<<བདག་གི་ལང་ཚོ་གང་དུ་ཡོད།>>
ཆིག་ལབ་ལ་མོལ་འཚམས་མེད་རུང་།
བདག་ལ་གཏན་དུ་སྤྱན་རས་གཡར་བར་འཚལ།
ཁྱེད་ཀྱི་མདུན་དྲུང་དུ་ང་ད་དུང་གོམས་ཡོད།
འདི་ནི་བདག་གི་ལང་ཚོ་འཚོལ་འདོད་པས་ཡིན།
མུ་སྨག་གི་ཕ་མཐའ་ནས་བདག་ལ་རྒྱང་ལྟ་གནང་བར་འཚལ།
གོམ་བགྲོད་ཇི་ལྟར་དལ་ཡང་ང་སླར་ཡང་ཐོན་ངེས།
རྡོག་ལམ་མིག་ཆུ་དང་སྨྲེང་བས་བསྙིལ་སོང་།
འོན་ཀྱང་ང་ལ་ད་དུང་མཛེས་སྡུག་ཡོད་པས།
ངས་ཅིས་ཀྱང་རང་གི་ལང་ཚོ་འཚོལ་འདོད།
ཁོང་ཅག་ཡོད་ཚད་རྒས་ཟིན་རུང་།
ང་ལ་ཁྱེད་ཀྱི་མཛེས་སྡུག་མཁོ།
འཁྱམས་ཉུལ་གྱི་འཇིག་རྟེན་རྒྱ་ཆེ་བས།
ང་རང་གི་རྨི་ལམ་ལ་དུང་བ་ལྷོད་མི་སྲིད།
དེ་བས་ངས་ད་དུང་ལང་ཚོ་འཚོལ་འདོད།
རྒྱབ་གཟུགས་ཀྱིས་བདག་ལ་བསླུ་བྲིད་གཏོང་མི་སྲིད།
དེ་ནི་བདག་མིག་ཆུ་ལ་ལོབས་ཚར་བས་ཡིན་ངེས།
བྱམས་དུང་གི་གཡབ་མོ་ལགས།
སུ་ཞི་གི་ལང་ཚོ་ད་ལྟ་ཁྱེད་ཀྱི་རྫི་མས་བསྐུངས་ཡོད།
ཟླ་ངོགས་ནས་རྒྱང་གླུ་འཐེན་པའི་མི་དེས།
སྐར་ཚོགས་རེ་རེ་བཞིན་ཁྱེད་ཀྱི་པང་དུ་བསུས།
འཚོལ་སྙེག་གི་གཡོར་གྲུ་དཀྲུགས་པའི་མི་དེས།
རླབས་གཉེར་སོ་སོ་ལ་ཁྱེད་ཀྱི་མིག་རྒྱ་བཏབ།
འོན་ཀྱང་། ངས་ད་དུང་ཅི་ཡང་མ་རྙེད་པ་ནི་རང་གི་ལང་ཚོ་རེད།
<<འཚོ་བ་ལགས། གུ་ཡངས་ལན་གཅིག་གནང་རོགས། >>
༡
གོམ་སྒྲ་དང་མིག་ཟུང་གིས་ས་སྲོད་མདུན་དུ་བཅར་དུས།
གཙང་ངོགས་ཀྱི་མཚམས་སྤྲིན་དེས་ཉི་འོད་རྒྱང་དུ་བསྐྱེད།
ཨེ་མ། ང་ནི་གཙང་འགྲམ་དུ་ལྷག་པའི་ངང་བ་ཁེར་འགྲོ་དེ་ཡིན་སྲིད།
༢
མི་ཚོགས་དལ་ལྷོད་ཀྱིས་ཉུལ་བའི་ཞབས་སྒྲ་མིག་ལམ་ནས་བོར་དུས།
ཤབ་ཤུབ་ཀྱིས་མཆིད་པའི་སྙན་ཚིག་ད་ལྟ་སུན་སྣང་གི་བྲང་ཁར་འཐོར།
ཀྱེ་མ། ང་ནི་སྲང་ལམ་དུ་འགྱེལ་བའི་ཆང་བཟི་ཁེར་རྐྱང་དེ་ཡིན་སོང་།
༣
རྡོག་ཁྲེས་ལྕི་བའི་སྐར་ཚོམ་དག་སྒེའུ་ངོགས་ཀྱི་ལོ་མར་འཁྱུད་དུས།
བཀྲག་མདངས་ཡལ་བའི་རྨི་ལམ་གྱི་བཀོད་པ་མཆིལ་རིས་ཀྱི་གསེང་དུ་ཡིབ།
ཀྱེ་ཧུད། ང་ནི་གནས་མལ་དུ་ལྷུང་བའི་ཡུགས་མོ་ཁེར་སྡོད་དེ་ཡིད་ངེས།
