བགྲེས་པོ་རང་གིས་བཤད་ནས་གཞན་ལ་ཡི་གེ་འབྲི་རོགས་ཞུས་པ།
     ང་ནི་༡༩༡༦ལོར་སྤྱིར་བཏང་གི་འབྲོག་དུད་གཅིག་ནང་སྐྱེས་པ་དང་ཕ་མ་གཉིས་ནི་འབྲོག་ལས་ཁོ་ན་བྱེད་མཁན་ཞིག་རེད། ང་ལོ་ཆུང་དུས་ནས་རྟ་དང་མེ་མདའ་ལ་ཧ་ཅང་དགའ་པོ་ཡོད། དེ་སྔོན་སྤྱི་ཚོགས་རྙིང་པའི་ནང་ན་ཚོད་ལོན་རྗེས། ངས་མི་ཚེའི་སྟོད་ཆར། དགྲ་ཇག་དང་འཐབ་འཁྲུག་མི་ཉུང་པ་ཞིག་བྱས་མྱོང་། ངས་རྒྱུན་དུ་རང་ལ་མཐོང་ཆུང་དང་། གཉའ་གནོན་བྱེད་མཁན་ཞིག་ཡིན་ཕྱིན་མི་དྲག་གཞན་སུ་འདྲ་ཞིག་ཡིན་རུང་ཁ་གཏད་འཇལ་ཏེ་དེ་ལན་དེ་འཇལ་བྱེད་དགོས་པ་ལས་ཕམ་ཁུར་དང་།མགོ་སྒུར་རྩ་བ་ནས་མི་བྱེད་དགོས་སྙམ་གྱི་ཡོད། ང་ལོ་བཅུ་གསུམ་ཙམ་ལ་སླེབས་སྐབས་ལུག་འཚོ་བར་འགྲོ་ཡི་ཡོད། ཉིན་གཅིག་ངས་ལུག་འཚོ་བཞིན་ཨ་ཅག་འཚེར་མ་ཟེར་པ་བརྐོས་ནས་ཆུ་ལ་བཀྲུ་བཞིན་བསྡད་ཡོད་པའི་ཚེ་དགའ་ཟེར་པའི་དུད་ཅིག་ཡོད་པ་དེ་ཚང་གི་ནོར་ངའི་ཐག་ཉེ་ནས་ས་ཆ་གཞན་ལ་ཤར་སོང་དེ་རྗེས་ཚེ་དགའ་ཁོ་རང་ནོར་རྗེས་ལ་ཡོང་ནས་ང་ལ་ང་ཚོའི་ནོར་འདི་ནས་ཕྱིན་སོང་ངམ་ཞེས་དྲིས་བྱུང་པས་ནོར་མཐོང་བྱུང་ལབ་པས་ཁོ་པས་ང་ཚོས་ནོར་འདི་ནས་འགྲོ་བ་ཁྱོད་ཀྱིས་མཐོང་བཞིན་འགོག་ཐབས་མི་བྱེད་པ་མི་འདི་ལ་ཡོད་ཟེར་ནས་ངས་མགོ་ནས་མནན་ཙམ་མནན་ཙམ་བྱས་བྱུང་། ངས་ཁོ་པར་འཛིང་དགོས་བསམ་སྟེ་ཁོ་པ་ནོར་རྗེ་ལ་འགྲོ་རྩིས་ཀྱི་ཁ་ཕྱིར་སྐོར་ནས་ཕྱིན་པ་དང་བསྟུན་སྟེ་འུར་རྡོ་རྒྱབ་པ་ཡིན་ཁོ་པས་དེ་མ་ཐག་ང་ལ་རྡོ་ཞུས་པའི་མ་ཚད་གྲི་ཁྱེར་ཏེ་རྒྱུག་བྱུང་པས་ངས་ཡང་འུར་རྡོ་ཅིག་རྒྱབ་པ་ཁོ་ཡི་རྐང་པ་ཐེབས་ནས་འགྱེལ་སོང་བས་ངས་ལམ་སང་ཁོ་བསད་ནས་ཆུ་ལ་དབྱུགས་དགོས་བསམ་བྱུང་ཡང་དེར་ཆུ་གཏིང་ཟབ་པ་མེད་པའི་ཁོ་པ་བསད་ན་མིས་མཐོང་ཡོང་བསམ་ནས་རང་སར་བཞག་པ་ཡིན།
      ཉིན་ཞག་ང་ལུག་འཚོ་བཞིན་ཡོད་པའི་ཨ་དར་ཟེར་བའི་མི་ཞིག་ཡོད་པ་དེའི་བུ་ཡང་ཕྱུག་འཚོ་བར་ཡོང་བ་ཕྲད་བྱུང་ཨ་དར་ཟེར་བ་དེ་དང་ང་ཚོའི་དབར་སྔོན་མ་རྩོད་འཛིང་བྱུང་མྱོང་པས་ཕན་ཚུན་འཁོན་འཛིན་ཡོད་པར་བརྟེན་ངའི་བསམ་པར་ང་ལོ་ན་ཆུང་པས་ཕ་རྒན་བསོད་མི་ཐུབ་རུང་ཕྲུ་གུ་འདི་གསོད་དགོས་སྙམ་ང་གཉིས་འུར་རྡོ་རྒྱག་རེས་བྱས་པ་ཡིན་ཨ་དར་ཕྲུ་གུས་ང་ལ་འུར་རྡོ་རྒྱབ་པ་ངའི་ལུས་པོར་ཕོག་ནས་ང་ཉིན་ཤས་རིང་ན་གཟེར་ཆེ་ཙམ་བྱུང་།  ཡང་ཉིན་ཞག་ཨ་དར་གྱི་བུ་དེའི་ལུག་རྣམས་རི་ལ་འཚོ་བར་འགྲོ་གི་ཡོད་པ་ངས་མཐོང་བྱུང་པས་ངས་དེ་རིང་ཁོ་པའི་རྗེས་སུ་ཕྱིན་ནས་ལན་ཞིག་སློག་དགོས་སྙམ་སྟེ་འཇབ་ནས་སོང་པ་ཡིན་ག་ལེར་ལྟ་ད་ཁོ་པས་རི་དུམ་ཞིག་ལ་གུར་གཅིག་བཟོས་པ་དང་ས་ལས་བཟོས་པའི་ནོར་ཁ་ཤས་དང་འདམ་གྱི་བུད་མེད་གཅིག་བཟོས་ནས་དེ་ཁོ་པའི་བག་མ་ཡིན་ཁུལ་གྱི་རྩེ་མོ་རྩེ་བཞིན་འདུག ངས་རྡོ་གཉིས་ལག་ཏུ་བཟུང་ནས་ཁོ་རེ་ད་ཁྱོད་གསོད་ཀྱི་ཡིན་བཤད་དེ་རྡོ་གཅིག་འཕང་བ་ཁོ་ཡི་འགྲམ་རུས་ཕོག་ནས་ལམ་སང་ཁོ་པ་ས་ལ་འགྱེལ་ནས་དྲན་མེད་དུ་བརྒྱལ་སོང་པས་ངས་ལམ་སང་ཁོ་ཡི་གྲི་དང་གཙོད་རུ་ཚུར་བླངས་ནས་ཁོ་པའི་སྐེད་རག་དེས་ལག་གཉིས་བསྡམས་ནས་གྲི་ས་ལ་བཙུགས་ཏེ་དེར་བཏགས། འུར་ཐག་གིས་རྐང་པ་གཉིས་བསྡམས་ནས་གཙོད་རུ་སར་བཙུགས་ནས་དེར་བཏག་སྟེ་བྲང་ཁ་ཕྱེ་དགོས་སྙམ་ནས་གྲིས་བཅད་ཀྱང་གྲང་ཁ་ཕྱེ་མ་ཤེས་པར་བྲང་སྟོད་ལ་ཁེལ་འདུག་ད་ལྟོ་བར་གྲི་རྒྱག་དགོས་སྙམ་ནས་ཕར་ལྟ་སྐབས་ཁོ་ཡི་ཕ་ཨ་དེར་ཡོང་གི་འདུག་པས་ལམ་སང་ཨ་དར་ལ་ཁྱོད་ཀྱི་བུ་ངས་བསད་ཡོད་ཁྱོ་རང་དེའི་ཤ་ཟོ་ཟེར་བཤད་ཏེ་བྲོས་པ་ཡིན་ཨ་དར་གྱི་ང་རྗེས་འདེད་བཏང་བར་བྲག་གསེབ་ཅིག་ལ་སླེབས་ནས་རྡོ་ཆེན་པོ་ཞིག་འཕང་བ་ཡི་སོག་པར་ཐེབས་ཏེ་ཁོ་པ་ཕྱིར་བྲོས་བྱས་སོང་། 

