༄༅།།རྨད་བྱུང་ཐུགས་རྗེ་བརྩེ་བའི་རྦ་རླབས་གཡོ།།
ལུང་རྟོགས་ཡོན་ཏན་ཡར་ངོའི་ཟླ་ལ་འགྲན།།
སྤངས་རྟོགས་ཕུན་ཚོགས་དཔལ་གྱིས་ཡོངས་གཏམས་པའི།།
འདྲེན་མཆོག་ཐུབ་པའི་དབང་བོའི་ཞབས་ལ་འདུད།།
ཕས་རྒོལ་སྨག་རིམ་འཇོམས་པའི་སྒྲོན་མེ་གསལ།།
ལྷག་བསམ་རྒྱ་མཚོའི་རྦ་རླབས་མཁའ་ལ་འཕྱོ།།
བྱམས་སེམས་དཔྱིད་རླུང་འཇམ་པོ་ལྡང་ལ་མཁས།།
མཚུངས་མེད་བཤེས་གཉེན་རྣམས་ལ་སྙིང་ནས་འདུད།།
བཅོས་མིན་དད་པའི་དྲི་བཞོན་བུ་མོ་ཡིས།།
བདག་བློའི་ལྗོན་ཤིང་དུས་ཀུན་གཡོ་བ་ལས།།
དད་གསུམ་རང་མདངས་གཙང་བའི་མཚན་མ་རུ།།
བསྟོད་དབྱངས་དྲི་བསུང་ཕྱོགས་ཀུན་སྤེལ་ལ་སྤྲོ།།
༧སྐུ་ཕྲེང་དང་བོ་རོང་ཆེན་དགེ་འདུན་རྒྱལ་མཚན་ཞབས།
ཡབ་རྗེ་འཇམ་དབྱངས་བླ་མ་གཙུག་ཏུ་བཀུར།།
ཟབ་རྒྱས་མདོ་སྔགས་གདམས་པའི་གཏེར་དུ་གྲུབ།།
བློ་བཟང་རྒྱལ་བའི་ཐུགས་ཀྱི་སྲས་བོར་གྱུར།།
བསྟན་པ་ཕྱོགས་མཐར་སྤེལ་བའི་དར་ཆེན་མཛད།།
སྙིགས་དུས་དམུ་རྒོད་འགྲོ་བ་ཀུན་བཏུལ་ནས།།
མདོ་རོང་ཡུལ་དུ་བསྟན་པའི་རྒྱལ་མཚན་བསྒྲེང་།།
མདོ་སྔགས་བསྟནཔའི་འབྱུང་གནས་ཆོས་ཀྱི་སྡེ།།
བཀྲ་ཤིས་ལྷུན་གྲུབ་འགྲོ་བའི་དཔྱིད་དུ་བསྐྲུན།།
རོང་ཆེན་དགེ་འདུན་རྒྱལ་མཚན་དཔལ་བཟང་བོས།།
མུན་ནག་རྒྱ་མཚོར་འཐིམ་པའི་སེམས་ཅན་རྣམས།།
བརྩེ་བའི་ལྕགས་ཀྱུས་རྗེས་སུ་བཟུང་ནས་ནི།།
ཆོས་ཀྱི་ཉི་མས་རྨོངས་མུན་སེལ་བར་བྱས།།
༧སྐུ་ཕྲེང་གཉིས་པ་ཀིརྟི་བསྟན་པ་རིན་ཆེན་ཞབས།
མདོ་སྨད་རྔ་ལྗོངས་ས་ཡི་ཐིག་ལེ་རུ།།
སྐྱེ་དགུའི་མགོན་དུ་སྐུ་ཉིད་བལྟམས་མ་ཐག།།
ཡིག་དྲུག་བཟློ་བའི་ངོ་མཚར་རྨད་བྱུང་སོགས།།
ངོ་མཚར་དཔལ་གྱིས་ལྗོངས་འདི་ཁྱབ་པར་བྱས།།
གངས་ལྗོངས་བསྟན་འགྲོའི་ཕན་བདེ་འབྱུང་བའི་གཞི།།
དབུས་གཙང་ཆོས་ཀྱི་ཞིང་དུ་ཞབས་བསྒྱུར་ནས།།
ལེགས་ཚོགས་བཤེས་གཉེན་ཞབས་ལ་གུས་དུད་དེ།།
