བེ་མིག་གི་སྙན་ཚིག་གཅེས་བཏུས།
མིང་བེ་ཨ་འཇིགས
པིར་མིང་བེ་མིག
ཕ་ཡུལ་རྨ་ལྷོ།
སྐད་འཕྲིན876394451
མི་རྟག་དྲན་པའི་ཐུན་ངག
བརྩེ་འདང་ཟླ་བ་དཀར་བོ་ལས་ཀྱིས་འགྲིབ།།
བརྩེ་བ་དཔག་བསམ་ལོ་མ་རླུང་གིས་ཁུར།།
དྲན་གདུང་མིག་ཆུ་མོད་པོའི་རྒྱ་མཚོ་འཁྱིལ།།
ཨ་ཐང་ཆད་པའི་སྐྱོ་གླུ་འཇག་མས་གྱེར།།
ལོ་ཟླ་རྟ་ཕོའི་གོམ་འགྲོས་གློག་ལས་མྱུར།།
བཅུ་དྲུག་ལང་ཚོའི་མེ་ཏོག་སད་ཀྱིས་བཅོམ།།
བརྩེ་དུང་བདེ་བའི་ས་བོན་ཆར་བས་རྡུངས།།
རེ་ཐག་ཆད་པའི་སྐྱོ་གླུ་བདག་གིས་ཤོར།།
ཁ་བ་གངས་ཀྱི་སེང་གེའི་ངར་སྐད་ཉམས།།
བསམ་འཕེལ་ཨ་ཇོ་ངེས་མེད་ས་མཐར་འཁྱམས།།
སེམས་ཀྱི་ཁ་དོག་ཀུན་ཉོན་གཉུག་མའི་བསྒྱུར།།
ཁེར་རྐྱང་འཚོ་བའི་ཀི་ཞིག་བདག་གིས་བཏབ།།
ལྷུང་ལྷུང་རྨ་ཆུ་སྔོན་མོར་འཕྲིན་ཞིག་བསྐུར།།
མཛེས་མཛེས་བྱམས་པའི་ཚོཊ་ལ་གཏམ་ཞིག་སྒྲོན།།
མི་ལོ་ཉི་ཤུར་ཕྱིར་མིག་ཐེངས་གཅིག་གཟིགས།།
མི་ཚེའི་ཐེམ་སྐས་འཛེག་པར་ཨ་ཧོ་དཀའ།།
༡༤/༩/༩ཉིན་རྭ་རྒྱ་ནས།
སྣང་བའི་རི་མོ།
མིག་ཆུས་མལ་ཐུལ་བརླན་པའི་མཚན་མོ་འདིར།།
དྲན་གདུང་སྐྱོ་གླུ་གཉོམ་མོ་ཁ་བས་གྱེར།།
ང་དང་ཁ་བའི་གཏམ་རྒྱུད་རིང་མོ་ཞིག།
ཟླ་བ་གཞོན་ནུར་དོ་ནུབ་ཨེན་ཙམ་གླེང་།།
ཁེར་རྐྱང་བུ་ལོའི་ཆིག་ལབ་མོད་པོ་ཞིག།
སེམས་ཀྱི་སྒྲོམ་གཞིར་བཅུག་ནས་ལོ་ཟླ་ཟད།།
སྡེ་ཆེན་མི་ཁའི་གྲང་རླུང་རབ་འཁྲུགས་ཀྱིས།།
སེམས་པ་འཁྱག་པའིབསྡམས་ནས་སྒོམ་ལ་ཉར།།
སྣང་བའི་སྐྱོ་གླུ་གཉོམ་མོ་གདུང་བའི་གླུ།
ལེན་པས་ཁུ་ལོ་ནགས་ཀློང་ཁྲོད་དུ་གྲགས།།
ཆུ་ལེན་བུ་མོས་ཀྲོང་ངེར་གསན་པའི་ཚེ།།
སེམས་པ་མགུ་བས་མིག་ཆུའི་ཕྲེང་བ་བསྟར།།
འཚོ་བ་ངན་ངོན་སྐལ་བའི་བཀས་བཅད་བྱས།།
ཁེར་རྐྱང་བུ་ལོ་ལས་ཀྱིས་སྒོམ་ལ་ཞུགས།།
དོ་ཞག་སྐྱོ་བས་དབྱངས་ཤིག་དཀྲོལ་བ་འདི།།
རང་སེམས་རང་གིས་གསོ་བར་དལ་ཅིག་སྦྱར།།
༢༠༡༥/༢/༢ཉིན།
སྣང་བ་རང་ཡན་མ།
