ཨ་མདོ་བྱམས་པ་ལགས་སུ་དགེ་ཆོས་སྐོར་བཅར་འདྲི་བྱས་པ།
  ༄༅། །བཙན་པོའི་མགར་གྱི་དྲ་བས་ཁྱེད་ལ་དགའ་བསུ་ཞུ། དེ་རིང་ནི་སྤྱི་ལོ 2019 ལོའི་ཟླ 10 ཚེས 15 རེས་གཟའ་མིག་དམར་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། ནང་འཇུག འདི་ནས་ང་དང་གླེང་མོལ་བྱ།
གཙོ་ངོས།
ཆོས་ལུགས།
རྩོམ་རིག
ལོ་རྒྱུས།
རུས་རྒྱུད།
དམངས་སྲོལ།
སྒྱུ་རྩལ།
དཔལ་འབྱོར།
མི་སྣ།
སློབ་གསོ།
ཕྱོགས་སྟོན་་་་ གཙོ་ངོས།» དམངས་སྲོལ།» གླེང་སྟེགས་བཅར་འདྲི། »ཨ་མདོ་བྱམས་པ་ལགས་སུ་དགེ་ཆོས་སྐོར་བཅར་འདྲི་བྱས་པ།
ཨ་མདོ་བྱམས་པ་ལགས་སུ་དགེ་ཆོས་སྐོར་བཅར་འདྲི་བྱས་པ།
རྩོམ་སྒྲིག་པ།  ཆར་བ། སྤེལ་དུས། 2015/2/25ལྟ་ཀློག (5532)རྩོམ་ཁུངས: བཙན་པོ་ཚང་།པར་འདེབ།

 

ཨ་མདོ་བྱམས་པ་ལགས་སུ་དགེ་འདུན་ཆོས་འཕེལ་གྱི་སྐོར་བཅར་འདྲི། དངོས་བྲིས་ཟེར་བ་འདི།

རོང་བོ་དགེ་འདུན་ལྷུན་གྲུབ།

272

དྲི་བ། དང་པོ་དེར་རྒན་ལགས་ཀྱི་མིང་དང་ལོ་ག་ཚོད་ཡིན་མིན་ལབ་རོགས་གནང་། དེའི་རྗེས་ལ་རྒན་ལགས་ཀྱིས་དགེ་འདུན་ཆོས་འཕེལ་གྱི་སྐོར་ལ་ག་རེ་ཤེས་ཀྱི་ཡོད་པ་ཚང་མ་བཤད་རོགས་གནང་།

ལན། ངའི་མིང་ལ་ཨ་མདོ་བྱམས་པ་ཟེར། ལོ་ ༨༥ ཡིན། ད་ལྟ་བར་དུ་རི་མོའི་ལས་ཀ་བྱས་ནས་བསྡད་པ་རེད། གཙོ་བོ་དེ་དགེ་འདུན་ཆོས་འཕེལ་དང་ངེད་གཉིས་ཀྱི་སྐོར་རེད། ང་ལོ་ ༢༨ གྱི་ཐོག་འདིར་ཡོང་བའི་སྐབས་ལ་དགེ་འདུན་ཆོས་འཕེལ་མི་འདུག ཁོང་བཙོན་ཁང་ནང་དུ་འདུག ང་འདིར་ཡོང་ནས་ལོ་གཅིག་གཉིས་ཤིག་གི་མཚམས་ལ་དགེ་འདུན་ཆོས་འཕེལ་བཙོན་ཁང་ནས་གློད་སོང་། མར་གློད་པའི་རྗེས་ནས་ངེད་གཉིས་གཅིག་གཅིག་ལ་ངོ་ཤེས་པ་བྱས། ངེད་གཉིས་ཞེ་དྲག་གི་འགྲིག་པོ་ཡོད་པ་རེད། དགེ་འདུན་ཆོས་འཕེལ་ངའི་སར་ལ་རྒྱུན་དུ་ཡོང་གི་ཡོད། དེའི་སྐབས་ལ་ང་ལ་གང་ཡང་མེད་པར་སྐྱོ་བོ་ཡོད་པ་རེད། དགེ་འདུན་ཆོས་འཕེལ་ལ་ཡང་གང་ཡང་མེད་པར་སྐྱོ་བོ་རེད། སུ་ལ་ཡོད་ན་གཅིག་པ་རེད། ང་ལ་ཟ་ཡ་འདྲ་ཡོད་དུས་ཁོ་ངའི་ནང་ལ་ཡོང་ནས་ངེད་གཉིས་ཀྱིས་དེ་ཟས། ཁོ་རང་ལ་ཟ་ཡ་འདྲ་ཡོད་དུས་ང་ཁོ་ཡོད་སར་སོང་ནས་ངེད་གཉིས་ཀྱིས་དེ་ཟས་པ་ཡིན། ངེད་གཉིས་ཞེ་དྲག་གི་འགྲིག་པོ་ཡོད་པ་རེད། ཁོ་བཙོན་ཁང་ནས་གློད་རྗེས་ནས་ངེད་གཉིས་ལོ་གསུམ་གྱི་རིང་དེ་འདྲ་བྱས་ནས་མཉམ་དུ་བསྡད་པ་རེད། དེ་ནས་ཁོ་གྲོངས་པ་རེད། གྲོངས་པའི་དུས་ལ་ལོ་ ༤༧ རེད། ༡༩༥༡ ཡིན་པ་འདྲ། ད་འདི་ཧོར་གཙང་གིས་བཤད་བཞག་པ་དང་། ཨ་ལགས་རག་ར་ཡིས་བཤད་བཞག་པ་ཚང་མ་ཁུངས་ལུང་ཏན་ཏན་ཏིག་ཏིག་རེད། ང་ལ་དེ་ཞེ་དྲག་ངོས་ཀྱི་མི་འདུག དགེ་འདུན་ཆོས་འཕེལ་གྲོངས་པའི་ལོ་དང་དགེ་འདུན་ཆོས་འཕེལ་ཨ་མདོ་ནས་ལྷ་སར་ཕེབས་པའི་ལོ་དེ་དག་ཧོར་གཙང་གིས་ལོ་རྒྱུས་དེའི་གསལ་བོ་ཞེ་དྲག་བཤད་འདུག ད་ངས་གང་ཤེས་པ་དེ་དེ་རེད། དགེ་འདུན་ཆོས་འཕེལ་ཐོག་མར་འཁྲུངས་ས་དེ་ཞོ་འཕང་ཞི་རེད། ཁོ་རང་ཡིན་པ་དེ་བླ་མ་ཞིག་གི་སྤྲུལ་སྐུ་རེད། བླ་མ་དེའང་བླ་མ་ཕལ་བ་ཞིག་མ་ཡིན་པར་ཁོ་རང་ཚོ་གདུང་རྒྱུད་དེ་རྡོ་བྲག་མཁན་པོ་ཟེར་བ་དེ་རེད། རྡོ་བྲག་མཁན་པོ་ཟེར་བའི་བླ་མ་དེའི་དགོན་པ་ཨ་མདོ་རེབ་གོང་ན་ཡ་མ་བཀྲ་ཤིས་འཁྱིལ་ཟེར་བ་ཞིག་ཡོད་པ་རེད། ཁོ་དགོན་པ་དེའི་རེད། དགེ་འདུན་ཆོས་འཕེལ་ཁོ་རང་དགོང་ལོ་ཆུང་ཆུང་ཡིན་དུས་ནས་དགོན་པ་དེའི་ནང་གི་དགོན་བདག་རེད། ཨ་མདོ་ནས་ཁོ་རང་མིང་ལ་ཨ་ལགས་རྡོ་བྲགཞེས་འབོད་ཀྱི་ཡོད་པ་རེད། མང་ཆེ་བས་ཨ་ལགས་རྡོ་བྲག་དང་ལྡིས་ཚ་སྐམ་པོ་ཡང་ཟེར་གྱི་འདུག་ལ། དགེ་འདུན་ཆོས་འཕེལ་ཡང་ཟེར་གི་རེད། ཁོ་ལ་མིང་གསུམ་ཡོད་པ་རེད། ལྡིས་ཚ་སྐམ་པོ་ཟེར་དགོས་པའི་རྒྱུ་མཚན་གང་ཡིན་ཟེར་ན་ཁོ་རང་ལོ་བདུན་གྱི་སྒང་ནས་ཨ་མདོ་ལྡིས་ཚ་དགོན་པ་ཟེར་བ་ཡོད་པ་རེད། ཁོ་རང་ཕ་ཡིས་ཁོ་དགོན་པ་དེར་ཁྲིད་ནས་གྲྭ་བ་བྱས་པ་རེད། གྲྭ་བ་བཟོ་མཁན་གྱི་བླ་མ་དེའི་མིང་ལ་ཞྭ་དམར་པཎ་ཊི་ཏ་ཟེར། ལྡིས་ཚ་ནས་ཡོད་པའི་དུས་སྐབས་ལ་ཁོའི་མིང་ལ་ལྡིས་ཚ་སྐམ་པོ་ཟེར་བ་རེད། ལྡིས་ཚ་ཟེར་བ་དགོན་པ་དེའི་མིང་རེད།

དགེ་འདུན་ཆོས་འཕེལ།

སྐམ་པོ་ཟེར་བ་ཁོ་རང་ཤ་སྐམ་པོ་སྐམ་པོ་ཞིག་ཡོད་པ་རེད། སྤྱིར་བཏང་གི་མང་ཆེ་བ་ཞིག་གིས་རྡོ་བྲག་མཁན་པོ་ཟེར་གི་རེད། ཁོ་རང་གི་ཆོས་མིང་དགེ་འདུན་ཆོས་འཕེལ་རེད། ཁོ་རང་ལ་མིང་གསུམ་ཡོད་པ་རེད། ལྡིས་ཚ་དགོན་པ་ནས་ཁོ་རྒྱུན་རིང་པོ་མ་བསྡད་ཟེར། སྐབས་ཤིག་ནས་ཁོ་རང་ལྡིས་ཚ་དགོན་པ་ནས་ལོགས་འདུག ལོ་བདུན་གྱི་སྒང་ལ་ལྡིས་ཚ་དགོན་པར་ཕྱིན་པ་དང་། དེ་ནས་ལོ་བརྒྱད། དགུ བཅུ་ཕལ་ཕེར་ལོ་ ༡༥ བར་དུ་མ་གཏོགས་དེའི་ལྷགས་ལ་བསྡད་མི་འདུག དེ་ནས་ཨ་མདོ་བླ་བྲང་བཀྲ་ཤིས་འཁྱིལ་ལ་ཡོང་བ་དང་། བཀྲ་ཤིས་འཁྱིལ་ནས་ཁོ་རང་གིས་དཔེ་ཆ་བལྟས་པ་རེད། ཁོ་རང་གིས་བླ་བྲང་བཀྲ་ཤིས་ནས་སློབ་གཉེར་བྱས་པའི་སྐོར་དེ་ཁྱོད་རང་ཚོའི་དེབ་ནང་དུ་བྲིས་ཚར་ཡོད་པས་ངས་འདིར་མི་བཤད་པ་བྱེད། དེ་ནས་ཁོང་ལྷ་སར་སླེབས་པ་རེད། ལྷ་སར་སླེབས་ནས་ཁོ་རང་སྡོད་སའི་དགོན་པ་འབྲས་སྤུངས་དགོན་པ་རེད། གྲྭ་ཚང་སྒོ་མང་གྲྭ་ཚང་རེད། ཁང་ཚན་ཀླུ་འབུམ་ཁང་ཚན། ངེད་གཉིས་ཁང་ཚན་གཅིག་རེད། འབྲས་སྤུངས་ལ་ཡོང་ནས་ཀྱང་དཔེ་ཆར་བལྟས་པ་རེད། དཔེ་ཆར་བལྟས་ནས་ཁོ་རང་ཨང་ཀི་དང་པོ་ཆགས་པ་རེད། ག་དུས་ཡིན་ནའང་རྩོད་པ་རྒྱག་དུས་ཁོ་རང་ལ་རྒྱལ་ཁ་ཐོབ་ཐོབ་པ་རེད། ཁོ་དངོས་གནས་ཀྱི་པྭ་ཥྱི་ཏ་རེད། དེའི་སྐོར་བཤད་དགོས་པ་ཞེ་དྲག་མི་འདུག

དྲི་བ། ང་ཚོས་གང་ཤེས་འདོད་ཡོད་པ་དེ་ནི་རྒན་ལགས་དང་དགེ་འདུན་ཆོས་འཕེལ་གཉིས་ག་དུས་ཐུག་པ་དང་། ཁྱེད་རང་གཉིས་གྲོགས་པོ་ཆགས་དུས་སྐད་ཆ་ག་རེ་བཤད་པ་སོགས་ཀྱི་སྐོར་རེད།