གཞུང་ཆེན་ལུང་རིགས་སྒྲོ་འདོགས་ཚར་དུ་བཅད།།
མདོ་རྒྱུད་ཟབ་རྒྱས་ཆོས་ཀྱི་དགའ་སྟོན་གྱིས།།
མཐའ་འཁོབ་འགྲོ་ལ་མཐར་བའི་ས་བོན་བསྐྲུན།།
རྒྱལ་བསྟན་ཟླ་གཞོན་སྟོང་གི་འཛུམ་ཟེར་གྱིས།།
གངས་ལྗོངས་ཡུལ་གྲུ་ཀུན་ལ་ཁྱབ་པར་བྱས།།
༧སྐུ་ཕྲེང་གསུམ་པ་ཀིརྟི་བསྟན་པ་རབ་རྒྱས་ཞབས།
ཞབས་སེན་གསེར་གྱི་རི་མོ་རྡོ་ལ་ཕབ།།
རྫུ་འཕྲུལ་རྣལ་མས་སྐྱེ་དགུའི་ཡིད་དབང་འཕྲོག།།
ལྐོག་གྱུར་གནས་ཀུན་སྒྲིབ་མེད་སྤྱན་གྱིས་གཟིགས།།
ཀུན་གྱིས་ལྷ་ཕྱག་གཙུག་གིས་གུས་པར་མཆོད།།
མདོ་སྔགས་གཞུང་བརྒྱ་ཐུགས་ཀྱི་དཀྱིལ་དུ་བཞེས།།
འཆད་རྩོད་རྩོམ་ལ་མཁས་དགུའི་རྒྱན་དུ་གྱུར།།
མཁྱེན་བརྩེ་ནུས་པས་འགྲོ་ཀུན་རྟག་ཏུ་བསྐྱངས།།
སྙན་པའི་གྲགས་པ་སྲིད་གསུམ་ཁོང་ལས་བརྒལ།།
ཐུབ་བསྟན་ས་ཆེན་གླིང་བཞིའི་ཁྱོན་ཀུན་དུ།།
མཁས་དང་གྲུབ་པའི་མཛད་འཕྲིན་འོད་སྟོང་གིས།།
གསལ་མཛད་འགྲོ་མགོན་བསྟན་པ་རབ་རྒྱས་ཀྱིས།།
ལྗོངས་འདིར་པད་འབྱུང་གཉིས་པའི་རྣམ་ཐར་བཞེས།།
༧སྐུ་ཕྲེང་བཞི་བ་ཀིརྟི་བློ་བཟང་འཇམ་དབྱངས་ཞབས།
རླབས་ཆེན་ཚོགས་གཉིས་དཔལ་གྱིས་བརྟས་པ་ཡིས།།
རྡོ་དྲིལ་ཕྱག་ཕྲེང་ངོས་འཛིན་གསལ་བར་མཛད།།
རྣམ་དཔྱོད་བློ་ཡིས་བཅུ་ཕྲག་འོ་མའི་མཚོ།།
ངོམས་མེད་འཐུང་བས་ཆོས་དབྱིངས་མཁའ་ལ་བསྐྱོད།།
འབྲས་སྤུངས་བློ་གསལ་གླིང་གི་དགའ་ཚལ་ནས།།
གསང་སྔགས་ཐེག་པའི་ཐོས་དོན་ཉེར་དགོངས་སྟེ།།
སྙིགས་ལྔའི་རང་མཚང་བདོ་བའི་རང་ཡུལ་དུ།།
ཆོས་འཁོར་ཉིན་བྱེད་དབང་བོའི་འཛུམ་ཟེར་ཕབས།།
སྲ་མཁྲེགས་གནམ་ལྕགས་ཐོག་མདའ་ཕྱག་གིས་བཞེས།།
འདྲེ་གདོན་མི་སྲུན་གྲངས་མེད་དམ་ལ་བཏགས།།
མགོན་མེད་འགྲོ་བར་མི་འཇིགས་སྐྱབས་མཛད་ནས།།
སྣང་སྲིད་དབང་བསྒྱུར་རྫུ་འཕྲུལ་མཐའ་ཡས་བསྟན།།
༧སྐུ་ཕྲེང་ལྔ་བ་ཀིརྟི་བསྟན་པའི་རྒྱལ་མཚན་ཞབས།
སྐྱེས་སྟོབས་ཤེས་རབ་སྤང་ལ་མེ་འབར་ཏེ།།
