༼གངས་རིའི་སྐར་རྒྱན༽
སྤྱི་ལོ༢༠༡༤ལོའི་སྤྱི་ཟླ༦ཚེས༢༨ཉིན་གྱི་དགོང་དྲོའི་ཆུ་ཚོད༧:༣༠སྟེང་གངས་ཅན་པ་སྒྲོལ་མ་སྐྱབས་ཀྱི་གླུ་གཞས་ཆེད་ཚོགས༼གངས་རིའི་སྐར་རྒྱན༽ཞེས་པ་མཚོ་སྔོན་བརྙན་འཕྲིན་ཁང་ནས་གཟབ་རྒྱས་ངང་འཚོགས།
ཁོ་བོའི་ངག་གི་འགྱུར་ཁུགས་ཟབ་མོ་དེ་དེ་འདྲའི་བརྗིད་ཅིང་དེ་འདྲའི་སྙན་པས།“ཕ་ཡུལ”བཏེགས་སོང་།“བོད་མི”གྱེར་སོང་། ད་དུང“ནམ་མཁའི་ལྷ་མོ”སྒུལ་ཞིང“པོ་ཏཱ་ལ”སེམས་ཀྱི་མཁའ་ལ་བཤམས་སོང་།“རྩམ་པ”འི་དྲི་བསུང་ཐུལ་བའི་ཁོའི་ཕ་སྐད་ཀྱི་གླུ་གཞས་འདི་དག་ནི་བོད་ཀྱི་ཤ་དང་རུས་ལ་ཟུག་པའི་དྭངས་གཙང་གི་ཁྲག་རྒྱུན་བཞུར་བའི་རླབས་སྒྲ་རང་དུ་འཁུམས་པས་ལོ་རྒྱུས་ཀྱི་ཡིག་ཚགས་སུ་འཁོད་འོས་སོ།།
ད་དུང་གཞས་གསར“བརྩེ་གཞས”དང“རྨི་ལམ་ནང་གི་རྟ་ཕོ” “གསེར་གྱི་སྐར་ཚོམ”
“ཀོ་གྲུ”སོགས་བླངས་པས་ཁོའི་ལ་ཞེན་གྱི་སྤོབས་པའི་དར་ལྕེ་རིང་མོ་དེ་བོད་མི་རིགས་རང་གི་ཚེ་སྲོག་ལྟ་བུའི་གངས་རི་དང་ནམ་མཁར་འཐེན་ཡོད་པ་མངོན་པར་གསལ།
རེད་དེ།
གངས་ཅན་པ་སྒྲོལ་མ་སྐྱབས་ཀྱི་གླུ་གཞས་ནི་གངས་རིའི་སྟེང་དུ་འགྱིང་བའི་གངས་སེང་གི་གད་རྒྱངས།
ནམ་མཁའི་མཐོངས་སུ་གྲགས་པའི་གཡུ་འབྲུག་གི་ངར་སྐད།
ནགས་མོའི་དཀྱིལ་དུ་འཕུར་བའི་ཁུ་བྱུག་གི་གསུང་དབྱངས་ཏེ།
བོད་ཁ་བ་ཅན་གྱི་དུས་གསུམ་ན་མཐོ་བའི་ཕ་སྐད་ཀྱི་དྭངས་མ་དེ་རེད་འདུག ཁྱོད་རང་ཡོད་པས་ང་ཚོས་ཕ་སྐད་ཀྱི་གླུ་གཞས་ལེན་ཆོག ཁྱོད་རང་ཡོད་པས་ང་ཚོས་ཕ་གཞས་ཀྱི་སྒྱུ་རྩལ་འཚོལ་ཆོག
ཁོ་བོའི་གླུ་གཞས་ཆེད་ཚོགས་སུ་གླུ་བ་ཀུན་དགའ་དང་སྒྲོན་བྷེ།
རིག་འཛིན་སྒྲོལ་མ། ས་ནག་གཞས་ཚོགས་སོགས་ཕེབས་ཡོད་ཅིང་ཁོང་ཚོས་ཀྱང་སྙན་མོ་གླུ་ཡི་མཆོད་པ་རེ་གངས་རིའི་ལྗོངས་ལ་ཕུལ་སོང་།
ཚང་མ་བཀའ་དྲིན་ཆེ།
ལེ་ཚན་རེའུ་མིག
ཁག་དང་པོ།
༡. ཕ་ཡུལ།
༢. བོད་མི།
༣. ནམ་མཁའི་ལྷ་མོ།
༤. པོ་ཏཱ་ལ།
༥. གླུ་བ་ཀུན་དགའི་གླུ་ལེན།
ཚན་པ་གཉིས་པ།
༡. རྩམ་པ།
༢.དམངས་གཞས་བསྟུད་ལེན།
༣. རྒྱང་རིག་གི་མཛའ་མོ།
༤. བརྩེ་གཞས།
༥. གཅེས་པའི་ས་ཆེན།
༦. སྒྲོན་བྷེའི་གླུ་ལེན།
ཚན་པ་གསུམ་པ།
༡. རྨི་ལམ་ནང་གི་རྟ་ཕོ།
༢. ཁ་བའི་མེ་ཏོག
༣. གསེར་གྱི་སྐར་ཚོམ།
༤. ས་ནག་གཞས་ཚོགས་ཀྱི་གླུ་ལེན།
ཚན་པ་བཞི་བ།
༡. ཀོ་གྲུ
༢. ང་ནི་མཐོ་སྒང་འདི་གཞི་འཛིན་ཡིན།
༣. ཁྲུང་ཁྲུང་དཀར་མོ།
༤. སྨོན་ལམ།
༥. རིག་འཛིན་སྒྲོལ་མའི་གླུ་ལེན།
༦. གངས་ཅན་པ།
ཞེས་གཞས་པ་ཁོང་གི་ཚ་བོ་སྨྱུག་མིང་འཛིན་པ་གངས་གཡུ་མཚོའམ་རྒྱལ་སྲས་ནག་པོས་གནའ་མཁར་ཟི་ལིང་ནས།
2014ལོའི་ཟླ6པའི་ཚེས28ཉིན།