སྒོ་ཤེས་རབ་རྒྱ་མཚོ།
གཅིག
ཉེ་ཆར་ལི་ཐིང་དགོན་ཆེན་གྱི་འདུ་ཁང་ཆེན་མོ་སྲེག་ཟས་ཁྱུར་མིད་བཏང་བ་དང་། བླ་རུང་ཆོས་སྒར་དང་། རྒྱལ་ཐང་གཉིས་སུའང་མེ་སྐྱོན་བྱུང་བ་སོགས་བོད་ཀྱི་ཡུལ་གྲུ་དུ་མར་མེ་ཡི་འཇིགས་པ་བསྟུད་མར་བྱུང་བས། རང་རིགས་སྤུན་ཟླ་གཞན་དག་དང་འདྲ་བར་ངའི་སེམས་ཀྱང་དེ་ཙམ་སྐྱིད་ཀྱི་མི་འདུག དེ་ལས་ཀྱང་ཐུ་བ་ཞིག་ལ། མི་རེ་ཟུང་གིས་གོད་ཆག་འདི་རིགས་ལ་བསྟན་པའི་རྣམ་འགྱུར་གོ་བས་ནི། ལྷག་ཏུ་ཀུན་རྟོག་སྒྱུ་མའི་རྟ་ཕོ་བསམ་གཞིགས་ཀྱི་ཀློང་ལ་དབང་མེད་དུ་ཤོར་རོ། །
ཅི་ལྟར་ཞེ་ན། བླ་རུང་ཆོས་སྒར་གྱི་བཙུན་མའི་གླིང་དུ་མེ་སྐྱོན་བྱུང་སྐབས། རང་རེའི་སྤུན་ཟླ་འགའ་ཞིག་གིས་ནི། མེ་ལྕེ་ལྷབ་ལྷུབ་འབར་བཞིན་པའི་ནུབ་མོ་དེ་ག་ཉིད་དུ། གདུང་སེམས་མཉམ་དུ་བསྐྱེད་རྒྱུ་ཕར་བཞག་ནས། སྐད་འཕྲིན་གྱི་ཚོགས་པ་རེ་ཟུང་ནང་དུ་གནས་ཚུལ་དེར་ཟ་དང་ཟུར་ནས་དགའ་འབོད་དང་དགོད་སྒྲ་སྒྲོག་པ་ལྟ་བུའི་རྣམ་འགྱུར་བསྟན་རབས་འདུག་སྟེ། རྒྱུ་མཚན་དྲིས་ཚེ། དེ་གའི་མཁན་པོ་ག་གེ་མོ་སྒེར་གཅོད་ཆེ་བས་ཡིན་ཞེས་སྨྲས་འདུག་པར་གཞིགས་ན། རྣམ་འགྱུར་དེ་འདྲ་སྟོན་མཁན་དག་ནི་དམངས་གཙོ་རང་དབང་ལ་དགའ་མོས་ཆེ་བ་རེ་ཡིན་ནམ་སྙམ་བྱུང་།
སྤྱིར་བཏང་། རང་རེ་ཁ་བ་ཅན་པ་རྣམས་ཀྱང་ལྟ་བ་སྣ་གཅིག་ཅན་ནས་སྣ་མང་ཅན་དུ་འགྲོ་བཞིན་པ་དང་། བསམ་བློ་ཆིག་རྐྱང་ཅན་ནས་སྣེ་མང་ཅན་དུ་ཕྱོགས་བཞིན་པའི་དབང་གིས། ཡུལ་ལུང་སོ་སོ་རུ་ཕྱི་ནང་གི་སྒེར་གཅོད་ཀྱི་དབང་ཤུགས་སུ་ལའང་མགོ་བོ་སྒུར་རྐྱང་མི་བྱེད་པར། དྲང་བདེན་དང་། འདྲ་མཉམ། རྩིས་ཐང་སོགས་གཙིགས་སུ་འཛིན་པའི་བག་ཆགས་ཤིག་གཞོན་སྐྱེས་ཚོའི་ཀུན་གཞིའི་ངོས་ནས་སད་ཀྱིན་ཡོད་པས། དེ་ནི་ཤིན་ཏུ་བསྔགས་འོས་པའི་གནས་སུ་ངས་ཀྱང་བརྩི་སྟེ། སྐྱེས་བུ་སྒེར་རེ་རེའི་ལྷན་སྐྱེས་ཀྱི་ཐོབ་ཐང་གི་ཕྱིར་དུ། དབང་ཤུགས་དང་ཟིལ་ཤུགས་ཁོ་ནར་མི་བསྟུན་པར། རྒྱུ་མཚན་དང་གནས་ལུགས་ཀྱི་ལག་ཆར་བརྟེན་ནས་རྒོལ་ལན་སྤྲོད་རུང་བ་ནི། དུས་རབས་ཉེར་གཅིག་པའི་དཔལ་ཡོན་སྤྱིའི་འགྲོ་ལུགས་ཤིག་ཏུ་གྲུབ་ཡོད་པས་སོ། །
འོན་ཏེ། ད་རེབ་ཀྱི་གནས་ཚུལ་འདི་ནི་སྒེར་གཅོད་མི་གཅོད་དང་འབྲེལ་བ་མེད་པའི་རང་བྱུང་གོད་ཆག་ཅིག་རེད་ཨང་། སྤུན་ཟླ་ཚོའི་གཞིས་ཁྱིམ་མེ་རུ་ཤོར་དུས་དང་། ཆོས་གྲོགས་ཚོའི་སྡོད་ཤག་ཐལ་བར་གྱུར་དུས། དགའ་འབོད་དང་ཐལ་སྒྲ་སྒྲོག་མཁན་གྱི་བོད་མི་ཡོད་པ་གོ་མ་ཐག་ཏུ། བླ་རུང་གི་གྲྭ་ཤག་དེ་དག་དང་འདྲ་བར་སྐད་ཅིག་ཉིད་ལ་ངའི་སེམས་པའང་མེ་རུ་འབར་སོང་། སྙིང་ཁོང་དུ་བས་བཙངས་བྱུང་། ན་ཟུག་དང་ཚ་གཟེར་སྐྱེས་བྱུང་།
གྲོགས་པོ་ཚོ། འུ་ཚོས་འདྲ་མཉམ་དང་། རང་དབང་། ཐོབ་ཐང་། དམངས་གཙོ་སོགས་གླེང་དོན་ནི། འཛམ་གླིང་གཙོ་རྒྱུགས་དང་མཐུན་པའི་ཤེས་དཔལ་གྱི་ལམ་ལུགས་ཤིག་བོད་ལའང་ཡོད་ན་ཅི་མ་རུང་སྙམ་སྟེ། ལམ་ལུགས་དེའི་འོག་ཏུ་བོད་མི་རེ་རེ་རྩིས་ཐང་ལྡན་པའི་ངང་ནས་འཚོ་ཐུབ་པའི་སྐལ་བ་ཞིག་བསུ་བའི་ཆེད་མ་རེད་དམ།
དེ་བཞིན་དུ་འུ་ཚོས་དགག་སྒྲུབ་དང་། དོགས་སློང་། དཔྱད་བརྗོད་སོགས་བྱེད་དོན་ཡང་། རང་གི་སྲོལ་རྒྱུན་གྱི་རིག་གནས་དང་གོམས་གཤིས་ལ་ཕྱི་དོར་བྱས་ནས་དེ་ལ་འོད་མདངས་གསར་པ་ཞིག་རྒྱས་སུ་འཇུག་འདོད་པ་དང་། གཞན་གྱི་ཁོག་རྒྱ་དང་བློ་གྲོས་ཀྱི་ས་བོན་བོད་དུ་དྲངས་ཏེ་སྣ་ཚོགས་ཤེས་རིག་གི