ན་ཚོད་དྲུག་ཙམ་ལོན་པའི་དུས་ཉིད་ནས།།
སྒྲ་རྩིས་སྙན་ངག་མེ་ཏོག་ཡོངས་བཏུས་ཏེ།།
མཁས་དགུ་དགྱེས་པའི་ལེགས་བཤད་མཆོད་སྤྲིན་སྤྲོས།།
མངོན་ཤེས་གྲུབ་རྟགས་བདག་གིར་ཆེར་བཞེས་ནས།།
སྐྱེས་མཆོག་རྒྱལ་སྲས་རྣམས་ཀྱིས་ལུང་བསྟན་པའི།།
མ་དང་མཁའ་འགྲོ་འདུ་བའི་གནས་མཆོག་ཏུ།།
གསང་སྔགས་སྟོད་རྒྱུད་གྲྭ་ཚང་གསར་དུ་བཏབ།།
ཉམ་ཐག་སྐྱེ་འགྲོར་ཆོས་སྦྱིན་ཆེར་མཛད་ཅིང་།།
རྒྱ་བོད་སློང་མོར་འཛད་མེད་གནང་སྦྱིན་བསྩལ།།
ཡབ་རྗེ་རྒྱལ་བ་གཉིས་པའི་མདོ་སྔགས་བསྟན།།
འཇིགས་མེད་སྙིང་སྟོབས་ཆེན་པོས་མཐའ་ལ་སྤེལ།།
༧སྐུ་ཕྲེང་དྲུག་པ་ཀིརྟི་དགེ་འདུན་ཆོས་ཀྱི་དབང་ཕྱུག་ཞབས།
སྐྱེས་བུ་རང་ག་མིན་པའི་ངེས་རྙེད་དེ།།
མདོ་དབུས་བླ་ལྷ་མང་བོའི་ལུང་བརྟག་གིས།།
སྐྱབས་མགོན་བླ་མའི་ཡང་སྤྲུལ་ངོས་བཟུང་སྟེ།།
གདན་ས་འདི་ནས་གདོང་ལྔའི་ཁྲི་ལ་བཀོད།།
བཤེས་གཉེན་རིགས་ཀྱི་ཅོད་པན་ཉེར་བསྟེན་ཏེ།།
མདོ་སྔགས་གཞུང་ལུགས་ཀུན་ལ་མཁས་བྱས་ནས།།
ཀུན་མཁྱེན་འཇིགས་མེད་དབང་བོའི་དགོངས་རྫོགས་སུ།།
གདན་དྲངས་པད་མོའི་ཆིབས་ཞལ་དེ་རུ་བསྒྱུར།།
ལྷ་དང་མཁའ་འགྲོའི་བསྟི་གནས་ལྷ་མོ་རུ།།
རྒྱུན་བཞུགས་མཛད་ནས་དགེ་འདུན་འདུས་སྡེ་ཡི།།
སྒྲིག་ལམ་ཀུན་སྤྱོད་སྡོམས་ཁྲིམས་འཆད་ཉན་སོགས།།
ཡར་བསྐུལ་གཟིགས་རྟོག་ནན་གྱིས་ཇེ་ལེགས་བཏང་།།
༧སྐུ་ཕྲེང་བདུན་པ་སྐྱབས་མཆོག་ཐུབ་བསྟན་ཉི་མ་ཞབས།
གྲུབ་བརྙེས་བྱེ་བའི་དབང་པོར་ལུང་བསྟན་ཅིང་།།
ངོ་མཚར་ཉམས་རྟོགས་ཡོན་ཏན་ཀླུང་དུ་བརྡོལ།།
བཀྲ་ཤིས་ལྷུན་གྲུབ་གླིང་གི་ལྡིང་ཁང་ནས།།
ཆོས་སྲིད་དྲི་མེད་ལྷ་དར་དཀར་པོ་འཐེན།།
གཟའ་ཚོང་ཐེ་བོའི་ཡུལ་ལུང་དུ་ཕེབས་ནས།།
འདོད་ཆོས་ཆར་གྱིས་དད་འདུས་གདུང་སེལ་ཏེ།།
ནང་དགོས་སྟག་ཚང་ལྷ་མོའི་བླ་གྲྭར་ཡོངས།།
ཟབ་རླིངས་ལུང་ཁྲིད་མན་ངག་ཕངས་མེད་བསྩལ།།
མ་དགོན་དགེ་ལྡན་བཀྲ་ཤིས་གཡས་འཁྱིལ་དུ།།
