བསྐྲུན་དཔྱད་གླེང་ཚོགས་འདུ ༽ པེ་ཅིན་མི་རིགས་རིག་གནས་ཕོ་བྲང་དུ་བསྡུས། ཀྲུང་གོའི་བོད་རིག་པ་ཞིབ་འཇུག་ལྟེ་གནས་དང་། ཀྲུང་དབྱང་མི་རིགས་སློབ་གྲྭ་ཆེན་མོ། མི་རིགས་དཔེ་སྐྲུན་ཁང་། ཀྲུང་དབྱང་མི་དམངས་ཀུན་ཁྱབ་རླུང་འཕྲིན་ལས་ཁུངས། རྒྱལ་ཁབ་མི་རིགས་ཡིག་སྒྱུར་ལྟེ་གནས་སོགས་ལས་ཁུངས་ཁག་གི་བོད་རིག་པའི་ཞིབ་འཇུག་པ་དང་མགོ་ཁྲིད། མཁས་དབང་མི་ཉག་མགོན་པའི་ཁྱིམ་མི། ལས་གྲོགས་སོགས་མི་སྣ་སུམ་ཅུ་ལྷག་ཐེངས་འདིའི་གྲོས་ཚོགས་སྟེང་དུ་ཞུགས་ཡོད།
མཁས་དབང་མི་ཉག་མགོན་པོ་མཆོག་ནི1923ལོར་སྐུ་འཁྲུངས་ཤིང་། གངས་དཀར་རྡོ་རྗེ་འཆང་བླ་མ་སྐུ་ཕྲེང་ལྔ་བ་ཀརྨ་བཤད་སྒྲུབ་ཆོས་ཀྱི་སེངྒེའི་མདུན་དུ་བོད་ཀྱི་རིག་པའི་གནས་ལ་གསན་སྦྱངས་མཐིལ་ཕྱིན་བྱས། སྔ་ཕྱིར་ལྷོ་ནུབ་མི་རིགས་སློབ་གླིང་དང་། ཀྲུང་དབྱང་མི་རིགས་སློབ་གླིང་། རྒྱལ་ཁབ་མི་རིགས་ཡིག་བསྒྱུར་ལྟེ་གནས། མི་རིགས་རིག་གནས་ཕོ་བྲང་སོགས་སུ་དགེ་རྒན་དང་། ཡིག་སྒྱུར། རིག་གཞུང་ཞིབ་འཇུག་སོགས་ཀྱི་ཕྱག་ལས་གནང་། ཁོང་གིས་མི་ཚེ་གང་པོར་ཞི་དུལ་བག་ཡོད་ཀྱིས་རིག་གཞུང་ཞིབ་འཇུག་ལ་འབད་པ་ལྷོད་མེད་མཛད་པ་དང་། ལྷག་ཏུ་བོད་ཡིག་དཔེ་རྙིང་ལེགས་སྒྲིག་ཐད་བྱས་རྗེས་བླ་ན་མེད་པ་བཞག་ཡོད། ཐེངས་འདིར་པར་སྐྲུན་བྱས་པའི༼ མཁས་དབང་མི་ཉག་མགོན་པོའི་གསུང་རྩོམ་ཕྱོགས་བསྒྲིགས ༽ནི་སྐུ་ཞབས་ཁོང་ཉིད་ཀྱིས་ལོ་ངོ་བཞི་བཅུ་ལྷག་རིང་ལ་དཀའ་སྤྱད་འབད་འཐབ་དང་བོད་རིག་པར་ཞིབ་འཇུག་གནང་བའི་གྲུབ་འབྲས་བཟང་བོ་དང་བོད་རིག་གནས་འཛིན་སྐྱོང་སྤེལ་གསུམ་ཁྲོད་ཀྱི་གསུང་རྩོམ་གཙོ་བོ་དག་ཕྱོགས་བསྡུས་བྱས་པ་དང་། ཀྲུང་གོའི་མི་རིགས་དཔེ་མཛོད་ཁང་གིས་ལེགས་བསྒྲིགས་བྱས་ཤིང་། ད་ལོའི་ཟླ་ལྔ་བར་ཀྲུང་གོའི་བོད་རིག་པ་དཔེ་སྐྲུན་ཁང་ནས་པར་སྐྲུན་འགྲེམ་སྤེལ་བྱས། དེབ་འདིའི་ནང་༼གངས་ཅན་མཁས་དབང་རིམ་བྱོན་གྱི་རྣམ་ཐར་མདོར་བསྡུས་བདུད་རྩིའི་ཐིགས་ཕྲེང་།༽དང༼འབོ་གངས་དཀར་སྤྲུལ་སྐུའི་རྣམ་ཐར་དད་པའི་པད་དཀར།༽༼བོད་ཀྱི་ལུས་སྦྱོང་རིག་པ་སྨན་གྱི་ལྗོན་པ།༽དང་རིག་གཞུང་དཔྱད་རྩོམ་སྐོར་ལ༼བཀའ་དང་བསྟན་བཅོས་འགྱུར་རོ་ཅོག་བོད་དུ་བྱུང་བའི་ཚུལ་མདོ་ཙམ་བརྗོད་པ།༽༼བོད་ཀྱི་ལོ་རྒྱུས་རིག་པའི་ནང་མི་ཉག་གི་གནས་ཚུལ་དང་མི་ཉག་སྐོར་གྱི་མིང་ཚིག་འགར་དཔྱད་པ།༽བཅས་བདམས་བཀོད་བྱས་ཡོད།
ཐེངས་འདིའི་ཚོགས་འདུ་ནི་ཀྲུང་གོའི་མི་རིགས་དཔེ་མཛོད་ཁང་གིས་གཙོ་སྐྱོང་གནང་བ་དང་། ཚོགས་ཐོག་ཏུ་དཔེ་མཛོད་ཁང་གི་བོད་ཡིག་དཔེ་རྙིང་ལེགས་སྒྲིག་དང་དཀར་ཆག ཞིབ་འཇུག་གི་འབྲས་བུའི་དཔེ་ཆ་སྣ་ཚོགས་འགྲེམས་སྟོན་བྱས།
|