ས་པད་མ་བཞད་པའི་མཐིལ་ཁུག་ལ།།
ནས་འབྲུ་དྲུག་གསར་བ་མི་དར་དུས།།
ནས་བཙལ་དགོས་ཟེར་ནི་མི་གཅིག་ཡོད།།
ནས་མི་བཙལ་ཟེར་ནི་མི་གསུམ་ཡོད།།
ནས་བཙལ་དགོས་ཟེར་ནི་མི་གཅིག་པོ།།
སྟོན་པ་ཤཱཀྱ་ཐུབ་པ་ཡིན།།
ནས་མི་བཙལ་ཟེར་ནི་མི་གསུམ་པོ།།
འདྲེ་མོ་བཀའ་བདུད་སྤུན་གསུམ་ཡིན།།
ནས་བཙལ་བར་མངགས་མཁན་སློབ་དཔོན་ཡིན།།
ཆུ་ཨ་ལོང་འདྲ་བའི་འཁྱིལ་ཁུག་ན།།
བྲག་སེངྒེ་འདྲ་ཡི་ཐོང་འོག་ན།།
ནས་མི་ཆེ་མི་ཆུང་ཕུག་རོན་ཙམ།།
ནས་བཟའ་འདོད་སྐྱེས་པའི་བྱ་གསུམ་ཡོད།།
བྱ་དང་པོ་ཡོང་བ་ཁུན་འཐུ་ཡོང་།།
བྱ་ཁུན་འཐུས་མ་ཐུབ་འཁུན་འཁུན་འཁུན།།
བྱ་གཉིས་པ་ཡོང་བ་གྲོ་འཐུ་ཡོང་།།
བྱ་གྲོ་འཐུས་མ་ཐུབ་གྱོད་གྱོད་གྱོད།།
བྱ་གསུམ་པ་ཡོང་བ་ནས་འཐུ་ཡོང་།།
བྲག་སྒོར་མོའི་སྟེང་ནས་ངལ་ཞིག་གསོས།།
ཆུ་བསིལ་མའི་འགྲམ་ནས་ཧུབ་གསུམ་འཐུང་།།
ནས་འཁུར་འདོད་བསམ་པའི་རྒྱུད་ལ་སྐྱེས།།
ནས་གས་བཞི་བྱེད་དམ་གས་དྲུག་བྱེད།།
ནས་མ་གས་འཁྱེར་ཐབས་དཀའ་གི་བསམ།།
བྱ་ནས་འཐུས་ར་མཆུ་བྲག་ལ་བརྡར།།
དེ་ནས་ནས་ཕུང་ཐར་སེ་བཞག།
ནས་གས་བཞི་མ་བྱས་གས་དྲུག་བྱས།།
ནས་འབྲུ་དྲུག་ཟེར་བ་དེའི་དོན་ཡིན།།
ནས་དང་པོ་ཡལ་བ་དགུང་ལ་ཡལ།།
དགུང་ཨ་སྔོན་ཞིང་ས་མ་རྙེད་སུ།།
ཤར་ཉི་ཟླས་ཞིང་མཛོ་མ་ཉན་ཐལ།།
འབྲུག་ཕོ་ཆུང་ཞིང་རྨོ་མ་ཉན་ཐལ།།
ནས་གཉིས་པ་ཡལ་བ་འབྲོག་ལ་ཡལ།།
འབྲོག་སར་ཞིང་ས་རུ་མ་རྙེད་སུ།།
གཡག་རོག་པོས་ཞིང་མཛོ་མ་ཉན་ཐལ།།
འབྲོག་མིས་ཞིང་རྨོ་མ་ཉན་ཐལ།།
ནས་གསུམ་པ་ཡལ་བ་ཆུ་ལ་ཡལ།།
ཆུ་གཙང་བོར་ཞིང་ས་མ་རྙེད་སུ།།
སྲམ་སྨུག་ཆུང་ཞིང་རྨོ་མ་ཉན་ཐལ།།