མཁས་མང་བློ་གསལ་བྱེ་བའི་འདུས་སྡེ་བསྐྲུན།།
ལེགས་བཤད་བཅུད་ཀྱིས་འགྲོ་བློའི་བུམ་བཟང་གཏམས།།
སྡོམ་གསུམ་ཉམས་ལེན་བརྟུལ་ཞུགས་མཐིལ་དུ་བཟུང་།།
༧སྐུ་ཕྲེང་བརྒྱད་པ་ཀིརྟི་བློ་བཟང་འཕྲིན་ལས་ཞབས།
གསུང་བཀྲོལ་ཡིག་དྲུག་མ་ཎི་བདོ་བ་དང་།།
ང་ཡི་དགོན་པ་ཤར་ན་ཡོད་དོ་ཞེས།།
རྟགས་མཚན་ང་ོམཚར་བཅུ་ཡིས་རྒྱན་པ་སོགས།།
སྐལ་ལྡན་དུང་བ་འདྲེན་པའི་ཡུལ་དུ་གྱུར།།
སྒྲིབ་མེད་སྤྱན་གྱིས་ཤེས་བྱའི་གནས་ཀུན་གཟིགས།།
མཐའ་ཡས་མཁས་པས་འགྲན་པའི་ཟླ་དང་བྲལ།།
རྒྱལ་བློན་འབངས་བཅས་རྩེ་གཅིག་གསོལ་བཏབས་པས།།
དགེ་ལྡན་ལེགས་བཤད་གླིང་ཉིད་ཕྱག་འདེབས་མཛད།།
གྱོད་སྣ་ཁ་མཆུ་འདུམ་བསྒྲིགས་བྱས་པ་དང་།།
རྔ་བར་མཚན་ཉིད་ལྷ་མོར་དུས་འཁོར་སོགས།།
གང་ཡིན་འགྲོ་བ་འདུལ་བའི་ལས་དགོངས་སྟེ།།
གསུང་རབས་གླེགས་བམ་དུ་མའི་སྒྲོན་མེ་སྦར།།
༧སྐུ་ཕྲེང་དགུ་བ་སྐྱབས་མཆོག་བསྐལ་བཟང་བློ་གྲོས་ཞབས།
མཁྱེན་དཔྱོད་ཉི་མའི་འོད་ཟེར་ཕྱོགས་མཐར་འཕྲོ།།
བསླབ་གསུམ་རིན་ཆེན་ནོར་བུས་ཡོངས་རྒྱན་ཏེ།།
དགེ་ལྡན་བསྟན་འཕེལ་བཀྲ་ཤིས་ཆོས་གླིང་དུ།།
སྒོ་གསུམ་དགེ་ལ་སྦྱར་བའི་ལམ་སྟོན་མཛད།།
གདན་སའི་གཙུག་ལག་བསྐྱར་བཞེངས་ལེགས་མཛད་དེ།།
རྟེན་འབྲེལ་མཛད་སྒོ་སྨོན་ལམ་ཚོགས་ཕེབས་གནང་།།
མཱ་ཆིས་ནན་གྱིས་གདན་ཞུ་འབྱོར་བ་ན།།
གང་འདོད་ཡིད་བཞིན་འཇོ་བའི་བཀའ་དྲིན་བསྩལ།།
སྒེག་ལྡན་བཀྲ་ཤིས་མེ་ཏོག་ཐང་ཆེན་ནས།།
དད་ལྡན་སྐར་ཚོགས་ས་ལ་འཕོས་འདྲའི་དབུས།།
སྤྱན་རས་གཟིགས་དབང་བཅུ་གཅིག་ཞལ་གྱི་དབང་།།
བསྩལ་བས་སྐྱེ་དགུར་ཐར་བའི་ས་བོན་བསྐྲུན།།
༧སྐུ་ཕྲེང་བཅུ་བ་རོང་ཆེན་ངག་གི་དབང་པོའི་ཞབས།
ཡ་མཚན་གཞོན་ནུའིི་ལང་ཚོ་སྨིན་པའི་དུས།།
ཆོས་སྟོན་གསུང་ཀློག་བག་ཆགས་ཡོངས་སད་པས།།
ངོ་མཚར་རྩེད་མོའི་སྒོ་གླེགས་ཡངས་པོ་རུ།།