ལན། ཁོ་བཙོན་ཁང་ནང་ནས་མར་གློད་པའི་རྗེས་ནས་ངེད་གཉིས་གྲོགས་པོ་ཆགས་པ་རེད། ཐོག་མ་དགེ་འདུན་ཆོས་འཕེལ་བཙོན་ཁང་ནང་ནས་མར་གློད་པ་དང་། ད་ཁོ་དགེ་འདུན་ཆོས་འཕེལ་ཟེར་དུས་མིང་གྲགས་ཆེན་པོ་ཞེ་དྲག་རེད། དེའི་སྔོན་ལ་ངེད་གཉིས་ཐུག་མྱོང་ཡོད་པ་མ་རེད། དེ་ནས་ཉིན་གཅིག་ལ་ངས་མི་ཞིག་ལ་དགེ་འདུན་ཆོས་འཕེལ་ལགས་ངའི་སར་ཁྲིད་ཤོག་ཅེས་མི་དེས་དགེ་འདུན་ཆོས་འཕེལ་ངའི་སར་ཁྲིད་ཡོང་བ་རེད། ངས་ཉིན་མོ་དེར་མོག་མོག་ཅིག་བཟོས་པ་ཡིན། གང་མཚམས་ཤིག་ལ་ཁོ་སླེབས་སོང་། མི་སྐམ་པོ་སྐམ་གྱོང་ཞིག་རེད། ཕྱུ་བ་ཐེར་མ་རྒྱ་སྨུག་ཅིག་གྱོན་ཞིང་། ཞྭ་མོ་དམག་མིས་གྱོན་པའི་ལའེ་མོ་ཆེན་པོ་ཞིག་གྱོན་འདུག དེ་འདྲ་གྱོན་དེ་ལ་གེ་ལུག་གེ་འདྲ་ཞིག་བྱས་ནས་ངའི་སར་སླེབས་སོང་། ངས་སྐབས་དེར་ནང་ལ་པར་ཆེན་པོ་གསུམ་བཀལ་ནས་ཡོད། པར་ཆེན་པོ་གསུམ་དེ་ངས་བྲིས་པ་ཡིན། གཅིག་དེ་སྟོན་པ་སངས་རྒྱས་བཅོམ་ལྡན་འདས་སྐུ་གཞོན་ནུའི་སྐབས་ལ་རྒྱལ་བུ་གཞོན་ནུ་དོན་གྲུབ་ཀྱི་ཆ་བྱད་བྱས་ནས་རྒྱལ་བོའི་ཆ་བྱད་བྱས་ནས་ངས་གཅིག་བྲིས་ཡོད་པ་རེད། གཉིས་དེ་རྒྱ་ནག་གི་གོང་མ་ཁང་ཤི་རེད། ཁྱད་མཚར་ང་སྐབས་དེར་ཁང་ཤི་ཟེར་བ་ཨོག་ཚོམ་རིང་པོ་ཞིག་ཡོད་པ་དེ་ལ་དགའ་བོ་ཞེ་བོ་ཞིག་ཡོད་སྐབས་དེ་ཟུར་གཅིག་ལ་བཀལ་ནས་ཡོད། ཕྱོགས་གཅིག་ལ་རྒྱལ་དབང་སྐུ་ཕྲེང་བཅུ་གསུམ་པ་རྒྱལ་བ་ཐུབ་བསྟན་རྒྱ་མཚོའི་སྐུ་པར་བཅས་པར་གསུམ་བཀལ་བཞག་ཡོད། པར་གསུམ་པོ་དེའི་གཤམ་ལ་རྩོམ་རྒྱབ་ཡོད་པ་རེད། རྩོམ་རྒྱག་མཁན་དེ་ཕ་བོང་ཁ་རིན་པོ་ཆེ་ཟེར་མཁན་བླ་མ་མཚན་སྙན་ཆེན་པོ་ཞིག་ཡོད་པ་དེའི་དྲུང་ཡིག་བློ་བཟང་རྡོ་རྗེ་ཟེར་བ་ཞིག་ཡོད་པ་དེ་རེད། དེས་རྩོམ་གང་འདྲ་བརྒྱབས་ཡོད་པ་རེད་ཟེར་ན། ད་རྒྱལ་བུ་གཞོན་ནུ་དོན་གྲུབ་རེད། སྟོན་པ་ཐུགས་རྗེ་ཅན་རབ་ཏུ་མ་བྱུང་གོང་ཁྱིམ་ལ་བཞུགས་པའི་གནས་སྐབས་དེར་རྩོམ་ཡིག་འདི་ལྟར་བརྒྱབས་ཡོད་པ་རེད། སྲས་གཙང་སྲས་བུ་གཞོན་ནུ་གསོ།། དོན་ཀུན་གྲུབ་པ་ལྷ་ཡི་ལྷ།། ཞེས་རྩོམ་བརྒྱབས་ཡོད་པ་རེད། རྒྱ་ནག་གི་གོང་མ་ཁང་ཤི་ལ། ས་འདི་སྟོབས་ཀྱི་འཁོར་ལོས་བསྒྱུར།། ཁང་ཤི་གོང་མ་བདག་པོ་ཆེ།། དེ་ནས་རྒྱལ་བ་ཐུབ་བསྟན་རྒྱ་མཚོ་ལ། གངས་ཅན་ལྷ་གཅིག་པད་དཀར་འཆིང་།། ཐུབ་བསྟན་རྒྱ་མཚོ་འགྲོ་བའི་མིག། ཅེས་བརྒྱབས་ཡོད་པ་རེད། ཁོས་ལམ་སེང་མཐོང་མ་ཐག་པར་དེར་བལྟས་སོང་། རྩོམ་འདི་སུས་བརྒྱབས་པ་རེད་ཟེར། དེ་ནས་ངས་ཕ་བོང་ཁ་བ་རིན་པོ་ཆེའི་དྲུང་ཡིག་རེད་ལབ་པ་ཡིན། དེ་ནས་ཁོས་དྲུང་ཡིག་དེའི་མིང་ལ་ག་རེ་ཟེར་གྱི་ཡོད་པ་རེད་ཅེས་བྲིས་པར། བློ་བཟང་རྡོ་རྗེ་ཟེར་གྱི་ཡོད་པ་རེད་ལབ་པ་ཡིན། དེར་ཁོས་རྩོམ་ཡག་པོ་འདུག་ག རྩོམ་ཡག་པོ་བརྒྱབས་འདུག་ཟེར། ཁོས་ཐོག་མ་ཐོག་མ་ངའི་པར་དེའི་གཤམ་གྱི་རྩོམ་དེར་བལྟས་ནས་ཧ་ལས་སོང་། ཁོ་ལངས་ནས་བལྟས་བསྡད་དེ་རྩོམ་དངོས་གནས་ཡག་པོ་བརྒྱབས་འདུག་ཟེར། དེ་རྗེས་གཞི་ནས་མར་བསྡད་དེ་མོག་མོག་འདྲ་བཟས། དེ་ནས་ངས་ཁྱོད་གང་ལ་བསྡད་ཡོད་དྲིས་པར་ཁོ་ཨ་མདོ་ཁང་གསར་ནང་ལ་བསྡད་ཡོད་ཟེར། རོགས་པ་ཡོད་དམ་ཞེས་དྲིས་པར། རོགས་པ་འདྲ་ཞིག་ཡོད་ཟེར། དེ་ནས་ངེད་ཚོས་སྐད་ཆ་ཕར་བཤད་ཚུར་བཤད་དུས་ཁོ་རང་གི་ཟླ་བོ་དེ། བཙོན་ཁང་འདིའི་ནང་ནས་ཁོ་གཉིས་གཉེན་སྒྲིག་བྱས་པ་ཞིག་རེད། བུ་མོ་དེ་ཁམས་མོ་ཞིག་རེད། མིང་ལ་ཆོས་སྒྲོན་ཟེར་གི ལོ་བཅོ་བརྒྱད་བཅུ་དགུ་ཞིག་རེད་འདུག ལོ་ཆུང་ཆུང་ཞིག་རེད། དེ་བཙོན་ཁང་ནང་ནས་གཉེན་སྒྲིག་བྱས་ཏེ་མར་ཁྲིད་ཡོང་ནས་ནང་ལ་ཡོད་ཟེར། དེ་ནས་ངས་མོ་རང་སྐད་བཏང་ཤོག ང་ཚོས་འདིར་མོག་མོག་བཟའ་ཞེས་ལབ་པར་ད་དེ་གཡུག་ཤོག ཁྲིད་མ་ཡོང་ཟེར། དེའི་ཉིན་མོ་དེ་དེ་འདྲ་བྱས་ནས་ངེད་གཉིས་ཐོག་མར་ངོ་ཤེས་པ་ཡིན། དེའི་རྗེས་ནས་ངེད་གཉིས་ཕར་ཕྱིན་ཚུར་ཡོང་བྱས་ནས་ངེད་གཉིས་ཀྱི་འབྲེལ་བ་དེ་ཞེ་དྲག་གི་ཡག་པོ་ཡོད་པ་རེད། ངེད་གཉིས་ལྟ་བ་སྤྱོད་པ་སོགས་གང་ཅིའི་ཕྱོགས་ནས་ཕན་ཚུན་མཐུན་པོ་ཞེ་དྲག་འདུག ཁོ་རང་ཡང་རྒྱུ་ཅ་ལག་ཞེ་དྲག་མི་དགོས་པར་སྤྲང་པོ་ནང་བཞིན་འདུག་པའི་བསམ་པ་དེ་ཡོད་པ་རེད། ང་ལ་ཡང་བསམ་བློ་དེ་འདྲ་ཞིག་ཡོད་པ་རེད། རི་མོ་འདྲ་ཞིག་བྲིས་ཏེ་དེ་རིང་དེ་རིང་དང་། སང་ཉིན་སང་ཉིན་བྱེད་པ་དང་། དེ་རིང་འཚོ་བ་འདྲ་བོ་བསྐྱལ་རྒྱུ་བྱུང་ན་མ་གཏོགས་སང་ཉིན་ལ་བསམ་བློ་གཏོང་གི་ཡོད་པ་མ་རེད། ངེད་གཉིས་ཀྱི་ལྟ་ཚུལ་འདྲ་བོ་ཞེ་དྲག་མཐུན་གི དེ་ཡིན་སྐབས་ངེད་གཉིས་ཀྱི་འབྲེལ་བ་དེ་ཉིན་རེ་བཞིན་ཡག་དུ་ཡག་དུ་འགྲོ་བ་དང་། མཚམས་ཤིག་ལ་ད་ཁོ་ཕལ་ཆེར་ངའི་ནང་ལ་ཡོང་ནས་བསྡད་འདུག་གི ཁོ་རང་གི་དགེ་ཕྲུག་དེ་དུས་ཙམ་ལ་རིག་གནས་སློབ་མཁན་མང་པོ་འདུག དགེ་ཕྲུག་མང་ཆེ་བ་དེར་ཡོང་ནས་དཔེ་ཆ་འདྲ་སྦྱང་། དཔེ་ཆ་འདྲ་བོ་ཁྲིད་ཡ་དེ་ཞེ་དྲག་ཁྲིད་གི་མ་རེད་སྐད་ཆ་འདྲ་བཤད་ནས་བསྡད། རྩེད་མོ་འདྲ་བོ་རྩེས། བསྟན་བཤིག་འདྲ་བོ་འཁྲབ་དེ་འདྲ་བསྡད་གི་མ་གཏོགས་དངོས་གནས་མཚན་ལྡན་གྱི་དཔེ་ཆ་ཁྲིད་པ་དེ་འདྲ་བྱེད་ཀྱི་མ་རེད། རྒྱུན་ལྡན་མིའི་རང་བཞིན་གང་འདྲ་ཞིག་ཡོད་པ་རེད་ཟེར་ན་མཚམས་མཚམས་ཏེ་ཉིན་ལྔ་དྲུག་བདུན་བརྒྱད་རེའི་མཚམས་ལ་མ་གཏོགས་ཁྲུས་རྒྱག་གི་མ་རེད། མལ་སའི་ནང་ནས་ཡར་ལངས། སྤྱིར་ཡར་ལངས་ཡ་ལངས་གི་མ་རེད། རྐང་སྣམ་ཀྱང་གྱོན་གི་མ་རེད། མལ་ཆས་འདྲ་བོ་དེ་འདྲ་ཞིག་བྱས་ནས་གྱོན། སྒང་ལ་རྒྱ་གར་ནས་ཁྱེར་ཡོང་བའི་ཀམ་པ་ལི་ལྗང་ཁུ་ཞིག་གྱོན་ཡོད་པ་དེ་གྱོན་ནས་བསྡད་གི་རེད། འོག་ལ་སྟོད་ཐུང་གྱོན་གི་མ་རེད། རྐང་སྣམ་ཡང་གྱོན་གི་མ་རེད། ད་དཔེ་ཆ་སློབ་མཁན་འཁྲིས་ན་མི་ག་ཚོད་ཡོད་ན་དེ་དེ་ག་རེད། གཅིན་པ་གཏོང་གི་འགྲོ་དུས་ལམ་སེང་ཡར་ལངས་ནས་ཀམ་པ་ལི་དེ་གྱོན་ནས་འགྲོ་གི་རེད། ཁོ་རང་རྐང་སྣམ་གྱོན་མི་འདུག་ཅེས་འཕྱ་ལད་གཏོང་མཁན་ཀྱང་ཡོད་པ་མ་རེད། ཁོ་གོམས་འདྲིས་རེད། ཁོའི་མིའི་རང་བཞིན་དེ་འདྲ་ཞིག་ཡོད་པ་རེད། མཚམས་རེར་ད་ངེད་གཉིས་བར་སྐོར་ལ་འགྲོ་ཟེར་གི་རེད། ད་ངེད་གཉིས་བར་སྐོར་ལ་ཕྱིན་པ་རེད། བར་སྐོར་ལ་ཕྱིན་པའི་སྐབས་ལ་ཁོ་རང་གི་ཆོས་སྒྲོན་ཟེར་བའི་བུ་མོ་དེ་རྗེས་མ་ང་ཚོའི་ཀླུ་འབུམ་ཁང་ཚན་གྱིས་དེ་ཡག་པོ་མི་འདུག་ཅེས་ཕྱིར་འབུད་བྱས་སོང་། ཁུངས་ལུང་མེད་པའི་བུ་མོ་དེ་འདྲ་ཁྱོད་རང་འདྲ་བོ་བྱས་ནས་དེ་ཁྱོན་ནས་ཡག་པོ་མི་འདུག་ཀླུ་འབུམ་ཁང་ཚན་གྱིས་ཕྱིར་འབུད་བྱས་སོང་། དེའི་རྗེས་ལ་ཆབ་མདོ་ནས་ཡིན་པ་ཨ་ཅེ་ཚེ་བརྟན་གཡུ་སྒྲོན་ཟེར་བ་ཞིག་ལ་འབྲེལ་བ་བྱས་ཏེ་དེ་དང་མཉམ་དུ་གཉེན་སྒྲིག་བྱས་ནས་བསྡད་པ་རེད། ཚེ་བརྟན་གཡུ་སྒྲོན་བཟང་ཚང་བྱས་པའི་སྐབས་ལ་ད་ཁོ་བར་སྐོར་ལ་འགྲོ་དུས་དངུལ་ཞེ་དྲག་དཀོན་པོ་རེད། ད་ཁོ་ཁྲོམ་ལ་འགྲོ་དུས་གཞི་ནས་ཡར་ལངས་ཏེ་རྐང་སྣམ་གྱོན། ཕྱུ་བ་འདྲ་གྱོན་སྐེ་རགས་བཅིངས་དེ་འདྲ་བྱེད་གི་རེད། མཚམས་རེར་ངས་ངེད་གཉིས་ཡིན་གཅིག་མིན་གཉིས་བར་སྐོར་ལ་འགྲོ་ཞེས་ངས་ཨུ་ཚུགས་བརྒྱབས་ནས་ངེད་གཉིས་འགྲོ་གི་ཡོད། འགྲོ་བའི་སྐབས་ལ་ཁོར་ཕྱུ་བ་ལྔང་སྨུག་ཞིག་དང་དམག་མིའི་གོན་པའི་ཞྭ་ལེ་མོ་ཞིག་གྱོན་རྒྱུ་ཡོད་པ་རེད། ཕྱུ་བ་དེ་ཡང་ཁོ་རང་ཨ་ཅེས་སྐེ་རགས་མ་བཅིངས་ཚེ་ཁོ་རང་གིས་བཅིངས་ཤེས་ནི་མ་རེད། ཕྱུ་བ་དང་ཞྭ་མོ་གྱོན་རྗེས་ཨ་ཅེ་ལ་དངུལ་སློང་གི་རེད། དངུལ་ཡོད་པ་མ་རེད། སྐབས་དེར་ང་ཚོའི་དངུལ་དེ་བོད་དངུལ་རེད། བོད་དངུལ་ཞོར་བེ་ཟེར་བ་ཞིག་ཡོད་པ་རེད། ཞོར་བེ་བཅུ་ཐམ་པ་སྲང་གང་རེད། ཞོར་བེ་བཅོ་ལྔ་གྲངས་ཀ་གཅིག་རེད། ཚེ་བརྟན་གཡུ་སྒྲོན། ཚེ་བརྟན་གཡུ་སྒྲོན་ང་ལ་དངུལ་ཞིག་སྤྲོད་རོགས་ཟེར་གི་རེད། ཚེ་བརྟན་གཡུ་སྒྲོན་གྱིས་ཕར་ཚུར་བཙལ་བཙལ་ནས་གྲངས་ཀ་བཅུ་སྟེ་ཞོར་བེ་བཅུ་ཐམ་པ་སྤྲོད་གི་རེད། ད་ཞོར་བེ་བཅུ་ཐམ་པ་སྤྲོད་དུས་ཙམ་ལ་ཁོར་བླུགས་ས་འདྲ་གཅིག་ཀྱང་ཡོད་པ་མ་རེད། པེ་ཞ་བླུགས་སའི་ཁུག་མ་ཟེར་བ་འདྲ་བོ་དེ་འདྲ་ཁྱོན་ནས་ཡོད་པ་མ་རེད། དེའི་རྗེས་ལ་ང་ལ་དངུལ་འདི་བླུགས་ས་ཞིག་སྤྲོད་རོགས་ཟེར་གི་རེད། ཚེ་བརྟན་སྒྲོལ་དཀར་གྱིས་མུ་ཟིའི་སྒམ་ཆུང་ཞིག་གི་ནང་ལ་དངུལ་དེ་ནས་བླུགས་ནས་སྤྲོད་གི་རེད། དེ་ནས་ངེད་གཉིས་ཁྲོམ་ལ་འགྲོ་གི་རེད། ཁྲོམ་ལ་ཕྱིན་པའི་སྒང་ལ་ཁོ་རང་སྒོ་ནས་མར་བཏོན་ནས་ནང་ལ་ཡར་མ་སླེབས་པར་དུ་ལྟ་ས་གཅིག་ལ་བལྟས་ཏེ་འགྲོ་བ་མ་གཏོགས། ཡར་མར་ལ་ལྟ་བ་འདྲ་བོ་དང་ཚོང་ཁང་འདྲ་ནང་གི་ཅ་ལག་ལ་ལྟ་བ། ཡང་མི་ལ་ལྟ་བའམ་སྐད་ཆ་བཤད་པ་དེ་འདྲའི་ལུགས་སྲོལ་ཡོད་པ་མ་རེད། ཐག་རིང་པོར་བལྟ་བ་དང་ཁོའི་འགྲོ་སྟངས་ཀྱང་ཡག་པོ་མ་རེད། ངེད་གཉིས་ཀྱིས་ག་ལེ་ག་ལེར་ལྷ་སའི་བར་སྐོར་ལ་སྐོར་བ་གཅིག་མ་བརྒྱབས་པའི་ས་དེར་བསུར་བསངས་ཡོད་པ་རེད། དེར་སྐྱེས་དམན་རྨོ་མོ་ཞིག་གིས་ཤ་བག་ལེར་བསྲེགས་ཀྱི་ཡོད་པ་རེད། ཤ་བག་ལེབ་ཡོད་ས་དེར་སོང་ནས་དུས་རྒྱུན་དུ་ཁོས་ཤ་བག་ལེབ་གསུམ་རེ་གསུམ་རེ་ཉོ་གི་རེད། ཁོ་དེར་ཕྱིན་ནས་ང་ལ་ཤ་བག་ལེབ་གསུམ་དགོས་ཀྱི་ཡོད་ཟེར་གི་རེད། རྨོ་ལགས་དེས་ཤ་བག་ལེབ་གསུམ་བསྲེགས་ཏེ་ཤོག་བུ་འདྲའི་ཁུག་ལའང་མ་བཏུམས་པར་དེ་ག་ནང་བཞིན་སྟེར་གི་རེད། ཁོས་ཤ་བག་ལེབ་གསུམ་དེ་ལག་ལ་བཟུང་ནས་གཅིག་དེ་ཁོ་རང་སར་བསྡད་པའི་སྐབས་དེར་བཟའ་གི་རེད། གཅིག་ང་ལ་སྤྲོད་གི་རེད། ཡིན་ནའང་ངས་ལེན་གི་མེད། ང་ངོ་ཚ་གི་རེད་པ། སྐབས་དེར་ལྷ་སའི་མི་རྣམས་ཀྱིས་སྤྲང་པོ་ཞིག་ཡིན་ན་མ་གཏོགས་ཁྲོམ་ནས་འགྲོ་གིན་འགྲོ་གིན་དུ་ཟ་མ་བཟའ་གི་མ་རེད། དངོས་གནས་ཚུལ་ལྡན་གྱི་མི་ཞིག་གིས་ཁྲོམ་ནས་བཟའ་གི་མ་རེད། དེ་འདྲ་བྱས་ནས་ཁོས་གཅིག་བཟས་རྗེས་ཡར་ལངས་གི་རེད། ཡར་ལངས་ནས་ད་དངུལ་སྤྲོད་དགོས་པ་རེད། ཁོའི་དངུལ་མུ་ཟིའི་སྒམ་ཆུང་ཞིག་གི་ནང་དུ་ཡོད་པ་དེ་ཕྱུ་བ་ཆེན་པོ་དེའི་ཨམ་འབག་ནང་ལ་བླུགས་ཡོད་སྐབས་ཁོས་མ་བཋྱེད་པར་ག་ས་ག་བར་བཙལ་ཏེ། བྱམས་པ། ངའི་དངུལ་མི་འདུག