    ང་ལོ་བཅུ་དྲུག་ལ་སླེབས་སྐབས་ང་ཚོས་སར་ནག་ཤོད་སྟག་ཕྲུག་དཔོན་ཚང་གི་ཚྭ་བ་འབྲང་ཞིག་སླེབས་སོང་དེའི་ཁལ་གཡག་ལ་འཇམ་བུ་（ཁ་ཚ་ཡང་ཟེར་）ཟེར་པའི་ན་ཚ་ཕོག་ཡོད་རྐྱེན་ཀླུ་ཟོག་ཚོ་སྐྱབས་ནས་ཁྱོད་ཚོས་ཁལ་གཡག་ལ་ན་ཚ་ཕོགས་ཡོད་པས་ང་ཚོས་ལྟས་ཀྱི་ཉེ་འདབས་སུ་མི་སྡོད་རོགས་བྱེད་ལབ་པར་ཁོ་པ་ཚོས་ཁོང་ཁྲོ་བཟོས་ནས་ཀླུ་ཟོག་ཚོ་སྐྱབས་ཀྱི་འགོ་ལ་རྡོ་ཞུས་ནས་ཁྲག་དོན་པ་བཟོས་འདུག་པས་དེར་དགྲ་ལན་སྤྲོད་ཆེད། ང་དང་བསྟན་འགོ།  ཨ་བན་སྤུག་རྡིལ་བཅས་མི་གསུམ་མཚན་མོར་འཇབ་རྒྱུ་བྱས་ཀྱང་རྟ་མ་ཐོབ་པས་ཕྱིར་ཉིན་ཁོ་ཚོ་ཉིན་མོར་ཚུག་འབབ་ལོང་མེད་པར་རྒྱུག་ནས་རྟ་བཅུ་སྐོར་ཞིག་དེད་པ་ཡིན། ཁོ་ཚོར་ཡོང་ནས་རྟ་བཟུང་རྩིས་བྱས་ཀྱང་འཛིན་མ་ཐུབ་པར་ང་ཚོས་རྟ་དེད་ནས་འགྲོ་སྐབས།མི་ཞིག་གིས་གྲོང་ཁྱེར་ནས་རྗེས་འདེད་བཏང་བྱུང་།ང་ཚོས་མེ་མདའ་རྒྱབ་རྩིས་བྱས་རུང་མེ་མདའ་འབར་མ་སོང་།འོན་ཀྱང་ཁོ་ཚོ་ཡོང་མ་ནུས་པར་ཕྱིར་ལོག་སོང་།ཉིན་ཤས་སོང་རྗེས་ནག་ཤོད་ཀྱི་སྐྱ་མི་མང་པོ་ཡོང་ནས་རྟ་རྣམས་ཕྱིར་སློག་དགོས་པའི་མ་ཚད་ཆེད་ཡུལ་བཤག་གསུམ་དགོས་ལུགས་ཤོད་ཀྱི་འདུག ངའི་ཕ་རྒན་དང་ཨ་ཉེ་རེ་ཤིས་བཅས་མི་རྒན་པ་ཚོས་ཕྲུ་གུ་འདི་གསུམ་གྱིས་ང་ཚོས་ཁ་ལ་ཉན་པོ་མེད་ལུགས་བཤད་ནས་ང་ཚོར་གཤེ་གཤེ་གཏོང་ཁུལ་བྱས་པ་དང་ང་ཚོས་དགྲ་ལ་གསོད་རེས་བྱེད་པ་ལས་འོས་མེད་ཚུལ་པ་བཤད་པ་ཡིན་ཁོ་ཚོས་རྟ་དེ་ཚོས་སྟག་ཕུ་བླ་བྲང་དང་།སྟག་ཕྲུག་དཔོན་ཚང་གི་ཡིན་ལུགས་ཤད་ཀྱི་འདུག་མཐར་རྟ་རྣམས་ཕྱིར་སློག་དང་སྟག་ཕུ་བླ་བྲང་ལ་ཆེ་མདོན་སྤྱང་ལྤགས་དང་།ཝ་ལྤགས་ཁ་ཤས་སྤྲད་པ་དང་ཚུར་ཀླུ་ཟོག་ཚེ་སྐྱབས་རྡུང་པ་དེར་གཡག་གཅིག་དང་ཕྱུ་བ་གཅིག་སྤྲད། ཡང་ལོ་དེའི་ནང་ང་ཚོའི་རྟ་ནོར་ཚང་མ་དགེ་རྒྱལ་ཇག་པས་དེད་པ་རེད།ང་ཚོས་གུར་འབུམ་པདྨ་གཡུ་རྒྱལ་ལ་དགྲ་ལན་འཕྲོད་ཐབས་ཀྱི་རོགས་ལབ་པའི་གུར་འབུམ་ནས་དགྲ་ལན་ལེན་པར་དེང་སྐབས་འགྲོ་རྒྱུ་མེད་ལུགས་དང་།དབང་རྣམ་ཁྱོད་རང་ལོ་ན་ཉི་ཤུར་སླེབས་སྐབས་འགྲོ་ཆོག་ཟེར་བ་དང་། ཁྱོད་ཚོས་དགྲ་ཡང་དགེ་རྒྱལ་གྱི་བེ་གུ་དབང་ཆེན་མགོན་པོ་ཡོད་པ་ཡིན། རྗེས་སུ་དགྲ་ལན་ལེན་པར་འགྲོ་སྐབས་འདི་ལྟར་བྱེད་དགོས་ཞེས་དམིགས་བསལ་གྱི་བསླབ་བྱ་ཁ་ཤས་བྱས་བྱུང་། ཡང་ལོ་དེར་དགེ་རྒྱལ་ཇག་པས་ང་ཚོའི་ཤོག་ཁའི་མགར་པ་རྒྱན་འཁོར་ཚང་གི་རྟ་ཡང་དེད་འདུག་དེར་རྟེན་ང་ཚོ་མི་བརྒྱད་མེ་མདའ་རང་དབང་བཞི་དང་བོད་མདའ་བཞི་ཁུར་ནས་དགེ་རྒྱལ་གྱི་རྗེས་སུ་ཕྱིན་པ་ཡིན། ཉིན་ཞག་འགའ་ཤས་སོང་རྗེས་ང་ཚོ་དགེ་རྒྱལ་གྱི་ས་ཆ་རྫ་ནག་རེས་སྒང་ཟེར་སར་སླེབས་ཏེ་སོ་ལྟ་བྱེད་སྐབས་དགེ་རྒྱལ་གྱི་སྡེ་དུད་རྣམས་དགྲ་དོགས་བྱས་ཏེ་རུ་བ་བརྒྱ་སྐོར་ཙམ་མཉམ་དུ་བསྡད་འདུག་པ་དེའི་ནུབ་ངོས་ནས་རྟ་ནོར་མང་པོ་དེད་པ་ཞིག་ཀྱང་ཁོ་ཚོའི་སར་སླེབས་སོང་། ང་ཚོས་ཞིབ་ཕྲ་བལྟས་རྗེས་དུད་ཚང་བཅུ་གཅིིག་ཅུང་ཟད་དུ་སྡད་ཡོ་བཟོ་འདུག་པས་ཁོ་ཚོའི་རྟ་རྣམས་དེད་གཏོང་ཟེར་ཤོད་བཞིན་མི་གཅིག་སྡེ་དུད་ཚོའི་ནང་དུ་བྲེལ་འཚབ་བྱས་ཏེ་ཕར་འགྲོ་ཚུར་ཡོང་བྱེད་ཀྱི་འདུག་པ་དེས་ང་ཚོ་མཐོང་ཐོས་བྱུང་ནས་ལན་སྐྱེལ་བ་འདྲ་ཞིག་བྱས་སོང་བ་ང་ཚོས་གསལ་པོར་མ་ཤེས་པར་དེ་ཕྱོགས་ལ་ཤར་རྒྱག་ཕྱིན་པ་ཡིན།ཁོ་པ་ཚོས་ང་ཚོ་ཡོང་བ་ཧ་གོ་ནས་ལམ་དགུག་སྤྲེལ་འདུག་པ་མ་ཚད་མེ་མདའ་ཡང་བརྒྱབ་བྱུང་བས་ངའི་སློག་པར་ཨི་ཁུང་ཕིག་འདུག  