མིག་བརྩེ་རུད། རྨ་ལྷོ།
སང་སིང་དབྱར་གྱི་རྔ་སྒྲ་དགོང་ནས་གྲགས།།
མྱུག་ཚོམ་དགའ་བའི་འཛུམ་བརྒྱ་ལྷུག་པར་གྲོལ།།
རྐང་འཐུང་རེ་བའི་སྨོན་པ་མངོན་གྱུར་པས།།
དབྱིག་འཛིན་བུ་མོའི་འཇོ་སྒེག་སྟངས་སྟབས་ངོམས།།
གསལ་གསལ་ཆུ་ཤེལ་དུང་ཟླ་མཁའ་ནས་འཛུམ།།
ཆུ་སྐྱེས་ཀུ་མུད་དགའ་བའི་འཛུམ་བརྒྱ་གྲོལ།།
རྒྱུ་སྐར་སྟོང་གི་མགོན་པོ་བྱོན་གྱུར་པས།།
ཀུན་གསལ་གྲོང་གི་མཚར་སྡུག་བརྗོད་དུ་མེད།།
ལྷང་ལྷང་ཁུ་བྱུག་གྲེ་འགྱུར་ལྷོ་ནས་གྲགས།།
མགོ་ནག་དགའ་ཞིང་སྐྱིད་པའི་གར་དུ་རྩེན།།
འབྲས་ལྡན་དུས་ལ་སྨོན་པ་མངོན་གྱུར་པས།།
དཔྱིད་དཔལ་བུ་མོ་གནས་ཡུལ་འགྲིམ་པར་སྩལ།།
སོར་བཅུའི་སྟངས་སྟབས་ཤོག་བུའི་གྲོང་དུ་མངོན།།
ཆགས་སྡང་དགའ་སྐྱོ་བརྩེ་བའི་འཕྲིན་དུ་གསལ།།
ཉིན་རེའི་སེམས་ཚོར་ཀུན་ལ་བཤམས་ཡོད་པས།།
ཐ་གྲལ་བུ་ལོར་གསང་བ་ཡོད་མ་མཆིས།།
༢༠༡༤/༢/༤
|