༼ཨ་མདོ་རྔ་བའི་ས་ཆར་ཇོ་བོ་བྱིན་ཅན་སྤྲོ་ཚུགས་ཇོ་བོ་ད་སྐབས་སྒོ་མང་དགོན་པའི་ཚོགས་ཆེན་འདུ་ཁང་ཡང་ཐོག་ཏུ་བཞུགས།
མཚམས་རིང་ཇོ་བོ་ད་སྐབས་མཚམས་རིང་སྡེ་བའི་ཁྱིམ་ཚང་ཞིག་གི་མཆོད་ཁང་ནང་ དུ་བཞུགས། གཡག་རི་ཇོ་བོ་སྣ་ཤུལ་སྡེ་བའི་སྒང་ཐོག་ཏུ་ལྷ་ཁང་ཞིག་ཏུ་བཞུགས།
ཨ་ལྗོངས་ཇོ་བོ་ད་སྐབས་ཨ་ལྗོངས་སྡེ་བའི་ཁྱིམ་ཚང་ཞིག་གི་མཆོད་ཁང་དུ་བཞུགས།༽ངག་རྒྱུན་དུ་ཇོ་བོ་འདི་དག་ལ་མ་མཇལ་བར་དབུས་ཀྱི་ཇོ་བོར་མཇལ་བ་ནི་གོས་ཀྱི་གོང་བ་མེད་པ་དང་འདྲ་བར་བཤད་པས་ལྷ་སར་མཇལ་སྐོར་དུ་མ་སོང་སྔོན་ཇོ་བོ་འདི་དག་དང་ཁྲོ་སྐྱབས་ཐུགས་རྗེ་ཆེན་པོ་སོགས་ལ་མཇལ་ཚར་བ་བྱེད་པ་རེད།
༄༅། །རྒྱལ་ཀུན་རབ་གཅིག་མཁྱེན་གཏེར་གཞོན་ནུ་དང་།
།ཡུམ་གཅིག་འཕྲིན་ལས་ཀུན་བདག་རྗེ་བཙུན་མ། །དབྱེར་མེད་སྐྱབས་ཀུན་སྤྱི་གཟུགས་བླ་མ་ལ། །སྙིང་ནས་འདུད་དོ་སྙིང་མུན་དབྱིངས་སུ་སོལ།
།བསྟན་པའི་བདག་པོ་སངས་རྒྱས་བཅོམ་ལྡན་འདས། །དེས་གསུངས་ཟབ་རྒྱས་ཆོས་ཀྱི་པད་ཚལ་དུ། །ཅི་དགར་རོལ་བའི་དགེ་འདུན་བུང་བའི་ཚོགས།
།སྐྱབས་མཆོག་རིན་ཆེན་གསུམ་གྱིས་དགེ་ལེགས་སྩོལ། །ཟས་གཙང་སྲས་མཆོག་འོད་སྟོང་བདག་པོ་ཡིས།
།ལྔ་ཕྲག་སྙིགས་མའི་སྨག་རུམ་སེལ་བའི་ཕྱིར། །སྤྲུལ་བའི་སྣང་བརྙན་བསམ་ལས་འདས་པ་ལས། །བྱེ་བྲག་རྟེན་འདིའི་ལོ་རྒྱུས་ཅུང་ཟད་འབྲི།
།དེ་ལ་རྟེན་འདི་ཡུལ་གང་ལས། ༼ ༡༽གང་ཟག་སུས།༼ ༢༽དུས་ནམ་གྱི་ཚེ།༼༣ ༽ཨ་མདོ་རྔ་བའི་ཨ་ཁྱམས་སྡེ་བ་འདིའི་ཁྱིམ་ཚང་འདིར་ཚུལ་ཇི་ལྟར་༼༤༽སྤྱན་དྲངས་པ་སྟེ་ས་བཅད་བཞི་ལས།
དང་བོ་ནི།
སྤྱིར་སངས་རྒྱས་རྣམས་ཀྱི་ཆོས་ལོངས་སྤྲུལ་གསུམ་གྱི་བཀོད་པ་བསམ་གྱིས་མི་ཁྱབ་ཀྱང་། བྱེ་བྲག་སྤྲུལ་སྐུའི་བཀོད་པ་ལའང་མཆོག་གི་སྤྲུལ་སྐུ་ནས་གཟིངས་དང་ཟམ་པའི་བར་འགྲོ་ལ་ཕན་པ་སྣ་ཚོགས་སྟོན་པར་མཛད་ཀྱང་བཞུགས་ཏེ་ཞེས་གསུངས་པས་སོ།
།
དེ་དག་ལས་ཇོ་བོ་འདི་ཉིད་གཟུགས་སྐུའི་སྣང་བརྙན་གཞན་སལས་ཁྱད་པར་དུ་འཕགས་པ་ཡིན་ཏེ། འདིའི་ཟུང་འཇུག་ལ་རིང་བསྲེལ་རྣམ་བཞིའི་གཙོས་དུང་གི་ཐུགས་རྗེ་ཆེན་པོ།
བྱི་རུའི་ཚེ་དཔག་མེད། གཡུའི་སྒྲོལ་མ་སོགས་འཇིག་རྟེན་ན་དཀོན་པའི་རྟེན་གསུམ་བསམ་གྱིས་མི་ཁྱབ་པར་གྲགས་ཤིང་འགངས་ཆེ་བ་དག་ཡོད་ཅིང་དབུས་ཀྱི་ཇོ་བོ་གཟི་འོད་འབར་བ་ཞེས་ཡོངས་སུ་གྲགས་པས་སོ།
།
