མདོ་ཁམས་རྫ་སེར་ཤུལ་དགོན་གྱི་གཙུག་ལག་ཁང་རབ་གནས་མཛད་སྒོ་བསྡུས།
༢༠༡༤ལོའི་སྤྱི་ཟླ་༧པའི་ཚེས་༣༡ཉིན་ཏེ་བདག་ཅག་གི་འདྲེན་མཆོག་མཚུངས་མེད་མཉམ་མེད་ཤཱཀྱའི་རྒྱལ་པོས་བཀའ་དང་པོ་བདེན་བཞིའི་ཆོས་འཁོར་བསྐོར་བའི་དུས་ཚེས་དགེ་བ་ཁྱད་པར་ཅན་བཀྲ་ཤིས་ཕུན་སུམ་ཚོགས་པའི་ཉིན་མོ་འདིར། ཆོས་ཁྲིམས་གསེར་གྱི་ཅོད་པཎ་གཙུག་ཏུ་བཀུར་བའི་མཁས་གྲུབ་བྱེ་བའི་བསྟི་གནས། མདོ་ཁམས་བསྟན་པའི་མཛེས་རྒྱན་དམ་པ།
རྒྱལ་བའི་ལུང་རྟོགས་ཀྱི་བསྟན་པ་རིན་པོ་ཆེ་ལུང་རིགས་དཔྱད་པ་གསུམ་གྱི་སྒོ་ནས་འཛིན་སྐྱོང་སྤེལ་གསུམ་བྱེད་པ་ལ་རླབས་ཆེན་བསོད་ནམས་བཟང་པོའི་མཐུ་ཡོངས་སུ་སྨིན་པ་རྫ་སེར་ཤུལ་དགོན་ཐེག་ཆེན་དར་རྒྱས་གླིང་གི་ཚོགས་ཆེན་གཙུག་ལག་ཁང་ཆེན་མོ་སྲིད་ན་རྙེད་པར་དཀའ་བའི་རྟེན་གསུམ་ཁྲི་ཕྲག་གིས་བྱུར་བུར་གཏམས་པའི་འཛམ་གླིང་མཛེས་པའི་རྒྱན་དུ་གྱུར་བ་འདི་ཉིད་དབུ་འབྱེད་ཀྱི་བཀྲ་ཤིས་པའི་མཛད་སྒོ་བསྡུས།
ཕྱོགས་ཀྱི་ཐ་གྲུ་ཀུན་ནས་འབྱོར་བའི་དགོན་སྡེ་ཁག་གིས་སྐྱབས་རྗེ་ཁྲི་བ་ཐུབ་བསྟན་སྙན་གྲགས་ཆོས་ཀྱི་རྒྱལ་མཚན་མཆོག་སྐུ་ཚེ་གཞོམ་གཞིག་བྲལ་བ་རྡོ་རྗེའི་ཆོས་བདུན་གྱི་ངོར་བོར་བསྐལ་བརྒྱར་བརྟན་ཅིང་མཁས་བཙུན་བཟང་གསུམ་གྱི་རྣམ་ཐར་གཙང་མའི་འཕྲིན་ལས་མཐའ་ཡས་སྐལ་བཟང་ཡོངས་ལ་ཁྱབ་གདལ་དུ་སྩོལ་ཕྱིར་དང་། སྤྱིར་སངས་རྒྱས་ཀྱི་བསྟན་པ་རིན་པོ་ཆེ་དང་།
ལྷག་པར་སྲིད་ན་མཐོང་བར་དཀོན་ཞིང་འཛམ་གླིང་མཛེས་པའི་རྒྱན་གཅིག་སེར་ཤུལ་དགོན་པའི་གཙུག་ལག་ཁང་ཆེན་མོ་ལེགས་གྲུབ་ཀྱི་ཐུགས་རྗེ་ལེགས་མཚོན་དང་བཀའ་དྲིན་གཏང་