ངའི་དངུལ་མི་འདུག་ཟེར་གི་རེད། དེ་ནས་རྨོ་ལགས་དེས་ཨོ་ཙི་སྐུ་ཕྱོགས་དངུལ་གང་ལ་ཡོད་པ་རེད། ངས་བཙལ་ཆོག་ཟེར་གི་རེད། རྨོ་ལགས་དེས་བཙལ་བཙལ་ནས་ཕྱུ་བ་དེའི་རུམ་ཁུག་ནས་མུ་ཟིའི་སྒམ་ཆུང་དེ་བཏོན་ཡོང་གི་རེད། དེ་ནས་ཁོས་དངུལ་གྲངས་ཀ་བཅུ་ཡོད་པ་དེའི་ནང་ནས་ཤ་བག་ལེབ་གསུམ་ལ་ག་ཚོད་སྤྲོད་དགོས་པ་དེ་སྤྲད། ཡར་ལངས། ཤ་བག་ལེབ་དེའི་གཅིག་ལག་པར་བཟུང་། གཅིག་དེ་ལམ་ཁ་ནས་འགྲོ་དུས་བཟའ་གི་རེད། བྱམས་པ་ཟོ་ཟེར་གི་རེད། ངས་བཟའ་གི་མེད། ལམ་ཁ་ནས་ཤ་བག་ལེབ་དེ་ཉི་མར་བསྟན་དེ། བྱམས་པ། དཀོན་མཆོག་གསུམ་ལྟོས་དང་། གྲོ་བྱེ་འདི་ཡག་པོ་ཞེ་བོ་ཞིག་རེད། གྲོ་བྱེ་འདི་ཕར་ཉི་མར་བསྟན་ན་ནང་ནས་ཉི་མ་མཐོང་གི་འདུག་ཟེར་བ་འདྲ་བོ་ཆོ་མེད་པའི་སྐད་ཆ་བཤད་གི་རེད། མི་ཚང་མས་བལྟས་ཏེ་མི་འདི་སྨྱོན་པ་ཞིག་ཡིན་པ་འདྲ་ཟེར་གི་རེད། མིས་ག་རེ་བཤད་མ་བཤད་དེ་ཁོས་མཐོང་གི་ཡོད་པ་མ་རེད་ལ། དེར་ཁྱོན་ནས་དོ་སྣང་ཁོ་ར་ཡོད་པ་མ་རེད། ཁོ་རང་གིས་བག་ལེབ་ནང་གི་ཤ་དེར་འགྲེལ་བཤད་བརྒྱབས་ནས། བལྟོས་དང་གྲོ་བྱེ་འདི་ཡག་པོ་ཞེ་བོ་ཞིག་རེད། གྲོ་བྱེ་འདིའི་ནང་ནས་ཤ་མཐོང་གི་འདུག་ཟེར་བ་འདྲ་བོ་ཆོ་མེད་པའི་སྐད་ཆ་བཤད་གི་རེད། མི་ཚང་མ་གད་མོ་ཤོར་གི་རེད། ང་རྦད་དེ་ངོ་ཚ། དེ་འདྲ་དེ་འདྲ་བྱས་ནས་ངེད་གཉིས་ནང་ལ་སླེབས་འགྲོ་གི་རེད། ནང་ལ་འགྲོ་དུས་ཤ་བག་ལེབ་གཉིས་ཁོ་རང་གིས་བཟས་པ་རེད། ཤ་བག་ལེབ་གཅིག་དེ་ཁོ་རང་ཟླ་བོ་ཚེ་བརྟན་གཡུ་སྒྲོན་ལ་ཁྱེར་ཡོང་བ་རེད། ཚེ་བརྟན་གཡུ་སྒྲོན་ལ་སྤྲད་དེ་འདི་ཟོ་དང་འདི་ཞིམ་པོ་ཞེ་བོ་ཞིག་འདུག་ཟེར་གི་རེད། དེ་དག་ཚང་མ་རྒྱུན་ལྡན་གྱི་གནས་ཚུལ་རེད། མཚམས་རེར་ཡང་ངས་ངེད་གཉིས་གཙུག་ལག་ཁང་ལ་མཆོད་མཇལ་འགྲོ་ཟེར་གི་ཡོད། ཁོས་མིན་མིན་མཆོད་མཇལ་ལ་འགྲོ་གི་མིན། གང་ལ་ཡོད་པ་རེད་ཟེར་གི་རེད། ངས་མཆོད་མཇལ་ལ་ཅིག་འགྲོ དེ་ལྷ་ས་ནས་སྙེ་ཐང་ལ་འགྲོ་དགོས་པ་རེད། མཚམས་རེར་མཆོད་མཇལ་ལ་སོང་ན་ཡག་པོ་ཡོད་པ་རེད་ཅེས་ངས་ཁོ་ཁྲིད་འགྲོ་གི་ཡོད། ཁྲིད་དུས་ཙམ་ལ་ངས་ཁོ་ལ་ཁས་ལེན་མང་པོ་ཞིག་བྱེད་དགོས་པ་རེད། ལྷ་མང་པོ་མང་པོར་མ་མཇལ། ལྷའི་མདུན་ནས་སྨོན་ལམ་བརྒྱབས་ནས་རྒྱུན་རིང་པོར་མ་སྡོད། མགྱོགས་པོ་མགྱོགས་པོ་མཇལ་ནས་ཚུར་ལོག་ཡོང་ན་ཡག་པོ་ཡོད་པ་རེད། སྨོན་ལམ་བརྒྱབས་ནས་སྡོད་པ་དེ་ཡག་པོ་མི་འདུག་ཟེར་གི་རེད། དེ་ནས་ངས་སྨོན་ལམ་བརྒྱབས་ནས་རྒྱུན་རིང་པོར་མི་འདུག ང་མགྱོགས་པོ་ཚུར་ལོག་ཡོང་ཆོག་ཞེས་ངས་ཁས་ལེན་བྱས་ཏེ་ངེད་གཉིས་མཆོད་མཇལ་ལ་འགྲོ་གི་རེད། ལྷ་ཁང་ཆུང་ཆུང་འདྲའི་ནང་ལ་འགྲོ་དུས་ལྷ་ལ་མཇལ་ཁ་ཞུ་གི་མ་རེད། ལྷའི་གདོང་ལ་བལྟས་ནས་འགྲོ་གི་རེད། གཙུག་ལག་ཁང་ལ་སོང་དེ་ཇོ་བོ་རིན་པོ་ཆེ་སྐད་མདུན་ལ་འགྲོ་དུས་ཇོ་བོ་རིན་པོ་ཆེ་ལ་ཐོད་པ་གཏུགས་གི་འདུག གཞན་མཆོད་ཁང་གཞན་པའི་ནང་གི་ལྷ་དེ་ཚོར་ཞེ་དྲག་དོ་སྣང་མེད་པའི་བཟོ་འདྲ་བྱས་ནས་ཞེ་དྲག་གང་ཡང་བྱེད་གི་མ་རེད། ཡང་ཉིན་གཅིག་བོད་ཀྱི་རྒྱལ་བོ་ ཏེ་ལུང་བྲག་ རེད། ཏེ་ལུང་བྲག་གི་ཕྱག་མཛོད་ཆེན་མོ། ཏེ་ལུང་བྲག་བོད་ཀྱི་རྒྱལ་བོ་རེད་མ་གཏོགས་བོད་ཀྱི་སྡེ་བ་གཞུང་གི་དབང་ཆ་ཡོད་ན་མེད་ན་དེ་ཕྱག་མཛོད་ཆེན་མོའི་ལག་ལ་ཡོད་པ་རེད། ཕྱག་མཛོད་ཆེན་མོའི་སྒང་ལ་མ་གཞི་ཡོད་པ་བཀའ་ཤག་འདྲ་བོ་ཡོད་པ་རེད། ཡིན་ནའང་དོན་དག་ཆེན་པོ་དེ་འདྲ་ཡོད་དུས་ཕྱག་མཛོད་ཆེན་མོ་མེད་དུས་ཐག་ཆོད་གི་མ་རེད། དགེ་འདུན་ཆོས་འཕེལ་གྱིས་ཕྱག་མཛོད་ཆེན་མོ་ལ་རིག་གནས་འདྲ་ཁྲིད་དེ་ཕྱག་མཛོད་ཆེན་མོ་དགེ་འདུན་ཆོས་འཕེལ་གྱི་དགེ་ཕྲུག་རེད། ཕྱག་མཛོད་ཆེན་མོ་ཡིས་མཚམས་མཚམས་ལ་དགེ་འདུན་ཆོས་འཕེལ་སྐད་གཏོང་གི་ཟེར། ངས་དགེ་འདུན་ཆོས་འཕེལ་ཁྱོད་ཕྱག་མཛོད་ཆེན་མོའི་སར་འགྲོ་དུས་མི་ལ་ཆེ་མཐོང་འདྲ་བོ་བྱས། མི་ལ་གུས་ཞབས་འདྲ་བོ་དེ་འདྲ་བྱེད་ཀྱི་ཨེ་ཡོད་ཅེས་དྲིས་བར་མེད། ངས་དེ་འདྲ་བྱེད་གི་མེད་ཟེར། དེ་ག་རེ་ཡིན་ན་ཞེས་དྲིས་པར། ངས་མི་ལ་ཆེ་མཐོང་འདྲ་བོ་དང་མི་ལ་གུས་ཞབས་འདྲ་བོ་དེ་འདྲ་རྩ་ནས་བྱས་མ་མྱོངས་ཟེར། ཞུས་མ་མྱོངས་ནའང་དེ་རིང་སང་ཉིན་སྡེ་བ་གཞུང་ཡར་བྱས་ན་མར་བྱས་ན་ཕྱག་མཛོད་ཆེན་མོའི་ལག་རེད། མིའི་ཀུན་སྤྱོད་ཟེར་བ་དང་མི་ཆོས་ཟེར་བ་དེ་ཡིན་གཅིག་མིན་གཅིག་ཚང་མ་ལ་བསྟུན་དགོས་པ་ཞིག་རེད། དེ་མིའི་ཀུན་སྤྱོད་དང་མཐུན་པ་ཞིག་བྱེད་དགོས་པ་རེད་ཅེས་ལབ་པར། ཕྱིར་གང་ཡང་ལབ་གི་མི་འདུག ངས་ཁྱེད་རང་ཕྱིན་པའི་སྐབས་ལ་ཕྱག་མཛོད་ཆེན་མོ་ཡིས་རྣམ་འགྱུར་གང་འདྲ་སྟོན་གྱི་འདུག་ཞེས་དྲིས་པར། ང་ཕྱིན་པའི་སྐབས་ལ་ཕྱག་མཛོད་ཆེན་མོ་ལམ་སེང་ཡར་ལངས་གི་རེད་ཟེར། དེ་དུས་ཤིང་གི་བཞུགས་སྒྲོམ་སྒང་ལ་རི་མོ་བྲིས་པ་དེ་ཡག་པོ་ཞེ་བོ་ཡོད་པ་རེད། ཁོ་སླེབས་དུས་ཕྱག་མཛོད་ཆེན་མོ་ལམ་སེང་མར་བབ་སྟེ་དགེ་འདུན་ཆོས་འཕེལ་ལགས་ཡར་བཞུགས་རོགས་ཟེར་གི་རེད་ཟེར། ང་ལམ་སེང་ཕྱིན་དེ་དེར་བསྡད་པ་ཡིན་ཟེར། ཨོ་ཕྱག་མཛོད་ཆེན་མོ་བཞུགས་སར་ཁྱོད་ལམ་སེང་བཞུགས་ཏེ་ཐེ་ཚོམ་ཙམ་ཡང་མེད་པར། ཁྱོད་ལ་དེ་འདྲའི་སྙིང་ཆེ་བ་ལ་ཅེས་ལབ་པར། ང་མི་ཡིན་སྐབས་ངས་མིའི་ཐོབ་ཐང་རྩོད་ལེན་བྱེད་གི་རེད་ཟེར། ཁོའི་སྐད་ཆ་དེར་བལྟས་པའི་སྒང་ལ་མི་ཆེན་པོ་སུ་འདྲ་ཞིག་ཡིན་ནའང་ཁོ་ལ་དེར་མིའི་འདུ་ཤེས་མེད་པ་འདྲ། ཕལ་ཆེར་ཅིག་ང་ཡིན་བསམ་པ། འཇིག་རྟེན་འདིར་མཁས་པ། འཇིག་རྟེན་འདིའི་ཡིན་མིན་གྱི་རྣམ་དབྱེ་ཤེས་མཁན་ང་གཏོགས་མེད་སྙམ་པའི་འདུ་ཤེས་ཤིག་ཡོད་པ་འདྲ། ཡང་ཉིན་གཅིག་ལ་ཁོས་སྐུ་དྲག་མང་པོ་ཞིག་ལ་དཔེ་ཆ་ཁྲིད་པའི་སྐབས་ལ། ཁོ་རང་ལ་བྱི་མི་ནག་པོ་ཞིག་ཡོད་པ་རེད། བྱི་མི་ནག་པོ་དེ་དུས་རྒྱུན་དུ་པང་ལ་ཉར་ནས་བསྡད་གི་རེད། དཔེ་ཆ་ཁྲིད་པའི་ཞོར་ལ་ཁྱོད་རང་ཚོ་ཚང་མས་ང་ལ་དགེ་འདུན་ཆོས་འཕེལ་ཤེས་རབ་ཆེན་པོ་རེད། དགེ་འདུན་ཆོས་འཕེལ་ཡོན་ཏན་ཆེན་པོ་རེད་ཅེས་ང་ལ་དེ་འདྲ་བཤད་གི་ཡོད་པ་རེད། དེ་དངོས་གནས་རེད། ང་ལ་ཤེས་རབ་ཆེན་པོ་དང་ཡོན་ཏན་ཆེན་པོ་རེད། རེད་དེ་ངས་ཤེས་རབ་ཆེན་པོ་དང་ཡོན་ཏན་ཆེན་པོ་ལ་འབད་བཻོན་ཞེ་དྲག་བྱེད་གི་ཡོད་པ་རེད། དུས་རྒྱུན་དུ་ངས་སེམས་འདི་རྦད་དེ་གཡེང་ནས་བསྡད་མེད། ངས་སེམས་འདི་གཞི་རྩ་གཅིག་གི་སྒང་ལ་བཞག་ནས་བསམ་བློ་གཏོང་ས་གཅིག་ལ་བསམ་བློ་བཏང་ནས་བསྡད་ཡོད་པ་རེད་མ་གཏོགས། ཁྱེད་རང་ཚོ་ནང་བཞིན་སེམས་འདི་རྒྱ་ཡན་དུ་བཏང་ནས་སེམས་འདི་གང་བྱུང་མང་བྱུང་རྩ་བ་ནས་མེད་ཟེར། ཁྱེད་རང་ཚོས་དངོས་གནས་དྲང་གནས་ང་དང་ཁྱེད་རང་ཚོ་བསྡུར་ན། སྙིང་རྗེ་ངའི་བྱི་མི་འདི་རེད། ང་དངོས་གནས་མི་རེད། ཁྱེད་རང་ཚོ་དང་བསྡུར་ན། ཁྱེད་རང་ཚོར་ངའི་བྱི་མི་འདི་ནང་བཞིན་གྱི་འཆར་སྣང་དང་ཤེས་རྒྱ་མ་གཏོགས་ཡོད་པ་མ་རེད། ཞོགས་པར་བྱི་མི་འདིའི་མིག་ལ་བལྟས་པའི་སྒང་ལ་བྱི་མི་འདིའི་མིག་གི་ནང་གི་འབྲས་བུ་འདི་རིལ་རིལ་ཞིག་ཡོད་པ་རེད། ཉིན་གུང་བལྟས་པའི་སྒང་ལ་བྱི་མིའི་མིག་ནང་གི་འབྲས་བུ་འདི་ཁབ་ནང་བཞིན། ཞོགས་པར་ཐད་ལ་ཡོད་པ་ཡིན་ན། ཉིན་གུང་འདི་ལྟར་ཡར་མར་སྟེང་འོག་ཏུ་བརྗེས་ནས་བསྡད་ཡོད་པ་རེད། རྣོ་ཕྲ་མོ་ཕྲ་མོ་ཁབ་ནང་བཞིན་ཞིག་ལས་ཡོད་པ་མ་རེད། བྱི་མིའི་མིག་གི་རྣོ་དེར་འདི་ལྟར་འགྱུར་ལྡོག་བྱུང་བའི་སྒང་ལ་ང་ཚོ་མིའི་མིག་གི་མཐོང་སྟངས་དང་བྱི་མིའི་མིག་གི་མཐོང་སྟངས་གཉིས་རྩ་བ་ཉིད་ནས་འདྲ་གི་མ་རེད། ང་ཚོས་འདི་ལྟར་ཕར་ལྷ་སའི་བུམ་པ་རི་ལ་བལྟས་པའི་སྒང་ལ། རི་ཕ་གི་བུམ་པ་རི་རེད། ངས་བལྟས་ན་བུམ་པ་རི་རེད། ཁྱེད་རང་གིས་བལྟས་ནའང་བུམ་པ་རི་རེད། ཚང་མས་བལྟས་ན་བུམ་པ་རི་རེད། མི་ཚང་མས་གཅིག་མ་གཏོགས་གཉིས་མཐོང་གི་མ་རེད། བྱི་མི་འདི་ཁ་གྲགས་པ་ཤེས་པ་ཞིག་ཚེ་ཁོར་དྲིས་པ་ཡིན་ན། བྱི་མིའི་མཐོང་ཚུལ་དང་མིའི་མཐོང་ཚུལ་གཉིས་ཁ་ཁ་རེད། བྱི་མིས་དེ་བུམ་པ་རི་མ་རེད་ཟེར་གི་རེད། དེ་མིན་པའི་རྒྱུ་མཚན་གང་ཡིན་ཟེར་ན་བྱི་མིའི་མིག་གི་འབྲས་བུ་དང་མིའི་མིག་གི་འབྲས་བུ་གཉིས་བཟོ་ལྟ་ལོགས་པ་རེད། རྣམ་འགྱུར་ལོགས་པ་རེད་ཟེར། དེ་ག་ནང་བཞིན་ང་ཚོའི་མདུན་གྱི་ཀ་བ་འདི་རེད། ང་ཚོ་ཚང་མས་ཀ་བ་འདི་ལ་བལྟས་པའི་སྒང་ལ་ཀ་བ་འདི་རིལ་རིལ་རེད་དམ་གྲུ་བཞི་རེད་ཅེས་འདྲི་དུས། ཚང་མས་གྲུ་བཞི་རེད་ཟེར་གི་རེད། གྲུ་བཞི་ཡིན་པ་ཁྱོད་རང་གིས་གང་འདྲ་བྱས་ནས་ཧ་གོ་སོང་ཟེར་དུས་སྒང་ལ། ངས་བལྟས་ནས་ཧ་གོ་སོང་ཟེར་གི་རེད། ངས་བལྟས་ན་རེད། ཁྱོད་ཀྱིས་བལྟས་ན་རེད། འདི་ལ་མི་བརྒྱ་ཡོད་པ་ཡིན་ན་ཚང་མས་བལྟས་ན་གྲུ་བཞི་མ་གཏོགས། གཞན་དངོས་པོ་རིལ་རིལ་དེ་འདྲ་རྩ་བ་ཉིད་ནས་མ་རེད། ཚང་མའི་ཁས་ལེན་གཅིག་གྱུར་རེད། ང་ཚོ་མི་ལ་སྣང་བའི་ཕ་རོལ་གྱི་ཡུལ་ག་འདྲ་ཞིག་ཡིན་ནའང་སྣང་བའི་སྣང་བྱ་དེ་ཙོག་ཙོག་ཡིན་ན་ཙོག་ཙོག རིལ་རིལ་ཡིན་ན་རིལ་རིལ། གྲུ་བཞི་ཡིན་ན་གྲུ་བཞི་གཅིག་མ་གཏོགས་ཡོད་པ་མ་རེད། ང་ཚོ་མིའི་མིག་གི་ལྟ་སྟངས་འདི་འདྲ་ཞིག་ཡོད་པ་རེད། དེ་གང་ཡིན་ཟེར་ང་ཚོ་མིའི་མིག་དེ་འདི་ལྟར་ཐད་ཀར་ཡོད་པའི་རྐྱེན་གྱིས་རེད། མིག་ཐད་ཀར་ཡོད་པ་རིགས་མཐའ་དག་གིས་ཀ་བ་འདིར་བལྟས་པ་ཡིན་ན་དེ་གྲུ་བཞི་རུ་མཐོང་གི་ཡོད་པ་རེད། ཡང་མིག་གཉིས་སྟེང་འོག་ཅིག་བརྗེས་ནས་ཀ་བ་འདིར་ལྟས་པ་ཡིན་ན། ཀ་བ་འདི་གྲུ་བཞི་མ་རེད། བཟོ་ལྟ་མི་འདྲ་བ་ཞིག་མཐོང་གི་རེད། དེའི་རྒྱུ་མཚན་གང་ཡིན་ཟེར་ན་ཁོ་རང་མིག་གཉིས་སྟེང་འོག་ཏུ་ཕྱིན་ཚར་བ་རེད། ང་ཚོ་མིག་གཉིས་ཐད་ཀར་ཡོད་པ་ཚོས་བལྟས་ན་གྲུ་བཞི་རེད། མིག་གཉིས་སྟེང་འོག་ཏུ་ཕྱིན་པའི་མི་ཡིས་ཀ་བ་འདིར་བལྟས་པ་ཡིན་ན་ཀ་བ་འདིའི་བཟོ་ལྟ་འགྱུར་ཚར་བ་རེད་ཟེར། དེ་ག་ནང་བཞིན་འཇིག་རྟེན་འདིའི་ཕྱིའི་སྣོད་དང་ནང་བཅུད་གང་དང་གང་ཡིན་ནའང་སོ་སོས་གང་མཐོང་བ་དེ་གཞི་ལ་བཞག་ནས་འདི་རེད་དང་འདི་མ་རེད་ཅེས་ཐ་སྙད་ཚད་མར་བཞག་པ་རེད་མ་གཏོགས། དེ་ལས་རྒྱུ་མཚན་གཞན་གང་ཡང་ཡོད་པ་མ་རེད་ཟེར།

དྲི་བ། དགེ་འདུན་ཆོས་འཕེལ་གྱིས་རྒན་ལགས་དང་མཉམ་དུ་སྐད་ཆ་བཤད་པ་ཡིན་ན་ཁོང་ག་རེ་བྱས་ནས་བཙོན་ཁང་ནང་བཅུག་པ་ཡིན་པའི་སྐོར་སྐད་ཆ་བཤད་སོང་ངམ།

ལན། དེ་ཁོ་དམར་པོའི་གསང་མྱུལ་རེད་ཅེས་བཅུག་པ་རེད་ཟེར། ཁོ་རྒྱ་གར་ལ་སོང་ནས་རི་མོ་ཅུང་ཙམ་བསླབས་པ་ཡིན་ཟེར། རི་མོ་སློབ་སའི་དགེ་རྒན་དེ་ཨུ་རུ་སུ་དཀར་པོ་མིང་ལ་རའོ་རིཀ་ཟེར་བ་ཞིག་ཡིན་ལ། ཁོའི་འཁྲིས་ལ་ཟླ་བ་དྲུག་དག་དག་ལ་རི་མོ་དག་དབྱིན་ཇིའི་སྐད་བསླབས་པ་ཡིན་ཟེར། དེའི་དོགས་བྱ་ཡིས་བཟུང་བ་རེད་ཟེར། རའོ་རིཀ་སྐབས་དེར་ཨུ་རུ་སུའི་ནང་ལོགས་ལ་ཨུ་རུ་སུ་དམར་པོ་ལངས་ཏེ་ཨུ་རུ་སུ་དཀར་པོ་བྲོས་ཏེ་ཁོ་རྒྱ་གར་ལ་ཡོང་ནས་བསྡད་ཡོད་པ་རེད། སྐབས་དེར་རྒྱ་གར་དབྱིན་ཇི་ཡིས་བཟུང་བསྡད་ཡོད་པ་རེད། ལྷག་པར་དུ་ཁོས་རྒྱ་གར་ནས་བོད་ཀྱི་ལོ་རྒྱུས་སྐོར་ལ་ཞིབ་འཇུག་མང་པོ་བྱས་པ་ཡིན་ཟེར། གནའ་སྔ་མོ་བོད་ཀྱི་བཙན་པོ་ཆོས་རྒྱལ་སྲོང་བཙན་སྒམ་པོ་ཡི་དུས་ལ་ཆུ་བོ་གང་ག་སོགས་ཚང་མ་བོད་ཀྱི་ས་ཆ་རེད། ཡིན་པའི་རྟགས་མང་པོ་འདུག་ཟེར། རྡོ་རིང་འདུག ལྷག་པར་དུ་ལྕགས་ཀྱི་ཀ་བ་གཉིས་ཀྱི་སྒང་ལ་སྔོན་མ་བོད་ཀྱི་རྒྱལ་བོའི་དབང་སྒྱུར་གྱི་ས་ཆ་ཡིན་པའི་ཁུངས་སྐྱེལ་་ལུང་སྐྱེལ་་འདུག་ཟེར་མོད་ཁོས་ཀ་བ་དེ་གཉིས་བཙལ་ནས་ཐུག་མ་སོང་ཟེར། ཁོ་མེ་འཁོར་ནང་ནས་ཕར་འགྲོ་དུས་མེ་འཁོར་གྱི་འབབ་ཚིགས་ལ་ཁེལ་མི་འདུག་པས་དེར་ཁོས་དབྱེ་འབྱེད་བྱེད་ཐུབ་མ་སོང་ཟེར། ཡང་བོད་ཀྱི་རྒྱལ་བོས་བཙུགས་པའི་ཀ་བ་གཅིག་འདུག་པ་དེར་དབྱེ་འབྱེད་བྱས་པ་ཡིན་ཟེར། ཡིན་པ་སྔོན་མ་དེ་ཕལ་ཆར་རྡོ་ཨེ་ཡིན་ན་བསམ་པ་ཞིག་འདུག རྗེས་མ་ཁོས་ཞིབ་འཇུག་བྱེད་དུས་ཅ་ལག་རྙིང་པ་ཚང་མ་སྐྱོན་བཏང་འདུག དེའི་སྒང་ལ་ཁྲོ་བླུགས་འདུག ཡི་གེ་ཚང་མ་གསལ་མི་གསལ་ཞིག་འདུག་སྐབས་དེར་ཞིབ་འཇུག་ཡག་པོ་ཞིག་བྱེད་ཐུབ་མ་སོང་ཟེར། དེ་ནས་རྒྱ་གར་གྱི་ལྡི་ལི་དེ་ཡང་གནའ་སྔ་མོ་བོད་ཀྱི་ས་ཆ་རེད། ལྡི་ལི་ཟེར་བའི་སྐད་དེའང་སྐད་ཟུར་ཆགས་པ་ཞིག་ཡིན་ཞིང་ང་ལ་ཅིག་བཤད་སོང་མོད་ངས་དྲན་གྱི་མི་འདུག་ དོན་དངོས་ཐོག་བོད་སྐད་ཅིག་རེད་ཟེར། ཡང་རྒྱ་གར་གྱི་ས་ཆ་གང་ཞིག་ཡིན་ན་ཅིག་ན་གཉན་ཆེན་ཐང་ཟེར་བ་ཞིག་འདུག གཉན་ཆེན་ཐང་ཟེར་བ་དེ་སྔོན་མ་བོད་ཀྱི་རྒྱལ་བོས་རྒྱ་གར་ལ་དམག་རྒྱག་པའི་དུས་ལ་བྱང་གི་གཉན་ཆེན་ཐང་ལྷ་ཡིས་དམག་མང་པོ་བསྡུས་དེ་རྒྱ་གར་ལ་དམག་རྒྱབ་པ་དང་། དེ་རྒྱ་གར་གྱི་ས་ཆ་ནས་གཞིས་ཆགས་ཏེ་ལུས་སོང་བ་ཞིག་རེད། གང་ཡིན་ཟེར་ན་ཁོ་རང་ཚོའི་ཁྱིམ་གྱི་སྒང་ལ་དར་ཆ་དཀར་པོ་སྟེ་བོད་ཀྱི་དར་ཆ་རེ་བཙུགས་འདུག ནང་ན་ཡི་གེ་མི་འདུག འདི་ག་རེ་རེད་ཅེས་དྲིས་པར། འདི་གནའ་སྔ་མོ་་སྔ་མོ་ང་ཚོའི་ཁྱིམ་ཚང་གང་འདྲ་ཞིག་ཡིན་ནའང་ཐོག་ལ་དར་ཆ་དཀར་པོ་དེ་འཛུགས་གི་རེད་ཟེར། ཁོ་ཉིན་གཅིག་དེའི་ཉེ་འགྲམ་ཞིག་ཏུ་ངལ་གསོ་རྒྱབ་ནས་ཉལ་བསྡད་པའི་དུས་ལ་མི་ཞིག་གིས་གླུ་ལེན་གི་འདུག ཕལ་ཆེར་ཁམས་དང་ཨ་མདོའི་གླུ་འདྲ་བོ། སྐད་སྙན་པོ་ཞེ་བོ་ཞིག་འདུག ཁོའི་སེམས་དེ་སྐྱོ་བ་འདྲ་ཞིག་སྐྱེས། ཡ་མཚར་འདི་གང་འདྲ། བོད་ཀྱི་མི་འདྲ་ཡིན་ནམ་སྙམ་ནས་ག་ལེ་ག་ལེར་ཁོ་ཡོད་སར་ཕྱིན་དེ་ཁོ་ལ་ཐུག་སོང་། དེ་ནས་ཁོ་གཉིས་སྐད་ཆ་བཤད་དེ་ཁྱོད་ཀྱི་གླུ་དེ་སྙན་པོ་ཞེ་དྲག་འདུག གླུ་དེ་ཁྱོད་ཚོའི་ལུང་པའི་གླུ་རེད་དམ་ཞེས་དྲིས་པར། རེད། ང་ཚོའི་ལུང་པའི་གླུ་རེད། གནའ་སྔ་མོ་འདི་བོད་ཀྱི་གླུ་རེད་ཅེས་བཤད་སྲོལ་ཡོད་པ་རེད། དེང་སང་ང་ཚོའི་ལུང་པའི་གླུ་འདི་རེད་ཟེར་གི བོད་ཀྱི་གླུ་འདྲ་བོ་མ་གཏོགས་རྒྱ་གར་གྱི་གླུའམ་གཞས་ཡི་རྣམ་པ་གང་ཡང་མི་འདུག དེར་བལྟས་ཚེ་ས་ཆ་འདི་གནའ་སྔ་མོ་བོད་ཀྱི་རྒྱལ་བོའི་ཆབ་འབངས་ཀྱི་ས་ཆ་རེད་ཟེར།

དྲི་བ། བཙོན་ཁང་ནང་ནས་ཁོང་གིས་སྡུག་མྱངས་པ་འདྲ་བོ་དེ་འདྲའི་ལོ་རྒྱུས་བཤད་སོང་ངམ།

ལན། བཙོན་ཁང་ནང་གི་སྐད་ཆ་བཤད་སོང་། ཕྱི་རྒྱལ་གྱི་མགྲོན་ཁང་ཞིག་ལས་སྡེ་བ་གཞུང་གི་བཙོན་ཁང་སྐྱིད་པོ་ཡོད་པ་རེད་ཟེར། སྡེ་བ་གཞུང་གི་བཙོན་ཁང་ལ་བཙོན་པ་ནག་ཆེན་ཡོང་ན་ཁོ་ནག་ཉེས་ཚར་ནས་རྒྱུགས་ཟེར་ན་ཁོ་འགྲོ་གི་མ་རེད་ཟེར། ལྷ་སར་སྐོར་བ་འདྲ་བརྒྱབས། ཁོ་རང་ཚོའི་འཚོ་བ་བསྐྱལ་བ་ཁག་པོ་ཡོད་སྐབས་ཡང་བསྐྱར་ཡར་བཙོན་ཁང་ནང་འཛུལ་ཡོང་ནས། སྐུ་མཁྱེན། ང་བཙོན་ཁང་ནང་ནས་ཅུང་ཙམ་ཉལ་འཇུག་རོགས་ཅེས་སྡོད་མཁན་ཡང་འདུག་ཟེར། ང་བཙོན་ཁང་ནང་ནས་འཚོ་བ་སྐྱིད་པོ་ཞེ་དྲག་བྱུང་ཟེར། ཙོ་ཙོ་མེས་ དང་ཨ་ལགས་རག་ར་དང་། སྐུ་དྲག་འདྲ་བོ་དེ་འདྲ་འཚོ་བ་སྐྱལ་ཡོང་མཁན་ཡོད་སྐབས་ངས་རང་གིས་བཟས་པ་དང་མི་ལའང་སྤྲད་པ་ཡིན་ཟེར། ལྷག་པར་དུ་ངས་བཙོན་ཁང་ནང་ཐང་ཀ་བྲིས་པ་དང་བུ་མོ་ཆོས་སྒྲོན་ཟེར་བ་དེ་དང་མཉམ་འབྲེལ་བྱས་ནས་མོར་སྤྱི་ཚོགས་སྟེང་ལ་བཙོང་གི་བཅུག འཚོ་བ་སྐྱིད་ཐག་ཆོད་ཡིན་ཟེར། བཙོན་ཁང་གི་ཐ་སྙད་ཙམ་མ་གཏོགས་བཙོན་ཁང་དེའི་ནང་དངོས་གནས་སྐྱིད་པོ་ཡོད་པ་རེད་ཟེར། དགོང་དྲོཉི་མ་ནུབ་མ་ནུབ་དེ་ལ་བཙོན་པ་ཚང་མ་བཙོན་ཁང་གི་ཐོག་ཁ་ནས་ཕོ་བྲང་ཡོད་སར་ཁ་འཁོར་ནས་སྒྲོལ་མ་ཚར་ཉི་ཤུ་རྩ་གཅིག་བཏོན། མ་ཎི་བཏོན། ཕྱག་འཚལ་བྱས་ཏེ་བཙོན་པ་ཚང་མ་སོ་སོའི་བཙོན་ཁང་ནང་འགྲོ་གི་རེད། བཙོན་ཁང་ནང་མྰ་ཅང་རྒྱག་ཡ་ཡོད་པ་རེད། བཙོན་ཁང་ནང་མྰ་ཅང་རྒྱག་པའི་སྐབས་སུ་རྣམ་རྒྱལ་གྲྭ་ཚང་གི་གྲྭ་བ་ཚོ་བཙོན་ཁང་ནང་ལ་མྰ་ཅང་རྒྱག་གི་ཡོང་གི་རེད། དེ་གང་འདྲ་བྱས་ནས་ཧ་གོ་བ་རེད་ཟེར་ན། བཙོན་ཁང་ནང་དུ་དེ་དགོང་མྰ་ཅང་རྒྱག་གི་ཡིན་ན། བཙོན་ཁང་གི་ཐོག་དེར་གཟན་དམར་པོ་ཞིག་བཏིང་ནས་འཇོག་གི་རེད་ཟེར། དེར་རྣམ་རྒྱལ་གྲྭ་ཚང་གི་གྲྭ་བ་ཚོ་མར་བཏོན་ཡོང་བའི་དུས་ལ་བཙོན་ཁང་ནང་ལ་དེ་དགོས་མྰ་ཅང་ཡོད་པ་འདྲ་བསམ་ནས། དགོང་མོ་རྣམ་རྒྱལ་གྲྭ་ཚང་གི་གྲྭ་བ་ཚོ་བཙོན་ཁང་ནང་ལ་མྰ་ཅང་རྒྱག་གི་ཡོང་གི་རེད་ཟེར། དེ་འདྲའི་སྐྱིད་པོ་རེད་ཟེར། ང་ཐོག་མར་ལས་ཁུངས་ནང་བཀག་ལ་བཅུག་པ་རེད་ཟེར། དེར་བཅུག་པའི་སྐབས་སུ་ང་ལ་ནག་ཉེས་འདྲ་བོ་ཁྱོན་ནས་བཤད་ཡོད་པ་མ་རེད། ནག་ཉེས་ངས་ཚོད་དཔག་བྱས་སྐབས་ངས་ཤེས་ནི་རེད། ག་རེ་བྱས་པ་ཡིན་ཟེར་ན་དབྱིན་ཇིས་སྡེ་བ་གཞུང་བཀའ་ཤག་ལ་ང་ལ་ནག་ཉེས་ཆེན་པོ་ཞིག་ཡོད་པ་རེད་ཅེས་གསང་བརྡ་ཞིག་སྤྲད་ཡོད་པ་ཐག་ཆོད་རེད་ངས་དེ་བསམ་སོང་། གང་ཡིན་ཟེར་ན་ངས་རྒྱ་གར་ནས་ལོ་བཅུ་གཉིས་བཅུ་གསུམ་ཞིག་ལ་བོད་ཀྱི་ལོ་རྒྱུས་ལ་ཞིབ་འཇུག་བྱས་པ་རེད། དབྱིན་ཇིས་ཚང་མ་ཧ་གོ་ནས་བསྡད་ཡོད་པ་རེད། ངའི་རྗེས་ལ་གསང་མྱུལ་བ་ཡོད་པ་རེད། ངས་ག་རེ་བྱས་དང་མ་བྱས་ཚང་མས་ཤེས་གིན་ཡོད་པ་རེད། ང་རྒྱ་གར་ནས་ཚུར་ཡོང་དུས་མོན་རྟ་ཝང་ནས་ཡོང་བ་ཡིན། མོན་རྟ་ཝང་ནས་ལྷ་སར་མ་སླེབས་པར་དུ་ཁོ་རང་ཚོའི་གསང་མྱུལ་ཡོད་པ་རེད། ངའི་ནག་ཉེས་དེ་གཞུག་ལ་དབྱིན་ཇིས་བཀའ་ཤག་ལ་ལབ། དེ་ནས་ང་འཇུས་པ་རེད་བསམ་སོང་། ངའི་བསམ་བློའི་ནང་དེ་འདྲའི་འཆར་སྣང་ཞིག་ཡོད་ཟེར། དེ་ཡིན་སྐབས་ངའི་སེམས་ཤིག་ལ་ངའི་ནག་ཉེས་དེ་གསང་མྱུལ་གྱི་ནག་ཉེས་རེད། ངས་གསང་མྱུལ་ལས་ཀ་བྱས་ཡོད་པ་མ་རེད། གསང་མྱུལ་གྱི་ལས་ཀ་བྱས་མེད་པ་ཞིག་ལ་གསང་མྱུལ་གྱི་ལས་ཀ་བྱས་པ་རེད་ཟེར་བའི་སྒང་ལ་ངས་མ་བྱས་པའི་དཔང་རྟགས་ཁོ་ཚོར་ཡོད་པ་མ་རེད། ངས་དངོས་གནས་བྱས་ཡོད་པ་མ་རེད། ད་ཡང་ན་ངའི་ལག་པ་གཅོད་གི་རེད། ཡང་ན་ངའི་མིག་འདོན་གི་རེད་བསམ་ནས་ང་ལ་ཞེད་སྣང་ཞེ་བོ་ཞིག་སླེབས་སོང་། སྐབས་དེར་ངས་སྒྲོལ་མ་ཞེ་དྲག་བཏོན་པ་ཡིན། ང་སྡོད་ས་དེ་བཙོན་ཁང་མ་ཡིན་པར་བཙོན་ཁང་གི་ཐོག་ནས་ཁང་པ་འོག་ཤིང་ལེབ་སྒྲིག་ཡོད་པ་སྒང་ཁང་བ་བྱས་སྤྱིར་བཏང་གི་མི་དྲག་པ་དེ་འདྲའི་ཁང་པ་ཞིག་གི་ནང་ལ་བཅུག་སོང་ཟེར། སྐབས་དེར་ང་ལ་ཕྲེང་བ་མེད་སྐབས་སྒྲོལ་མ་ཚར་རེ་བཏོན་ཏེ་ཤིང་གི་སྒང་ལ་རྟགས་རེ་བརྒྱབས་ཏེ་ཕལ་ཆེར་རྟགས་བརྒྱབས་པ་དེས་ཁང་པ་ཁེངས་འདུག་ཟེར། དེ་འདྲའི་སྐབས་ལ་ཉིན་ཞིག་མི་དཔོན་གྱིས་ཡར་སྐད་བཏང་སོང་། ཉིན་མོ་དེ་རིང་ནས་བཟུང་ཁྱོད་ལྷ་ས་ནས་སྡོད་གི་མ་རེད། ཁྱོད་ཞོལ་བཙོན་ཁང་དེའི་ནང་ལ་འགྲོ་དགོས་པ་རེད། ཞོལ་བཙོན་ཁང་ལ་འགྲོ་བའི་དུས་ལ་ཁྱོད་ལ་རྟ་ལྕགས་ལྔ་བཅུ་ཐམ་པ་གཞུ་གི་རེད། ཁོ་ཚོར་དེ་ལྟར་ཁྱབ་བསྒྲགས་བྱས་སོང་ཟེར། སྐབས་དེར་བཀའ་བློན་ཟུར་ཁང་གིས་ཧ་གོ ཟུར་ཁང་གིས་ང་ལ་ཡག་པོ་བྱེད་གི་རེད། ཟུར་ཁང་གིས་ཧ་གོ་ནས་ཟུར་ཁང་ཁོ་རང་གི་སརྔུན་ མདའ་དཔོན་ ཟེར་བ་ཞིག་ཡོད། མདའ་དཔོན་དགེ་འདུན་ཆོས་འཕེལ་གྱི་སློབ་མ་རེད། ཟུར་ཁང་ཡང་དགེ་འདུན་ཆོས་འཕེལ་གྱི་སློབ་མ་རེད། ཁོང་གཉིས་ཀ་ངའི་སློབ་མ་ཡིན་སྐབས་ང་ལ་རྟ་ལྕགས་གཏོང་བའི་ཉིན་མོ་དེར་རྟ་ལྕགས་གཏོང་མཁན་ སྒོ་ལྕགས་ པ་བྱས་ནས། རྐང་བཙུགས་ནས་མི་ནག་ཅན་ལ་ཁྲིམས་གཅོད་བྱེད་མཁན་མགོ་ལ་ཞྭ་མོ་འབོག་ཐོ་གྱོན་མཁན་ཞིག་ཡོད་པ་རེད། དེས་མི་ནག་ཅན་གང་འདྲ་ཡིན་ནའང་ཁ་སྦུབས་བྱས་ནས་ཉལ་བཅུག་སྟེ་རྐུབ་ལ་རྟ་ལྕགས་ཀྱིས་གཞུ་གི་རེད། དེར་ཟུར་ཁང་དང་མདའ་དཔོན་གཉིས་ཀྱིས་རྟ་ལྕགས་གཏོང་མཁན་ལ་དངུལ་སྤྲད་དེ། ཁོའི་རྐུབ་ལ་རྟ་ལྕགས་ཀྱིས་མ་ཁེལ་བ་བྱོས། ལྕགས་སྣེ་ས་ལ་ཁེལ་བ་བྱོས་ཅེས་བཤད་དེ་ཁོ་ལ་རྟ་ལྕགས་རེག་མ་སོང་། དེ་ཟུར་ཁང་གི་བཀའ་དྲིན་ཡིན་ཟེར། དེའི་རྗེས་ལ་ཞོལ་གྱི་བཙོན་ཁང་ནང་ལོ་གསུམ་ལ་བསྡད་པ་ཡིན། ལོ་གསུམ་བསྡད་པའི་སྒང་ལ་གཞི་ནས་ཀླུ་འབུམ་ཁང་ཚན་གྱིས་དགེ་འདུན་ཆོས་འཕེལ་སྔོན་མ་ཀླུ་འབུམ་ཁང་ཚན་གྱི་གྲྭ་བ་ཡིན་སྐབས་ཁོ་ཚོས་ཤུགས་བརྒྱབས་ཏེ། ཁོ་ལ་ནག་ཉེས་ཆེན་པོ་བཀལ་ཡོད་པ་མ་རེད། ད་ཁོ་མར་གློད་རོགས་གནང་། དགེ་འདུན་ཆོས་འཕེལ་གྱིས་ཕལ་ཆེར་ཡག་ག་སྡུག་ག་དེ་འདྲ་མི་བྱེད་ཅེས་ཀླུ་འབུམ་ཁང་ཚན་ཁས་ལེན་ལ་བསྡད་ནས་ཁོ་མར་གློད་པ་རེད། གློད་པའི་ཉིན་མོ་དེར་སྡེ་བ་གཞུང་གི་ཁྲིམས་ཀྱི་བཀའ་ཡིག་མར་ཀློག་དགོས་པ་རེད། བཙོན་པ་ཚང་མས་ཉན་དགོས་པ་རེད། ཀློག་པའི་སྐབས་ལ་དགེ་འདུན་ཆོས་འཕེལ་ཁོ་ནག་ཉེས་ཆེན་པོ་རེད། ཁོ་ཨུ་རུ་སུ་དམར་པོའི་གསང་མྱུལ་བ་རེད། ང་བཙུགས་ནས་ཨུ་རུ་སུ་དམར་པོས་བཏང་བའི་གསང་མྱུལ་བ་རེད། ཡིན་ནའང་ལོ་དེར་རྒྱལ་བ་རིན་པོ་ཆེ་དགོངས་ལོ་ ༡༣ ལ་ཕེབས་ཡོད་པ་དང་། རྒྱལ་བ་རིན་པོ་ཆེ་དགོངས་ལོ་ ༡༣ ལ་ཕེབས་པའི་སྐུ་བགེགས་ཡོད་སྐབས་ཁོ་རང་ཚེ་ཐར་ཡིན་ཞེས་ཁྱབ་བསྒྲགས་བྱས་སོང་། ཉིན་མོ་དེར་ཁྱབ་བསྒྲགས་བྱས་ཏེ་ཁོ་མར་གློད་པ་རེད། ཁོ་ལ་ནག་ཉེས་ཡོད་ན་མེད་ན་དེ་གསང་མྱུལ་ཞེས་པ་དེ་རེད། གསང་མྱུལ་བ་རེད་ཟེར་མཁན་དབྱིན་ཇི་རེད། རྒྱ་གར་ནས་ལོ་ ༡༢ ལ་བོད་ཀྱི་ལོ་རྒྱུས་ལ་ཞིབ་འཇུག་བྱས། དཔེར་ན། ལྡི་ལི་དང་ཆུ་བོ་གང་ག་ཟེར་བ་འདྲ་བོ་ཚང་མ་བོད་ཀྱི་ས་ཆ་རེད་ཅེས་ལབ་པ་རེད། དེ་ག་ནང་བཞིན་ས་གནས་ས་ཐོག་གི་སྐད་དང་ཡི་གེ། རྟགས་ཚང་མ་ལ་ཁོས་ཞིབ་འཇུག་བྱས་པ་དབྱིན་ཇིས་ཤེས་ཡོད་པ་རེད། རྗེས་ནས་དབྱིན་ཇི་ཁྲིམས་ཁང་ནང་ལ་བསྐྱལ་བ་རེད་ཟེར།