ཉ་གསེར་མིག་ཞིང་རྨོ་མ་ཉན་ཐལ།།
ནས་བཞི་བ་ཡལ་བ་བྲག་ལ་ཡལ།།
བྲག་དམར་པོར་ཞིང་ས་མ་རྙེད་སུ།།
བྱ་ཐང་དཀར་ཞིང་མཛོ་མ་ཉན་ཐལ།།
གློག་རོག་མོས་ཞིང་རྨོ་མ་ཉན་ཐལ།།
ནས་ལྔ་བ་ཡལ་བ་ནགས་ལ་ཡལ།།
ནགས་དགའ་ལྡན་ཞིང་ས་མ་རྙེད་སུ།།
སྟག་དམར་ཡག་ཞིང་མཛོ་མ་ཉན་ཐལ།།
གླ་དར་མས་ཞིང་རྨོ་མ་ཉན་ཐལ།།
ནས་དྲུག་པ་ཡལ་བ་རོང་ལ་ཡལ།།
རོང་གཤིན་ས་ཡིན་པས་ཞིང་ས་རྙེད།།
ནས་འབྲས་བུ་ཐོགས་པའི་རྟེན་འབྲེལ་འཛོམས།།
རོང་རྒན་པོས་ཞིང་མཛོ་དགོས་ཞེས་འཚབ།།
རོང་དར་མས་ཐོང་གཤོལ་དགོས་ཞེས་འཚབ།།
རོང་རྒན་མོས་ཡུར་རྒྱག་དགོས་ཞེས་འཚབ།།
རོང་ནས་འདེབས་ཚང་ལ་འཚབ་གསུམ་ལངས།།
སྟོད་བལ་བོའི་ཡུལ་ནས་མགར་བ་བཙལ།།
སྨད་རྒྱ་ནག་ཡུལ་ནས་ཤིང་བཟོ་ཁྲིད།།
བལ་མགར་བས་རྨོ་ལྕགས་ངར་མོ་རྡུང་།།
རྒྱ་ཤིང་བཟོས་གཉའ་ཤིང་ཡང་མོ་ལས།།
བཤོལ་ཤིང་རྩེ་ལ་ཐོང་ལྕགས་སྤྲད།།
ཞིང་རྨོ་བའི་ལམ་ལ་དགའ་སྤྲོ་སྐྱེས།།
སྟོད་འབྲོག་པའི་ལག་ནས་འབྲི་ཞིག་ཉོས།།
སྨད་ཁེ་བའི་ལག་ནས་གླང་ཞིག་ཉོས།།
འབྲི་གླང་རྒྱུད་ལ་མཛོ་ཞིག་བླངས།།
མཛོ་ཁྱུང་དཀར་ཞིང་རྨོར་བཀོལ་བ་ཡིན།།
རྫས་ལུད་མཐུན་རྐྱེན་འཛོམས་པ་དང་།།
ཆུ་ལུད་དྲོད་གཤེར་རྒྱས་དུས་ན།།
རོང་རྒན་གཞོན་ཞིང་རྨོར་འགྲོ་རྒྱུ་བྱས།།
རོང་མ་སྲིས་ཡུར་མ་ཡུར་རྒྱུ་བྱས།།
དཔྱིད་ལྗང་ལོ་མྱུ་གུ་འབུས་དུས་ན།།
རྫ་ཁའི་ཁ་བ་ཞུ་དུས་ན།།
གྲོག་ཆུ་གྲོག་ལ་བཞུར་དུས་ན།།
ལ་ཆུ་ལུང་ཆུ་འདྲེས་དུས་ན།།
ཉིན་རྩྭ་སྲིབ་རྩྭ་དྲོས་དུས་ན།།
རྣོ་ལྕགས་ས་ལ་ཟུག་དུས་ན།།
རོང་ཁྱིམ་མིས་ནས་འབྲུ་འདེབས་མགོ་བརྩམས།།
སྤང་རྒོད་ཐང་རྒོད་མིན་ས་ནས།།
ནས་ཡར་སྐྱེས་མགྱོགས་པའི་ས་ཞིག་བཙལ།།
རྡོ་དང་རྡེའུ་རིགས་ཉུང་ས་ནས།།
གཤོལ་ཐོང་ལྕགས་འགྲིམས་པའི་ས་ཞིག་བཙལ།།
རྩྭ་ལྡུམ་ཤིང་ལྡུམ་དཀོན་ས་ནས།།
ནས་ཡུར་རྒྱག་སླ་བའི་ས་ཞིག་བཙལ།།
ཁྱུང་དཀར་གཉིས་འགྲོགས་སྐེ་ལ་གཉའ་ཤིང་འཕངས།།
བཤོལ་མདའ་བཤོལ་ཡུ་ཐོང་ལྕགས་ཆ་ཚང་སྤྲད།།
ས་འབར་ར་ར་དང་འབུར་རི་རི།།
ས་དེ་ནས་ཞིང་ཞིག་བཏུལ་བཏང་ཐལ།།
ནས་སྐྱེ་ཚུལ་གཉོར་སྲོལ་བཤད་རྒྱུ་ན།།
ལུད་གསོག་དུས་འབུམ་ཁང་བརྩིགས་བརྩིགས་བྱས།།
ལུད་འཁུར་དུས་ཚ་ཚ་རྒྱག་རྒྱག་བྱས།།
ལུད་འགྲེམ་དུས་སྤྲིན་ནག་འཁྱུག་འཁྱུག་བྱས།།
ནས་ཚིགས་གཅིག་མཚམས་ནས་བུད་དུས་ན།།
བུ་ལོ་གཅིག་ཅིག་གི་བསམ་པ་བཟུང་།།
ནས་ཚིགས་གཉིས་མཚམས་ནས་བུད་དུས་ན།།
བུ་ལོ་གཉིས་ཤིག་གི་བསམ་པ་བཟུང་།།
ནས་ཚིགས་གསུམ་མཚམས་ནས་བུད་དུས་ན།།
བུ་ལོ་གསུམ་ཞིག་གི་བསམ་པ་བཟུང་།།
ནས་སྐེད་ལོ་མ་སྟོང་གིས་བསྐོར།།
ནས་མགོར་སྙེ་མ་འབུམ་ཚོ་ཐོགས།།
ཞིང་ལོ་ལེགས་འབྱུང་བའི་གླུ་ཞིག་བླངས།།
ནས་ད་ཐོབས་ད་ཐོབས་ཟེར་དུས་ན།།
རྗེ་བླ་མས་ཕྱག་ནས་གཏོར་གཏོར་བྱས།།
ཞིང་འབྲས་བུ་སྨིན་པའི་གླུ་ཞིག་བླངས།།
ནས་ད་བྲེགས་ད་བྲེགས་ཟེར་དུས་ན།།
རྗེ་བླ་མས་ཕྱག་རྒྱ་བྱས་བྱས་བྱས།།
ནས་ད་རྡུངས་རྡུངས་ཟེར་དུས་ན།།
ནང་གྲྭ་བས་རྟགས་རྩལ་འཕེན་འཕེན་བྱས།།
ནས་ད་རྩེགས་ད་རྩེགས་ཟེར་དུས་ན།།
ཆོས་པོ་ཏི་གྲལ་ལ་སྒྲིག་སྒྲིག་བྱས།།
མ་བུ་མོས་སྦྲང་དཀར་རྩམ་པ་བླངས།།
བུ་ཚ་བོས་ནས་ཆང་སྔོན་མོ་བཙགས།།
ནས་སྔོན་མོའི་འཁྲུངས་རབས་འདི་འདྲ་ལགས།།
འདི་ཡང་ཡང་འཁྲུངས་བའི་བཀྲ་ཤིས་ཤོག།
