༢༠༡༤ལོའི་ཟླ་༥་པའི་ཚེས་༢༡་ནས་༢༧བར་འཛམ་གླིང་གོ་ལ་ཟླུམ་པོའི་ཡང་རྩེ་འཕགས་མཆོག་ཕྱག་ན་པདྨོའི་ཟླ་བྲལ་ཐུགས་བསྐྱེད་ཀྱི་འོད་སྣང་ནུབ་པ་མེད་པའི་གནས་མཆོག ཡུལ་ལྗོངས་ཀྱི་བཀོད་པ་ཕུན་སུམ་ཚོགས་པ་ཆོས་དང་རིག་གཞུང་གི་དཔལ་ཡོན་རབ་ཏུ་རྒྱས་པའི་བོད་ཆོས་ལྡན་གྱི་ཞིང་ཁམས་ན་འཚོ་ཞིང་གནས་པའི་དད་ལྡན་སེར་སྐྱ་ཕོ་མོ་རྣམས་ལ། རིས་མེད་གདུལ་བྱ་རྒྱ་མཚོའི་དཔལ་དུ་ཕན་བདེའི་འཕྲིན་ལས་ཀྱི་རླབས་ཕྲེང་རྟག་ཁྱབ་ལྷུན་གྲུབ་ཀྱི་ཚུལ་དུ་འབྱུང་བའི་སྙིགས་དུས་བསྟན་པའི་མཛེས་རྒྱན་གསང་ཆེན་སྔ་འགྱུར་བའི་བསྟན་པའི་གསལ་བྱེད་དམ་པ་༧འཇའ་ལུས་པ་མཁན་ཆེན་ཚེ་དབང་རིག་འཛིན་གྱི་ཡང་སྤྲུལ་ཐུབ་བསྟན་བསྟན་འཛིན་སྙན་གྲགས་སམ་འཇམ་དབྱངས་རྒྱལ་བ་རྒྱ་མཚོ་མཆོག་གིས་ངེས་གསང་བསྟན་པའི་མཛོད་འཛིན་བཀའ་དྲིན་མཚུངས་མེད་སྐྱབས་རྗེ་བླ་མ་རིན་པོ་ཆེ་དོན་གྱི་སླད་དུ་མཚན་ནས་སྨོས་ན་༧འཇམ་དབྱངས་ཤེས་རབ་རྒྱལ་མཚན་མཆོག་གི་ཐུགས་བཞེད་དང་རྨེ་ཡུལ་ཕྱུག་མོའི་དད་ལྡན་སྤྱིའི་རེ་འདོད་ཀྱིས་ཞུ་བ་ཡང་ཡང་ཕུལ་བ་ལ་བརྟེན་འདི་ཕྱིའི་ལེགས་ཚོགས་མཐའ་དག་འབྱུང་བའི་གཞི་གཅིག་པུ་རིས་མེད་བསྟན་འགྲོའི་སྤྱི་རིམ་གངས་ལྗོངས་མ་ཎི་སྨོན་ལམ་ཆེན་མོ་ཐེངས་བརྒྱད་པའི་ཆོས་ཚོགས་སྤྱི་རྩིས་ཀྱི་ཟླ་༥་བའི་ཚེས་༢༡ནས་༢༧བར་དང་། བོད་རབ་བྱུང་བཅུ་བདུན་པའི་རྒྱལ་བ་ཤིང་རྟ་ལོའི་ཟླ་༣པའི་ཚེས་༢༢་ནས་༢༨བར་ཤར་ཕྱོགས་དུང་རི་དཀར་པོའི་ཉེ་འགྲམ་ཡུལ་ལྷ་རྨེ་རྒྱལ་ལྷ་ཕྱུག་གིས་བདག་གིར་བཞེས་པའི་རྨེ་ཁོག་ནོར་བུའི་གླིང་ལ་འཚོགས་འདུག
| 