༼ཐྲི་རོ་ཡེ།༽
ནང་དོན་མདོར་བསྡུས།
གློག་བརྙན་འདི་ལ་བལྟས་མ་ཐག་འུ་ཅག་གི་ཀླད་པའི་ནང་ཐོག་མར་ཤར་བ་ནི«ཧོར་གླིང་གཡུལ་འགྱེད»ཡིན་པ་ཁོ་ཐག་ཆོད་དེ།
དེའི་རྒྱུ་མཚན་ཡང་གློག་བརྙན་འདིའི་ནང་དུའང་མཛེས་མ་གླིང་ལ་གྲགས་པ་ཞིག་སྟེ།
མིང་ལ་ཧེ་ལུན(Helen)དུ་འབོད་པའི་བཙུན་མོ་ཞིག་མགྲོན་པོ་རྒྱལ་སྲས་ཤིག་དང་ཞེ་མཐུན་དུ་གྱུར་ནས་གཡུལ་འགྱེད་འདིའི་མགོ་བསླངས་ཡོད་དེ།
དེ་ནི་ཧོར་གུར་དཀར་རྒྱལ་པོས་འབྲུག་མོ་འཕྲོག་སྟེ་ཧོར་གླིང་གཡུལ་འགྱེད་བྱུང་བ་དང་ཨ་ན་མ་ན་རེད།
ཐྲི་རོ་ཡེ(Tory)ནི་ཐྲི་རོ་ཡེའི་གཡུལ་འགྱེད་གཞིར་བཟུང་ནས་འཁྲབ་གཞུང་དུ་བཅོས་པ་ཞིག་སྟེ།
ལོ་ངོ་སུམ་སྟོང་ཉིས་བརྒྱའི་ཡར་སྔོན་དུ།
ཡུལ་ཆེན་པོ་ཀེ་རི་སིའི་རྒྱལ་ཕྲན་མཱ་སེ་ནཱིའི་རྗེ་བོ་ཨ་གྷ་མེམ་ནོན(Agamemnon)གྱིས་དྲག་པོའི་དམག་ཤུགས་ཀྱིས་མཐའ་འཁོར་གྱི་རྒྱལ་ཕྲན་རྣམས་དབང་དུ་བསྡུས་ཏེ་མནའ་འབྲེལ་རྒྱལ་ཁབ་བཙུགས་མོད།
ཁོའི་སྤུན་ཆུང་སྟེ་རྒྱལ་ཕྲན་སི་ཕར་ཐའི་རྗེ་བོ་མེམ་ནོན་ལོའུ་སི(Menelaus)འཐབ་འཁྲུག་ལ་ཞེན་པ་ལོག་སྟེ།
ཨེ་རྗེན་རྒྱ་མཚོས་བར་ཆོད་ཅིང་སྟོབས་ཤུགས་ཆེས་ཆེ་བའི་འགྲན་ཡ་ཐྲི་རོ་ཡེ་དང་ཞི་མཐུན་ཡོང་བའི་རེ་བ་བྱས་ནའང་།
ཞི་གྲོས་ཀྱི་བར་སྐབས་སུ།
ཁོའི་བཙུན་མོ་ཧེ་ལུན་ཐྲི་རོ་ཡེའི་རྒྱལ་སྲས་ཆུང་བ་ཕཱ་རི་སི(Paris)དང་ཞེ་མཐུན་དུ་སོང་ནས་ལྐོག་ཏུ་བྲོས་པས།
མེམ་ནོན་ལོའུ་སི་ནི་ཞེ་སྡང་གཏིང་ནས་ལངས་ཏེ།
དེ་མ་ཐག་ཀེ་རི་སིའི་དཔུང་ཆེན་ལ་ཁ་ལོ་བསྒྱུར་གྱིན་ཡོད་ཅིང་།
སྔ་མོ་ནས་ཐྲི་རོ་ཡེ་ཧབ་ཐོབ་བྱེད་བསམ་ཡོད་པའི་ཁོའི་ཕུ་བོ་ཨ་གྷ་མེམ་ནོན་ལ་དམག་རོགས་ཞུས་ཤིང་།
ཨ་གྷ་མོམ་ནོན་ནི་འདོད་ཐོག་ཏུ་རྟ་བརྒྱུགས་པ་ཡིན་པས། དེ་མ་ཐག་གྲུ་ཆེན་སྟོང་གཅིག་ཡོད་པའི་དཔུང་ཆེན་དྲངས་ཤིང་།
དེའི་ནང་དུ་ཀེ་རི་སེའི་དཔའ་བོའི་རྩེ་ཕུད་དུ་གྲགས་ཤིང་གློག་བརྙན་འདིའི་མི་སྣ་གཙོ་བོ་ཨ་ཁི་ལི་སི(Achilles)ཡང་ཡོད་ལ། དུས་མཚུངས་སུ།
ཐྲི་རོ་ཡེའི་ནང་དུའང་དཔའ་བོའི་ཡང་རྩེ་རྒྱལ་སྲས་ཧེ་ཁུ་ཐོ(Hector)ཡོད་པས།
སྟག་སེང་ཁ་སྤྲོད་དུ་གྱུར་བའི་གཏམ་རྒྱུད་ཅིག་འདི་ནས་མགོ་བརྩམས་པ་རེད་ལ།
དེའི་འབྲས་བུ་ནི། གློག་བརྙན་གྱི་མཇུག་ཏུ“མི་སྲོག་དགུན་གྱི་གྲོ་འབྲུ་ནང་བཞིན་ཉག་ཕྲ་རུང་ཁོ་ཚོའི་མཚན་སྙན་ལ་ནམ་ཡང་ནུབ་པ་མེད”ཅེས་བཤད་པ་ནང་བཞིན་ནོ།།