རག་གི་ཡོན་དུ་བརྟན་བཞུགས་མཎཌལ་གྱི་སྤྱན་གཟིགས་མི་ཕྱེད་དད་པའི་སྙིམ་པ་དཔངས་མཐོ་བས་ཀུན་བཟང་མཆོད་པའི་ཀློང་དུ་བསྟར་བའི་རྟེན་འབྲེལ་གྱི་སྒོ་དང་བོ་སྤེལ་བའི་ཁྲོད་ཕྲེང་བསྒྲིགས་པ་འདི་ནི་ཨ་མདོ་རྔ་ཡུལ་བསེ་དགོན་ནས་འབྱོར་བའི་བསེ་སྤྲུལ་སྐུ་དང་དགོན་པའི་ལས་སྣེ་རྣམས་རེད།
མདོ་སྔགས་རབ་འབྱམས་སྨྲ་བ་ཨ་ལགས་བཞག་པ་རིན་པོ་ཆེ་བསུ་སྦྲེངས་ཞུ་བ།
ཨ་ལགས་བཞག་པ་རིན་པོ་ཆེས་ཆོས་སྲིད་གཉིས་ཆར་ལས་འཕྲོས་པའི་བཀའ་སློབ་གནང་བ།
ངེས་དོན་མཁས་པའི་དབང་ཕྱུག་སེར་བྱེས་དགེ་བཤེས་འཇམ་དཔལ་བློ་ཤེས་མཆོག་གིས་ཕྱོགས་བཞི་མཚམས་བརྒྱད་ནས་ཡོང་བའི་སྐུ་མགྲོན་ཡོངས་ལ་མཚམས་འདྲི་དང་འབྲེལ་བའི་ཤིས་ཚིག་གིས་མཛད་སྒོ་དབུ་འབྱེད་གནང་བ།
མདོ་སྨད་ཨ་མདོའི་ཕྱོགས་ནས་ཆེད་དུ་ཕེབས་པའི་མཚོ་སྔོན་བརྙན་འཕྲིན་ཁང་གི་མདོ་འཛིན་པ་བཀྲ་ཤིས་དབང་ཕྱུག
ལྷ་མོ། སྒྲོལ་མ། ད་དུང་ཀང་ཏུང་ནས་ཕེབས་པའི་མདོ་འཛིན་པ་གྲགས་ཅན་འགས་མཛད་སྒོའི་ཐོག་ཕེབས་པའི་སྐུ་མགྲོན་གཙོ་གྲས་མཚམས་སྦྱོར་དང་ཁོ་ཚོས་གཏམ་བཤད་ལེགས་པར་གྲུབ་རྗེས་ཁམས་པའི་བཀྲ་ཤིས་ཞབས་བྲོ་དང་ཤེར་བསྟན་གྱི་བདུང་ལེན་སོགས་རྩེད་འཇོ་མིག་གི་དགའ་སྟོན་བཤམས།
སློབ་གསོ་བ་ཆེན་མོ་རྭ་རྒྱ་འཇིགས་མེད་རྒྱལ་མཚན་དང་ཨ་ལགས་བཞག་པ་ཚང་སོགས་བཞུགས་པའི་ཚོགས་རའི་ཟུར་ཞིག
སྐྱབས་རྗེ་ཁྲི་བ་ཐུབ་བསྟན་སྙན་གྲགས་ཆོས་ཀྱི་རྒྱལ་མཚན་མཆོག་གིས་བཀའ་སློབ་གནང་བཞིན་པ།
མཛད་སྒོའི་ཐོག་ཏུ་ཆིབས་བསྒྱུར་བཀའ་དྲིན་བསྐྱངས་པའི་ལུགས་གཉིས་སྟོབས་ཀྱིས་དྲེགས་ཤིང་དམངས་ཀྱི་བདེ་སྡུག་གི་རི་མོ་སྙིང་དབུས་སུ་བཅངས་པའི་རིམ་པ་ཁག་གི་མགོ་ཁྲིད་རྣམ་པ་དང་།
གངས་ཅན་སྐྱེ་འགྲོ་ཡོངས་ཀྱི་མགོན་དང་དཔུང་གཉེན་དམ་པར་མངོན་པར་བཞེངས་པའི་བླ་སྤྲུལ་རྣམ་པ། ཐོས་བསམ་རིག་པའི་དཔལ་གྱིས་ཡོངས་སུ་ཕྱུག་ཅིང་བསླབ་གསུམ་ཡོན་ཏན་རྒྱ་མཚོའི་ཕ་རོལ་ཏུ་སོན་པའི་བཀའ་རབ་འབྱམས་དགེ་བའི་བཤེས་གཉེན་རྣམ་པ།
