ཁྲག་གིས་བརྫིས་པའི་སྙན་ངག
དྲན་གདུང་མིག་ཆུ་རྨ་ཆུའི་གཞུང་ལ་འདྲེན།།
མེས་པོའི་རྐང་ལ་གསེར་གྱིས་ལྷན་པ་བརྒྱབས།།
སྟོན་རླུང་རྒོད་པོས་རེ་བའི་རྨི་ལམ་དཀྲོགས།།
སེམས་ཀྱི་རོལ་མོ་ཚོར་བའི་དབྱངས་ལ་འཐམ།།
ཁེར་རྐྱང་འཚོ་བའི་སྟོན་ནམ་ལོ་ལས་རིང་།།
མལ་ཐུལ་དྲོད་པོའི་བདེ་བ་སྒྱུ་མས་བསླུས།།
ལུས་ཀྱི་ཕུང་བོ་འབྱུང་བོའི་གསོལ་དུ་འདྲེན།།
འཁོར་བའི་གནས་ན་དགའ་སྐྱོ་ཁྲི་མ་འབུམ།།
ཚོར་བའི་དབྱངས་རྟ་ཁྲག་གི་རྒྱུ་མས་དཀྲོལ།།
སེམས་ཀྱི་ན་ཟུག་སྙིང་ཁྲག་དྭངས་མས་བྲིས།།
ལུས་ཀྱི་ཟུངས་ཁྲག་བེ་སིའི་གཞུང་ལ་མཆོད།།
ཁྲག་གི་སྙན་ངག་འདི་ལ་དོ་ཟླ་སུ།།
ཟླ་འོད་འོག་ཏུ་སྐུ་ལོ་བསམ་གཞིགས་མོད།།
མཚན་གུང་སྙན་ངག་དམར་བོ་ཁྲག་གིས་བྲིས།།
རྒྱུ་སྐར་གྲངས་ལ་ཁོག་རྩིས་གྲངས་མེད་བརྒྱབས།།
དོ་དགོང་སྐྱ་རེངས་གཞོན་ནུ་འདི་ལྟར་སྒུག།
སྤྱི་ཟླ༩/༢༨ཉིན་མཚན་གུང་ཆུ་ཚོད་གཉིས་པ་ནས་རྫོགས།
སྙན་ངག་ལྷ་མོའི་བསླུ་བྲིད།
ཆར་ལྡན་ཟླ་བཟང་འཛིན་མའི་མངལ་དུ་སྦྲུམ།།
ཁུ་ལོའི་གསུངས་སྐད་འཇོལ་མོའི་ཡིད་དུ་འཐད།།
སྙན་ངག་ལྷ་མོར་གློད་པའི་སེམས་གཏམ་འདི།།
དབྱར་གཞུང་སྐྱིད་པའི་ཚལ་ན་གར་དུ་རྩེན།
རྐང་འཐུང་སྒེག་མོའི་ལང་ཚོའི་སྟངས་སྟབས་གཡོ།།
དབྱར་གཞུང་དགའ་ཚལ་སྐྱིད་པའི་དཔལ་དུ་ཤར།།
སྙན་ངག་ལྷ་མོའི་མཛེས་པའི་ཞལ་ཁྱིམ་དེ།།
ཀུན་གསལ་རྫིང་རིང་ངོས་ལ་རྟག་པར་འཛུམ།།
རིག་ལམ་འདབ་བརྒྱ་མེ་ཏོག་ཁྲ་ལེར་བཞད།།
སྨྱུག་རྩེའི་རྐང་དྲུག་ཅི་དགར་དགའ་བའི་འཇོ།།
ང་དང་སྙན་ངག་ལྷ་མོའི་བརྩེ་བ་ཟབ།།
ལྷ་མོ་ཚེ་གཅིག་དགའ་མའི་གྲོགས་ལ་གཅེས།།
གཟུགས་དྲི་རེག་བྱ་ཚོར་བའི་ཁ་དོག་དང་།།
དགའ་སྐྱོ་ཆགས་སྡང་ཚོར་བའི་བདེ་སྡུག་སོཊ།།
སྙན་ངག་ལྷ་མོར་འཁྲབ་པའི་གར་ཆུང་ཉིད།།
བདག་གི་སོར་བཅུའི་བར་ནས་ལྷོད་ཀྱིས་ཤོར།།
༢༠༡༤/༥/༡༨ཉིན་བསང་འགྲམ་ནས་ཞར་བྱུང་དུ།
མི་སྐད་ཅིག
དགོང་གི་ཉི་མ་འཆར་ནུབ་རྒོད་པས།།
ལོ་ཟླའི་འཁོར་བསྐྱོད་རིམ་གྱིས་ཟད་སོང་།།
སེམས་ཀྱི་ཚོར་བ་འགྱུར་བ་མང་པས།།
རྟག་བརྟན་ལས་གཞིར་ལྷུ་ལག་མ་ཚང་།།
གཉིད་དང་ལེ་ལོ་གཉུག་མར་གནས་པས།།
བག་མེད་འདུ་འཛིས་མི་ཚེ་ཟད་སོང་།།