འདི་ཉིད་ཡུལ་གང་ལས་སྤྱན་དྲངས་པ་ཡིན་ཞེ་ན་ལྷ་ལྡན་དག་པའི་ཞིང་ལས་སོ།
།
གཉིས་པ་ནི།
ལོ་ཆེན་བེེ་རོ་ཙ་ནའི་སྨོན་ལམ་གྱི་སྟོབས་ལས་འཁྲུངས་པའི་ཨ་འདུས་གྱད་པོ་སྒོམ་ཆེན་ཞེས་བྱ་བའི་མཁས་ཤིང་གྲུབ་པ་བརྙེས་པའི་སྐྱེས་མཆོག་དེ་ཉིད་ཀྱིས་སོ།
།
གསུམ་པ་ནི།
རང་བྱུང་བརྒྱད་པའི་མཇུག་ཙམ་ཡིན་ཏེ། གྱད་པོ་སྒོམ་ཆེན། བླ་མ་ཀུན་དགའ་འོད་ཟེར། བླ་མ་ཀུན་དགའ་དབང་ཕྱུག བླ་མ་དཀོན་མཆོག་འོད་ཟེར། བླ་མ་དཔལ་ལྡན་བཟང་བོ། བླ་མ་ཀུན་དགའ་དཔལ་བཟང་།
བླ་མ་ཀུན་དགའ་རྣམ་རྒྱལ། བླ་མ་ངག་དབང་ལྷུན་གྲུབ། དགེ་སློང་དཀོན་མཆོག་འཇིགས་མེད། སྒང་དབོན། དགེ་སློང་མཁས་གྲུབ། དགེ་སློང་ཐོགས་མེད། དགེ་སློང་བསྟན་འཛིན། དགེ་སློང་འཇམ་དབྱངས་གྲགས་པ།
དེ་རྣམས་རེ་རེ་ལ་ལོ་བཞི་བཅུ་ཙམ་བྱས་ཀྱང་ལྔ་བརྒྱ་དང་དྲུག་ཅུ་ཙམ་ཡིན་པས་སོ། །
བཞི་བ་ནི།
ལོ་རྒྱུས་སྨྲ་བ་རྣམས་ཀྱི་ངག་རྒྱུན་ལྟར་ན།
སྐྱེས་མཆོག་གྱད་པོ་སྒོམ་ཆེན་གྱིས་ཇོ་བོ་གཟི་འོད་འབར་བ་འདི་བླུ་ཡོན་དུ་མཛོ་དཀར་༡༠༠མཛོ་དམར་པོ་༡༠༠མཛོ་སྔོན་པོ་༡༠༠མཛོ་ནག་པོ་༡༠༠སྟེ་མཛོ་བཞི་བརྒྱ་སྟེར་བར་གྲགས།
དེ་ནས་སྐྱེ་མཆོག་དམ་པ་དེ་ཉིད་ཀྱིས་བར་སྣང་ནས་རྫུ་འཕྲུལ་གྱི་སྒོ་ནས་གནས་འདིར་སྤྱན་དྲངས་པ་ཡིན་པར་གྲགས།
ཇོ་བོ་འདིའི་བྱིན་རླབས་དང་དགེ་མཚན་གྱིས་གནས་འདིར་ནད་མུག་འཁྲུགས་རྩོད་ཞི་ཞིང་བཀྲ་ཤིས་པའི་མེ་ཏོག་སིལ་མ་ཁ་དོག་སྣ་ཚོགས་ཀྱིས་ས་འདིར་ཡོངས་སུ་ཁྱབ་པ་ཡིན་ཞེས་གྲགས། གལ་ལ་ཐུག་དུས་གསུངས་འབྱོན་མྱོང་བར་གྲགས། ཡུལ་འདིར་འབྲུམ་ཡམས་ཀྱིས་མི་མང་བོ་ཤི་ཚེ། ཇོ་བོ་འདིའི་སྐུ་ལ་འབྲུམ་བུ་མང་བོ་བཞེས་པས་དེ་ཕྱིན་ཆད་ནད་དེ་ཆད་པ་ཡིན་ཞེས་ཀྱང་གྲགས།
སྨྲས་པ།
འདིས་མཚོན་བདག་གི་དགེ་ཚོགས་ཆུ་ཕྲན་དེ།
།སྐྱེ་འཕགས་དུས་མེའི་དགེ་ཚོགས་རྒྱ་མཚོ་དང་། །ཆབས་གཅིག་འཁོར་གསམ་ཡོངས་དག་ཤེས་རབ་ཀྱིས།
།རབ་འབྱམས་རྒྱལ་བས་བསྔོས་བཞིན་ཡོངས་སུ་བསྔོ། །རྟེན་འདི་མཐོང་ཐོས་དྲན་རེག་འགྲོ་ཀུན་གྱི།
།རྒྱུད་ལ་བྱང་ཆུབ་སེམས་མཆོག་རབ་སྐྱེས་ནས། །ཕྱིན་དྲུག་བསྡུ་བཞིའི་ལམ་བཟང་མཐུར་ཕྱིན་ཏེ།
།ཐམས་ཅད་མཁྱེན་པའི་གོ་འཕང་ཐོབ་གྱུར་ཅིག །ཅེས་པ་འདི་ནི་འཇམ་དབྱངས་མགོན་པོ་ནས་བྲིས་པའོ།
།དགེའོ། །བཀྲ་ཤིས། ཁྱིམ་ཚང་དེའི་མཆོད་ཁང་སྒོ་འགོར་བཀལ་བའི་ངོ་སྤྲོད་ལས་བཤུས།
|