ལུང་རྟོགས་བསྟན་པའི་ཁུར་ཆེན་དགུང་དུ་འདེགས་པའི་བྱེད་པོ་དགོན་པ་ཁག་གི་མཁན་ལས་ཟུར་རྣམ་པ།
རླབས་ཆེན་བསོད་ནམས་དཔལ་གྱིས་མངོན་པར་མཐོ་ཞིང་དད་དམ་འགྱུར་བ་མེད་པའི་སྦྱིན་བདག་རྣམ་པ་བཅས་ས་གནས་དང་ཡུལ་ཕྱོགས་མི་འདྲ་བ་ག་ས་གང་ནས་བསྟན་སྲིད་ཀྱི་ཁུར་ཆེན་ཕྲག་ཏུ་བཞེས་པའི་རླབས་ཆེན་གྱི་མཛད་བཟང་རྣམས་རེ་ཞིག་འཕྲོ་བཅད་དེ་སྐུ་ངལ་འཛེམ་མེད་ངང་ལེ་བར་བརྒྱ་ཕྲག་སྟོང་ཕྲག་ལྷག་བརྒྱུད་དེ་སེར་ཤུལ་དགོན་ཐེག་ཆེན་དར་རྒྱས་གླིང་དུ་ཕེབས་འདུག
གཙུག་ལག་ཁང་ངོ་སྤྲོད་མདོར་བསྡུས།
འཚོགས་ཆེན་གཙུག་ལག་ཁང་གི་ནང་རྟེན་གྱི་གཙོ་བོ་ནི་སྟོན་པ་མཉམ་མེད་ཐུབ་པའི་དབང་པོ་གཙོ་འཁོར་གསུམ།
གཡས་ཕྱོགས་སུ་རྗེ་ཡབ་སྲས་གསུམ་དང་། གཡོན་ཕྱོགས་སུ་རྒྱལ་པཎ་རྣམ་གཉིས་དང་དགོན་འདི་ཕྱག་འདེབས་པ་པོ་རྗེ་བཀའ་བཅུ་པ་བློ་བཟང་ཆོས་དར་སོགས་ཀྱི་སྣང་བརྙན་ཆེ་ཚད་ཐོག་བརྩེགས་གཉིས་དང་།
དེའི་གཡས་ཕྱོགས་སུ་སྒྲོལ་མ་ལྷ་ཉེར་གཅིག གཡོན་ཕྱོགས་སུ་ཤེས་རབ་ཀྱི་ལྷ་ཉེར་གཅིག ཐོག་བརྩེགས་གཉིས་པའི་ཁར་རྒྱལ་བ་ཙོང་ཁ་པ་བློ་བཟང་གྲགས་པའི་དཔལ་གྱི་སྐུ་བརྙན་སྟོང་སྐུ།
ཚེ་དཔག་མེད་ཀྱི་སྐུ་བརྙན་སྟོང་སྐུ། སྨན་བླའི་སྐུ་བརྙན་སྟོང་སྐུ། རྗེ་བཙུན་སྒྲོལ་མའི་སྣང་བརྙན་སྟོང་སྐུ། ཐོག་བརྩེགས་གསུམ་པར་དཀྱིལ་དུ་ཇོ་བོ་ཡིད་བཞིན་ནོར་བུའི་སྐུ་བརྙན་གཙོའི་བྱང་སེམས་ཉེ་བའི་སྲས་བརྒྱད་དང་། དཔལ་ནཱ་ལེནྡྲའི་པཎ་གྲུབ་བཅུ་བདུན།
ཁྲོ་བོ་མི་གཡོ་བོ། རྟ་མགྲིན་བཅས་ཀྱི་ལྷ་ཁང་། དེ་བཞིན་ཐུབ་པའི་གནས་བརྟན་བཅུ་དྲུག རྒྱབ་ངོས་སུ་དགེ་ལྡན་པའི་ཕྱག་ཆེན་བླ་མ་བརྒྱུད་པའི་བླ་བརྒྱུད།