དྲི་བ། དགེ་འདུན་ཆོས་འཕེལ་རྒྱ་གར་གྱི་ཀ་བློན་སྦུག་ཅེས་པའི་ས་ཆ་ཞིག་ཡོད་པ་དེར་སྡོད་སྐབས་ ར་ཀེ་པན་ཊ་ཚང་ དང་ ཀུན་འཕེལ་ལགས་ དང་། ལྕང་ལོ་ཅན་ ཁོ་ཚོ་གསུམ་པོས་མཉམ་དུ་བོད་ཀྱི་ཚགས་པར་ཞིག་བཏོན་པ་ཡིན་ཟེར་བ་དེའི་སྐོར་ལ་སྐད་ཆ་འདྲ་བཤད་སོང་ངམ།

ལན། དེའི་སྐོར་ལ་བཤད་ཀྱི་མི་འདུག དགེ་འདུན་ཆོས་འཕེལ་གྱིས་ང་དེའི་གྲས་ན་མེད་ཟེར། ཡང་ཁོ་རང་ཚོར་ཚོགས་པ་ཡོད་ཟེར་གི་མི་འདུག དགེ་འདུན་ཆོས་འཕེལ་གྱིས་ང་དེའི་གྲས་ལ་མེད་ཟེར། ང་རྒྱ་གར་ལ་ལོ་ ༡༣ ལ་སྡོད་པའི་དུས་ལ་སྒང་ལ་འཚོ་བ་སྐྱོ་བོ་ཞེ་དྲག་ཅིག་རེད། ཉིན་མོ་གཅིག་ལ་ང་ལ་རྒྱ་གར་གྱི་པེ་ཞ་གཅིག་ཀྱང་མེད་པར་བསྡད་མྱོང་ཟེར། ང་འཚོ་བ་སྐྱོ་བོ་ཞེ་དྲག་སོང་ཙང་མི་ཚང་མས་ཧ་གོ་ནས་ཁ་ཤས་ཀྱིས་ང་ལ་ཁྱོད་སློབ་གྲྭ་ཞིག་གི་དགེ་རྒན་བྱོས་དང་། འཚོ་བ་འདི་ལས་ཡག་པོ་ཅིག་སྐྱེལ་་ཐུབ་གི་རེད། ཁྱོད་ལ་ཟླ་བ་རེ་རེར་གླ་ཆ་ཆེན་པོ་སྟེར་མཁན་འདུག་ཟེར། དེ་ངས་མི་དགོས། ང་སློབ་གྲྭ་གཅིག་གི་དགེ་རྒན་བྱས་ན་སློབ་གྲྭ་དེའི་ཤེས་ཡོན་ལ་སོགས་པར་ལྟ་རྟོགས་བྱས་ནས་དེར་བསྡད་དགོས་པ་རེད་མ་གཏོགས། བོད་ཀྱི་ལོ་རྒྱུས་ལ་ཞིབ་འཇུག་བྱེད་པའི་དུས་ཚོད་ཡོད་པ་མ་རེད་བསམས་ནས་མ་བསྡད་ཟེར། ཡང་ཁ་ཤས་ཀྱིས་ང་ཚོའི་ནང་ལ་བུ་མོ་ཡག་པོ་ཞེ་བོ་ཡོད། དབྱིན་ཇི་ཞིག་གིས་ང་ཚོའི་ནང་ལ་བུ་མོ་ཡག་པོ་ཞེ་བོ་ཞིག་ཡོད། ང་རང་ཚོ་རྒྱུས་ཡོད་ཆེན་པོ་ཞེ་དྲག་ཡིན་ཞེས་བཤད་པར་ངས་དེ་ཡང་མ་བྱས། ཡང་རྒྱ་གར་གྱི་བྷ་བྷོ་དེ་འདྲ་ཡིས་ང་ཚོའི་ནང་ལ་བུ་མོ་ཡག་པོ་ཡོད། ཁྱོད་ངེད་ཚང་ནས་མག་པར་སྡོད་ཟེར་མཁན་འདུག དེར་ཡང་མ་བསྡད་ཟེར། ཡང་ཁམས་པའི་ཚོང་དཔོན་འདྲ་བོ་དེ་འདྲ་ཡིས་ང་ཚོའི་ནང་ལ་སྡོད་དང་། ང་ཚོར་བུ་མོ་ཡག་པོ་དང་འཚོ་བ་ཡག་པོ་ཞེ་བོ་ཞིག་ཡོད་ཟེར། དེར་ཡང་ང་མ་བསྡད་ཟེར། ཁོས་དེ་དག་བཤད་དགོས་པའི་རྒྱུ་མཚན་གང་ཡིན་ཟེར་ན། ཉིན་མ་གཅིག་ལ་སྐུ་དྲག་མང་པོ་ཞིག་ཡོད་པ་དེ་དག་གིས་དགེ་འདུན་ཆོས་འཕེལ་འདི་ཐབས་སྐྱོ་བོ་ཞེ་བོ་ཞིག་རེད། ཨ་ལྕག་ཡག་པོ་གཅིག་ལའང་འཕྲད་ཐུབ་ཡོད་པ་མ་རེད། སྔོན་མ་ཆོས་སྒྲོན་རེད། སྣ་བུག་ཡོད་པ་མ་རེད། དེང་སང་ཡང་ཚེ་བརྟན་གཡུ་སྒྲོན་རེད། ངོ་ནི་ངོ་ཡག་པོ་ཡོད་པ་མ་རེད། རྐུབས་ནི་རྐུབས་ཆེན་པོ་འདི་འདྲ་ཞིག་ཡོད་པ་རེད། ད་དགེ་འདུན་ཆོས་འཕེལ་ལ་ག་རེ་བྱེད་དགོས་པ་རེད། ཨ་ཐབས་སྐྱོ་བོ། ཅེས་དགེ་འདུན་ཆོས་འཕེལ་ལ་ཨ་ལྕག་ཡག་པོ་གཅིག་ཀྱང་རག་ཡོད་པ་མ་རེད་ཅེས་ལབ་པ་དེའི་ལན་ལ་དགེ་འདུན་ཆོས་འཕེལ་གྱིས་དེ་ལྟར་ལབ་པ་རེད། ང་ལ་ཨ་ལྕག་མ་རག་པ་མ་རེད། ངས་ཨ་ལྕག་འཚོལ་གྱི་ཡོད་ན་དབྱིན་ཇིའི་བུ་མོ་དང་རྒྱ་གར་བྷ་བྷོ་ཡི་བུ་མོ། ཁམས་པའི་ཚོང་དཔོན་གྱི་བུ་མོ་སྙིང་རྗེ་བོ་དེ་འདྲ་མང་པོས་ང་ལ་ཚུར་རེ་བ་འདོན་མྱོང་ཡོད་པ་རེད་དེ། ངས་ཁྱོན་ནས་མ་བྱས། ལྷག་པར་དུ་ཏྲེ་ཐུང་གི་སྲས་མོ། ཨ་ལགས་རག་ར་ཡི་འོག་མ་བུ་མོ་ཞིག་ཡོད་པ་འདྲ། དེས་དགེ་འདུན་ཆོས་འཕེལ་ལ་འདོད་པ་ཞེ་དྲག་ཅིག་བྱེད་ཀྱི་ཡོད་པ་འདྲ། ཨ་ལགས་རག་ར་ཡི་འོག་མ་བུ་མོ་དེས་ང་ལ་ཞེ་དྲག་འདོད་པ་བྱས་པ་རེད། དགེ་འདུན་ཆོས་འཕེལ་ལ་ཆང་ས་རྒྱག་རྒྱུ་མ་བྱུང་ན་ང་ཨ་ནེ་བྱེད་ཀྱི་ཡིན་ཞེས་བཤད་མོད། ངས་ཁྱོན་ནས་འདོད་པ་མ་བྱས། ཡང་ཁྲི་བྱང་རིན་པོ་ཆེ་ཡིས་ ར་ཚ་ཞག་གི་ ཨ་ནེ་སྙིང་རྗེ་བོ་ཞིག་ཡོད་པ་འདྲ། ར་ཚ་ཞག་གི་ཨ་ནེ་ཁྱེད་གཉིས་ཆང་ས་བརྒྱབས་ན་ཡག་པོ་ཡོད་པ་རེད་ཅེས་ང་ལ་བཤད་ཀྱང་ངས་ཁྱོན་ནས་ཁ་ལ་མ་ཉན། ང་ལ་མང་པོ་ཞིག་གིས་ཚུར་རེ་བ་བཏོན་ནའང་ངས་ཁས་ལེན་མ་བྱས། ངས་ཁས་ལེན་མ་བྱས་པ་འདིའི་རྒྱུ་མཚན་ཁྱོད་རང་ཚོས་ཤེས་གིན་ཨེ་ཡོད། ཁྱོད་ཚོས་རྒྱུ་མཚན་ཤེས་གིན་མ་རེད། ང་དགེ་འདུན་ཆོས་འཕེལ་འདི་མིའི་རང་དབང་རྩོད་ལེན་བྱེད་མཁན་ཞིག་རེད། ང་ལ་རང་དབང་ཆ་ཚང་དགོས་སྟབས་ངས་ཁོ་རང་ཚོའི་འདོད་པ་མ་བསྐང་པ་རེད། དཔེར་ན། ཏྲེ་ཐུང་བའི་བུ་མོ་དེ་དང་ངེད་གཉིས་ཆང་ས་རྒྱག་གི་ཡིན་ན་མོ་ང་ལ་དགའ་བོ་ཞེ་བོ་ཞིག་ཡོད་པ་རེད། མོ་སྙིང་རྗེ་བོ་ཡང་ཡོད་པ་རེད། མོ་རང་ལྷ་ས་བ་རེད། སྐུ་དྲག་གི་སྲས་མོ་རེད། ང་ཨ་མདོ་ནས་རེད། མི་ཕལ་བ་ཞིག་རེད། ཨ་མདོ་ཞིག་དང་ལྷ་ས་བ་ཞིག་ཆང་ས་བརྒྱབས་ན་འགྲིག་གི་མ་རེད། ཁོ་ཚོའི་གོམས་འདྲིས་དང་ལྟ་བ་སྤྱོད་པ་ཚང་མ་སྐུ་དྲག་གི་ལས་སྟངས་རེད། ང་སྤྲང་པོ་རེད། ཨ་མདོ་རེད། ད་དཔེར་ན་ངེད་གཉིས་ཆང་ས་འདྲ་རྒྱག་ཁུལ་བྱས་པ་ཡིན་ན་ང་ལ་གཅེས་གིན་རེད། དགེ་འདུན་ཆོས་འཕེལ་ལགས་ཁྱེད་རང་ཕྱུ་བ་གྱོན་སྟངས་འདི་རྩ་བ་ནས་ཡག་པོ་མི་འདུག ཕྱུ་བ་འདི་འདྲ་གྱོན་རྒྱུ་ཡོད་པ་མ་རེད་ཅེས་ང་ལ་ཕྱུ་བ་གྱོན་སྟངས་སློབ་གིན་རེད། ཡང་དགེ་འདུན་ཆོས་འཕེལ་ཁྱོད་རང་འགྲོ་སྟངས་ཡག་པོ་མི་འདུག་ཅེས་ང་ལ་འགྲོ་སྟངས་སློབ་གིན་རེད། ཡང་དགེ་འདུན་ཆོས་འཕེལ་ཁྱོད་རང་སྐད་དེ་ཨམ་སྐད་མ་ཡིན་པ་དང་ལྷ་སའི་སྐད་ཡང་མ་ཡིན་པ་བྱས་ཁྱོད་རང་སྐད་དེ་ཡག་པོ་མི་འདུག་ཅེས་ལབ་གི་རེད། ད་ངའི་གོན་པ་གྱོན་སྟངས་དང་། སྐད་ཆ་བཤད་སྟངས། ཟ་མ་བཟའ་སྟངས་ཚང་མ་བསྒྱུར་དགོས་པ་རེད། ང་རྒྱ་གར་ལ་སྡོད་དུས་ངའི་མིང་ལ་མ་ཧ་པཎ་ཊི་ཏ་དགེ་འདུན་ཆོས་འཕེལ་ཞེས་ང་ལ་པཎ་ཊི་ཏ་མིང་ཡོད་པ་རེད། རྗེས་དེ་ལ་སྐྱེས་དམན་ཞིག་གིས་ང་ལ་འདི་ལྟར་ཆ་ཚང་སློབ་དགོས་ན་དེ་ཐབས་སྐྱོ་བོ་རེད། དེའི་རྐྱེན་གྱིས་ངས་མ་ཉན། ག་དུས་ཡིན་ན་ཆང་ས་མ་བརྒྱབས་པའི་སྔོན་དེ་ལ་འདོད་ཕྱོགས་དེ་ཆ་ཚང་བཤད་ན་འགྲིག་གི་རེད། ཆང་ས་བརྒྱབས་ཚར་ནས་གཅིག་གིས་གཅིག་ལ་བསྟུན་དགོས་པ་རེད། སྐྱེས་པས་བུད་མེད་ལ་བསྟུན། བུད་མེད་ཀྱིས་སྐྱེས་པ་ལ་བསྟུན་ན་མ་གཏོགས་སྣང་བ་གང་དྲན་བྱས་ན་དེ་མ་རབས་ཀྱི་ལས་ཀ་རེད། ངས་ཏྲེ་ཐུང་གི་བུ་མོ་དེ་ཡག་པོ་ཡོད་མེད་ཤེས་གིན་རེད། ངའི་སྐད་ཆ་དེའི་ནང་ན་སྐྱག་རྫུན་རྩ་བ་ནས་མེད། ང་མང་པོ་དེ་འདྲས་བཤད་ནའང་ངས་མ་བྱས་པ། ཁྱོས་བཤད་པའི་ཆོས་སྒྲོན། ཚེ་བརྟན་གཡུ་སྒྲོན་རྐུབ་ཆེན་པོ་དེ་ཚོའི་གདོང་ལ་བལྟ་དགོས་པའི་རྒྱུ་མཚན་ག་རེ་རེད། ཁོ་ཚོ་མཉམ་དུ་བསྡད་ན་ང་ལ་རང་དབང་ཆ་ཚང་ཡོད་པ་རེད། ང་དེ་རིང་དམར་ཧྲེངས་བྱས་ནས་འགྲོ་གི་ཡོད་ན་ཁོ་ཚོས་མ་འགྲོ་ཟེར་གི་མ་རེད། ངས་སྐད་ཆ་གང་བྱུང་མང་བྱུང་བཤད་ནའང་ཁོ་ཚོས་ངའི་ཁ་འགོག་གི་མ་རེད། ང་ལ་རང་དབང་ཆ་ཚང་ཡོད་པ་རེད། འཇིག་རྟེན་གྱི་མིའི་བདེ་བ་ཡོད་ན་མེད་ན་མིའི་རང་དབང་ཟེར་བ་དེ་མིའི་བདེ་བ་རེད། ཁྱོད་ཚོས་མིའི་རང་དབང་ཟེར་བ་དེ་ཤེས་གིན་ཡོད་དམ། ངས་མིའི་བདེ་བ་དེ་ཤེས་གིན་ཡོད་པ་རེད། ཅེས་ཉིན་གཅིག་ལ་དགེ་འདུན་ཆོས་འཕེལ་གྱིས་སྐད་ཆ་དེ་འདྲ་བཤད་པ་རེད།

དྲི་བ། དགེ་འདུན་ཆོས་འཕེལ་བཙོན་ཁང་ནས་མར་གློད་དེ་བཅིངས་འགྲོལ་དམག་མི་རྣམས་བོད་ནང་ཡོང་བའི་སྐོར་ལོ་རྒྱུས་ཅུང་ཙམ་བཤད་ཐུབ་བམ།