<<ཀུ་རེ་སློང་བའི་མེ་ཏོག>>
དང་བོ།
༡ ༽
ཆར་ཟིལ་དང་ཉི་འོད་ཀྱིས་བསླས་པའི་ཞོགས་པ་དེར།
སུ་ཞིག་གིས་ཆུ་ཐིགས་བདག་གི་འགྲམ་པར་གཏོར་བ་ན།
བདག་ལ་དངངས་ཚབ་དང་སྐྲག་སྣང་ཅི་འདྲའི་མོད།
༢༽
ངལ་དུབ་ཀྱི་རྫི་མ་དུད་པོར་འཕྱང་བའི་གཞོན་ནུ་དེས།
སུ་ཡིན་་་སུ་ཡིན། མང་དུ་དྲིས་ཀྱང་།
དབེན་པའི་ལྗོན་ཚལ་དུ་རྨི་ལམ་གྱི་འཇའ་ཟེར་རྐུ་བའི་ཁྱོད།
ད་དུང་གང་དུ་ཡོད་དམ་་་
༣༽
སིམ་མེར་ལུས་པའི་སྨྱུག་སྤྱིལ་གྱི་ཕྱི་རོལ་ནས།
གླུ་སྐད་ཁུར་བའི་ཕྱེ་མ་ལེབ་ཀྱི་གཤོག་དབྱངས།
སྲིན་དར་གྱི་དྲ་གསེབ་ནས་བདག་གི་གམ་དུ་ཤུ་བུར་འཛུལ།
༤༽
སྨྱུག་ཞྭ་དང་རྩྭ་ལྭ་འཚེམ་བཞིན་པའི་འགྲུལ་བཞུད་པ་དེས།
ངའི་ངལ་གསོ་དང་ལས་ཀ་ལ་བར་ཆད་སྟུད་མར་གཏོང་བའི་ཁྱོད།
གང་དུ་ཡོད་་་གང་དུ། ར་བའི་ནང་དང་། ལྡུམ་རའི་ཕྱི་རོལ།
༥༽
རྩི་བཅུད་ཀྱིས་སྨིན་མ་མཁྱོག་པོར་བཅོས་པའི་ཁྱོད།
ཟེ་བ་དང་འདབ་མས་གདོང་ཕྱེད་བཀབ་པའི་ཁྱོད།
ཡལ་གའི་སྟེགས་བུ་ཐོག་གར་རྩེད་ལ་གཞོལ་བ་ན།
ངས་གཞི་ནས་ཁྱོད་ཉིད་ཀུ་རེ་སློང་བའི་མེ་ཏོག་ཏུ་ངེས།
༦༽
དུས་སྐལ་དང་། འཚོ་བ། བླ་སྲོག་ཡོད་ཚད་ལ་དབང་སྒྱུར་བའི་མི་ཡཱ།
གཉིས་པ།
༡༽
ཕྱི་རོལ་ནས་ཁ་བ་བབས་སོང་།
སྐྱོ་སྣང་གི་ལན་བུ་དུད་པོར་དཔྱངས་པའི་མི་ཚོགས་ཡྰ།
བདག་ལ་གདུང་བ་མི་གནང་བར་འཚལ།
༢༽
གདོང་རས་སུ་ཟུར་མིག་བཀལ་བའི་གྲིབ་གཟུགས་དེས།
ཐག་རིང་ནས་བརྩེ་དགོད་ཀྱིས་བདག་ལ་འཕྱ།
དགོངས་པ་མ་འཚམས། ང་ཁྱེད་ཀྱི་ཉེ་སར་བཅར་ན་འདོད།
༣༽
རྨི་ལམ་དུ་དཔྱིད་མདངས་རྣམ་པར་བཀྲ།
གླིང་བུ་འབུད་པར་མཁས་པའི་བྱིས་པ་ཀྱེ།
ཅི་ཞིག་གི་སླད་དུ་བདག་ལ་ཀུ་རེ་སློང་ངམ།
༤༽
ཧ་ཧ་་་་ ལྗོན་ལོ་ལྡེམ་ལྡེམ་དུ་འདར་བའི་ཕང་བར།
ངས་དངུལ་གྱི་མེ་ཏོག་ལ་བརྒྱུས་པའི་གླུ་སྙན་དཀྲོལ།
ཁྱོད་ཀྱིས་ད་དུང་ཕངས་སེམས་ཀྱིས་བདག་ལ་བལྟ་དོན་ཅི།
༥༽
ཉི་འོད་ཀྱི་དྲྭ་མིག་ཏུ་བྱིའུ་ཁྱུའི་སྒྲོ་ཐུར་འཐོར་དུས།