ང་ཚོས་ཀྱང་ཕར་མེ་མདའ་བརྒྱབས་ནས་ཁོ་ཚོའི་མི་གཉིས་ཤི་རྨས་བཟོས་རྗེས་ཁོ་ཚོ་ཕྱིར་བྲོས་བྱས་སོང་། ང་ཚོས་(དེ་མུར་ཐེ་ཚོམ་མེད་པར་ཁོ་ཚོའི་རུ་ཐོག་ལ་བབས་ནས་མཚན་གང་རིང་ཕན་ཚུན་གྲི་དང་། མེ་མདའ་ཁྱེར་ནས་འཐབ་རེས་བྱས་མཐར་ང་ཚོའི་ཁོ་ཚོས་ཕྱོགས་ཀྱི་མི་བདུན་བསད་པ་དང་།  ང་ཚོའི་རྟ་གཅིག་ཁོ་ཚོས་བསད་འདུག  དེ་ནས་ང་ཚོས་ཁོ་ཚོའི་ས་ནས་རྟ་ནོར་ལེན་དགོས་བསམ་ཡང་གཅིག་ཀྱང་ཐོབ་མ་བྱུང་པས་ང་ཚོ་ཕྱིར་ལོགས་བྱས་པ་ཡིན། ང་ཚོ་ཕྱིར་ལོག་འགྲོ་བའི་ཕྱི་ཉིན་ལམ་བར་དུ་རྟ་པ་དུམ་ཞིག་ཕྲད་བྱུང་བ་དེ་ནི་དགེ་རྒྱལ་གྱི་རི་དྭགས་རྒྱག་མཁན་རེད་འདུག ཁོ་ཚོར་རྟ་དྲུག་དང་།མེ་མདའ་གཉིས་ཡོད་པ་ཚང་མ་ང་ཚོས་འཕྲོག་ནས་མི་ལ་ཉེས་རྡུང་ཆེར་མ་བྱས་པ་བཏང་བ་ཡིན།  ང་ཚོ་ཤར་རེ་ནང་ལ་ལོག་ནས་ནང་དུ་སླེབས་སྐབས་ཡང་ང་ཚོས་ཁྱིམ་གྱི་རྟ་ནོར་ཡོངས་རྫོགས་དགེ་རྒྱལ་ཇག་པས་འདེད་ཚར་འདུག་པས་ངས་ངེས་པར་དུ་ཡང་དགེ་རྒྱལ་ལ་དགྲ་ལན་ཐེངས་གཅིག་སློག་རྒྱུའི་སེམས་ཐག་བཅད་པ་ཡིན།  དེ་མུར་ལོ་གཉིས་ཙམ་འགྲོ་སྐབས་ངས་ད་དགྲ་ལན་སྤྲོད་བྱེད་ཀྱི་མེ་མདའ་དྲག་པ་ཞིག་ཉོ་དགོས་འདུག་སྙམ། ཚ་སྤྲུལ་ཕྱག་མཛོད་ཟེར་པའི་ཚོང་པ་ཞིག་ཡོད་པ་དེའི་ས་ནས་ནོར་སུམ་བཅུ་སྤྲད་དེ་མེ་མདའ་རི་སྤིན་མདེའུ་བརྒྱ་ཐམ་པ་ཡོད་པ་ཞིག་ཉོས། དེ་རྗེས་ངས་ད་རང་ཉིད་ལ་རྟ་དང་མེ་མདའ་ནི་ཡོད་ཕྲལ་དུ་དགྲ་ལན་ལེན་པར་འགྲོ་དགོས་བསམས་ནས་རུ་བ་བྱང་སྐྱོད་བྱས་ཏེ་ཉེ་འབྲེལ་ཚོ་ལ་ཡང་ང་རྟ་ཇག་ཅིག་འགྲོ་རྩིས་ཡོད་ལབ། ཉེ་འབྲེལ་ཚོས་རྟ་ཇག་ལ་འགྲོ་རྒྱུ་མེས་ལུགས་མང་པོ་ཤོད་ཀྱི་འདུག་ངས་འོ་ན་རི་དྭགས་རྔོན་པར་འགྲོ་རྒྱུ་ཡིན་བཤད་ནས་བསྟན་འགོ་དམང་རས་དང་ཨ་བན་སྤུག་སྡིས་སོགས་ལ་ལྐོག་གྲོས་བཤམ་ནས་རི་དྭགས་རྔོན་པར་འགྲོ་གི་ཡིན་ཟེར་ཁལ་གཡག་ཉི་ཤུ་དེད་ནས་ཐོན་རྩིས་བྱེད་སྐབས།   ཡང་ཉེ་འབྲེལ་ཚོས་ས་ཐག་རིང་སར་མ་འགྲོ་དགྲ་དགོས་ཡོང་ཉེས་དེ་ལས་ཐག་ཉེ་རི་དྭགས་རྔོན་ན་ཡག་ཟེར་ང་ཚོས་དེ་རང་བྱེད་ཟེར་ཕྱིན་སྟེ། ཐག་ཉེ་རིང་ནས་རྐྱང་བརྒྱ་བསད་མི་གཅིག་ཕྱིར་སློག་པ་དེའི་གདོང་ལ་རྐྱང་ཤ་དང་། ཁལ་གཡག་ཕྱིར་སློག་བྱས་ཏེ་ང་ཚོ་མི་གསུམ་དགེ་རྒྱལ་རྟ་ཇག་སོང་ཡིན།   

    ང་ཚོས་སྔོན་མ་གུར་འབུམ་པདྨ་གཡུ་རྒྱལ་གྱིི་བསླབ་བྱ་ལྟར་ཁོ་རང་བྱེས་ལ་འགྲོ་དུས་རང་ཡུལ་ལ་སྟག་འདྲ་བ་ཡོད་རུང་།   མི་ཡུལ་ལ་ཝ་འདྲ་བ་བྱས་ནས་འགྲོ་དགོས་བཞིན་མཚན་མོ་གཉིད་མི་ཉལ་པར་སོ་རེས་སྐོར་ང་དང་ཉིན་མོར་ག་ལེར་ཕྱིན་ནས་རྟ་རྣམས་ངལ་གསོ་ཡོང་བ་བྱེད་པ་དགྲ་ཟོག་བྱ་ར་ལྟ་བ།  ས་དཔྱད་ལ་ལྟ་བ། རི་དྭགས་ཀྱི་དལ་བྲེལ་ལ་ལྟ་བ་བཅས་བྱས་པ་དང་།  ང་ཚོས་དགྲ་རྒྱན་སྐབས་མི་ཆེ་གསོད་ཆུང་གསོད་མ་ཡིན་པ་རྟ་ནོར་འདེད་གང་ཐུབ་བྱེད་དགོས་པ་དང་གལ་ཏེ་ང་ཚོར་ཇག་ཐོབ་པ་ཡིན་ན་རྗེས་འཛོལ་ཡོང་ཆེད་དེ་བས་དོགས་ཟོན་བྱེད་དགོས་པ་བཅས་བྱེད་དགོས་རྒྱུའི་གྲོས་བྱས་པ་ཡིན་དེ་ནུབ་ང་ཚོས་དགེ་རྒྱལ་གྱི་ས་ལ་སླེབས་སོང་བས་ང་ཚོའི་རི་མགོ་ནས་སོ་སྟ་བྱས་པ་ཡིན།  དགེ་རྒྱལ་གྱི་སྡེ་དུད་ཚོ་ནི་རུ་སྤོམས་བྱས་ནས་དགྲ་ཟོག་བྱེད་བཞིན་འདུག་དེའི་མཚན་མོར་ང་ཚོས་རྟ་ཁ་ཤས་ཐོབ་ན་སྙམ་ནས་འགྲོ་སྐབས་རྟ་ཚང་མ་རྭ་པའི་ནང་དུ་བཅུགས་ཡོད་པ་དང་། ཕྱི་རྒྱུག་པའི་རྟ་གཅིག་ཀྱང་མ་ཐོབ་པར་ཕྱིར་འཐོན་བྱས་པ་ཡིན་དེ་ནས་ང་ཚོས་བྲོ་ཆས་མང་པོ་མེད་པས་ཐག་རིང་ཙམ་ཕྱིར་འཐེན་བྱས་ནས་རི་དྭགས་འདྲ་གསོད་དགོས་པ་དང་། རྟ་རྣམས་ཡང་ངལ་གསོ་རྒྱག་དགོས་པ་འདུག་བཤད་ནས་དེ་ལྟར་ཉིན་ཤས་བསྡད་པ་ཡིན། 