ཐར་བའི་ལམ་ལ་རྒྱང་ཐག་རིང་པས།།
འཇིག་རྟེན་འཚོ་བ་སྤོངས་པར་མ་ནུས།།
སོ་སོའི་སྦྱངས་སྟོབས་ལས་ལ་རྟེན་པས།།
མཁས་པའི་ཁྲི་ལ་འཛེགས་པ་དཀོན་སོང་།།
སོ་སོའི་ནུས་ཚོད་ཚད་འགག་ཡོད་པས།།
མི་ཐེག་ཁུར་བོ་འདོར་བར་སྨོན་བྱུང་།།
ང་ལ་ང་ཡི་འཚོ་བ་ཡོད་པས།།
མི་ཟས་སྤྱོད་པར་དགོངས་འཆར་མ་གསུངས།།
ང་ལ་ང་ཡི་འཇིག་རྟེན་ཡོད་པས།།
ང་རང་སྒྲོག་ལས་ཅིས་ཀྱང་གཏོང་རོགས།།
༢༠༡༤/༩/༣ཉིན།
ཚོར་བའི་བཅུད།
སོར་བཅུའི་སྟངས་སྟབས་ཚོར་བའི་ཀློང་དུ་ཟུག།
དྲན་པའི་ན་བུན་ཤོག་དཀར་ཐང་དུ་རྒྱུ།།
ཁེར་རྐྱང་འཚོ་བའི་ཆིག་ལབ་ཨེན་ཙམ་དེ།།
གང་གི་མ་གསན་དོ་ནུབ་རེ་ཐག་ཆད།།
སེམས་ཀྱི་སྙིང་གཏམ་ཆིག་ལབ་ཉིད་དུ་གྱུར།།
སྤྲིངས་འདོད་བརྩེ་འཕྲིན་སེམས་ཀྱི་སྒྲོམ་དུ་བཅུག།
དམ་བཅའ་ཟློག་མེད་ཁས་ལེན་སྡོམ་པ་དེས།།
ཡིད་མཐུན་གང་ལ་བདེ་མོའི་གྱེས་ཕྱག་ཞུས།།
གྱེས་བྲལ་མིག་ཆུ་སྨྱུ་གུའི་རྩེ་ནས་བཞུར།།
དུངས་བརྗོད་སྙན་ངག་གྲོང་ལ་ཐོལ་གྱིས་ཤོར།།
མཚན་གུང་བདེ་བ་བྲལ་བའི་འུག་རྒོད་དེའི།།
མ་ཐོས་ཨག་སྐད་ལྷ་མོ་འོན་པར་གནས།།
དོ་ནུབ་སེམས་པ་རབ་རིབ་མུན་པའི་བཟུང་།།
མ་འཕྲད་བྱམས་པ་འདས་པའི་ལོ་ཟླ་ཟད།།
སྒེག་མོའི་འགྲམ་ཆང་སྩོལ་བ་མ་བྱུང་བའི།།
ལང་ཚོའི་འདབ་མ་རྒྱས་པའི་སྐལ་བ་ཕྲ།།
༡༤/༧/༢༣ཉིན་མཚན་གུང་རྨ་ཉིན་ཐང་ནས།
ཟླ་འོད་འོག་གི་མགྱོགས་བྲིས།
སྒེའུ་ཁུང་དམར་བའི་བར་གསང་ཞིག་ནས།།
ཟླ་བ་དཀར་བའི་ཟླ་གཟུགས་འཛུམ་པ།།
རྒྱུ་སྐར་ཁྲོད་ཀྱི་ཉ་རྒྱས་ཟླ་བ།།
ཀུ་མུད་དགའ་མར་འཁྲེང་བའི་སེམས་པ།།
མགོ་དཀྲིས་དམར་བོའི་ཟུར་མིག་ཁྲ་ཆུང་།།
སྡེ་ཆེན་ཁྲོམ་ནས་ལྷང་ངེར་མངོན་པ།།
རི་དྭགས་མིག་གི་ཟུར་མིག་གཡོ་བ།།
སྐྲ་བདག་དགའ་ལོར་གློད་པའི་གསང་གཏམ།།
ཁེར་རྐྱང་འཚོ་བའི་མི་ཚེ་བསྐྱལ་བ།།
སུ་ཡི་བཞག་པའི་འཁོར་བའི་ལན་ཆགས།།
ལོ་དང་ཟླ་བའི་གྲངས་འབོར་རྩིས་པ།།
རེ་སྒུག་སྟོང་གི་འཚོ་བའི་ཁ་དོག།
དུས་རབས་གསར་བའི་བརྡ་འཕྲིན་ཁྲོད་ནས།།
སྐད་འཕྲིན་གདོང་ལ་ལན་བརྒྱར་གཅེར་བ།།
བརྩེ་འཕྲིན་སྟོང་གི་དྲྭ་སྟེང་གང་བ།།
སུ་ལ་ཕུལ་བའི་འཁོར་བའི་སྟ་གོན།།
ཡེ་ལོ༡༤/༦/༡༣མཚན་གུང་ལ་བྲིས།
| 