གཡས་ཕྱོགས་སུ་སྔ་འགྱུར་བའི་བླ་བརྒྱུད། གཡོན་ངོས་སུ་བཀའ་བརྒྱུད་ཆེ་བཞི་ཆུང་བརྒྱད་ཀྱི་བླ་བརྒྱུད།
མདུན་ངོས་སུ་དཔལ་ལྡན་ས་སྐྱའི་ལམ་འབྲས་ཀྱི་བླ་བརྒྱུད། དེའི་ཕྱི་རོལ་གྱི་ཤར་དུ་རྡོ་རྗེ་སེམས་དཔའ་སྟོང་སྐུའི་ལྷ་ཁང་།
ལྷོར་རྒྱ་ཆེན་སྤྱོད་བརྒྱུད་ཀྱི་ལྷ་ཚོགས། ནུབ་ཏུ་ལམ་རིམ་བླ་མ་བརྒྱུད་པའི་ལྷ་ཚོགས།
བྱང་དུ་ཟབ་མོ་ལྟ་བརྒྱུད་ཀྱི་ལྷ་ཚོགས། ཐོག་བརྩེགས་བཞི་བའི་དཀྱིལ་དུ་རྒྱལ་བ་རྡོ་རྗེ་འཆང་གཙོ་བོར་གྱུར་བའི་བླ་མེད་ཀྱི་ལྷ་ཚོགས།
གཡས་སུ་སྤྱོད་རྒྱུད་ཀྱི་ལྷ་ཚོགས། རྒྱབ་ཏུ་རྣལ་འབྱོར་རྒྱུད་ཀྱི་ལྷ་ཚོགས། གཡོན་དུ་བྱ་རྒྱུད་ཀྱི་ལྷ་ཚོགས་དང་།
རྗེ་བཙུན་འཇམ་པའི་དབྱངས་ཀྱི་སྟོང་སྐུ། སྤྱན་རས་གཟིགས་ཀྱི་སྟོང་སྐུ། ཕྱག་རྡོར་སྟོང་སྐུ་བཅས་ཡོད། དེའི་ཕྱི་རོལ་གྱི་རྒྱབ་ངོས་གཡས་སུ་དཔལ་རྒྱལ་བ་ཇོ་ནང་བའི་ལྷ་ཁང་།
གཡོན་དུ་ཞི་བྱེད་པའི་ལྷ་ཁང་། ཐོག་བརྩེགས་ལྔ་བར་ཇོ་བོ་ཡིད་བཞིན་ནོར་བུ་དང་། རྒྱལ་བ་རིགས་ལྔ་གཙོ་བོར་གྱུར་བའི་ལོངས་སྐུ་དང་བྱང་སེམས་ཉེ་བའི་སྲས་བརྒྱད་ཀྱི་ལྷ་ཚོགས་བཅས་བཞུགས།
གསར་དུ་བཞེངས་བཞིན་པའི་སྒྲོལ་མ་ཉེར་གཅིག་གི་ལྷ་ཁང་།
མཐོ་རིམ་ནང་བསྟན་སློབ་གླིང་གི་འདུ་ཁང་།
ནང་རྟེན་གཙོ་བོ་ནི། སྟོན་པ་གཙོ་འཁོར་གསུམ་དང་། རྗེ་ཡབ་སྲས་གསུམ། བྱམས་འཇམ་དབྱངས། འཕགས་མཆོག་སྐུ་སྒྲུབ་དང་ཐོགས་མེད། སེ་ར་རྗེ་བཙུན་ཆོས་ཀྱི་རྒྱལ་མཚན་སོགས་ཀྱི་སྐུ་བརྙན་བྱིན་རླབས་ཅན་དུ་མ་བཞུགས་ཡོད།
ཐོག་ཁང་གཡས་གཡོན་དུ་ཡང་གཞུང་ཆེན་བཀའ་པོད་ལྔའི་གཙོའི་ཐུན་མོང་རིག་གནས་བཅས་དཔེ་ཁྲིད་བྱེད་ཡུལ་གྱི་སློབ་ཁང་མང་དུ་ཡོད་དོ།
།
ནག་ཆུ་ཁམས་ཚན།