    ང་ལོ་བཅུ་བདུན་ལ་སླེབས་སྐབས་དེར་ལོ་དེའི་དབྱར་ཁར་དེ་སྔོན་ཨ་མདོ་སྟོད་མར་མགོ་བཏགས་བྱས་ནས་ཨམ་སྟོད་ཤོག་ཁོངས་སུ་བསྡད་ཡོད་པའི་དགེ་རྒྱས་ཤོག་ཁའི་ཇག་པ་ས་འགོ་རུང་ཚང་ཟེར་བའི་མི་ཚང་ཞིག་ཡོད་པ་དེ་ཁོ་པ་ཕ་ཡུལ་དུ་ནང་འཁྲུག་བྱས་ནས་མ་འཆམ་པར་ཨ་མདོར་སླེབས་རྗེས་ལོ་ཤས་རིང་ཁོ་པས་ཚུལ་མཐུན་ཡིན་བཟོ་བྱས་ཏེ་བསྡད་པ་དང་།  དེ་ནས་ཡང་ཁོ་བྲོས་རྩིས་ཀྱི་ཨ་མདོའི་ནང་ཚ་སྤྲུལ་ཚང་ཟེར་པའི་ཚོང་པ་ཞིག་ཡོད་པ་དེའི་སར་ནས་རྗེས་སུ་རིན་འབབ་སྤྲད་ཡོད་ཟེར་ཅ་དངོས་གང་འཚམ་ཁྱེར་ནས་རང་འཚམ་གྱིས་ནག་ཆུར་ཚོང་རྒྱག་པར་འགྲོ་རྒྱུར་ཁ་གཡར་ཏེ་ཕྱིན་པ་ཨམ་སྟོད་དཔོན་སྐལ་བཟང་དགྲ་འདུལ་ནས་ཧ་གོ་རྗེས་འགོ་རུང་ཁོ་པས་ཚ་སྤྲུལ་ཚོང་པའི་སར་ནས་ཅ་དངོས་ཁ་བསླུ་ཁྱེར་པ་དང་།   ཁོ་པ་ཨམ་སྟོད་ཀྱི་སྡེ་ཁོངས་སུ་གཏོགས་པ་ཞིག་ཡིན་པས་རང་གར་གཏོང་རྒྱུ་ཡོད་པ་མ་རེད་བཤད་ནས་སེར་ཤུལ་ཉི་མ་དང་།   ལྷ་པ་ཕྲ་རིལ་གཙོ་རྟ་པ་བཞི་འགུག་པར་བཏང་པའི་ཁོ་པ་རྗེས་ཟིན་མཚམས་ཁོ་པས་ཁྱོད་ཚོ་སླེབས་པ་ཡག་པོ་རེད་ང་བྲོས་རྩིས་མེད་ཟེར་བ་སོགས་སྐད་ཆ་འདྲ་ཆགས་མང་པོ་བཤད་པ་དང་།  ཁོ་ཚོར་སྣེ་ལེན་གང་ཡག་བྱས་ཏེ་ང་ལམ་སང་ཁྱོད་ཚོ་མཉམ་དུ་ལོག་རྒྱུ་ཡིན་ལུགས་བཤད་ནས་ཁོ་ཚོ་མཉམ་དུ་ཕྱིར་ལོག་བྱས་པའི་ཉིན་གཉིས་པའི་མཚན་མོར་ནམ་སྟོད་ཁོ་པས་ལྷ་བ་ཕྲ་རིས་ལ་ལྷ་འབེབ་དགོས་ཟེར་བསྡད་པ་དང་།  མཚན་དཀྱིལ་ཁོ་ཚོ་བཞི་པོ་སྣང་མེད་ལ་གཉིད་ཉལ་པའི་སྐབས་དང་སྟུན་ནས་ས་འགོ་རུང་ཕ་བུ་མི་ལྔའི་མཉམ་རུབ་ཀྱི་ཁོ་ཚོ་བཞི་དམར་གསོད་བཏང་ནས་དེ་ཚོས་མེ་མདའ་དང་ཅ་དངོས་གང་ཡོད་ཁྱེར་ནས་ཁོ་པ་ནུབ་ཕྱོགས་སུ་བྲོས་པ་རེད་གནས་ཚུལ་དེ་ས་གནས་དེ་གའི་མང་ཚོགས་ཀྱི་ཧ་གོ་རྗེས་ཕྲལ་དུ་ནག་ཆུ་རྫོང་དང་།  སྐབས་དེར་ནག་ཆུར་བསྡད་ཡོད་པའི་ཨམ་སྟོད་དཔོན་པོ་སུག་བཅས་ལ་སྙན་སེང་ཞུས་རྗེས་ནག་ཆུ་རྫོང་གིས་ཕྲལ་དུ་ཨམ་སྟོད་དཔོན་པོ་སུག་གཙོས་མི་བརྒྱད་དང་རྫོང་གི་སྐུ་ཚབ་གཉིས་བཅས་རྟ་པ་བཅུ་ས་འགོ་རུང་གི་རྗེས་ཟིན་སྟེ་ཕན་ཚུན་མེ་མདའ་ཁ་ཤས་རྒྱབ་རྗེས་ས་འགོ་རུང་མི་རྟ་ཚང་མ་བྲོས་ཤོར་པའི་བྱ་ཐབས་མ་བྱུང་པར་ཕྱིར་ལོག་རྗེས་ནག་ཆུ་རྫོང་གི་ས་འགོས་རུང་བྱས་ཏེ་ཚབ་ཆེན་ཡིན་པས་དེ་མུར་འཇོག་རྒྱུ་མེད་པ་དང་། ཁོ་པར་རྗེས་འདེད་བཏང་ནས་གསོད་བཟུང་གང་བདེ་བྱེད་རྒྱུའི་ལས་འགན་ཨམ་སྟོད་ནས་འཁུར་དགོས་རྒྱུའི་བཀའ་ཕབས་གསལ་ལྟར་དཔོན་པོ་སུག་ནག་ཆུ་ནས་ཕྱིར་ལོག་བྱས་རྗེས་དཔོན་སྐལ་རྒྱམ་ཁོ་གཉིས་བྲོས་བྱས་ཏེ་ཨམ་སྟོད་ཤར་གླིང་ནས་གུར་འབུམ་འཁོར་མོ་དང་། བར་གླིང་ནས་མགར་པ་འབྲུག་སྐྱབས་གཉིས་དམིགས་འཛུགས་བྱས་པ་དང་།ཁོ་གཉིས་ཀྱི་རོགས་པར་བར་གླིང་ནས་ང་དང་།  ཕུན་ཚོགས་རྡོ་རྗེ།  རྫ་ཉག་གསོད་གཡུ།  སྦོད་རུ་ནོར་མོ་བཅས་མི་བདུན་དང་ཤར་གླིང་ནས།  དོན་རྣམ་དང་བེ་རི་སྐར་མ། སེར་ཤུལ་འགོ་གཡག་བཅས་མི་བདུན་དང་།  གོང་གསལ་ཁོང་གཉིས་ཚུར་རྒྱབ་པའི་ཁྱོན་ང་ཚོ་མི་བཅུ་དྲུག་རྟ་སྦོད་རང་འགྲིག་ཨ་མདོ་ནས་རྡོག་ཐོན་གྱིས་ཞག་ཚུག་ཁ་ཤས་ཕྱིན་པའི་ལམ་བར་དུ་སེ་བ་རུ་བའི་ཚོང་རྒྱག་མཁན་ཡིན་ཟེར་པའི་འགྲུལ་པ་ཞིག་འཕྲད་པ་དེས་ཁ་སང་འདི་ནས་མེ་མདའ་རང་འབར་མང་པོ་ཡོད་པའི་འགྲུལ་པ་ཞིག་གྲོ་རྩོང་( སློང་མོ་)་རྒྱག་བཞིན་རྒྱག་བཞིན་ཕྱིན་སོང་པའི་ཁྱོ་ཚོས་ཉིན་གཉིས་ཚུན་རྗེས་ཟིན་ས་ཡོད་ཟེར་ཡང་དེའི་ཕྱིར་ཉིན་རྟ་པ་གཅིག་ཐུག་བྱུང་པ་དེར་སྐད་ཆ་འདྲི་སྐབས་ཁྱོད་ཚོའི་དྲི་ཡིས་དེ་ད་ནང་ལམ་བར་འཕྲོག་བཅོམ་བྱེད་བཞིན་ཕྱིན་སོང་ད་ལྟ་ཕལ་ཆེར་ཁ་ཇོ་ལུང་རིང་ཟེར་སར་བསྡད་ཡོད་བཟོ་མེད་ཟེར་བྱུང་པས་ང་ཚོས་དེ་མུར་ཁ་ཇོ་ལུང་རིང་ཟེར་སར་བསྡད་ཡོད་བཟོ་མེད་ཟེར་བྱུང་པའི་ང་ཚོས་དེ་མུར་ཁ་ཇོའི་རི་འགོ་ལ་ཕྱིན་ནས་སོ་ལྟ་བྱེད་བཞིན་ཕྱིན་ནས་སོ་ལྟ་བྱེད་སྐབས་ཁོ་ཚོ་ཁ་ཇོའི་ཉིན་འདབ་འཚམ་ཀ་དོང་གསུམ་གྱི་ཐག་ཉེར་དགྲ་ཟོན་བྱས་ཏེ་བསྡད་འདུག  