ལན། ད་ངས་བང་རིམ་བཞིན་མ་ཡིན་པར་ག་ས་གར་ནས་འཐར་རེ་འཐོར་རེ་བྱས་ནས་བཤད་གི་ཡིན། བང་རིམ་བཞིན་ངའི་བསམ་བློའི་ནང་ལ་འཁོར་གིན་མི་འདུག ཉིན་ཞིག་ཁོས་ང་ཚོའི་པོ་ཏ་ལའི་མདུན་གྱི་རྡོ་རིང་འདི་རྩ་ཆེན་པོ་ཞེ་བོ་ཞིག་རེད། རྡོ་རིང་འདི་བོད་ལ་བཀའ་དྲིན་ཆེན་པོ་རེད། རྡོ་རིང་འདིའི་མཐའ་ལ་གསེར་གྱི་མཐའ་སྒྲོམ་ཞིག་སྤྲད་པ་ཡིན་ནའང་ད་དུང་རྡོ་རིང་འདིའི་བཀའ་དྲིན་མཇལ་ཐུབ་གི་མ་རེད། བོད་པས་རྩ་བ་ནས་ཤེས་གིན་ཡོད་པ་མ་རེད། རྡོ་རིང་སྒང་ལ་ཡི་གེ་ཡོད་པ་དེར་ཁ་ཤས་ཀྱིས་རྡོ་གཞུས་ནས་བཅགས་པ་སོགས་ཚང་མ་ཀོང་ཀོང་བཟོས་ཡོད་པ་རེད་ཟེར། ཀོང་ཀོང་བཟོས་ཡོད་པ་ང་ཚོས་ཧ་གོ་གི དེང་སང་རྡོ་རིང་ལ་ལྕགས་རི་བསྐོར་ཚར་བ་རེད། སྔོན་མ་ལྕགས་རི་ཡོད་པ་མ་རེད། ད་བྱིས་པ་བསམ་མེད་དེ་འདྲ་ཡིན་རྒྱུ་རེད་རྡོ་འཁྱེར་སོང་ནས་ཡི་གེ་ཡོད་སར་རྟགས་བྱས་ནས་ལྕགས་ཁྱེར་ཤོག མར་ཁྱེར་ཤོག་ཅེས་རྡོ་རིང་རྦད་དེ་ཀོང་ཀོང་དེ་འདྲ་ཞིག་བཟོས་ཡོད་པ་རེད། ཡི་གེ་གནད་ཆེན་པོ་མང་པོ་ཞིག་དེ་ལྟར་བསུབས་བཞག་འདུག རྡོ་རིང་འདི་དངོས་གནས་བོད་ལ་བཀའ་དྲིན་ཆེན་པོ་རེད། རྡོ་རིང་འདིའི་དྲིན་ལན་འདིའི་མཐའ་ལ་གསེར་གྱི་མཐའ་སྒྲོམ་ཞིག་སྤྲད་པ་ཡིན་ནའང་ད་དུང་རྡོ་རིང་འདིའི་བཀའ་དྲིན་མཇལ་ཐུབ་གི་མ་རེད། དཔེར་ན། ང་ཚོའི་བོད་འདི་དེང་སང་རྒྱ་ཅོག་གྲུ་བཞི་ཞིག་གི་སྒང་ལ་ཡོད་པའི་ཚལ་སཉེར་མ་གང་ནང་བཞིན་རེད། རྒྱ་ཅོག་གྲུ་བཞི་ཞིག་གི་སྒང་ལ་ཚལ་སཉེར་མ་གང་བཞག་པ་དང་དེའི་ཕྱོགས་བཞི་ལ་ཐུར་མ་བཞི་བཞག་ནས་ད་ཐུར་མ་རྣམས་ལག་ལ་བཟུང་ནས་ཚལ་དེ་བཟའ་དགོས་བསམ་ནས་བསྐོར་བསྡད་ཡོད་པ་རེད། བོད་འདི་འདི་ལྟར་གནས་གིན་མ་རེད། ག་རེ་བྱས་ནའང་ཅིག་གིས་ཐུར་མ་རྒྱག་གི་རེད། ངས་བལྟས་ན་ཕལ་ཆེར་རྒྱ་མིས་རྒྱག་གི་རེད། དེའི་སྐབས་ལ་རྒྱ་མི་ཡོད་པ་མ་རེད། རྒྱ་མིའི་སྐོར་རྣ ་བའི་ནང་རྒྱ་མིའི་ནང་ལོགས་ན་ལངས་གིན་ཡོད་པ་རེད་ཅེས་པའི་གཏམ་ཙམ་ལས་ཡོད་པ་མ་རེད། ཕལ་ཆེར་ཕྱོགས་བཞི་བོའི་ནང་ནས་རྒྱ་མིས་ཐུར་མ་རྒྱག་གི་རེད། དེ་ནས་མའོ་ཙེ་ཏུང་ཟེར་བ་དེའི་སར་ཨ་མི་རི་ཁའི་གསར་འགྱུར་འགོད་མཁན་ཞིག་ཕྱིན་འདུག དེ་ཚོས་ཕར་ཚུར་སྐད་ཆ་བཤད་སྟངས་དང་ག་རེ་ཡིན་ན་འདྲ། དེང་སང་མའོ་ཙེ་ཏུང་ཟེར་བ་དེ་ཞེ་དྲག་གི་མི་ཐབས་མཁས་པོ་དང་གཡོ་སྒྱུ་ཆེན་པོ། རྦད་དེ་མི་གཉོམ་ཆུང་དང་སྐྱོ་བོའི་སྤྱོད་པ་དང་མཐུན་པའི་མི་དེ་འདྲ་ཞིག་ཡིན་པའི་རྣམ་པ་བསྟན་ཡོང་གི་ཡོད་པ་རེད། ད་ཆར་ཁོ་རང་གི་གོས་ལའང་ལྷན་པ་བརྒྱབས་ནས་གྱོན་འདུག ཞྭ་མོ་རྩེ་ཞྭ་རལ་བསྡད་པ་ཞིག་གྱོན་འདུག དེའི་ཁོའི་ཕྱིའི་རྣམ་པ་མ་རེད། ཕྱིའི་རྣམ་པ་འདི་འདྲ་ཞིག་རེད། གཞུག་ལ་ཁོ་རང་གིས་དམག་བརྒྱབས་ནས་རྒྱལ་ཁ་ཐོབ་པ་ཞིག་ཡིན་ན་ཏན་ཏན་ཁོ་རང་གི་སྤྱོད་པ་དེར་འགྱུར་ལྡོག་འགྲོ་གི་རེད། རྒྱ་མི་ཟེར་བ་དེ་རང་བཞིན་གྱིས་ཁོ་ཉམས་ཅན་བྱེད་པ་ལ་ཞེ་བོ་ཞིག་ཡོད་པ་རེད། དཔོན་ཉམས་འཛིན་པ་ལ་དགའ་བོ་ཞེ་བོ་ཞིག་ཡོད་པ་རེད། དེ་རིང་སང་ཉིན་མའོ་ཙེ་ཏུང་ཁོའི་རྣམ་འགྱུར་དེ་ཁོའི་ཕྱིའི་རྣམ་པ་ཙམ་རེད་མ་གཏོགས་ཁོ་ལ་རྒྱལ་ཁ་ཆ་ཚང་ཐོབ་པའི་རྗེས་ལ་ཁོས་དེ་ལྟར་བྱེད་གི་མ་རེད། ཏན་ཏན་ཁོའི་སྤྱོད་པ་ལམ་སེང་འགྱུར་འགྲོ་གི་རེད། ང་ཚོ་བོད་སྡེ་བ་གཞུང་ཟེར་བ་འདི་དེ་རིང་སང་ཉིན་གནས་ཚུལ་དང་། དེ་རིང་སང་ཉིན་གྱི་དུས་ཡུན་འདིར་སྡེ་བ་གཞུང་ཟེར་བ་འདིར་གནས་ཚུལ་དང་ནུས་པ་གང་འདྲ་ཞིག་ཡོད་པ་རེད་ཟེར་ན། ནུས་པ་ཡོད་པ་མ་རེད། ནུས་པ་མེད་པའི་རྒྱུ་མཚན་གང་ཡིན་ཟེར་ན། ཏྰ་ལའི་བླ་མ་བྱིས་པ་ཆུང་ཆུང་ཞིག་ལས་ཡོད་པ་མ་རེད། དེའི་མཐའ་དང་ཕྱི་རོལ་ཏུ་མི་ཆེན་པོ་དག་གིས་བསྐོར་བསྡད་ཡོད་པ་རེད། ཏྰ་ལའི་བླ་མ་རྦད་དེ་ར་བ་མང་པོ་ཞིག་གི་ནང་ལ་བཅུག་ནས་བསྐོར་བསྡད་ཡོད་པ་རེད། ཁོ་རང་བྱིས་པ་ཡིན་སྐབས་གང་ཡང་ཤེས་གིན་མ་རེད། དེའི་འོག་ན་ཧ་ལས་པའི་མི་བློ་རིག་ཊོད་པོ། མི་ཤེས་རབ་ཅན། མི་དེ་འདྲའི་རིགས་འོག་ན་ཡོད་པ་རེད་དེ། དེའི་གྲས་དེ་ཡར་འགྲོ་བཅུག་གི་མ་རེད། ཏྰ་ལའི་བླ་མའི་མཐའ་བསྐོར་གི་མི་དེ་དག་ལག་གདངས་འཆིངས་ནས་འོག་གི་དེ་དག་ཁྱོན་ནས་ཡར་ཤོར་འཇུག་གི་མ་རེད། གནས་ཚུལ་འདི་འགྱུར་ལྡོག་མ་བཏང་ན་བོད་ཟེར་བ་འདི་ཕལ་ཆེར་ལོ་བཞི་ལྔ་ལ་མ་གཏོགས་གནས་གིན་མ་རེད། ཉིན་གཅིག་ཁོས་ལ་དེ་འདྲ་ཞིག་ཀྱང་བཤད་མྱོང་།

དྲི་བ། དགེ་འདུན་ཆོས་འཕེལ་བཙོན་ཁང་ནང་ནས་མར་གློད་ནས་ཆང་མང་པོ་འཐུང་བ་དང་ཐ་མག་མང་པོ་འཐེན་པ་འདིའི་ཐད་རྒན་ལགས་ཀྱིས་ག་རེ་བསམ་གྱིན་འདུག

ལན། དེ་དགེ་འདུན་ཆོས་འཕེལ་ཁོ་རང་གིས་ཟེར་བ་ལ་ང་བཟུང་བ་དེ་སྡེ་བ་གཞུང་གིས་བཟུང་པ་རེད། སྡེ་བ་གཞུང་གི་ནང་ལ་སྐབས་དེར་ སྐབས་བྱོལ་ ཟེར་བ་ཞིག་ཡོད་པ་རེད། དབྱིན་ཇིས་བོད་གཞུང་བཀའ་ཤག་ལ་ཡི་གེ་བཏང་བ་དེ་ཕལ་ཆེར་སྐབས་བྱོལ་བཀའ་བློན་ཡིན་པའི་སྐབས་དེ་ཡིན་པ་འདྲ། ཡིན་གཅིག་མིན་གཉིས་ང་འཛིན་མཁན་དེ་སྐབས་བྱོལ་ཡིན་ཟེར། སྐབས་བྱོལ་གྱིས་དེ་དུས་སྐད་ཆ་མང་པོ་དེ་སྣོག་སྣོག་ནས་ང་བཙོན་ཁང་ནང་བཅུག་པ་རེད། ང་བཙོན་ཁང་ནང་བཅུག་པའི་སྐབས་ལ་སྐབས་བྱོལ་སོགས་ཁོ་ཚོ་མི་རེ་གཉིས་ཤིག་མ་གཏོགས། འོག་གི་མི་ཚོས་ཞེ་དྲག་ཞེ་དྲག་ཧ་གོ་ཡོད་པ་མ་རེད། ང་བཟུང་བ་སྡེ་བ་གཞུང་གིས་བཟུང་བ་རེད། དེ་ནས་ངའི་སེམས་སྐྱིད་པོ་མེད་པ་ཆགས་ནས་ཆང་འཐུང་། ཐ་མག་འཐེན། གང་འདྲ་བྱས་ནས་ཤི་ན་ཤི། གང་ལྟར་ཤི་ནི་ཤི་དགོས་པ་རེད། ཕལ་ཆེར་གསོད་ནི་གསོད་གི་རེད་བསམས་པའི་བསམ་བློ་དེ་འདྲ་ཞིག་ཁྱེར་ནས་ང་སྨྱོན་པ་ཆགས་པ་རེད་ཟེར། ཉིན་གཅིག་སྟོད་ལུང་བྲག་རྒྱ་ཐོག་སྒང་ལ་ཕྱག་མཛོད་ཆེན་མོས་སྡེ་བ་གཞུང་གི་སྐུ་དྲག་ཚང་མར་ཐུགས་སྤྲོའི་ཞལ་ལག་ཅིག་བཏང་བ་རེད། དེའི་སྐབས་སུ་དགེ་འདུན་ཆོས་འཕེལ་སྐད་བཏང་བ་རེད། སྐུ་དྲག་དེ་ཚོ་གོ་རིམ་བཞིན་སྐུ་དྲག་ཆེན་པོ་ཚོ་གོང་དང་སྐུ་དྲག་འབྲིང་བ་དེའི་འོག་དང་། མར་ཡོང་གིན་ཡོང་གིན་སྐུ་དྲག་དཀྱིལ་མ་དེ་འདྲ་མ་གཏོགས་ཡོད་པ་མ་རེད། བཀའ་ཤག་ལབ་ན་སྐུ་དྲག་གི་ནང་ནས་མཐོ་ཤོས་དེ་རེད། དགེ་འདུན་ཆོས་འཕེལ་བཀའ་ཤག་གི་དཀྱིལ་དེར་བསྡད་ཡོད་པ་རེད། དགེ་འདུན་ཆོས་འཕེལ་ལ་མགྲོན་བརྡ་བཏང་ནས་ཤོག་ཅེས་ལབ་པ་དང་། དགེ་འདུན་ཆོས་འཕེལ་གྱིས་ང་ཡོང་གིན་ཡིན་ཞེས་ཕྱུ་བ་སོགས་གོན་པ་དང་། ཚེ་བརྟན་གཡུ་སྒྲོན་ལ་དེ་རིང་ད་འགྲོ། དེ་རིང་སྡེ་བ་གཞུང་གི་སྟོན་མོ་རེད། དེ་རིང་ཟ་རྒྱུ་ཡོད་པ་རེད། འགྲོ་ཞེས་ལབ་པར། ཚེ་བརྟན་གཡུ་སྒྲོན་གྱིས་ཨ་མ། ཨ་མ། ང་ངོ་ཚ་གི ང་འགྲོ་གི་མིན་ཞེས་ལབ་པར། དགེ་འདུན་ཆོས་འཕེལ་གྱིས་ངོ་ག་རེ་བྱས་ནས་ཚ་དགོས་པ་རེད། སྟོན་མོར་ཡིན་གཅིག་མིན་གཅིག་འགྲོ་དགོས་ནི་རེད། ངས་ཁྱོད་ཁྲིད་ཆོག ང་སྐད་བཏང་ན་ཁྱོད་ཡིན་གཅིག་མིན་གཅིག་ངས་རོགས་པར་འཁྲིད་དགོས་པ་རེད་ཅེས་ཚེ་བརྟན་གཡུ་སྒྲོན་ཁྲིད་པ་རེད། སྟོན་མོ་དེ་མིས་ཁེངས་བསྡད་འདུག དགེ་འདུན་ཆོས་འཕེལ་འདི་ལྟར་ཡར་ཡོང་དུས་བར་མཚམས་ཤིག་ནས་ཚེ་བརྟན་གཡུ་སྒྲོན་བཀག་ནས། དེ་ལ་གོ་རིམ་ཡོད་པ་རེད། ཚེ་བརྟན་གཡུ་སྒྲོན་བུ་མ་རེད། སྐུ་ལྕམ་སྙེ་ལགས། སྐུ་ལྕམ་སྙེ་ལགས་ཁྱེད་རང་འདིར་བཞུགས་རོགས་ཞེས་དེར་རྐུབ་སྟེགས་ཤིག་བཞག་ནས་བསྡད་དུ་བཅུག་པ་རེད། དགེ་འདུན་ཆོས་འཕེལ་གྱིས་ཕྱི་མིག་མ་བལྟས་པར་ཕྱིན་འདུག ཁོའི་རྗེས་ལ་ཚེ་བརྟན་གཡུ་སྒྲོན་གཡུ་སྒྲོན་ཡོད་བསམ་ནས་ཁོ་རང་བཀའ་ཤག་གི་དཀྱིལ་དེར་བསྡད་པ་རེད། བཀའ་དེར་བཀའ་ཤག་གི་མི་བཞི་དང་། དེ་ནས་ཇ་སག་ཟེར་བ་འདྲ་བོ། མཐོ་རི་མཐོ་སེ་དག་དེར་ཡོད་པ་རེད་དེའི་འཁྲིས་ལ་དགེ་འདུན་ཆོས་འཕེལ་བཞག་པ་རེད། དེ་ནས་ཁ་ལག་བཏང་བ་རེད། དགེ་འདུན་ཆོས་འཕེལ་གྱིས་ཚེ་བརྟན་གཡུ་སྒྲོན་ཁོའི་འཁྲིས་ལ་ཡོད་བསམས་ནས་མོ་འོག་ནས་བཀག་འགོག་བྱས་པ་དེའི་སྐོར་སྣང་ངོར་བྱུང་ཡོད་པ་མ་རེད། ད་ཞལ་ལག་བཏང་བའི་སྒང་ལ་ཞལ་ལག་སྔ་ཚལ་ཡིན་ན། ཤ་ཡིན་ན་གང་ལྟར་ཞིམ་པོ་འདྲ་ཞིག་ཡོད་པ་འདྲ། ཞིམ་པོ་དེ་དགེ་འདུན་ཆོས་འཕེལ་གྱིས་འདི་ལྟར་བཟས་ཏེ། ཚོད་ཚོད་ཅིག་ལ་ཁོས་ཚེ་བརྟན་གཡུ་སྒྲོན་ལགས། ཝ་ཡེ། ཚེ་བརྟན་གཡུ་སྒྲོན། ཚེ་བརྟན་གཡུ་སྒྲོན། ཚལ་འདི་ཞིམ་པོ་འདུག ཚལ་འདི་ཞིམ་པོ་འདུག་ཅེས་བལྟ་བའི་སྒང་ལ་ཚེ་བརྟན་གཡུ་སྒྲོན་ཡོད་པ་མ་རེད། དེ་ནས་སྐད་བརྒྱབས་ནས། ཨོ་ཙི། ཚེ་བརྟན་གཡུ་སྒྲོན་མི་འདུག ཚེ་བརྟན་གཡུ་སྒྲོན་གང་ལ་ཕྱིན་སོང་། མོ་མགྱོགས་པོ་འདིར་ཤོག་ལོབ་དང་། མགྱོགས་པོ་ཤོག མགྱོགས་པོ་ཤོག་དང་འདི་ཚལ་ཞིམ་པོ་འདུག འདི་ཞལ་ལག་ཞིམ་པོ་རེད་ཅེས་ལབ་པར། ཕྱག་མཛོད་ཆེན་མོ་ཡིས་དགེ་འདུན་ཆོས་འཕེལ་ལགས། སྐུ་ལྕམ་སྙེ་ལགས་མ་གིར་བཞུགས་འདུག་ཅེས་ལབ་པར། མིན། མིན། མོ་འདིར་ཁྲིད་ཤོག ཞལ་ལག་འདིར་ཞིམ་པོ་འདུག་ཅེས་མི་མང་པོ་དེ་འདྲ་ཡོད་ས་ནས་དེ་ལྟར་ལབ་པ་རེད། དེ་ནས་ཚང་མས་ལགས་རེད། ཁྲིད་ཤོག སྐུ་ལྕམ་སྙེ་ལགས་ཡར་གདན་འདྲེན་ཞུས་ཤིག ཡར་གདན་འདྲེན་ཞུས་ཞེས་མོ་ཡར་ཁྲིད་ཡོང་ནས་དགེ་འདུན་ཆོས་འཕེལ་གྱི་འཁྲིས་ལ་བཞག་པ་རེད། ཁོ་གཉིས་ཀྱི་ཁ་ཐུག་ན་ཡོད་པ་མི་ཆེན་པོ་རྐྱང་རྐྱང་རེད། ཁོ་རང་གིས་སྐུ་དྲག་ཆེན་པོ་དེ་འདྲ་ཡོད་པ་ཕལ་ཆེར་སྣང་ངོས་ཤར་གྱི་མེད་པ་འདྲ། ཚལ་འདྲ་ཡོད་ན་སཉེར་མའི་ནང་བླུགས་ནས་ཚེ་བརྟན་གཡུ་སྒྲོན་ལ་འདི་ཞིམ་པོ་འདུག དེ་ཞིམ་པོ་འདུག་ཅེས་ཁོ་རང་ལ་ཁོ་རང་གི་ཚེ་བརྟན་གཡུ་སྒྲོན་མ་གཏོགས་ཉིན་དེར་མི་གཞན་པ་གཅིག་ཀྱང་མཐོང་གི་མི་འདུག དེ་དངོས་གནས་ཡ་མཚན་ཞིག་རེད་བསམ་གི དེ་སྤྱོད་པ་རེད། ཁོ་རང་གིས་མི་དེ་ཚོར་མིའི་འདུ་ཤེས་ཤིག་མཐོང་གི་མེད་པ་འདྲ། ཡང་མིན་ན་ཁོ་རང་རྦད་དེ་མིའི་འདུ་ཤེས་ཤིག་མེད་པ་དང་། ང་ཚོ་བྱིས་པ་ཚོའི་ནང་ལ་འགྲོ་དུས་བྱིས་པ་ཚོ་མིའི་གྲངས་ཀ་ནང་ལ་གཏོང་གི་མ་རེད། དེ་འདྲ་ཞིག་ཡིན་པའམ། ཡང་ན་ཁོ་རང་གི་སེམས་ཀྱི་རྟོགས་པ་དེ་ཞེ་དྲག་གི་མཐོན་པོར་སླེབས་འདུག ང་ཟེར་བ་དེ་ཁྱོན་ནས་མི་འདུག ང་ངོ་ཚ་གི་འདུག་ཟེར་བ་འདྲ་བོ། ང་ལ་མི་ཡིས་ཅིག་བཤད་ཨེ་ཡོང་ཟེར་བ་འདྲ་བོ་སྣང་བ་ཁོ་རང་བཞག་གི་མི་འདུག ཁོའི་ཚེ་བརྟན་གཡུ་སྒྲོན་ཟེར་བ་དེར་རྣམ་པ་ཞིག་ཡོད་ན་ཡིན་རུང་། མདོག་ཉེས་པོ་ཞེ་བོ་ཞིག་ཡོད་པ་རེད། དེ་ཡར་ཤོག་ཅེས་ཁོ་རང་གི་འཁྲིས་དེ་ལ་བཞག་པ་རེད། དེ་དངོས་གནས་ཡ་མཚན་ཞིག་རེད་བསམས་ནས་ངས་རྗེས་རྗེས་དེ་ལ་མི་ཚོར་ཁོའི་འདུ་ཤེས་འདྲ་བོ་དེ་བཤད་སྐབས་དེ་དངོས་གནས་སྤྱོད་པ་ཡ་མཚན་རེད་ཟེར། མི་སུ་འདྲ་ཞིག་ཡིན་ནའང་མི་ཆེན་པོའི་མདུན་ལ་འགྲོ་དུས་འཁུམ་འགྲོ་བ་རེད། མི་ཚང་མ་དཔའ་འདྲ་བོ་ཞུམ་ནས་མི་ཆེན་པོ་ཆེན་པོའི་མདུན་ལ་འགྲོ་དུས་ཙམ་ལ་དཔའ་འདྲ་བོ་ཞུམ་ནས་རྣམ་འགྱུར་སྟོན་གི་རེད། དགེ་འདུན་ཆོས་འཕེལ་དཔའ་ཞུམ་པ་ཕར་ཞོག དེའི་རིགས་དེ་ཚོ་ཁོར་མིའི་གྲངས་ཀའི་ནང་མི་འདུག ཁོའི་སྤྱོད་པ་དེ་འདྲ་ཞིག་རེད། དེ་དངོས་གནས་ཡ་མཚན་པོ་ཞིག་རེད། ཁོ་རང་རྦད་དེ་དུས་རྒྱུན་དུ་མི་ཆེན་པོ་ང་ཡིན་ཟེར་མཁན་ཞིག་ཡོང་ནའང་རྩ་བ་ནས་ཁ་གྲགས་གི་མ་རེད། ཐ་མག་ལ་མེ་ཁ་འདྲ་གསོས། བསམ་བློ་འདྲ་ཞིག་བཏང་ནས་རྩ་བ་ནས་ཁ་གྲགས་གི་མ་རེད། མི་གཉོམ་ཆུང་དང་སྤྲང་པོ་དེ་འདྲ་ཞིག་ཡོང་ན་ཕལ་ཆེར་དེ་དང་ཁོའི་ལྟ་བ་དང་སྤྱོད་པ་གཅིག་པ་ཡིན་སྐབས་ཁོ་རང་གི་ནང་ཚང་འདྲ་བོ་བྱས་ནས། ཟ་རྒྱུ་འཐུང་རྒྱུ་ཡོད་ན་སྤྲད། ཁ་བརྡ་གློད། སྐད་ཆ་འདྲ་མི་འདྲ། སྤྱོད་པ་འདྲ་མི་འདྲ། ད་ཁོ་རང་འཁྲབ་གིན་རེད། ཁོའི་སྤྱོད་པ་དེ་འདྲ་ཞིག་རེད། དགེ་འདུན་ཆོས་འཕེལ་དེའི་ཉིན་མོར་གནས་ཚུལ་དེ་ངོ་མ་ཡ་མཚན་པོ་ཞིག་རེད། སྡེ་བ་གཞུང་ལ་ཡོད་ན་མེད་ན་དག་དེར་ཡོད་པ་རེད། དེའི་འཁྲིས་ལ་ཁོ་རང་གིས་དགའ་བོ་བྱེད་ས་ཁོ་རང་གི་ཨ་ལྕག་དེ་མ་གཏོགས་བཤད་རྒྱུ་ཡོད་པ་མ་རེད། གཞན་དེ་ཚོ་ཁོས་མིའི་གྲངས་ཀའི་ནང་མ་བཞག་པ་རེད། དེ་དངོས་གནས་ཡ་མཚན་ཞིག་རེད།