དངངས་སྐྲག་ཤིག་ཤིག་གིས་ལག་ཟུང་ང་ཡི་བྲང་ཁར་སྙེན།
གནས་མལ་འཚོལ་བའི་གཞོན་ནུ་ལགས། བདག་ལ་དྲོལ་ཁོལ་མི་འདུག
༦༽
ཁྱོད་ཉིད་སིལ་སྡོང་གི་ར་བར་སྟོང་བསམ་གྱིས་འགྲེང་སྟེ་རྒྱང་རིང་ལ་ཅེར།
བསམ་ལ་ངོམས་པའི་མི་དེས་ཡལ་གའི་སྟེང་ནས་འཛུམ་དཀར་གྱིས་ཁྱོད་ལ་ལྟ།
ཀུ་རེ་སློང་བའི་མེ་ཏོག
གསུམ་པ།
༡༽
བརྩེ་བའི་མི་ལགས།
ཁྱོད་ཀྱིས་ཟླ་འོད་ལ་རེ་དུས།
བདག་གིས་གཏན་དུ་སྤྲིན་པ་ལ་གཞིག
སྤྲིན་པས་ཁྱོད་ཉིད་བདག་གི་ཉེ་སར་བསྐྱལ།
ཟླ་བས་ང་རང་ཁྱོད་དང་རྒྱང་དུ་བསྐྱེད།
༢༽
གསལ་ལ་མི་གསལ་བའི་གཞས་གདངས་དེས།
ཁྱོད་རང་གཉིད་དུ་མི་འཇུག ལྟོས་དང་།
བདག་སྐར་ཚོམས་སུ་བརྫུས་ནས་ཁྱོད་ཀྱི་སྒེའུ་ཁྲ་ལས་ཞུ་མོལ་མཆིད།
ཅིས་ཀྱང་གཟིམ་པར་འཚལ།
༣༽
འོད་ངོགས་ནས་ཡིག་འབྲུ་འཚོལ་བའི་བྱིས་པ་ཨང་།
ཨ་མ་གང་སོང་ཟིན།
ངས་ཁ་རོག་གེར་སུ་ཞིག་ལ་སོ་ལྟ་བྱེད་དམ།
ཀུ་རེ་སློང་བའི་མེ་ཏོག
བཞི་བ།
༡༽
མཛེས་སྡུག་གི་ལྡུམ་ར་རུ།
མེ་ཏོག་གི་བསུང་ཞི་ཐུལ།
ལམ་འགྲམ་གྱི་འགྲུལ་བ་དེས་ང་རང་དལ་གྱིས་འཇིབ།
མེ་ཏོག་ཡ་་་མེ་ཏོག
ང་རང་སད་དུ་ཆུགས།
མི་ཚོགས་ཀྱི་མིག་ཟུང་གཏོང་བར་འཚལ།
༢༽
དྭངས་བསིལ་གྱི་རྫིང་བུ་རུ།
གསེར་མདོག་གི་ངང་མོ་འཁོར།
གྲུ་ཐོག་གི་གཞོན་ནུ་དེས་ང་རང་མིག་གིས་དྲངས།
༣༽
ཡུལ་གྱིས་བསྐལ་བའི་མཛའ་གྲོགས་ཀྱེ།
མེ་ཏོག་འདི་བཞེས་རོགས།
བདག་ལ་བཀྲག་མདངས་དང་དྲི་བསུང་མེད་པས་ཁྱོད་ཀྱི་མགུལ་རྒྱན་དུ་ག་ལ་རུང་།
༤༽
ཉི་འོད་ཀྱི་ཞོགས་པ་དེར།
ལྗང་གསར་གྱི་རྨི་ལམ་འཚོལ་བའི་མི་ཚོགས་དག་ཁྱེད་ཀྱི་གམ་དུ་སླེབས།
ངལ་དུབ་ཀྱིས་མནར་བའི་བདག
ད་དུང་རྨི་ལམ་དུ་གཡེངས།
ཀུ་རེ་སློང་བའི་མེ་ཏོག
ལྔ་བ།
༡༽
ཁེར་རྐྱང་གིས་མནར་བའི་མཚན་མོ་དེར།
རབ་རིབ་ཀྱི་ཟླ་བ་བདག་གི་སྒེའུ་ངོས་འཛུམ།
སུན་སྣང་གི་འོད་མོག་གཤོག་རྩེར་ཁུར་བའི་མེ་ཁྱེར་ད་དུང་རྒྱང་རིང་ན།
༢༽
ལྐོག་གྱུར་ཀྱི་གསང་བ་ཞིག་གིས་བདག་དལ་གྱིས་སྒེའུ་ཁུང་གི་ཕྱི་རོལ་ཏུ་ཁྲིད།