ང་ཚོས་ག་འདྲ་བྱེད་ཟེར་གྲོས་བྱས་མཐར་གུར་འབུམ་འཁོར་མོ་ནས་དོ་དགོང་མཚན་མོར་ང་ཚོས་དགྲ་ས་འཛིན་ཐུབ་པ་བྱེད་དགོས་ང་ཚོ་ཡོད་ས་མི་དྲུག་ལྷོ་ངོས་ཐང་འབབ་ཆུ་འགྲམ་ལ་འགྲ་རྒྱུ་དང་། འབྲུག་སྐྱབས་གཙོས་ཁྱོད་ཚོ་མི་དྲུག་ཁོ་ཚོའི་ནུབ་ངོས་ས་རོང་ཡོད་སར་འགྲོ་དགོས་པ་དང་། དེ་མིན་ཚོས་བེན་རྟ་བཟུང་ནས་སྡོད་དགོས་ཟེར་སོང་པས་ང་ཚོས་དེ་ལྟར་བྱ་རྒྱུ་གཏན་འཁེལ་བྱས་ནས་དེ་ནུབ་ནམ་ཕྱེད་ཡོལ་ཙམ་ལ་ཁག་སོ་སོ་གཏན་འཁེལ་བྱས་པའི་ས་ཆར་ཕྱིན་ནས་གང་མཚམས་སོང་རྗེས་ནམ་གསལ་ཡོང་གི་འདུག་པར་ང་ཚོས་ས་དཔྱད་ལ་ཞིབ་ལྟས་བྱས་ནས་གད་ཉག་ཅིག་འདུག་པ་དེའི་ཕར་ཕྱོགས་ལ་ཨ་ཁུ་འབྲུག་སྐྱབས་ང་གཉིས་བསྡད་པ་དང་། གད་སྟག་གི་ཚུར་ཕྱོགས་སུ་ཁོ་གཉིས་ཀྱི་སྒུག་ནས་སྡད་ཡོད་པའི་དེ་ཕྲལ་ཁོ་ཚོ་ཡང་རུ་བ་བཤར་བྱུང་ང་ཚོའི་ཐག་ཉེར་སླེབས་སྐབས་ཁལ་གཡག་འདྲོག་ཙམ་བྱས་སོང་པས་ཁོ་ཚོའི་མ་རྒན་ནས་ཀི་བཏབ་སྟེ་དགྲ་སླེབས་འདུག་ཟེར་སོང་བས་ས་འགོ་རུང་ཕ་བུ་ཚོ་དེ་འཕྲལ་ཁྲིས་ཀྱི་ཀོང་ཀོང་ནང་ལ་རྒྱུག་སོང་། 

    ང་ཚོས་མེ་མདའ་ཁ་ཤས་བརྒྱབ་པ་དང་། ཕར་ཕྱོགས་འཁོར་མོ་ཡོད་ས་ནས་ཀྱང་མེ་མདའ་ཁ་ཤས་བརྒྱབ་སོང་ཁོ་ཚོས་ཀྱང་ང་ཚོར་མེ་མདའ་ཐེངས་མང་རྒྱག་གི་འདུག ཨ་ཁུ་འབྲུག་སྐྱབས་ཀྱིས་ད་ཁོ་ཚོ་ཀོང་ཀོང་ནང་དུ་ཡོད་པས་བྱ་ཐབས་ཁག་པོ་རེད་དེ་ལས་ཁར་གཏུག་ཁོ་ཚོའི་སར་རྒྱུག་ན་ལེགས་ཟེར་པར་ངས་དེ་འདྲ་བྱས་ན་ས་དཔྱད་ཡག་པོ་མེད་པས་ཉེན་ཁ་ཡོང་རྒྱུ་རེད་དེ་ལས་ཕར་ཕྱོགས་ཀྱི་རི་མགོར་རྒྱུག་ན་ཁོ་ཚོ་ཀོང་ཀོང་ནང་དུ་ཡོད་པ་གསལ་ཙམ་མཐོང་རྒྱུ་རེད་ལབ་པར་ཨ་ཁུ་ནས་དེ་རང་ཡིན་ཟེར་ང་གཉིས་དེར་སླེབས་རྗེས་ཁོ་ཚོ་གསལ་ཙམ་མཐོང་གི་འདུག་པས་ང་གཉིས་ཀྱིས་མེ་མདའ་ཁ་ཤས་བརྒྱབ་རུང་ཧ་གོ་འདི་གོ་མི་འདུག་པས་ང་གཉིས་ཀྱིས་ད་ང་གཉིས་ཀྱི་མེ་མདར་ཤུགས་ཆེན་པོ་མེད་པས་མདེའུ་འཁྱོལ་གྱི་མེད་པ་འདྲ་ཚེ་བརྟན་གྱི་མེ་མདའ་ཡག་པོ་ཡོད་པས་ཁོ་པ་འདིར་ཤོག་ལབ་ན་ཡག་ས་རེད་ལབ་སྟེ་ཁོ་པ་ཚུར་ཤོག་ཟེར་བོས་ནས་ཚེ་བརྟན་གྱིས་མེ་མདའ་གསུམ་ཙམ་བརྒྱབ་སོང་པས་ཁོ་ཚོ་མ་བདེ་བ་འདྲ་པོ་ཞིག་བྱས་ནས་ཀོང་ཏོང་གི་ཚུར་ཕྱོགས་སུ་ཚང་མ་མཉམ་དུ་འགྲིལ་ནས་ང་ཚོར་མེ་མདའ་ཁ་ཤས་རྒྱག་གི་འདུག   ལྷོ་ངོས་ལ་ཡོད་པའི་འཁོར་མོ་སྐོར་བཅས་ནི་ས་དཔྱད་ཡག་པོ་མེད་རྐྱེན་ཆུ་ཞིག་ཡོད་སར་གབ་ནས་སྡོད་པ་ལས་བྱ་ཐབས་མེད་པ་དང་།  ཁོ་ཚོའི་རྟ་ཡང་མཐོང་རྒྱུ་མི་འདུག་དེ་ནས་ཨ་ཁུ་ང་གཉིས་དང་།  སྦོས་རུ་ནོར་མོ་ཤར་ངོས་སུ་ས་གཤོང་ཞིག་འདུག་པ་དེར་ཕྱིན་ནས་ལྟ་སྐབས་ཁོ་ཚོ་འགོ་མཐོང་རྒྱུ་ཡོད་ཙམ་འདུག་པས་མེ་མདའ་ཁ་ཤས་བརྒྱབ དེ་ནས་ང་དེར་བསྡད།ཨ་ཁུ་འབྲུག་སྐྱབས་ང་ཚོའི་ནུབ་ངོས་སུ་འགྲོས་རྩིས་ཀྱི་ག་ལེར་ཕྱི་བསྣུར་གྱི་འགྲོ་བ་ཁོ་ཚོས་མཐོང་ནས་མི་གཅིག་མགོ་མཐོ་ཙམ་བཏོན་ནས་མེ་མདའ་རྒྱག་གི་འདུག་པས་པས་མེ་མདའ་གཅིག་བརྒྱབ་པས་ཁོ་པ་མགོ་བོ་མཐོང་ཙམ་བྱས་ཏེ་འགུལ་སྐྱོད་མེད་པ་འདྲ་པོ་བྱས་སོང་དེ་ནས་ཨ་ཁུ་འབྲུག་སྐྱབས་ད་གིན་འགྲོ་གི་ཡིན་ཟེར་ས་དེར་བསྡད།  