་དགའ་ཚལ་རང་ལ་སྨིན་དུ་འཇུག་འདོད་པས་ཡིན་གྱི། རང་དང་ལྟ་ཚུལ་མི་མཐུན་པ་དང་། དགའ་མོས་མི་མཚུངས་པ་དག་ལ་ཕན་ཚུན་དགྲ་རུ་བལྟས་ཤིང་། གྱོད་དུ་གྱུར་ཏེ། གཅིག་གི་མགོར་སྡུག་ཐོན་དུས་གཅིག་ཤོས་ཀྱིས་དགའ་འབོད་སྒྲོག་པའི་ལམ་དུ་འགྲོ་རྒྱུ་གཏན་ནས་མ་ཡིན་ཨང་།
སྔར་རྒྱ་ནག་གི་ས་ཕྱོགས་ག་གེ་མོ་རུ། གྲུ་གཟིངས་ཤིག་མཚོ་ནང་དུ་ནུབ་ལ་ཉེ་སྟེ་གྲུ་ཐོག་གི་མི་རྣམས་ཨག་སྐད་དི་རི་རིར་གྱུར་ཚེ། ཐག་རིང་ན་ཡོད་པའི་རྒྱ་མི་དག་གིས། "ག་ལེར་ཕེབས་ཨཱ"ཞེས་སྨྲས་པའི་གསར་འཕྲིན་གྱིས་འཛམ་གླིང་ཧང་སང་བར་བྱས་སྐབས། ངས་ཀྱང་། "དེ་འདྲ་ཡིན་ནི་རེད། མི་རིགས་དེའི་ཀུན་སྤྱོད་ནི་ཅིག་ཅིག་ཅིག་དང་ཉིག་ཉིག"ཅེས་ལུང་བ་གང་བཤད་པ་ཡིན།
ཡང་ཐེངས་ཤིག རྒྱ་གྲོང་ཆེ་གེ་མོ་རུ་མཁར་མཐོན་པོ་ཞིག་གི་ཡང་རྩེ་ནས། སེམས་སྡུག་གིས་གཟིར་བའི་མི་ཞིག་མར་ལྡིང་རྩིས་བྱས་སྐབས། འོག་གི་ལྟད་མོ་པ་ཚོས། "གྲོགས་པོ། མགྱོགས་པོར་མཆོངས་དང"ཞེས་དགའ་བསུའི་ཐལ་མོ་བརྡབས་པའི་གནས་ཚུལ་གོ་དུས་ཀྱང་། ངས་སྔར་བཞིན་མགོ་བོ་གཡུག་ཞོར། "ཁོ་ཚོའི་ཀུན་སྤྱོད་ཚད་འདི་འདྲ་ཞིག་ཏུ་ལྷུང་དོན་ནི། ཅིག་ཅིག་རེད། ཉིག་ཉིག་རེད།"ཅེས་དཔྱད་པ་གཏོང་ཁུལ་གྱི་སྦྱོར་བ་ལྷུར་བླངས་སོ།། དེ་སྐད་འཆད་པའི་གནས་སྐབས་ཀུན་ཏུ། རང་གི་མི་རིགས་ལ་ནི་སེམས་བཟང་པོ་ཡོད། བརྩེ་བ་ཡོད། སྙིང་རྗེ་ཡོད། གཞན་ལ་སེམས་ཁུར་དང་རོགས་སྐྱོར་བྱེད་སྙམ་པའི་ང་རྒྱལ་དང་ཁེངས་དྲེགས་ཤིག་དུས་དང་དུས་སུ་མིག་མདངས་ལས་ཤོར་འགྲོ་ཡི་འདུག