དགུང་གི་ཟླ་བ་གཞོན་ནུ་མཁའ་ནས་གཟིམས་སོང་།།
སྐྱ་རེངས་ན་ཆུང་བུ་མོས་གཞན་ཡུལ་འགྲིམས་སོང་།།
སེམས་པ་སྒོམ་ལ་བཞུགས་པའི་དེབ་ཐེར་དཀར་བོ།།
ལོ་ཟླའི་འཁོར་བསྐྱོད་ཁྲོད་ནས་རྡུལ་དུ་བསྒྱུར་སྐད།།
མིག་ཆུ་རྒྱ་མཚོར་མཆོད་པའི་མི་ཚེ་རིང་མོར།།
དབེན་ཐང་ས་བདག་སྐུ་ལོའི་རྨི་ལམ་དཀྲོགས་སོང་།།
ཁེར་རྐྱང་འཚོ་བ་སྡུག་པོའི་སྐྱོ་གླུ་གཉོམ་པས།།
རྒྱུ་སྐར་སྟོང་གིས་ངུ་ཤུམ་ཡང་ཡང་ཤོར་སོང་།།
དོ་དགོང་མཛའ་གཞས་རིང་མོ་ལྐོག་ཏུ་གྱེར་བས།།
ཕྱི་ནང་སྣོད་བཅུད་ཡོངས་ཀྱི་སེམས་པ་སྒུལ་བྱུང་།།
ལྷུང་ལྷུང་རྨ་ཆུ་རིང་མོ་ཧད་དེ་ལུས་སོང་།།
སྨྱུག་ཚོམས་རྣ་བ་ཀྲོང་ཀྲོང་གཏད་དེ་ལུས་སོང་།།
སེམས་པ་གས་ཆག་ཤོར་བའི་ལོ་ཟླ་མོད་པོ།།
སྙིང་གཏམ་མགུར་ཆུང་མི་མེད་དབེན་པར་བསྒྲོན་ཡོད།།
དུས་ཀུན་མཚན་སྲུང་བྱེད་པའི་ལོ་ཟླའི་ཁྲོད་ནས།།
མིག་ཆུས་སྙན་ངག་དམར་བོ་སྒྲོམ་དུ་ཉར་ཡོད།།
ཀྱེ་ཀྱེ་ལས་དབང་རྒྱལ་མོའི་བཀའ་སྐྱོན་ཨེ་ཡིན།།
ཀྱེ་ཧུད་ཕ་མ་ཟུང་གི་བཀའ་སྒོས་ཨེ་ཡིན།།
ཀྱེ་མ་ཁེར་རྐྱང་འཚོ་བ་སྡུག་པོ་ཡིན་པས།།
ཀྱེ་ཧུད་ལྷ་སའི་ཁྲོམ་ལ་བུ་ང་ཆས་འགྲོ།།
སྤྱི་ཟླ༡/༡༨ཉིན་མཚན་གུང་ཆུ་ཚོད་གསུམ་པ་ནས་སྦྱར།
སྣང་བ་རྒྱ་ཡན་མ།
ཚོར་བ་དབྱངས་སུ་གྱེར་བའི་དྲན་འཛིན་གྱི་ངོས་སུ།།
ངག་དབང་མཚོ་བྱུང་ལྷ་མོའི་དངོས་གྲུབ་ཞིག་མཉེས་ཏེ།།
ཚིག་སྦྱོར་ལྷུ་ལག་མཛེས་པའི་སྙན་ངག་གི་གར་མས།།
དྲན་གདུང་སེམས་ཀྱི་ན་ཟུག་ཤོག་དཀར་དུ་འཁྲབ་བྱུང་།།
ན་ནིང་ཏི་སེ་རི་བོའི་གངས་འདབ་ནས་བཞུད་པའི།།
ཆུ་ལེན་བུ་མོའི་སྙིང་གཏམ་མགུར་ཆུང་དེ་དྲན་ན།།
ས་མཐའ་རང་དབང་མཛེས་པའི་གངྒ་ཡི་དྲུང་དུ།།
མི་བསྡོད་སྐད་ཅིག་ཉིད་ལ་ད་རེས་རང་འགྲོ་འདོད།།
ཆུ་ལེན་ཨ་མདོ་བུ་མོའི་བཞིན་ཞལ་དེ་དྲན་ན།།
ཉིན་དཀར་ཟས་ཐུན་ཞིམ་པོ་སྤྲོ་བ་རང་མེད་ལ།།
ཉིན་མོ་ངལ་དུབ་གཉིད་ལ་མོས་པ་རང་མེད་པས།།