ནོར་མོ་ང་གཉིས་མཚན་མོར་སྡོད་སར་ཕྱིན་ནས་མེ་མདའ་རྒྱག་རྩིས་སྐབས་ལྷོ་ནུབ་ངོས་ནས་རྒྱས་ཚང་སྦྱིན་པ་ཟེར་བ་དེ་ལག་ཏུ་མདུང་ཁྱེར་ནས་ཀི་ཤར་ཁ་ཤས་བརྒྱབ་སྟེ་ངས་ཉི་མ་དེ་རིང་ཁོ་ཚོ་མདུང་རྩེར་འཛེར་གྱི་ཡིན་ཟེར་ཐེ་ཚོམ་མེད་པར་ཁོ་ཚོའི་སར་རྒྱུག་སོང་དེ་མ་ཐག་ཨ་ཁུ་འབྲུག་སྐྱབས་ནས་ད་ཁྱོད་ཚོ་སོས་རན་པ་རེད་འགོ་སྒུར་ཟེར་སྐད་བརྒྱབ་སོང་བས་ང་ཚོས་གསལ་པོ་མ་ཤེས་རུང་ས་འགོ་རུང་དང་། ཁོ་པའི་བུ་ཆེ་བ་གཉིས་ནི་འགོ་དང་། སྐེ་ལ་མེ་མདའ་ཐེབས་ནས་བསད་ཚར་ཡོད་གཤིས་ཁོ་པའི་བུ་ཆུང་བ་དང་།  མག་པ། སྒྲོལ་མ་དང་།  ཡང་ལེན་ཚེ་རིང་བཅས་ཀྱིས་དེ་མ་ཐག་འགོ་སྒུར་གྱི་ཡིན་ཟེར་ནས་མེ་མདའ་ཚང་མ་ང་ཚོས་སར་འཕང་བྱུང་བས་སྐབས་དེར་འཁོར་མོ་ཁོ་ཚོ་ཡང་དེར་སླེབས་ནས་སེར་ཤུས་འགོ་གཡག་སོགས་ཀྱི་དེ་ཚོ་རང་སར་དམར་གསོད་གཏོང་གི་ཡིན་ཟེར་ཉེས་རྡུང་གཏོང་རྩིས་བྱེད་ཀྱི་འདུག་ཨ་ཁུ་འབྲུག་སྐྱབས་ང་གཉིས་ཀྱིས་ཁོ་ཚོའི་ནང་གི་མི་དྲག་པ་གཉིས་པོ་ནི་ང་ཚོའི་བསད་ཚར་འདུག་ད་འགོ་སྒུར་པའི་མི་ལ་ཉེས་རྡུང་གཏོང་རྒྱུ་མེད་ལབ་ནས་བཀག་པ་ཡིན། འོན་ཀྱང་འགོ་གཡག་གིས་མི་འདི་ཚོས་ངའི་ཨ་ཁུ་བསད་པ་རེད་ངས་ཁོ་པ་བསོད་ཀྱི་ཡིན་ཟེར་པར་ངས་ཁྱོད་ཀྱི་འགོ་སྒུར་པའི་མི་ལ་དེ་འདྲ་བྱས་ན་ངས་ཁྱོད་བསོད་ཀྱི་ཡིན་ལབ་པའི་ཁོ་པ་ངུ་ཙམ་བྱས་ནས་སྡད་སོང་། ས་འགོ་རུང་གི་ནག་མོ་དང་གནའ་མ་ཕྲུ་གུ་བཅས་ནི་ཆུ་དཀྱིལ་ལ་འབྱོར་ནས་བསྡད་འདུག  དེ་ནས་ང་ཚོས་ཁོ་པ་ཚོའི་རྟ་དང་།མེ་མདའ་ཚང་མ་རྩིས་ལེན་བྱས་རྗེས་ཨ་ཁུ་འབྲུག་སྐྱབས་ནས་ད་ང་ཚོས་ག་རེ་བྱེད་དགོས་མིན་གསལ་པོ་ཤེས་ཀྱི་མི་འདུག་དབང་འདུས་རྡོ་རྗེ་ཁྱོད་རང་དེ་སྔོན་དཔོན་དབང་ཆེན་དང་མཉམ་དུ་འགྲོ་མྱོང་བའི་འགྲོ་ལུགས་གང་དགོས་ཀྱི་ཡོད་དམ་ཞེས་དྲིས་སོང་བར་ཁོ་པས་གཏེ་པོའི་མགོ་ལག་ལེན་དགོས་པ་རེད་ཟེར་སོང་པས་ས་འགོ་རུང་ཕ་བུ་གཉིས་ཀྱི་འགོ་ལག་བཅད་པ་དེ་ཁྱེར་པ་དང་། ཁོ་ཚོ་མི་གཉིས་དེ་ནུབ་འཁོར་མོའི་འབྲང་ལ་ཉར་པ་དང་།གཅིག་ང་ཚོས་ཉར་པ་ཡིན་དེ་ནས་ང་ཚོ་ལོག་ཡོང་པའི་ལམ་བར་དུ་ས་འགོ་རུང་གི་བུ་གསུམ་པོ་ནག་ཆུ་རྫོང་ལ་རྩིས་སྤྲོད་དགོས་པས་ཉིན་མཚན་ཚང་མར་ང་ཚོ་འབྲང་ཁ་གཉིས་ཀྱིས་ལྟ་སྲུང་བྱེད་ཀྱི་ཡོད་ང་ཚོ་གོ་རེའི་བྲག་དམར་ལ་སླེབས་སྐབས་དེ་ཉིན་ཁོ་ཚོ་ལྟ་སྲུང་བྱེད་རེས་ང་ཚོ་ཡིན་པའི་སྐབས་དང་སྟུན་ནས་བུ་ཆེ་བ་གཉིས་མི་གཞན་གྱི་ཧ་མི་གོ་པ་བྱས་ཏེ་ལྐོག་དུ་བྲོས་དགོས་པའི་བསླབ་བྱ་རྒྱག་དགོས་དེ་ལྟར་མ་བྱས་ནས་ཁོ་ཚོ་ནག་ཆུ་རྫོང་ལ་རྩིས་སྤྲོད་ཀྱང་བྱས་ན་རྟ་ལྕག་ཞུས་ཏེ་ཤ་ཟད་རུས་ལ་ཐུག་པ་བཟོ་ཀྱི་རེད། ཁོ་ཚོས་མི་དྲག་པ་གཉིས་ནི་ང་ཚོའི་བསད་ཚར་བ་རེད་ད་ཁོ་གཉིས་བསད་ན་སྙིང་རྗེ་ཟེར་གྱི་འདུག་པའི་ངས་དེ་ལྟར་ཁོ་གཉིས་ལ་བཤད་པ་ཡིན་འོན་ཀྱང་ཁོ་གཉིས་ཀྱིས་ད་བྲོས་ནུས་པ་མི་འདུག་ཟེར་ནས་བྲོས་རྩིས་བྱེད་ཀྱི་མི་འདུག་དེ་ནས་ང་ཚོ་ཕྱིར་སླེབས་རྗེས་དེ་སྔོན་སེ་ཤུ་ཉི་མ་སོགས་བསད་པའི་རྟ་དང་མེ་མདའ་ཁོངས་སོ་སོར་ཕྱིར་སྤྲོད་བྱས་པ་དང་དེ་མིན་མེ་མདའ་རང་འབར་ལྔ་དང་རས་ཆ་དོ་པོ་དྲུག་ཡོད་པ་ནག་ཆུ་རྫོང་གི་རྒྱུ་ཚབ་ལ་རྩིས་སྤྲད།  བུ་སྒྲོལ་མ་དང་ཡང་ལེན་གཉིས་ཀྱང་ནག་ཆུ་རྫོང་གི་སྐུ་ཚབ་ཀྱི་ཁྲིད་སོང་།  ང་ཚོ་སྡེ་དཔོན་ཚོས་ཁོ་གཉིས་གང་དྲག་བྱེད་རོགས་ཟེར་ཞུ་བ་མང་པོ་བྱས་སྟབས་ཁོ་གཉིས་ནག་ཆུར་འབྱོར་རྗེས་འབྱོར་ལྕག་ཁ་ཤས་བརྒྱབ་པ་ལས་དེ་མིན་སྐྱོན་ཆེར་བྱུང་མི་འདུག    རྗེས་སུ་ནག་ཆུ་རྫོང་གི་ང་ཚོར་གཟིགས་གསོས་དཔའ་དར་ཡིན་ཟེར་ཇ་སྒམ་གཉིས་དང་། མི་རེར་དར་ཁ་རེ་སྤྲད་བྱུང་། 