ཕྱེ་བས་བྱིས་བ་ཕལ་བའི་ངང་ཚུལ་སྤངས།།
འཇམ་དཔལ་དབྱངས་དངོས་བློ་བཟང་དཔལ་བའི་དྲུང་།།
གསང་ཆེན་ལམ་གྱི་རིམ་པའི་ལྗགས་ལུང་གསན།།
མདོ་སྔགས་ལུང་རིགས་ཆོས་སྒྲ་སྒྲོགས་པའི་གནས།།
ལེགས་བཤད་གླིང་དུ་དུས་འཁོར་གསར་བཞེངས་གནང་།།
ལྷ་སྡེ་གཡས་འཁྱིལ་རྐ་གཡང་ཕྱུག་མོ་རུ།།
དུས་ཀྱི་འཁོར་ལོའི་དབང་བསྐུར་ལེགས་མཛད་ཅིང་།།
ས་འདིར་བསླབ་གསུམ་འཛིན་པས་མཛེས་བྱས་སྟེ།།
མཚུངས་མེད་བསྟན་པའི་དར་ཆེན་མཁའ་རུ་བསྒྲེངས།།
༧སྐུ་ཕྲེང་བཅུ་གཅིག་པ་སྐྱབས་མཆོག་བསྟན་འཛིན་
འཇིགས་མེད་ཡེ་ཤེས་རྒྱ་མཚོ་ཞབས།
མི་ཟད་ལུགས་ཟུང་འཕྲིན་ལས་འོད་སྣང་གིས།།
ལུང་རྟོགས་ཡོན་ཏན་པད་མོའི་འདབ་བརྒྱ་གྲོལ།།
མཐའ་འཁོབ་གདུལ་བྱའི་བློ་མུན་སེལ་ཕྱིར་དུ།།
ཚོ་བདུན་དགོན་དུ་བཤད་གྲྭ་གསར་འཛུགས་གནང་།།
ཆེས་མཐོའི་གཙུག་ལག་ལྷ་ཡི་ལྡིང་ཁང་ནས།།
རབ་འབྱམས་རིག་སྨྲའི་རྒྱལ་མཚན་གསོལ་ནས་ནི།།
ཨ་ཙརྱ་ཡི་མཚན་གནས་ལེགས་བཞེས་ཏེ།།
བོད་ཀྱི་རིག་གཞུང་ཉམས་ཞིབ་འགན་མཛད་བཞེས།།
དུག་གསུམ་དྲི་མས་སྦགས་པའི་སྐྱེ་རྒུའི་གཉེན།།
སྙིང་གཏམ་ཉམས་མྱོང་རྒན་པོའི་བསླབ་བྱ་དང་།།
ཕར་ཕྱིན་དབྱར་ཆོས་ཚད་མའི་དགུན་ཆོས་སོགས།།
ཅི་མཛད་རྒྱལ་བསྟན་དར་བའི་གསོས་སུ་སྨིན།།
སྨོན་ཚིག
ཤེས་རིག་ལག་ཟུང་འཁུམ་པའི་སློབ་བུ་བདག །
མཛད་འཕྲིན་དཔག་བསམ་འདྲེན་པའི་ཡོན་མེད་ཀྱང་།།
ཅུང་ཟད་ཐོས་པའི་བསོད་ནམས་བསགས་པ་ལས།།
དད་པའི་མིག་ཆུས་སྨྱུག་རྩེར་བཀོད་ནས་བྲིས་།།
ཞེས་དུག་གསུམ་གྱི་རོ་ལ་འཐིམ་པའི་ཐ་ཤལ་སྐྱེས་བུ་ངས་
སྐྱབས་མགོན་ཀིརྟི་རིན་པོ་ཆེ་མཆོག་མདོ་སྨད་དུ་བྱོན་ཏེ་སངས་རྒྱས་བསྟན་པ་
སྤེལ་ནས་ལོ་འཁོར་དྲུག་བརྒྱ་ལོན་པའི་རྗེས་དྲན་རྟེན་འབྲེལ་དུ་ཁོང་གི་མཛད་རྣམ་
ཐོར་བུ་བཀོད་པ་ཕྱེ་ལེབ་སྒེག་མོའི་གཤོག་རླབབས་ཞེས་བྱ་བ་བྲིས་པའི་དགེ་ལེགས་འཕེལ།།
ཐུབ་གཞོན།