སེམས་ཤོར་སྙིང་གི་བུ་མོར་མཇལ་བ་རང་སྩོལ་ཤོག།
མཐོན་པོ་སྲིད་པའི་སྒང་ན་ཁེར་རྐྱང་དུ་ལུས་པའི།།
བདག་མེད་ཨ་མདོའི་བུ་ལོ་གཤོག་ཟུང་ཅིག་སྩོལ་དང་།།
ཕ་གིའི་གངས་ལྗོངས་རི་བོའི་ཕ་རོལ་ན་གནས་པའི།།
ཨ་མདོའི་བུ་མོ་ལྷ་མོ་ལན་གཅིག་རང་མཇལ་འདོད།།
སྤྱི༢༠༡༥/༡/༩ཉིན།
སེམས་པ་རྙིད་པོ།
ལྷོ་མཐའི་རི་སུལ་ཆུང་ཆུང་འདིར།།
རྨ་ཆུ་སྔོན་པོར་སེམས་པ་བརླན།།
བག་ཁུམས་ལྷིང་འཇགས་གནས་པ་འདིས།།
ཡིད་ཀྱི་དྲན་པ་སྟོང་སིང་ངེ་།།
སྟོན་རླུང་འུར་འུར་ལྡང་བ་འདིས།།
ལྕང་ལོ་རེ་རེ་རྡོག་པའི་བརྗིས།།
རྐང་འཐུང་ལོ་མའི་དར་རྒུད་འདིས།།
མི་རྟག་ཡང་ཡང་དྲན་པར་བྱས།།
དོ་ནུབ་སྟོན་ནམ་རིང་མོར་འདིར།།
ཆུ་ཤེལ་ཟླ་བ་རྒྱན་དུ་འཚེར།།
ཁེར་རྐྱང་འཚོ་བའི་ལོ་ཟླའི་ཁྲོད།།
རང་གི་གྲིབ་མ་གྲོགས་སུ་ཁུམས།།
ཚོར་བ་རྣོན་པོའི་ཁ་དོག་འདི།།
མེ་ལོང་ངོས་སུ་ཧ་བཏབ་པོ།།
སོར་བཅུའི་སྟངས་སྟབས་མངོན་པ་འདི།།
སེམས་མཐུན་གྲོགས་ལ་སྤྲིངས་པས་སོ།།
རྨི་ལམ་ནང་གི་རི་གྲོང་ཆུང་ཆུང་།
ལྷུང་ལྷུང་རྨ་ཆུ་བཞུར་བའི་འགྲམ་ངོགས་དང་།།
མུ་མཁྱུད་གངས་རིས་བསྐོར་བའི་ཉེ་འདབས་ན།།
ཁུ་སིམ་ལྷིང་འཇགས་གནས་པའི་རི་གྲོང་ཞིག།
དོ་ཞག་རྨི་ལམ་ནང་ནས་ལན་བརྒྱར་མཇལ།།
གསལ་ལ་མི་གསལ་རྒྱང་ནས་རི་གླུ་གྲགས།།
ཞེན་པའི་བུ་ལོ་ཉེ་བའི་ཕྱོགས་སུ་རྒྱུགས།།
མཇལ་བའི་མཛའ་མཐུན་གྲོགས་ཀྱི་བཟང་སྤྱོད་དེས།།
ཡིད་ཀྱི་སྨོན་པ་དབང་མེད་དེར་ཕྱོགས་རྒྱུ།།
རི་ཁྱིམ་སོ་སོའི་དུ་བ་དགོང་ལ་འཕྱུར།།
མགྲོན་ལ་བརྩེ་བའི་བུ་མོའི་ཚེམས་ཕྲེང་རྒོད།།
དཀར་ལ་དམར་བའི་འབྲོག་མོ་གཤིས་བཟང་དེ།།
སེམས་ཀྱི་ཟབ་སར་ཉུལ་བའི་ཡིད་དུ་འཐད།།
སྐྲ་དཀར་རྒན་པོའི་ལག་གི་ཕྱག་ཕྲེང་མཛེས།།
སྨན་ཆུང་བུ་མོའི་ངག་གི་བཞོ་དབྱངས་སྙན།།
ནང་ལ་མཛའ་བརྩེ་རྒྱས་པའི་རི་གྲོང་འདིར།།
ཞེན་ཞིང་ཞེན་ནས་སླར་ཡང་གཉིད་དུ་ཡུར།།
སྤྱི་ཟླ༢༠༡༤/༡༠/༣༡ཉིན་ལས་སྒྲུབ་ཁང་ནས།