    ང་རང་ལོ་ཉི་ཤུ་རྩ་ལྔ་སླེབས་སྐབས་ང་ཡི་སྤུན་སྐལ་བསྟན་དང་ཞང་པོ་ནོར་སྲིད་གཉིས་གཙོས་རི་དྭགས་རྒྱབ་པར་ཕྱིན་པ་གཙང་རྒྱུད་ཤོག་ཁའི་ཇག་པ་བྱུ་རག་བཀྲ་ཚེ་དང་།གཡར་རྩི་རྒྱ་རྣམས་སོགས་ཇག་པ་ཚོ་གཅིག་དང་།ཕྲད་ནས་གཙང་རྒྱུད་ཇག་པས་སྐལ་བསྟན་དང་ནོར་སྲིད་གཉིས་བསད་པ་དང་།མེ་མདའ་གཉིས་འབྲལ་ཆས་དང་ཁལ་གཡག༢༠རྟ་བཅས་ཚང་མ་ཁོ་ཚོས་འཕྲོད་འདུག་པ་ཟེར་བ་ང་ཚོས་ཧ་གོ་བྱུང་པས་ངས་ལམ་སང་དགྲ་ལེན་སྤྲོད་རྒྱུའི་སེམས་ཐག་བཅད་པ་ཡིན་འོན་ཀྱང་ཨ་ཁུ་འབྲུག་སྐྱབས་ཀྱིས་དགྲ་ཤ་ལེན་རྒྱུ་ཏོག་ཙམ་དང་འགྱང་ནས་སྐྱོན་མི་ཡོང་དེ་ལས་མི་གཉིས་བསད་པ་དེའི་རྗེས་འཇུག་དགེ་རྩ་སྒྲུབ་རྒྱུ་གལ་ཆེན་ཡིན་པའི་སྔོན་ལ་དགོན་སྡེ་བསྙེན་བཀུར་དང་།བླ་མ་སྔོ་ཞུས་བྱས་ན་དགའ་གི་རེད་ཟེར་གྱི་འདུག་པས་དེ་ལྟར་བྱས་བ་ཡིན།དེ་ནས་ཟླ་གཉིས་ཙམ་ཕྱིན་རྗེས།    ང་ཚོས་ཨམ་སྟོད་དཔོན་བ་སུག་བསོད་རྡོར་སར་ཡིག་འཕྲིན་སྐུར་ནས་གཙང་རྒྱུད་པས་ང་ཚོའི་མི་གཉིས་བསད་པ་དང་།མེ་མདའ་དང་འབྲང་ཆས་སོགས་འཕྲོག་པའི་དགྲ་ལེན་ལེན་པར་ང་ཚོ་སྤུན་ཉེ་ཚོ་འགྲོ་རྩིས་ཡིན་ཨམ་སྟོད་སྡེ་དཔོན་གྱིས་ང་ཚོས་དམག་སྣོན་གང་མང་གཏོང་རོགས་བརྗོད་པ་དང་། ང་ཚོས་ཐག་ཉེར་ཡོད་པའི་སྡེ་དུད་ཚོར་ཡང་གང་སར་ཆ་འཕྲིན་སྐུར་ནས་མགྱོགས་མྱུར་གཙང་རྒྱུད་ཤོག་ཁའི་ནང་དུ་དགྲ་ལན་ལེན་པར་འགྲོ་དགོས་པའི་སྐུལ་སློང་བྱས་མཐར་ཉིན་ཤས་སོང་རྗེས་མི་ཁག་གཅིག་སྔོན་ལ་འདུ་འཛོམས་བྱུང་པའི་བོད་ཟླ་༣ཚེས༣ཉིན་ང་ཚོ་དེར་ཡོད་རྣམས་སྔོན་ལ་ཐོན་པ་དང་། རྗེས་ལ་དམག་རོགས་ཡོང་མཁན་ཚོ་དེར་སྒུག་སྡོད་ཀྱི་ག་ལེར་སྐྱོད་སྐབས་སྔ་རྗེས་མི་ཁག་གཅིག་སླེབས་བྱུང་བ་ཚང་མ་སྡོམ་ན་དམག་མི་བཞི་བཅུ་ཙམ་དེ་ནས་ང་ཚོ་ཤར་སྐྱོད་སྐབས་ལམ་བར་ས་ཆ་ཞིག་ནས་རྟ་དུམ་གཅིག་མཐོང་གི་འདུག་པས་ང་ཚོ་དེའི་ཐག་ཉེར་སླེབས་སྐབས་རྟ་དེ་ནི་དེ་སྔོན་ང་ཚོའི་རྟ་དགྲ་ཤོར་བ་རེད་འདུག་རྗེས་སུ་གོ་ཐོས་ལ་གོང་གསལ་གཙང་རྒྱུད་ཇག་པའི་བའི་སྤུན་སྐལ་བསྟན་དང་། ནོར་སྲིད་གཉིས་བསད་ནས་མེ་མདའ་དང་།རྟ་ཁལ་འཕྲོག་ཏེ་ཁོ་ཚོ་ལོག་འགྲོ་པའི་ཉིན་དང་པོའིི་མཚན་མོར་ཁོ་ཚོའི་སར་ཨ་མདོའི་ཡུལ་ལྷའི་ཆོ་འཁྲུལ་ཡིན་པ་འདྲ་ཟེར་པའི་མེ་དམར་པོ་ཞིག་སླེབས་ནས་འུར་སྒྲ་ཆེན་པོ་ཞིག་གྲགས་ཏེ་ཁོ་ཚོའི་རྟ་ནོར་ཚང་མ་རི་ལ་ཤོར་པ་དང་། མི་ཚང་མ་བྲོས་པ་རེད་ཟེར་གྱི་འདུག་དེ་ནུབ་ང་ཚོ་དེར་སྡད། དེའི་ཕྱིར་ཉིན་ང་ཚོ་སྔ་པོར་གྲི་ནག་ལུང་རིང་དཀར་མོ་ཟེར་པའི་ཐང་གཞུང་བརྒྱུད་སྐྱོད་དེ་ཉིན་གུང་ཙམ་ལ་ང་ཚོ་སྔོན་དུ་འགྲོ་མཁན་གཅིག་གི་ཆུ་མིག་ཡོད་ས་ཞིག་ལ་ཇ་བཀོལ་ནས་སྡད་པ་ཡིན་ང་ཚོས་ཇ་བཀོལ་མ་ཐུབ་གོང་རྗེས་མ་ཚོ་ཡང་དེར་སླེབས་བྱུང་པས་སྒྲུང་མཁན་རྡོ་རྗེ་དོན་འགྲུབ་ཟེར་པ་དེ་སྨྱོ་བ་འདྲ་པོ་ཞིག་བྱས་ནས་འདུག་རྒྱུ་མི་འདུག་དགྲ་ཐུག་གྲབས་འདུག  ནམ་མཁར་སྤྲིན་ནག་འཁྲིགས་པ་དང་། ས་གཞུར་རྡུར་དམར་འཁྲིགས་ཀྱི་རེད་ང་སྔོན་ལ་འགྲོ་ཟེར་གྱི་འདུག་པས་སྒྲུང་མཁན་དང་། ང་ཚོ་ཁ་ཤས་སྔོན་དུ་ཕྱིན་པ་དང་། གཞན་རྣམས་ཀྱང་རྗེས་སུ་ཡོང་མུས་ལ་གང་མཚམས་ནས་རྗེས་མ་རྣམས་ཀྱིས་ཕར་ཕྱོགས་ཀྱི་རི་སྒང་ནས་མི་རྟ་ཁ་ཤས་བྲོས་སོང་ཟེར་ཀི་འབོད་བྱས་བྱུང་པས་དེ་ཕྲལ་ང་དང་ཨ་བན་སྤུག་སྡིས་མགོ་ཆུག་བཅས་མི་གསུམ་མགྱོགས་མྱུར་ཁོ་ཚོ་བྲོས་འགྲོ་བའི་མདུན་ཕྱོགས་སུ་རྒྱུག་ནས་ཁོ་ཚོ་ལམ་སྒུག་བྱ་རྩིས་ལ་ཁོ་ཚོ་ཏག་ཏག་གདོང་ཐུག་རྒྱབ་འདུག་སྐབས་དེར་ནམ་མཁའ་ནས་གངས་ཆར་ཞིག་ཀྱང་བབས་བྱུང་བ་དང་ས་ཡང་རུབ་གྲབས་འདུག་ཁོ་ཚོ་ནག་ཧྲོག་ཧྲོག་མཉམ་དུ་རུག་པ་འདྲ་པོ་བྱས་སོང་པས་ངས་དེར་གཏད་དེ་མེ་མདའ་ཞིག་རྒྱབ་པ་དེ་མེ་དམར་ཆེ་ལེར་ཁོ་ཚོའི་དཀྱིལ་ལ་ཐིམ་སོང་པའི་མེ་མདའ་རྒྱག་ཐེངས་གཅིག་ལ་མི་གཉིས་ལ་ཐེབས་ནས་གཅིག་གི་རྐུབ་ལ་རྨས་སྐྱོན་བཟོས་པ་དང་།  