སྐབས་དེར་བདག་གིས་ཟླ་བསིལ་གྱིས་མ་རེག་པའི་གྲུ་ག་དེ་རུ།
གཞོན་ནུ་མ་ཞིག་ཀྲོང་ངེར་འགྲེང་བཞིན་ཡོད་པར་ཚོར།
༣༽
ང་འདི་ན་ཡོད་སྟེས་དབང་གིས་བདག་གི་ངག་སྒོ་ནས་འདི་ལྟར་ཤོར།
༤༽
ཁོ་མོས་འཚེར་སྣང་གི་ངང་ནས་སྒེའུ་ཁྲ་ལྷོད་ཀྱིས་ཕྱེས་སོང་།
༥༽
ཟླ་བ་གློ་བུར་དུ་མུན་ནག་གི་དྲྭ་གཟེབ་ཏུ་ཡིབས།
འོན་ཀྱང་སྔས་འགྲམ་གྱི་མིག་ཆུ་ལ་ད་དུང་འོད་དཀར་འཚེར།
༦༽
མཚན་མོ་འདིར་ཁྱོད་ཀྱིས་སྒེའུ་ཁུང་གི་དྲྭ་མིག་བསལ།
སྒེའུ་ཁུང་གི་དྲྭ་མིག་དེས་བདག་ཉིད་ཡོངས་སུ་བསལ།
༧༽
སྒྱུ་འཕྲུལ་གྱི་ཟློས་གར་ལ་སུན་པ་མེད།
རྨི་ལམ་གྱི་རོལ་རྩེད་ལ་ངོམས་པ་མེད།
ཀུ་རེ་སློང་བའི་མེ་ཏོག
དྲུག་པ།
༡༽
ཟླ་འོད་ཀྱི་ཟེགས་མ་སྒེའུ་ངོགས་སུ་འཐོར་བ་དང་།
འོད་ཞགས་ཀྱིས་བསྣུམས་པའི་འཛུམ་བརྩེ་གོར་མོ་ཞིག
ད་ལྟ་བདག་གི་རྨི་ལམ་ལས་ལྷམ་མེར་འཚེར།
༢༽
ཟིལ་བ་ཐོགས་པའི་མེ་ཏོག་ཨང་།
ཁྱོད་ཀྱིས་དཀྱོག་པོར་བསྟར་བའི་ཐིག་རིས་ལ་རྨི་ལམ་གྱི་འཇའ་ཟེར་ཐགས་སུ་བསླས།
འདབ་མ་ལས་བདག་གི་སེམས་གཏམ་མཆིད།
ཡང་སྙིང་བདག་གང་དུ་ཡོད་དམ།
༣༽
དུང་སེམས་ཀྱི་ཞེན་པ་འབར་བའི་མཐོངས་དབྱིངས་སུ།
འོད་ཀྱི་སྲད་བུ་ལ་བརྒྱུས་པའི་མེ་ཁྱེར་ཡན།
སྒེའུ་འགྲམ་གྱི་མེ་ཏོག་འཛུམ་བག་གིས་བསུ་མཁན་ཁྱོད་ཡིན་ནམ།
༤༽
ཅི་ཞིག་སླད་དུ་ང་ཁྱོད་ཀྱི་དྲི་བསུང་ལས་ནམ་ཡང་ཐར་དུས་མེད།
དེ་ནི་བདག་ཟེའུ་འབྲུ་ལ་སྨྲེང་བ་ཁོ་ནས་མིན་ཏེ།
ཆིག་ལབ་དང་ལྐོག་འཛུམ་ལ་སྐྲག་པས་སོ། །
༥༽
གླུ་སྙན་གྱི་འཇམ་རླུང་ལྷོད་ཀྱིས་ལྡང་ཡོང་།
ངའི་སྒེའུ་ཁྲ་ལ་གསང་ལམ་ཡོད་པ་གཞི་ནས་ཤེས།
ཀྱེ་མ་་་། ངའི་སྙན་ངག་གི་ཕྲ་རྒྱན་ཁྱོད་ཀྱི་གེ་སར་དུ་་འཁྲུལ་སོང་།
དེ་ནི་བསུང་ངད་ཅིག་གི་བྱིན་རླབས་རེད།
༦༽
འཇིག་རྟེན་འདིར་རྨི་ལམ་ཅི་འདྲའི་མོད།
རྨི་ལམ་རེ་རེ་ལའང་ད་དུང་འཇིག་རྟེན་རེ།
ཁྱོད་ཀྱི་འཛུམ་མདངས་ཇི་ལྟར་ཆུང་ཡང་།
བདག་གི་འཇིག་རྟེན་དུ་གཏན་ནས་ཤོང་ཐབས་བྲལ།
姓名:东日·曲琼吉美