ཡིན་ན་ཡང་། དེ་རིང་ཆོས་སྡེ་ཆེན་པོ་ཞིག་ཏུ་མེའི་འཇིགས་པ་བྱུང་དུས། ལེགས་སོའི་ཐལ་མོ་རྡེབ་པའི་བོད་མི་ཡོད་ཚུལ་དངོས་སུ་གོ་དུས། ངའི་སྔར་གྱི་ང་རྒྱལ་དེ་ནི་རྒྱུ་མཚན་ལྡན་པའི་ང་རྒྱལ་ཞིག་མིན་པ་འདྲ་བས། དར་ཅིག་ལ་ཧད་དེ་ལུས་པར་གྱུར།
གཉིས།
ཁོ་བོ་ལོ་ན་ཆུང་དུས་སུ། ལོ་ལོན་བགྲེས་སོང་ཚོས་ཉི་མར་བསྲོ་ཞོར་གྱི་ཁ་བརྡ་ལ་ཉན་རྒྱུར་ཧ་ཅང་དགའ། ཁོ་ཚོའི་གཏམ་གྱི་བརྗོད་གཞི་ནི་ངེས་པ་མེད་པར་ག་ས་གང་དུ་འཕྲོ་བས། ས་ཆ་གང་ཞིག་ཏུ་ཆུ་ལོག་བརྒྱུགས་པ་དང་། མེ་ཤོར་བ། ས་ཡོམ་བརྒྱབ་པ་སོགས་ཀྱི་བྱུང་བ་གླེང་སྐབས། "ཨ་ཧ་བོ། སྙིང་རྗེ"ཟེར་ནས་མིག་ཆུ་ཡང་ཡང་གཏོང་། ཁྱིམ་མཚེས་གཡས་གཡོན་དུ་བཀྲ་མི་ཤིས་པ་དང་། རྐྱེན་ངན་རེ་བྱུང་བའི་གནས་ཚུལ་བཤད་ནས། སེམས་སྡུག་གིས་དངན་པ་འཐེན་བཞིན་ཟས་ཟ་བའི་ཡི་ག་ཡང་འགག་འགྲོ་བ་ཡིན།
རེད། བགྲེས་སོང་དེ་དག་ནི་མ་གཞི་ནས་མིག་ཆུ་གཏོང་རྒྱུར་དགའ་བ་འདྲ་སྟེ། དྲི་མེད་ཀུན་ལྡན་བཙོན་གྱིས་མནར་ཚུལ་བཤད་ན་མིག་ཆུ་འཆོར། སེང་ལྕམ་འབྲུག་མོ་ཧོར་གྱིས་འཕྲོག་ཚུལ་བཤད་ན་མིག་ཆུ་འཆོར། འགྲོ་བ་བཟང་མོར་བར་ཆད་བྱུང་ཚུལ་བཤད་ན་མིག་ཆུ་འཆོར། སྣང་ས་འོད་འབུམ་སྡུག་གིས་མནར་ཚུལ་བཤད་ན་མིག་ཆུ་འཆོར། ད་དུང་། ཁོ་ཚོའི་གྲས་ན། ཨ་ཁུ་ཚང་གི་ལུ་གུ་སྤྱང་ཀིས་བསད་པ་གོ་ན་མིག་ཆུ་འཆོར་མཁན་དང་། ཨ་ཞང་ཚང་གི་ཁྱི་མོ་དུག་གིས་ཤི་བ་ཐོས་ན་མིག་ཆུ་འཆོར་མཁན་ཡང་མང་པོ་ཡོད།
འོན་ཀྱང་ཁྱད་མཚར་ཞིག་ལ། གཞན་གྱི་སྡུག་བསྔལ་གླེང་ན་མིག་ཆུ་འཆོར་སླ་བའི་བགྲེས་སོང་དེ་ཚོས། རང་ཉིད་ཀྱིས་མྱངས་པའི་དཀའ་སྡུག་གི་ལོ་ཟླ་ཕྱིར་དྲན་བྱས་དུས་མིག་ཆུ་གཏོང་བ་ཧ་ཅང་ཉུང་། འཇིག་རྟེན་ཞིག་གི་ཆག་འཇིག་ཡོད་ཚད་ཀྱི་མྱོང་བ་དངོས་སུ་བརྒྱུད་པའི་ཁོ་ཚོར་མཚོན་ན། མུ་གེས་གཟིར་བའི་ལོ་ཟླ། འཐབ་རྩོད་ཀྱིས་མནར་བའི་བསྐལ་བ། "རིག་གསར"གྱིས་བཅུན་པའི་དུས་ཚིགས་སོགས་སུ་རང་ཉིད་ཀྱི་མགོ་ལ་ཆག་སྒོ་ཅི་བྱུང་ཞིབ་ཕྲ་གསུང་རྒྱུ་ལོས་ཡོད་དེ། དེ་དག་རེ་རེ་བཞིན་གླེང་མོལ་གྱི་སྐབས་སུ། སེམས་པ་ལྷོད་ཤིག་གེ་དང་། ངོ་མདངས་བརྟན་ལྷང་ངེ་བྱེད་པ་ལས། མིག་ཆུ་འདོན་པ་ཕར་ཟད་དབུགས་འཚང་ཙམ་གྱི་རྣམ་འགྱུར་སྟོན་མཁན་ཡང་ཉུང་ལ། ད་རུང་ལན་རེར་སྡུག་བསྔལ་གྱི་མྱོང་བ་འཇིགས་རུང་དག་དགོད་ཞོར་རྩེ་ཞོར་དུ་སྨྲ་བར་བྱེད་དོ། །
ངོ་མ། བགྲེས་སོང་དེ་ཚོའི་རྒྱུད་ན་དཀའ་སྡུག་གིས་མི་ཐུལ་བའི་རུས་རྐང་ཞིག་དང་། མྱ་ངན་གྱིས་མི་ཆུན་པའི་སྤྲོ་སྣང་ཞིག་ལྷན་སྐྱེས་སུ་མངའ་བའི་ཚུལ་ད་ལྟ་དྲན་ན། བོད་མི་རྣམས་སེམས་བཟང་ཡིན། སྙིང་རྗེ་ཆེ། གློ་ཡོད། རུས་པ་མཁྲེགས། བུ་རྒོད་ཟེར་བའི་སྐད་ཆ་རྣམས་ཀྱང་བཤད་སྲོལ་ཙམ་མིན་པའི་ངེས་ཤེས་སྐྱེས། སྐྱེས་ནས་ཀྱང་ལྷད་མེད་པའི་བརྩེ་བ་དང་། ལན་ལ་མི་རེ་བའི་སེམས་ཁུར། མ་བཅོས་དག་གཙང་གི་རང་གཤིས་དེ་དག་ནི། ཤེལ་གྱི་མཆོད་རྟེན་བརྩེགས་འདྲའི་གངས་རི་མཐོན་པོ་དང་། གཡུ་ཡི་མུ་ཏིག་བཞུས་འདྲའི་གངས་ཆབ་རིང་མོ་ཇི་བཞིན། མདོ་དབུས་མཐོ་སྒང་གི་འཇིག་རྟེན་འདི་བརྒྱན་པའི་འོད་ཀྱི་ཕྲ་ཚོམ་རེ་རེ་ཡིན་པའང་ཚོར་སོང་།
གསུམ།
མིག་རྡེབ་ལོང་ཙམ་ལ། རང་ཉིད་བགྲང་བྱའི་ཐེམ་པ་སོ་བརྒྱད་དུ་བརྒལ་ཞིང་། བགྲེས་སོང་དེ་དག་ཀྱང་རེ་རེ་བཞིན་བཞུད་ཟིན་པའི་ཤུལ་ན། མི་རབས་གསར་པའི་དཔུང་ཁག་ཅིག་ཆར་རྗེས་སུ་ཤ་མོ་བརྡོལ་བ་བཞིན་ཐོལ་གྱིས་འཁྲུངས་བྱུང་སྟེ། ཁོང་ཅག་ནི་བློ་རིག་བཀྲ། སློབ་སྦྱོང་ལྡན། སྤོབས་པ་ཆེ། འཆར་སྒོ་ལྡན་པས་བོད་མིའི་འབྱུང་འགྱུར་ལ་རེ་བ་སྔར་ལས་ཆེའོ་ཞེས་ཀུན་གྱིས་གླེང་།
