ལྡོག་འཆར།༼རྨ་ཆུ།༽

སྤྲིན་པ་ལྗང་ཁུ་མཁའ་ན་ཚོམ་བུར་རྒྱུ།།

གྲིབ་མ་ནག་པོ་ས་ལ་དྲུད་པ་དེས།།

ཕྱི་རོལ་ཆོས་ཀྱི་རང་བཞིན་ཙམ་པོ་ཞིག།

ཁྱོད་ལ་སྟོན་ཞིང་ང་ལ་གསལ་བར་བཤད།།

གྲིབ་མ་མགྲོན་དུ་བྱོན་པའི་འཇིག་རྟེན་ན།།

སོ་སོར་མྱོང་བ་མི་འདྲ་རེ་རེ་ཡོད།།

རེ་རེའི་གསེབ་ན་སྐྱིད་སྡུག་སྤེལ་མར་མངའ།།

སེམས་ཤེས་མི་འདྲའི་ཚུལ་ཙམ་གླེང་ཡང་བླ།།

གྲིབ་མའི་རྡོག་སྒྲ་སྙིང་གི་འཕར་ལྡིང་རེད།། 

སྤྲིན་པའི་ཁ་དོག་ཤེས་པའི་རང་མདངས་རེད།།

བསིལ་གྲིབ་རེས་མོས་སེམས་ཀྱི་ཞིང་ས་ལ།།

འཁོར་ཞིང་བསྐོར་བ་ལས་ཀྱི་རང་གཟུགས་ཙམ།།

                               ༢༠༡༤/༠༤/༢ཉིན།