དྭ་ཕྲུག་ཅིག་གིས་ཨ་མར་ལེགས་སྐྱེས་འབུལ་བཞིན་པ།
དེ་རིང་ནི་གསུམ་བརྒྱད་རྒྱལ་སྤྱིའི་བུད་མེད་དུས་ཆེན་གྱི་ཉིན་མོ་འདིར་དྲྭ་ལམ་ཚགས་དེབ་བརྙན་འཕྲིན་ཁང་སོགས་ནས་རྟེན་འབྲེལ་ཞུ་བ་དང་ཆབས་ཅིག་ངེད་བཙན་པོའི་མགར་གྱི་དྲ་བས་ཀྱང་རྟེན་འབྲེལ་ཞུ་མཁན་གྱི་སྙན་ཚོམ་འགའ་བཀོད་པ་ཡིན་མོད་ཚང་མ་སྐད་ཆ་ཡག་ཤོས་སམ་བཟང་རབ་རྒྱན་རབ་དང་ཧྲ་རབ་དྲིན་རབ་སོགས་ལས་མི་འདུག་ཀྱང་ཆེས་ཡིད་སྐྱོ་བ་ཞིག་ལ་དོ་དགུང་ནུབ་ཇ་འཐུང་སྟེ་སྒོར་ཞིག་བུད་དུས་རྒྱ་རིགས་བྱིས་པ་ལོ་བདུན་ཅན་ཞིག་གིས་རང་གི་མ་ལོ་ལ་ལེགས་སྐྱེས་ཀྱི་མར་མེ་སྐོང་བུ་འགའ་བསྒྲོན་འདུག་པ་དང་དྲིན་ཆེན་གྱི་མ་ལོ་ལགས། ཁྱེད་ཀྱི་སྐྱེས་སྐར་ལ་རྟེན་འབྲེལ་ཞུ།
དེ་རིང་བྱམས་ལྡན་ཨ་མ་ཁྱེད་ཀྱི་དུས་ཆེན་རེད། བུ་ངས་ཁྱེད་ལ་ཟ་རྒྱུ་དང་གོན་རྒྱུ་ཁྱེར་ནས་ཡོད་ཅེས་པ་དེ་ཐོས་རྗེས་ངོ་མ་ཡིད་སེམས་ལ་བརྗོད་མི་ཤེས་པའི་སྐྱོ་བ་ཞིག་བསྐྱིལ་ཐལ།
རྒྱབ་ཏུ་ལངས་འདུག་པ་ནི་ཕར་བལྟས་ཚོད་ཀྱིས་བྱིས་པ་དྭ་ཕྲུག་དེའི་ཕ་ཡིན་ས་རེད། “宝贝”གཅེས་ཕྲུག་ཁྱིམ་དུ་ལོག་རེད།
ད་འཁྱག་གི་ཟེར་བཞིན་ཁོས་ཀྱང་མཁུར་མགོ་ནས་མིག་ཆུ་ཤམ་ཤམ་བཞུར་འདུག དྭ་ཕྲུག་སྙིང་རྗེ་བོ་དེས་ཀྱང་ངས་ཁྱེད་རང་དྲན་གི་ཡོད། ཨ་མ་ལགས། ཁྱེད་རང་དྲན་གི་ཡོད། ཅེས་ཡང་ཡང་བརྗོད་ཀྱིན་ངུ་འབོད་རྒྱག་བཞིན་པ་ནི་དེ་རིང་གི་ཆེས་ཡིད་འགུལ་ཐེབས་པའི་བྱམས་ལྡན་ཨ་མའི་ལེགས་སྐྱེས་ངོ་མ་དེ་རེད། འདི་ནི་དྭ་ཕྲུག་ཅིག་གི་གདུང་དབྱངས་ཀྱིས་བཞེངས་པའི་གྲོང་ཁྱེར་འདིའི་སྲོལ་བཟང་ངམ་དྲིན་ཅན་དྲིན་ལ་གོ་བའི་ལེགས་སྐྱེས་རེད།
བྱམས་ལྡན་གྱི་མ་ལོ་ལགས། ཁྱེད་ཀྱི་བྱིས་པ་འདིས་མ་འོངས་པར་གཤིས་རྒྱུད་འཇམ་ཞིང་ཤེས་འཇོན་གཉིས་ལྡན་གྱི་མི་བུ་ཞིག་ཏུ་བརྩོན་ལེན་བྱེད་པར་ཡིད་ཆེས་ཡོད།
གང་ལྟར་ཁྱེད་ལ་བཀའ་དྲིན་ཆེ་ཞུ། ཁྱེད་རང་བདེ་བར་གཟིམས་དང་བུ་ཆུང་སྙིང་རྗེ་བོས་ཁྱེད་ལ་དུས་ཚིགས་ལྟར་ཟས་གོས་ཁྱེར་ཡོང་ས་རེད། ངོ་མ་ཤ་ཚ་ནི་ཞིག་ཡོད་ཀི།
ངས་ཀྱང་བུ་ཆུང་འདི་དང་ད་དུང་འདི་བཞིན་འཇིག་རྟེན་གྱི་ཁམས་ཀུན་ཏུ་དྭ་ཕྲུག་ཇི་སྙེད་ཅིག་ཡོད་པ་ཚང་མའི་ཚབ་བྱས་ཏེ་དྲིན་ཆེན་གྱི་བྱམས་ལྡན་མ་དེ་དག་གི་དོན་དུ་ཨོཾ་མ་ཎི་པདྨ་ཧཱུཾ་གང་མང་བཏོན་དང་འདོན་བཞིན་ཡོད། འདི་ནི་བཅོས་མ་མ་ཡིན་པའི་ངའི་ལེགས་སྐྱེས་ཡིན། བྱམས་ལྡན་མ་ལོ་ཐམས་ཅད་ནད་མེད་ཚེ་རིང་དང་མཐར་ཐུག་ཐར་བ་དང་ཐམས་ཅད་མཁྱེན་པའི་གོ་འཕང་འཐོབ་པའི་རྒྱུར་གྱུར་ཅིག་གུ།
ཞེས་གྲོང་ཁྱེར་ཤེས་དཔལ་འགྲན་པའི་ལྡིང་ཁང་ནས་༢༠༡༤ལོའི་ཟླ་༣པའི་ཚེས་༨ཉིན་ཁཱ་ཤེས་རབ་རྒྱ་མཚོས།
