དབུ་མ་རབ་འབྱམས་པའི་གཟེངས་རྟགས་གནང་འདུག
ལབ་དགོན་དགའ་ལྡན་མདོ་སྔགས་བཤད་སྒྲུབ་འཕེལ་རྒྱས་གླིང་དུ་སྤྱི་ལོ་
༢༠༡༤ .༡༠ .༦
བོད་ཟླ་ ༨. ༡༣ གྱི་ཉིན་ཤར་རྒྱལ་བ་ཙོང་ཁ་པ་ཆེན་པོའི་གསུངས་པའི་དབུ་མ་དགོངས་པ་རབ་གསལ་རྩོད་རྒྱུགས།
བྲི་རྒྱུགས། བློ་རྒྱུགས་བཅས་མི་ལོ་བཞིའི་རིང་རྒྱུགས་སྤྲོད་ལེགས་པར་གནང་བའི་དགེ་སློང་དྲུག་གིས་རྒྱུགས་འབྲས་རབ་འབྱམས་པའི་གཟེངས་རྟགས་ཐོབ་པ་དང་།
གཟེངས་རྟགས་འབུལ་བའི་མཛད་སྒོ་སྟབས་བདེ་ཞིག་ཚོགས་པར་མ་ཟད། འབུལ་བའི་སྐབས་དགེ་འདུན་དམངས་ཀྱིས་དགའ་བའི་ཐལ་སྒྲས་བསུས་ཏེ་ཐུགས་དགྱེས་དགྱེས་གནང་།
ད་རུང་ལབ་དགོན་གྱི་མཁན་པོ་བསོད་ནམས་ཆོས་འཕེལ་མཆོག་གིས་རབ་འབྱམས་པའི་གཟེངས་རྟགས་སྤྲད་པར་ལ་དམིགས་ཡུལ་དང་དགོས་པ་ཡོད་སྐོར་འདི་ལྟར་གསུང་འདུག
དེ་རིང་ཚེས་བཟང་སྐལ་བཟང་གི་ཉིན་མོ་འདིར་དབུ་མ་རབ་འབྱམས་པའི་གཟེངས་རྟགས་སྤྲད་པ་ནི། སེར་བྱེས་མཁས་སྙན་གྲྭ་ཚང་གི་སྒྲིག་གཞི་ལྟར་ཡིན་པས་ཁུངས་མེད་མ་ཡིན་ཞིང་།
དམིགས་ཡུལ་གཙོ་བོ་ནི། མ་འོངས་མི་རབས་རྣམས་སློབ་སྦྱོང་ལ་སྤྲོ་བ་དང་བློ་གྲོས་འཕེལ་རྒྱས་ཡོང་བའི་ཆེད་དུ་ཡིན་པའི་སྐོར་དང་།
སངས་རྒྱས་ཀྱི་བསྟན་པ་འཇིག་ལ་ཉེ་བའི་དུས་སྐབས་འདི་འདྲ་ཞིག་ལ་ནང་པའི་ཆོས་དང་རིག་གཞུང་འདི་མི་ཉམས་གོང་འཕེལ་བྱེད་པར་ངེད་ཅག་ལ་རག་ལུས་པས།
ངེད་ཅག་གི་ངོས་ནས་ཀྱང་འཇོན་ཐང་ཡོད་ཚད་ལ་བརྟེན་ནས་སངས་རྒྱས་ཀྱི་བསྟན་པ་ཡུན་རིང་སྤུས་དག་པོ་ཞིག་གནས་ཐབས་སུ་ལས་འགན་སྤེལ་རྒྱུ་ཡིན་ཞེས་དང་།
གཟེངས་རྟགས་འདི་འདྲ་ལོ་རེ་རེར་འབུལ་རྒྱུ་མེད། དཔེར་ན། ཕར་ཕྱིན་ལྟ་བུ་ཡིན་ན་མི་ལོ་དྲུག་དང་བདུན་གྱི་བར་རྩོད་རྒྱུགས།
བྲི་རྒྱུགས། བློ་རྒྱུགས་བཅས་གདམས་ཏེ། གཟེངས་རྟགས་ཐོབ་མཁན་རྣམས་ལ་འབུལ་རྒྱུ་ཡིན་པའི་སྐོར་སོགས་གསུང་མཛད་མང་དུ་གནང་།
གཟེངས་རྟགས་སྤྲད་ཡུལ་ནི། ཨང་རིམ་དང་བོའི་དང་བོ་སྟོང་སྐོར་བློ་བཟང་ཉི་མ། ཨང་རིམ་དང་བོའི་གཉིས་པ་ཀ་བཞི་བློ་བཟང་རྒྱ་མཚོ།
ཨང་རིམ་དང་བོའི་གསུམ་པ་སྟོང་སྐོར་བློ་བཟང་སྦྱིན་པ། ཨང་རིམ་གཉིས་པའི་དང་བོ་སྟོང་སྐོར་བློ་བཟང་དབང་ལྡན།
ཨང་རིམ་གཉིས་པའི་གཉིས་པ་འདམ་གཞུང་བློ་བཟང་དར་རྒྱས། ཨང་རིམ་གསུམ་པ་ཨ་མདོ་འཇམ་དབྱངས་ཕུན་ཚོགས་བཅས་ཡིན།
ཁོང་རྣམས་ཀྱིས་མི་ལོ་དུ་མའི་རིང་ལ་དགའ་བཞིན་སྤྲོ་བཞིན་ནང་ཆོས་ལ་སློབ་སྦྱོང་བྱས་པ་དང་།
ལྷག་པར་དུ་མི་ལོ་བཞིའི་རིང་ལ་ལོ་ཟླ་ཞག་གིས་བསྐྱལ་ཞིང་། ཁ་ཆར་གདོང་གིས་བསུས་ཏེ་དབུ་མ་ལ་བརྩོན་འགྲུས་བསྐྱེད།
དེ་ལྟ་བུའི་སློབ་སྦྱོང་གི་དཀའ་ངལ་མང་བོ་ཁྱད་དུ་བསད་མཐར། དབུ་མ་རབ་འབྱམས་པའི་གཟེངས་རྟགས་འདི་གེགས་མེད་བདེ་བླག་ཏུ་ཐོབ་པ་རེད། མདོར་ན།
དགེ་རྩ་འདིས་མི་རབས་རྗེས་མ་རྣམས་བློ་གྲོས་ཇེ་མཐོར་ཡོང་བའི་ཐབས་སུ་འགྲོ་བར་
སྨོན་ལམ་ཐེངས་ཤིག་འདེབས་རྩིས་ཡོད་པས་དེ་ལུགས་ཐུགས་འཇགས་འཚལ།
ལབ་དགོན་གཙུག་ལག་སློབ་གཉེར་ཁང་ཆེན་མོའི་དབུ་མ་རབ་འབྱམས་པའི་ཕྱག་ཁྱེར།
འཕྲིན་འགོད་པ་བློ་སྦྱིན།
| 