ཡིན་ཡང་། སྔར་གྱི་བགྲེས་སོང་རྣམས་དང་མི་མཚུངས་པ་ཞིག་ལ། མི་རབས་གསར་པ་དག་ནི་རང་ཉིད་སྡུག་རབས་དང་། གཙེས་རབས། མནར་རབས་ཀྱི་སྨྲེ་ངག་འདོན་པར་དགའ་ན་ཡང་། སྐྱེ་བོ་གཞན་གྱི་དཀའ་སྡུག་ལ་སེམས་ཁུར་དང་གདུང་སེམས་ཀྱི་ཚོར་བ་དེ་ཙམ་མེད་པར་མ་ཟད། གཞན་ལ་རང་བྱུང་གནོད་སྐྱོན་ཕོག་ཚེ་དགའ་འབོད་སྒྲོག་པའི་རྣམ་འགྱུར་ཚུན་ཆད་ཀྱང་བསྟན་བྱུང་བ་མིན་ནམ།
དེ་ལྟར་བསམ་ན། ད་ནི་སྙིང་རྗེའི་བློ་དང་། བརྩེ་བའི་སེམས་རྩ་བར་གྱུར་པའི་བོད་པའི་གོམས་གཤིས་དང་བག་ཆགས་མང་པོ་ཞིག་གནའ་གཏམ་དུ་འགྱུར་ལ་ཉེ་ཞིང་། གནའ་སྒྲུང་དུ་ཆགས་ལ་ཉེ་བའི་སྔ་ལྟས་ཇེ་མང་ནས་ཇེ་མང་དུ་འགྲོ་བཞིན་པ་འདྲ་བས། རང་གིས་རང་ལ་དྲི་བ་ཞིག་འདྲི་དགོས་བྱུང་། གལ་ཏེ་མུ་མཐུད་དུ་འདི་ལྟར་སོང་ན། ནམ་ཞིག་བོད་ལ་དམངས་གཙོའི་ལམ་ལུགས་ཚུགས་ཤིང་། རང་དབང་གི་སྤྱི་ཚོགས་ཤིག་གྲུབ་པའི་དབང་དུ་བཏང་རུང་། མི་དང་མིའི་བར་མཛའ་བརྩེ་དང་། ཕན་སེམས་ཀྱི་ཀུན་སློང་མེད་པར་གྱུར་ཚེ། བདེ་སྐྱིད་ཀྱི་འཚོ་བའི་ཇི་ལྟར་རོལ་ལམ? མི་ཚེའི་རིན་ཐང་ཇི་ལྟར་མངོན་ནམ?
དངོས་གནས་ཏེ། གཡས་ནས་ཅིག་ཚང་མེ་ཤོར་དུས་འུ་ཚོ་དགོད་ཆོག་ལ། གཡོན་ནས་གན་ཚང་ཆུས་ཁྱེར་ཚེ་ཡང་འུ་ཚོས་འཕྱ་ཆོག་མོད། ཉིན་ཞིག འུ་ཚོ་རང་ཉིད་ཀྱི་སྡོད་ཁྱིམ་མེ་རུ་འབར་ཞིང་། མལ་ས་ཆུ་ཡིས་ཁྱེར་ན་ནི། འུ་ཚོའི་ཉེ་འཁྲིས་ཀྱི་མི་དེ་དག་གིས་ཀྱང་ཚུར་ལ་ཧབ་དགོད་དང་འཕྱ་མོད་བྱེད་ངེས་པས། དེ་དུས་འུ་ཚོས་ཇི་ལྟར་བྱའམ? དགོད་རྒྱུ་ཡིན་ནམ་ངུ་རྒྱུ་ཡིན? ཡང་ན?
༢༠༡༤/༡/༡༤
|