གླིང་སྟོད་ནས་མར་བརྩིས་པའི་དང་པོ་ནག་ཆུ་ཁམས་ཚན་ཡིན་ལ་དེའི་ནང་དུ་རྒྱལ་བ་ཚེ་དཔག་མེད་ལྷ་དགུ་གཙོ་བོར་གྱུར་པའི་འཆི་མེད་ཚེ་སྒྲུབ་ཀྱི་ལྷ་ཁང་དང་། ནག་ཆུ་ཁམས་ཚན་གྱི་ཐད་ཀའི་ལྕགས་རིའི་སྒོ་ཆེན་གྱི་གཡས་གཡོན་དུ་སྨན་གཟུངས་དང་ཚེ་ལྷ་རྣམ་གསུམ་གྱི་བསྙེན་པ་སོགས་གཟུངས་གཞུག་བྱས་པའི་དུང་འཁོར་ཡོད།
བསམ་བློ་ཁམས་ཚན།
གཉིས་པ། བསམ་བློ་ཁམས་ཚན་གྱི་ནང་དུ་རྗེ་བླ་མ་བློ་བཟང་གྲགས་པ་ཡབ་སྲས་གསུམ་གཙོ་བོར་གྱུར་བའི་བྱིན་རླབས་མཆོག་སྩོལ་གྱི་ལྷ་ཁང་། བསམ་བློ་ཁམས་ཚན་གྱི་ཐད་ཀའི་སྒོ་ཆེན་དུ་དམིགས་བརྩེ་མའི་དུང་འཁོར་ཡོད།
བྱ་བྲལ་ཁམས་ཚན།
གསུམ་པ། བྱ་བྲལ་ཁམས་ཚན་གྱི་ནང་དུ་རྒྱལ་བ་རིག་གསུམ་མགོན་པོ་གཙོ་བོར་གྱུར་པའི་དངོས་གྲུབ་ཀུན་འབྱུང་གི་ལྷ་ཁང་། བྱ་བྲལ་ཁམས་ཚན་གྱི་ཐད་ཀའི་སྒོ་ཆེན་དུ་རིགས་གསུམ་མགོན་པོའི་དུང་འཁོར་ཡོད།
ལྷོ་བ་ཁམས་ཚན།
བཞི་བ། ལྷོ་བ་ཁམས་ཚན་གྱི་ནང་དུ་ངན་སོང་སྦྱོང་བ་ལྷ་དགུ་གཙོ་བོར་གྱུར་པའི་སྡུག་བསྔལ་ཀུན་སེལ་གྱི་ལྷ་ཁང་དང་། ལྷོ་བ་ཁམས་ཚན་གྱི་ཐད་ཀའི་སྒོ་ཆེན་དུ་གཟུངས་ཆེན་སྡེ་ལྔའི་དུང་འཁོར་ཡོད།
ཧར་གདོང་ཁམས་ཚན།
ལྔ་པ། ཧར་གདོང་ཁམས་ཚན་གྱི་ནང་དུ་རྡོར་སེམས་རིགས་ལྔ་གཙོ་བོར་གྱུར་པའི་སྒྲིབ་པ་རྣམ་འཇོམས་ཀྱི་ལྷ་ཁང་། ཧར་གདོང་ཁམས་ཚན་གྱི་ཐད་ཀའི་སྒོ་ཆེན་དུ་ཡིག་བརྒྱའི་དུང་འཁོར་ཡོད།
སྣང་མཐའི་མཆོད་སྡོང་ལྷ་ཁང་།
ལྷ་ཁང་འདིའི་ནང་གི་རྟེན་གསུམ་གྱི་རིམ་པ་ནི། གཙོ་བོ་གསེར་གདུང་ཆེན་མོ་ལ་ཆེ་ཚད་སྨི་༨ཅན་དང་། ཐོག་བརྩེགས་གཉིས་པའི་གཡས་ཕྱོགས་སུ། སྟོན་པ་ཐུབ་པའི་དབང་བོ་དང་སྲས་ཀྱི་ཐུ་བོ་བྱམས་འཇམ་དབྱངས་གཉིས། དེའི་གཡོན་ཕྱོགས་སུ་འོད་དཔག་མེད་གཙོ་སྐུ་བྱས་ནས། སྟོན་པ་ཤཱཀྱ་ཐུབ་པ། རིན་ཆེན་འོད་རྒྱལ། ཉེ་སྲས་བརྒྱད། གནས་བརྟན་བཅུ་དྲུག རྒྱལ་ཆེན་སྡེ་བཞི་བཅས་བཞུགས།
| 