དྲི་བ། དགེ་འདུན་ཆོས་འཕེལ་གྱིས་ཁོའི་སློབ་མ་དང་གཞན་མི་འདྲ་ཐུག་འཕྲད་ལ་ཡོང་དུས། སྟོན་པའི་སྐུ་ཞིག་ཡོད་པ་དེར་ཐ་མག་གི་མེ་བཙུགས་པ་སོགས་བྱེད་གི་རེད་ཟེར། དེ་རྒན་ལགས་ཀྱིས་ཤེས་སམ།

ལན། དེ་ཡོད་པ་རེད། དགེ་འདུན་ཆོས་འཕེལ་རྒྱ་གར་ནས་ཚུར་སླེབས་ཏེ། དེ་དུས་དགེ་འདུན་ཆོས་འཕེལ་བཙོན་ཁང་ནང་ལ་ཕྱིན་ཡོད་པ་མ་རེད། ད་ཚང་མས་དགེ་འདུན་ཆོས་འཕེལ་སྔོན་མ་འབྲས་སྤུངས་ནས་དཔེ་ཆའི་ཐད་སྐད་གྲགས་ཆེན་པོ་རེད། རྒྱ་གར་ནས་ཚུར་སླེབས་དུས་དགེ་འདུན་ཆོས་འཕེལ་གྱི་ལྟ་བ་ལོག་འདུག་ཟེར། དགེ་འདུན་ཆོས་འཕེལ་ཆོས་ལ་དད་པ་མི་འདུག ཁོ་ཚོའི་འཛིན་གྲྭ་ནང་གི་དགེ་བཤེས་རྒྱལ་རོང་ སྐྱོལ་དཔོན་ ཟེར་བ་འདྲ་བོ། ཚེ་ཁང་བླ་མ་ ཟེར་བ་འདྲ་བོ། མི་ཉག་ སྐྱོལ་དཔོན་ ཟེར་བ་འདྲ་བོ་དེ་འདྲའི་དགེ་བཤེས་མང་པོ་ཞིག་ཡོད་པ་རེད། ཁོ་ཚོ་དགེ་འདུན་ཆོས་འཕེལ་གྱི་ཉམས་ཚོད་ལེན་དུ་ཡོང་བ་རེད། དགེ་འདུན་ཆོས་འཕེལ་སྐབས་དེར་དེང་སྐབས་ཀྱི་ ཁྲོམ་གཟིགས་ཁང་ གི་འཁྲིས་དེར་ ཨ་མདོ ་སྤེན་པ་ཟེར་བ་ཞིག་ཡོད་པ་རེད། དེང་སང་ཁང་པ་དེ་བཤིག་ཚར་བ་རེད། དགེ་འདུན་ཆོས་འཕེལ་ཨ་མདོ་སྤེན་པའི་ནང་ཡོད་པ་རེད། ཁོ་ཚོས་སྐབས་ཤིག་དེ་ཧ་གོ་ནས། དེ་དུས་ཁོ་ཚོ་འབྲས་སྤུངས་ཀྱི་དགེ་བཤེས་ཡོད་ན་མེད་ན་དག་རེད། རྒྱལ་རོང་སྐྱོལ་དཔོན། ཚེ་ཁང་བླ་མ། མི་ཉག་སྐྱོལ་དཔོན། ལྷ་ས་སྨན་ཁང་ནང་ན་རྩིས་པའི་རྒན་ལགས་ཟེར་བ་ཞིག་ཡོད་པ་རེད། ཁོ་ལ་རིག་གཞུང་ཕྱོགས་ནས་ཞེ་དྲག་གི་ཡོད་པ་རེད། ཁོ་ཚོ་མི་བཞི་དེ་དགེ་འདུན་ཆོས་འཕེལ་ལ་ཉམས་ཚོད་ལེན་དུ་ཕྱིན་པ་རེད། དགེ་འདུན་ཆོས་འཕེལ་ལྟ་བ་ལོག་འདུག་ཟེར། ང་ཚོ་ཕྱིན་ནས་སྐད་ཆ་འདྲ་བཤད་ན་ལྟ་བ་ལོག་ཡོད་མེད་ཅུང་ཙམ་ཧ་གོ་གི་རེད་ཅེས་ཕྱིན་པ་རེད། དེ་དུས་ཟླ་བ་བཞི་བའི་ནང་རེད། ལོ་དེར་ཆར་བ་ཁྱོན་ནས་མ་བཏང་བར་ཐན་པ་བྱུང་། ལྷ་སའི་ནང་གི་ཆུ་མིག་ཡོད་ཚད་ཚང་མའི་འགྲམ་ལ་གྲྭ་བ་བཞི་ལྔ་རེ་ཕྱིན་ནས་ཆར་འབེབ་བྱེད་ཀྱི་ཡོད་པ་རེད། དེ་འདྲའི་སྐབས་ལ་ཁོ་ཚོ་ཕྱིན་པ་རེད། ཁོ་ཚོ་ ཨ་མདོ་ཁང་ཚན ་གྱི་རྒྱལ་སྒོ་ནས་ཡར་འཛུལ་སྐབས་དགེ་འདུན་ཆོས་འཕེལ་ཐོག་ག་ནས་མར་བབས་ཡོང་གི་ཟེར། ཁོ་ཚོ་མཐོང་བ་དང་ཁ་ཅི་ཡང་མི་གྲགས་པར་བལྟས་ནས་བསཉཉོད་གི ཡ་ད་ཁོ་ཚོ་ངའི་སར་ཡོང་བ་རེད་བསམས་པ་འདྲ། དེ་ནས་ནང་ལ་ཕྱིན་སོང་ཟེར། རྗེས་དེ་ལ་ཁོ་ཚོ་ཁོའི་ནང་ལ་ཕྱིན་པ་ཡིན། ནང་ལ་ཕྱིན་པའི་སྒང་ལ་ཁང་བའི་ནང་ལ་གདན་ཞིག་བཏིངས་འདུག དེ་མ་གཏོགས་ཅི་ཡང་མི་འདུག་ཟེར། གོང་དེ་ལ་དཔེ་སྒམ་ཞིག་བཞག་འདུག དཔེ་སྒམ་དེའི་ཐོག་ལ་གསེར་ཟངས་ཀྱིས་བཞེངས་པའི་སྟོན་པའི་སྐུ་ཞིག་དང་དེབ་ཅིག་བཞག་འདུག་ཟེར། ཁོ་རང་ལམ་སེང་ཕྱིན་དེ་དེར་བསཉཉད་སོང་། ཁོ་ཚོར་ཡ་མེད་བྱས་ཏེ་ཁ་ཡང་གྲགས་གི་མི་འདུག་ཟེར། ད་ཁོ་རང་ཚོ་ཁ་ཤས་རྐུབ་སྟེགས་སྒང་དང་ཁ་ཤས་ས་གདན་གྱི་སྒང་ལ་བསྡད་པ་ཡིན་ཟེར། ཁོ་ཚོས་དགེ་འདུན་ཆོས་འཕེལ་ལ་ཕར་སྐད་ཆ་མ་བཤད་པ་དང་། དགེ་འདུན་ཆོས་འཕེལ་གྱིས་ཚུར་སྐད་ཆ་མ་བཤད་པར་དགེ་འདུན་ཆོས་འཕེལ་གྱིས་ལམ་སེང་ཐ་མག་ཅིག་ལ་མེ་སྒྲོན་ཞིང་། ཁ་ཁྱོན་ནས་གྲགས་གི་མི་འདུག་ཟེར། ད་ཁོ་ཚོ་ཚང་མ་ཁ་རོག་གེར་བསྡད་པ་འདྲ། བར་མཚམས་ཤིག་ལ་དགེ་འདུན་ཆོས་འཕེལ་གྱིས། ཨ་ཨ། ད་ལོ་ཐན་པ་ཡོང་ནས་གནམ་འདི་མེ་བསྲེག་ཐེབས་སོང་ང་ཟེར། དེ་ནས་ཁོ་ཚོས་དེ་ག་རང་རེད། ད་ལོ་ཐན་པ་ཞེ་བོ་ཞིག་བསྟན་སོང་། ད་ལོའི་གནམ་གཤིས་འདི་ག་རེ་ཡིན་ནམ། ཚ་བ་འདི་འདྲ་དང་ཐན་པ་འདི་འདྲ་བསྟན་མ་མྱོང་ཞེས་ལན་སློག་པ་འདྲ། ལན་དེ་སློག་པ་དང་དགེ་འདུན་ཆོས་འཕེལ་གད་མོ་ཞིག་ཤོར་ཏེ་ལས་འབྲས་མེད་པའི་རྟགས་རེད་ཟེར། གང་ལགས་ཞེ་ན་ཐན་པ་ཐོན་པའི་སྒང་ལ་ལྷ་སའི་ཆུ་མིག་ཡོད་ཚད་པའི་སྒང་ལ་དགེ་འདུན་པ་གསུམ། བཞི། ལྔ་དང་དྲུག་ནས་ཆར་འབེབ་བྱེད་ཀྱི་ཡོད་པ་རེད། ཆར་འབེབ་ག་ཚོད་བྱས་ཀྱང་ཆབ་བ་གཏོང་གི་མི་འདུག དེ་ལས་འབྲས་མེད་པའི་རྟགས་རེད། ཆར་འབེབ་གཏོང་བ་ནི་ཆར་བ་འབབ་པའི་རྒྱུ་རེད། རྒྱུ་དེ་ལ་འབྲས་བུ་ཆར་བ་ཡིན་གཅིག་མིན་གཅིག་གཏོང་དགོས་ནི་རེད་དེ་ཆར་བ་གཏོང་གི་མི་འདུག ལས་འབྲས་མེད་པའི་རྟགས་རེད། ཁོས་དེ་ལྟར་ལབ་གིན་འདུག་ཟེར། སྐད་ཆ་དེ་ལབ་པ་དང་མི་ཉག་སྐྱོལ་དཔོན་གྱིས། ཨོ་ཙི། དགེ་འདུན་ཆོས་འཕེལ་ལགས། དེ་འདྲ་མ་གསུངས་རོགས། ལས་འབྲས་མེད་པའི་རྟགས་ལ་ཆར་བ་མ་འབབ་པ་ཡིན་རྒྱུ་མ་རེད། ཅེས་སྐད་ཆ་དེ་བཤད་སོང་ཟེར། དེ་ནས་དགེ་འདུན་ཆོས་འཕེལ་གྱིས་ཐ་མག་འཐེན་ཞོར་དུ་སྔས་མགོར་ཡོད་པའི་སྟོན་པའི་སྐུ་དེ་ལ་ཐ་མག་གི་དུ་བ་དེ་གཏོང་གི་ཟེར། དེ་ནས་མི་ཉག་སྐྱོལ་དཔོན་གྱིས་དགེ་འདུན་ཆོས་འཕེལ་ལ། ཨོ་ཙི། དགེ་འདུན་ཆོས་འཕེལ་ལགས། ཁྱོད་རང་མཁས་པ་ཆེན་པོ་ཞིག་དང་མ་འདྲ་བར། ཐ་མག་ཟེར་བ་འདི་ང་ཚོའི་ལྟོ་ཡི་ནང་གི་གཙོག་ཤོས་དེ་རེད། ཁྱོད་ཀྱི་སྔས་མགོར་བཞུགས་པ་དེ་སྟོན་པ་སངས་རྒྱས་བཅོམ་ལྡན་འདས་ཀྱི་སྣང་བརྙན་རེད། ལྟོ་ཡི་ནང་གི་གཙོག་ཤོས་དེ་ཁྱོད་རང་གིས་སྟོན་པ་བཅོམ་ལྡན་འདས་ཀྱི་སྣང་བརྙན་ལ་ཕུལ་བ་དེ་མ་འགྲིག་པ་ཞིག་རེད་ཅེས་ལབ་སོང་ཟེར། དགེ་འདུན་ཆོས་འཕེལ་ཕྱིར་གད་མོ་ཞིག་ཤོར་ཏེ། ང་སྔོན་མ་འབྲས་སྤུངས་ན་ཡོད་དུས་ཁྱོད་དང་ང་ཕལ་ཆེར་འཛིན་གྲྭ་གཅིག་པ་རེད། ང་ཚོ་འཛིན་གྲྭ་ཡར་མར་རེད་ལ། ཁྱོད་ཀྱིས་སྔོན་མ་ནས་ཅིག་ཤེས་མདོག་གིས་སྐད་ཆ་བཤད་སྲོལ་ཡོད་མོད། ཁྱོད་ཀྱིས་ཅི་ཡང་ཤེས་གིན་མེད། དེ་རིང་སང་ཉིན་ཡང་ཁྱོད་ཀྱིས་ཅི་ཡང་ཤེས་མི་འདུག ད་ཁྱོད་ཀྱིས་འབྲས་སྤུངས་ནས་མདོ་ལ་སློབ་གཉེར་བྱས་ནས་ལྷ་རམས་པའི་དམ་བཅའ་བཞག་པ་རེད། ལྷ་རམས་པའི་དམ་བཅའ་བཞག་དུས་ཨང་དང་པོ་རེད། ཁྱོད་རྒྱུད་ལ་ཕྱིན་པ་རེད། རྒྱུད་ལ་འགྲོ་དུས་ཁྱོད་ཀྱིས་སྔགས་ཀྱི་དམ་བཅའ་བཞག་པ་རེད། སྔགས་ཀྱི་དམ་བཅའ་བཞག་ནས་ཀྱང་ཁྱོད་ཨང་དང་པོ་རེད། དེ་རིང་སང་ཉིན་ཁྱོད་རྒྱུད་སྟོད་པའི་བླ་མ་དབུ་མཛད་རེད། རྒྱུད་སྟོད་པའི་བླ་མ་དབུ་མཛད་ཀྱི་རྗེས་ནས་ཁྱོད་དགའ་ལྡན་ཁྲི་བ་ལ་འགྲོ་གི་རེད། ཁྱོད་ཀྱིས་མདོ་མཐར་ཕྱིན་ནས་སྔགས་ལ་སློབ་སྦྱོང་བྱས། སྔགས་མཐར་ཕྱིན་ནས་བླ་མ་དབུ་མཛད་བྱས་པ་རེད། ཁྱོད་གང་འདྲ་བྱས་ནས་ཕྱིན་པ་ཡིན། ཁྱོད་ཀྱིས་ད་དུང་གཅིག་ཀྱང་ཤེས་གིན་མི་འདུག ངས་ཐ་མག་གི་དུ་བ་དེ་བཅོམ་ལྡན་འདས་ལ་ཕུལ་བ་དེ་ངས་སངས་རྒྱས་ལ་མཆོད་པ་ཕུལ་བ་རེད། ས་སྐྱ་པཎ་ཌི་ཏས་མཆོད་པའི་ནང་གི་མཆོག་དང་ཕུལ་དུ་བྱུང་བ་དེ་རང་ཉིད་དགའ་བའི་ལྟོ་དེ་དཀོན་མཆོག་ལ་ཕུལ་དེ་ཡིན་ཞེས་གསུངས་ཡོད་པ་རེད། ངས་ཐ་མག་དེ་སྟོན་པ་ལ་མཆོད་པར་ཕུལ་བ་ཡིན། ཐ་ན་ངས་སྟོན་པར་མཆོད་པ་ལ་ཆང་ཡང་ཕུལ་གིན་ཡོད། དེ་རིང་ང་ལ་ཆང་མི་འདུག མཚམས་མཚམས་ལ་ངས་ཆང་ཉོས་པའི་སྐབས་ལ་ངས་ཆང་རྫ་ཁོག་འདི་འདྲ་ཞིག་གི་ནང་ཉོས་ཏེ་སྟོན་པ་ཆང་གི་ནང་ལ་གཡུག་བཞག་པ་ཡིན། ངས་ཐ་མག་གི་དུ་བ་འདི་སྟོན་པ་ཐུགས་རྗེ་ཅན་ལ་མཆོད་པར་ཕུལ་བའི་སྐབས་ལ་ངའི་ངོས་ནས་སངས་རྒྱས་བཅོམ་ལྡན་འདས་ལ་མཆོད་པ་མཆོག་ཏུ་གྱུར་བ་དེ་ཕུལ་བ་རེད། སྟོན་པའི་ངོས་ནས་ཀྱང་སངས་རྒྱས་ལ་གང་སྣང་བ་ཐམས་ཅད་དག་པ་རབ་འབྱམས་པ་འབའ་ཞིག་རེད། སངས་རྒྱས་ལ་སྣང་ཚད་ཀུན་དག་པ་རབ་འབྱམས་པ་འབའ་ཞིག་རེད་མ་གཏོགས། ཐ་མག་གི་ངོ་བོ་གཙོག་པ་དེ་འདྲ་སྣང་གི་མ་རེད། ཨ། ཁྱོད་ཀྱི་མགོ་ཡི་སྐྲ་ཕུད་ནས་དམར་པོ་ཆགས་འདུག ད་དུང་ཁྱོད་ཀྱིས་གཅིག་ཀྱང་ཤེས་གིན་མི་འདུག ད་དུང་དགའ་ལྡན་ཁྲི་བར་འགྲོ་འདོད་ནས་ཁ་གདངས་ནས་བསྡད་འདུག ཁྱོད་ངོ་མི་ཚའམ་ཞེས་སྐད་ཆ་དེ་འདྲ་བྱུང་བ་ཟེར། ཐོག་མར་དགེ་འདུན་ཆོས་འཕེལ་ལྷ་སར་སླེབས་ཚར་ནས་འབྲས་སྤུངས་ཀྱི་དགེ་བཤེས་གསུམ་དགེ་འདུན་ཆོས་འཕེལ་ལ་འཚམས་འདྲི་དང་ཞོར་ལ་དགེ་འདུན་ཆོས་འཕེལ་གྱི་ཉམས་ཚོད་ལེན་པར་ཡོང་བ་རེད། དགེ་འདུན་ཆོས་འཕེལ་རྗེས་དེ་ལ་ ༡༩༥༡ ལོའི་ཟླ་བ་ ཚེས་ ༡༡ ལ་གཤེགས་པ་རེད། ཧོར་གཙང་གི་ལོ་རྒྱུས་དེའི་ནང་ལ་གསལ་བོ་རེད། ཁོའི་ན་ཚ་དེ་ཆུ་བསགས་སོང་ནས་རྦད་དེ་གཟུགས་པོ་ཚང་མ་སྐྲང་ཞིང་། སྨན་རྩིས་ཁང་གིས་སྨན་བཏང་སོང་། དེའི་སྐབས་དེར་རྒྱ་མི་ཐོག་མར་བོད་ལ་སླེབས་པའི་སྐབས་རེད། དགེ་འདུན་ཆོས་འཕེལ་ལ་དེ་དགོང་སྨན་བྱིན་ན་ཆུ་མར་འབབ་གི