གཅིག་གི་རྐང་པར་རྨས་སྐྱོན་ཚབ་ཆེན་བཟོས་པའི་མ་ཚད་རྟ་གཅིག་ཀྱང་བསད་འདུག   མི་གཅིག་དེ་ཕྲལ་ཁོ་ཚོའི་ཐག་ཉེར་གྲོག་རོང་ཞིག་ཡོད་པ་དེར་ཕྱིན་ནས་མེ་མདའ་རྒྱག་རྩིས་བྱེད་ཀྱི་འདུག  དེ་ཕྲལ་ངས་རྟ་དེར་བཞག་སྟེ་རྐང་ཐང་མར་ལག་མདའ་ཁྱེར་ནས་ཁོའི་རྩར་ཕྱིན་ནས་སྐྱབས་བླ་འགོ་སྒུར་ཟེར་ཀི་འབོད་བྱས་པས་ཁོས་ལགས་སོ་ཟེར་མགོ་སྒུར་སོང་ང་ཁོ་རང་སར་སླེབས་སྐབས་ཁོ་རང་མེ་མདའ་ཐེངས་ལྔ་རྒྱག་རྩིས་བྱས་རུང་འབར་མ་ཐུབ་ནས་མེ་མདའི་སྤོར་ཏོག་ཨབ་ཁུང་ནང་བཅུག་རྩིས་བྱེད་ཀྱིན་སྡད་འདུག   

    ཁོ་པར་སྐད་ཆ་དྲི་སྐབས་ཁོ་པ་ནི་ངས་སྤུན་བསོད་མཁན་དབྱར་རྩི་རྒྱས་རྣམ་ཡིན་པ་ཁས་ལེན་་བྱས་སོང་བའི་མ་ཚད་གཙང་རྒྱུད་ཀྱི་སྡེ་རྣམས་རུ་བ་སྡོད་སྟངས་ཞིབ་ཕྲ་ཤོད་ཀྱི་འདུག་ངས་སེམས་ནང་ཁོང་ཁྲོ་ཚད་མེད་ཡོང་གི་འདུག་འོན་ཀྱང་ཁོ་པ་མགོ་སྒུར་སོང་ཙང་བསད་ན་རུང་གི་མ་རེད་སྙམས་ནས་བཞག་པ་ཡིན། དེ་མུར་ང་ཚོའི་མི་རྗེས་མ་ཚོ་ཡང་དེར་སླེབས་བྱུང་པས་ངས་ཁོ་པ་ནི་ངའི་སྤུན་སྐལ་བསྟན་བསོད་མཁན་རེད་འདུག་ཟེར་ཁོ་ཚོར་ཤོད་སྐབས་ཁོ་ཚོས་འོ་ན་མི་འདི་དམར་གསོད་གཏོང་དགོས་ངེས་རེད་ཟེར་ཡང་ངས་ཡང་བསྐྱར་མནོ་བསམ་བཏང་སྟེ་མགོ་སྒུར་པའི་མི་བསོད་རྡུང་བྱེད་པ་འམ་སྡུག་པོ་བཏང་ན་དེ་ནི་ཕོ་ཐ་མའི་བྱེད་སྟངས་ཤིག་རང་རེད་སྙམས་ནས་ཁོ་པ་ལོག་རྒྱུག་ཟེར་ཕྱིར་ལོག་བཏང་བ་ཡིན། དེ་ནས་ང་ཚོ་དེ་དགོང་དེར་ཇ་བཀོལ་ནས་གང་འཚམས་སྡད་རྗེས་མཚན་མོར་དབྱར་རྩི་རྒྱས་རྣམ་ཀྱིས་བཤད་པ་ལྟར་ན་དེ་ནས་མི་རིང་པར་གཙང་རྒྱུད་ཀྱི་སྡེ་་དུད་བརྒྱ་སྐོར་ཞིག་ཡོད་པ་དེའི་ཚུར་ཕྱོགས་སུ་ཇུ་རག་བཀྲ་ཚེ་ཡོད་སའི་སྡེ་དུད་བཅུ་སྐོར་ཞིག་བསྡད་ཡོད་ཚོད་འདུག་པ་དེའི་ཕྱོགས་སུ་རྒྱུག་དམག་རྣམས་ཤར་སྐྱོད་བྱས་ཏེ་ཇུ་རག་བཀྲ་ཚེ་ཡོད་སའི་སྡེ་དུད་བཅུ་སྐོར་དེའི་སར་སླེབས་ནས་ལུག་གཅིག་སྟོང་སྐོར་དང་། ནོར་སུམ་བརྒྱ་སྐོར་རྟ་ལྔ་བཅས་དེད་ནས་ཕྱིར་ལོག་བྱས་པ་དང་། ཕྱི་ཉིན་ཞོགས་པ་གཙང་རྒྱུད་ཀྱི་རྟ་པ་དྲུག་བཅུ་སྐོར་ཞིག་གིས་རྗེས་འདེད་བཏང་ཡོང་གི་འདུག ང་ཚོའི་མི་ཁག་གཅིག་གིས་རྗེས་ལ་ནོར་ལུག་རྣམས་དེད་ནས་ཡོང་བ་དང་།  ང་ཚོ་མི་ཁ་ཤས་སྔོན་ལ་སོ་བལྟ་བྱེད་བཞིན་འགྲོ་གི་ཡོད་གཙང་རྒྱུད་ཀྱི་རྟ་པ་རྣམས་ཤར་སེར་ཡོང་ནས་ང་ཚོ་དང་ནོར་ལུག་འདེད་མཁན་གྱི་བར་ལ་སླེབས་ཚར་གྱི་འདུག སྐབས་དེར་ང་ཚོས་མདུན་དུ་གཙང་པོ་ཞིག་ཡོད་པ་དེ་དོན་བདེ་པོ་མེད་པས་ང་ཚོ་ཡར་ཙམ་ཆུ་རྒྱུན་དུ་ཕྱིན་ནས་དར་ཟམ་ཞིག་ཐུག་པ་དང་དེ་དོན་ཏེ་གཙང་པོའི་ཕར་ཕྱོགས་སླེབས་མཚམས་དེ་ཕྲལ་གཙང་རྟ་པ་ཚོ་དང་།  འཛིང་རྩིས་ཀྱིས་ཁོ་ཚོས་མི་ཁ་ཤས་བསོད་དགོས་བསམ་བྱུང་འོན་ཀྱང་ཁོ་པ་ཚོ་ནོར་ལུགས་འདེད་མཁན་ཕྱོགས་སུ་འགྲོ་བ་ལས་ང་ཚོའི་ཕྱོགས་སུ་ཡོང་ནུས་མ་སོང་། ང་ཚོས་ཀྱང་དེར་ཕྱོགས་སུ་རྒྱུག་ནས་ནོར་ལུག་འདེད་མཁན་སྐྱོབ་རྩིས་བྱས་པ་ཡིན།  ཡང་ཁོ་ཚོས་ང་ཚོ་དེར་ཕྱོགས་སུ་རྒྱུག་ཡོང་བ་མཐོང་ནས་ཐེ་ཚོམ་ངང་བལྟ་ཙམ་བལྟ་ཙམ་བྱས་མཐར་མེ་མདའ་གཅིག་ཀྱང་མ་རྒྱབ་པར་རྟ་པ་དྲུག་ཅུ་ཚང་མ་ཕྱིར་བྲོས་བྱས་སོང་། དེ་ནས་གང་འཚམས་སོང་རྗེས་བུད་མེད་དང་།  ཕྲུ་གུ་མང་པོ་ཞིག་རྐང་ཐང་མར་རྒྱུག་ཡོང་གི་འདུག་པ་དེ་ཚོས་ཁྱོད་ཚོས་ལུག་མ་མོ་ཚང་མ་འདེད་པར་བརྟེན།  ལུག་ཕྲུག་ཡོད་ཚད་སྡད་ཡོད་པ་རྣམས་ཚང་མ་ཤི་རྒྱུད་ཡིན་པས་མ་མོ་རྣམས་ཕྱིར་སྤྲོད་རོགས་ཟེར་ཞུ་བ་འཐེན་གྱི་འདུག་པས་ང་ཚོས་ལུག་མ་མོ་ལྔ་བརྒྱ་ཙམ་ཞིག་ཕྱིར་སྤྲད་པ་ཡིན།