སང་ཉིན་ཡང་ཆུ་གསོག་གི སྨན་རྩིས་ཁང་གིས་སྨན་བཏང་བ་དེས་ཀྱང་མ་ཕན་པར། ང་དུས་རྒྱུན་དུ་དེར་འགྲོ་གི་ཡོད་རེད། ཉིན་གཅིག་ཁོས་ང་ལ་བྱམས་པ་ཁྱོད་ལ་མོ་རྒྱག་མཁན་དེ་འདྲ་ཨེ་ཡོད་ཟེར། ང་ལ་མོ་བ་ཡག་པོ་དེ་འདྲ་ཡོད་ཅེས་པར། ཁྱོད་སོང་ནས་ང་ལ་མོ་ཞིག་རྒྱོབས་དང་། ང་ལ་ཆུ་ཡི་ན་ཚ་འདིས་སྡུག་པོ་བཏང་ཐལ། ཁྱོད་ལ་མོ་བ་སུ་ཡོད་ཟེར། ཀྲེ་བོ་བཀའ་འགྱུར་རིན་པོ་ཆེ་ ངས་ངོ་ཤེས་གིན་ཡོད། ང་དེར་སོང་ནས་མོ་བརྒྱབ་ན་གང་འདྲ་ཡིན་ནམ་ཞེས་དྲིས་པར། ཨོ། ཨོ། ཁོ་ད་ལྷ་ས་ནས་མོ་བ་སྐད་གྲགས་ཆེ་ཤོས་རེད། འོ་ན་ཁྱོད་སོང་ནས་མོ་ཞིག་རྒྱག་རོགས་ཞེས་ང་དེར་མོ་རྒྱག་གི་ཕྱིན་པ་ཡིན། ང་མོ་རྒྱག་གི་འགྲོ་དུས་བཀའ་འགྱུར་རིན་པོ་ཆེ་ལ་ངས་ཆ་ཚང་ཞུས་པ་ཡིན། དགེ་འདུན་ཆོས་འཕེལ་ལ་ཆུ་བསག་ནས་ན་གིན་འདུག ད་ལྟ་ལས་སལ་བོ་དྲག་གི་མི་འདུག དེ་གང་འདྲ་ཡིན་མིན། ཚེ་སྲོག་ལ་བགེགས་དང་བར་ཆད་འདྲ་ཡོད་དང་མེད་ཅེས་ཞུས་པར། ཀྲེ་བོ་བཀའ་འགྱུར་རིན་པོ་ཆེ་ཡིས། ཨ། རེད་ལགས། རེད་ལགས། པྭ་ཥྱི་ཏ་ཆེན་པོ་དགེ་འདུན་ཆོས་འཕེལ་ལ་ངས་མོ་རྒྱབ་ནས་རེ་བ་འདྲ་ཡོང་གི་མ་རེད། དགེ་འདུན་ཆོས་འཕེལ་ལགས་ང་ལ་ཡིད་ཆེས་ཡོད་པ་མ་རེད། ངས་མོ་རྒྱབ་ནའང་དགེ་འདུན་ཆོས་འཕེལ་ང་ལ་ཡིད་ཆེས་གིན་མ་རེད་ཟེར། དེ་ཡིད་ཆེས་གིན་རེད། ཏན་ཏན་ཡིད་ཆེས་གིན་རེད། དགེ་འདུན་ཆོས་འཕེལ་ཁོ་རང་གིས་ང་སོང་ནས་མོ་ཞིག་རྒྱོབས་དང་ཅེས་ང་མོ་རྒྱག་གི་ཡོང་བ་ཡིན། སྐུ་མཁྱེན། དེ་ལ་ཅིག་རིམས་གྲོ་འདྲ་བོ་དེ་འདྲ་དང་། ཡང་ན་ཚེ་སྲོག་ལ་བགེགས་དང་བར་ཆད་འདྲ་ཡོད་དང་མེད་མོ་ཅིག་རྒྱགས་རོགས་ཞེས་བཤད་པ་དང་། དེ་ནས་མོ་བརྒྱབས་སོང་། ངའི་མོ་ལྟར་ཡིན་ན་ཚེ་སྲོག་ལ་སྐྱོན་ཆ་འདྲ་ཆེ་མི་འདུག ངའི་མོ་ཡིན་ན། ཨ་ཙི། ད་དགེ་འདུན་ཆོས་འཕེལ་ལ་ཅིག་བྱོས་ཞེས་ན་བྱེད་གི་མ་རེད། སྐྱབས་འགྲོ་བཏོན་པ་ཡིན་ན་དེ་ཕན་པོ་འདུག སྐྱབས་འགྲོ་དང་དེ་དགོང་ར་མོ་ཆེ་ཚེ་དཔག་ལྷ་ཁང་ནང་མཆོད་མེ་མཚན་ཐུབ་ཅིག་བཞག སྐྱབས་འགྲོ་འདྲ་བཏོན་པ་ཡིན་ན་དེ་ཅུང་ཕན་པ་མི་ཡོང་ངམ་ཟེར། དེ་ནས་ངས་ལན་དེ་ཁྱེར་ནས་ཡོང་དུས་དགེ་འདུན་ཆོས་འཕེལ་གྱིས་ག་རེ་ཟེར་གྱི་འདུག་ཟེར། ད་དེ་འདྲ་དེ་འདྲ་ཟེར་གི སྐྱབས་འགྲོ་ཐོན་ཟེར་གི དེ་དགོང་ར་མོ་ཆེའི་ཚོ་དཔག་མེད་ལ་མཚན་འཁྱོངས་ཕུལ་ཟེར་གི་ཅེས་ལབ་པར། ཡ་ཡ་ཞེས་ལམ་སེང་ཚེ་བརྟན་གཡུ་སྒྲོན་ལ་ཧོར་ཁང་གིས་ཁྱེར་ཡོང་བའི་མར་དེ་ཅིག་ཅིག་ལ་ཡོད། དེའི་སྒང་ནས་མར་ཁུ་བཞུས། མཆོད་ཀོང་ཆེན་པོ་ཞིག་གི་ནང་མཆོད་མེ་མཚན་ཐུབ་ཅིག་བླུགས་ཏེ་དེ་དགོང་ཚེ་དཔག་མེད་ཀྱི་ལྷ་ཁང་ནང་ཕུལ་ཞོག་ཅེས་ལབ་སོང་། སྐབས་དེར་ང་ཚོས་ལྷ་སའི་ལུགས་སྲོལ་ལྟར་ལག་ལ་འཕྲེང་བ་རེ་བཟུང་བསྡད་ཡོད་པ་རེད། ངའི་ལག་ན་འཕྲེང་བ་ཡོད། དགེ་འདུན་ཆོས་འཕེལ་གྱིས་ཁྱོད་ཀྱི་འཕྲེང་བ་ང་ལ་གཡོར་དང་ཟེར། ག་རེ་བྱེད་གི་ཡིན་ཞེས་པར། ངས་སྐྱབས་འགྲོ་འདོན་གི་ཡིན་ཟེར། དེ་ནས་ངས་འཕྲེང་བ་ཁོའི་ལག་ལ་བཞག་ཅིང་ཁོས་སྐྱབས་འགྲོ་འདྲ་ཞིག་འདོན་གི ད་གང་ཤེས་གང་འདྲ་ཞིག་འདོན་གི་ཡོད་མེད། སྐྱབས་འགྲོ་ཕལ་ཆེར་ཚར་ལྔ་བཅུ་དྲུག་ཅུ་ཞིག་བཏོན་མེད། དེ་ནས་ང་ལ་འཕྲེང་བ་སྤྲད་དེ་ད་མི་འདོན་ཟེར། ཨོ་ཙི། ཐོན་དང་། དེ་འདྲ་ཞིག་གིས་ག་ལ་ཡོང་གི་རེད་ཅེས་པར། མ་རེད། མ་རེད། ཆོས་ཟེར་བ་དེ་མང་པོ་བྱེད་རྒྱུ་ཡོད་པ་མ་རེད། ཆོས་ལ་དཀོན་པའི་འདུ་ཤེས་ཟེར་བ། ཆོས་ཟེར་བ་འདི་ཧ་ཅང་དཀོན་པོ་མ་གཏོགས་དེ་མང་པོ་བྱས་ན་ཡག་པོ་ཡོད་པ་མ་རེད་ཟེར། དེ་ལེའུ་གཅིག་རེད། ཡང་དེའི་ཕྱིའི་ཉིན་མོ་ཞིག་ལ་ང་ཕྱིན་པའི་དུས་ལ་ན་ཚ་སྡུག་དུ་སྡུག་དུ་འགྲོ་གི་འདུག གཟུགས་པོ་ཚང་མ་སྐྲངས་འདུག ད་ཁང་པ་འདིའི་སྦུག་བྱས འདིའི་མདོ་དེ་ལ་ ཀ་སྤེ་ བཟོ་འདྲ་ཞིག་འདུག ཀ་སྤེ་ནང་ལ་ཉི་མ་བསྟན་གི མདོ་འདི་བ་ནས་ཀ་སྤེ་ནང་ལ་འཁྱེར་བ་ལ་མི་བཞི་ཡིས་གདན་གྱི་སྒང་ནས་ཁྱེར་འགྲོ་བ་མ་གཏོགས་ཁོ་རང་འགུལ་ལྕོགས་གཏོང་ཐུབ་ཀྱིན་མི་འདུག ང་ཡང་ཀ་སྤེ་ནང་ལ་བསྡད་པ་ཡིན། བསྡད་པའི་སྐབས་ལ་ཁོ་རྦད་དེ་སྣང་བ་སྐྱིད་པོ་སྔོན་མ་ནང་བཞིན་རེད་མ་གཏོགས་སྡུག་བསྔལ་འདྲ་བོ་ཁྱོན་ནས་མི་འདུག ཕྱི་ལོགས་ཀྱི་ཀ་སྤེ་བཟོ་འདྲ་བོ་དེའི་ནང་ལ་མི་བཞི་ཡིས་བཀྱགས་ནས་ཡོང་དགོས་པ་རེད། དེར་བཞག་ནས་ང་ཚོ་དེར་བསྡད་ན་ཁོ་ཚོ་ཚང་མ་ཕྱིན་སོང་། དེ་ནས་ང་གཅིག་པོ་བྱས་ངེད་གཉིས་བསྡད་པའི་སྒང་ལ། ཝ་ཡེ། བྱམས་པ། ཁྱོད་རང་གིས་བལྟས་ན་ང་དྲག་གི་རེད་ལ་དྲག་གི་མ་རེད་ཟེར། དྲག་དང་དྲག སྐྱོན་ཡོད་ནི་མ་རེད། ན་ཚ་གཞན་ལྗིད་མོ་འདྲ་མ་རེད། ཆུའི་ན་ཚ་རེད། ཆུ་མར་བབས་ན་དེ་ག་རེད། དྲག་གི་རེད། དེ་དྲག་གི་རེད་ཅེས་པར། ཁོ་གད་མོ་ཞིག་ཤོར་ནས་དྲག་གི་མ་རེད། དེ་དྲག་གི་མ་རེད་ཟེར། དེ་དྲག་གི་རེད། མི་དྲག་པའི་རྒྱུ་མཚན་གང་ཡང་མི་འདུག་ག ན་ཚ་ནི་ཆུའི་ན་ཚ་རེད། ཆུ་ཕབ་བཞག་ན་ན་ཆ་དྲག་པ་མ་རེད་དམ་ཞེས་པར། མ་རེད། མ་རེད། ད་རེ་ན་ཚ་འདི། ང་བསོད་ནམས་ཆེན་པོ་རེད། ད་རེའི་ན་ཚ་འདི་ང་ལ་ཕོགས་པ་རེད། ང་བསོད་ནམས་ཆེན་པོ་རེད་ཟེར། མི་ལ་ན་ཚ་ཕོགས་ན་བསོད་ནམས་ཆེན་པོ་ཨེ་ཡིན། འདི་གང་འདྲ་བྱས་ནས། ན་ཚ་ཕོགས་ན་སྡུག་པ་རེད་མ་གཏོགས་ཡག་པོ་གང་ཡང་མ་རེད་པ་ཅེས་པར། མ་རེད། མ་རེད། ང་བསོད་ནམས་ཆེན་པོ་སོང་ཙང་ང་ལ་ན་ཚ་འདི་ཕོགས་པ་རེད། མི་བསོད་ནམས་ཆེན་པོའི་རིགས་མཐའ་དག་ལ་ཆུའི་ན་ཚ་ཕོགས་གི་རེད། ཆུའི་ན་ཚ་ཟེར་བ་འདི་ལས་སླ་བོར་ཕོགས་པ་ཡོད་པ་མ་རེད། སྨོན་ལམ་བརྒྱབས་ན་མ་གཏོགས་འདི་ལས་སླ་བོ་ཕོགས་གི་མ་རེད་དེ། ངས་སྨོན་ལམ་གཅིག་ཀྱང་མ་བརྒྱབས། ང་ལ་ཆུའི་ན་ཚ་ཕོགས་པ་རེད་ཟེར། ཨ་ཅེས་པར། སྔོན་མ་དགའ་ལྡན་པའི་དགེ་བཤེས་རྣམས་ཀྱིས་ཆུ་ནད་ཕོགས་ནས་ཤི་བར་གྱུར་ཅིག་ཅེས་སྨོན་ལམ་རྒྱག་གི དགའ་ལྡན་པའི་དགེ་བའི་བཤེས་གཉེན་རྣམས་ཀྱིས་ཤི་བའི་ན་ཚ་དེ་ཆུ་ཕོགས་ནས་ཤུ་བར་གྱུར་ཅིག་ཅེས་སྨོན་ལམ་ཞེ་དྲག་རྒྱག་གི ངས་སྨོན་ལམ་གཅིག་ཀྱང་མ་བརྒྱབས། སྨོན་ལམ་མ་བརྒྱབས་ནའང་ང་ལ་ན་ཚ་དེ་ཕོགས་ཡོང་པ་རེད། ང་བསོད་ནམས་ཆེན་པོ་རེད་ཟེར། ཨོ་ཅེས། དེས་ན་དགའ་ལྡན་པའི་དགེ་བའི་བཤེས་གཉེན་པ་རྣམས་ཀྱིས་ཆུ་ཡི་ན་ཚ་ང་ལ་ཕོགས་པར་ཤོག་ཅིག་ཅེས་སྨོན་ལམ་རྒྱག་དགོས་པའི་རྒྱུ་མཚན་གང་ཡིན་ནམ་ཞེས་པར། དེ་ལ་རྒྱུ་མཚན་ཞེ་དྲག་ཡོད་པ་རེད་ཟེར། རྒྱུ་མཚན་ག་རེ་ཡོད་པ་རེད་ང་ལ་ཅིག་ཤོད་དང་ཞེས་པར། རྒྱུ་མཚན་ཞེ་དྲག་ཡོད་པ་རེད། ཆུའི་ན་ཚ་དང་། ཆུ་ཟེར་བ་འདི་ཁོ་རང་བསིལ་བའི་རང་བཞིན་རེད། ཁོ་ཉག་གེ་ཉོག་གེ་མ་ཡིན་པར་དྭངས་མོ། ཆུའི་ན་ཚ་འདི་ཕོགས་ན་བསིལ་བའི་རང་བཞིན་རེད། རྗེས་མ་ཤི་ཁ་དེར་རིམ་གྱིས་རིམ་གྱིས་འོད་སཉུབ་ནས་འགྲོ་བའི་སྒང་ལ་རིམ་གྱིས་རིམ་གྱིས་འབྱུང་བ་བཞི་བསཉུ་པའི་སྐབས་ལ། རྗེས་ལ་ཆུ་སེར་ཕྲ་མོ་ཟེར་བ་ཞིག་མངོན་དུ་གྱུར་ཡོད་པ་རེད། ཆུ་སེར་ཕྲ་མོ་མངོན་དུ་གྱུར་བའི་སྐབས་ལ་ཆུའི་ན་ཚ་ཕོགས་ནས་ཤི་བའི་རིགས་མཐའ་དག་སེམས་དེ་ཞེ་དྲག་གི་གསལ་བོ་ཡོད་པ་རེད། སེམས་དེ་གསལ་བོ་ཞེ་བོ་ཞིག་ཡོད་པ་རེད། ཉག་གེ་ཉོག་གེ་མེད་པ་དང་། སེམས་ལ་ད་ལྟ་ཅིག་དྲན་གྱིན་དྲན་གྱིན་ཡང་བསམ་བློ་གཞན་པ་འདྲ་ཡོང་བ་དེ་འདྲ་བྱུང་གི་ཡོད་པ་མ་རེད། སེམས་དེ་བརྟན་པོ་དང་སེམས་དེ་གསལ་བོ་ཞེ་བོ་ཞིག་ཡོད་པ་རེད། སེམས་དེ་གསལ་ཆ་ཡོད་པའི་སྐབས་དེར་སྨོན་ལམ་གང་ཞིག་བརྒྱབས་པ་ཡིན་ནའང་སྨོན་ལམ་འགྲུབ་གི་རེད་ཟེར། ཁྱད་ཆོས་དེ་ཡོད་པ་རེད་ཟེར། ཨོ་ཙི། དེ་ཡིན་དུས་ཆུ་ཟེར་བ་དེ་ལས་སླ་བོ་མི་འདུག རྒྱུ་མཚན་འདྲ་བོ་ཞེ་དྲག་འདུག་ཅེས་པར། ཁོ་གད་མོ་ཤོར་གི སྐྲངས་ནས་འདི་རེད། གད་མོ་ཤོར་གི ན་ཚ་གང་ཡང་མི་འདུག་གམ་ཞེས་པར། མཚམས་མཚམས་ལ་ན་ཚ་འདུག་ཟེར། རྒྱུན་དུ་ན་ཚ་མི་འདུག དགོང་མོ་གཉིད་ཡག་པོ་ཁུག་གི་ཟེར། དེའི་ཉིན་མོ་དེ་དེ་རེད། ཡང་དེའི་ཕྱིའི་ཉིན་མོ་ཕྱིན་པ་ཡིན། སྡུག་དུ་ཕྱིན་འདུག བྱམས་པ་ཞེས་འབོད་གི ཨ་ཞེས་པར། བདེ་བ་ཅན་གྱི་ཞིང་ཟེར་བ་དེ་ཡོད་པ་རེད་དམ་ཡོད་པ་མ་རེད་ཟེར། གང་ལབ་ཀྱིན་ཡོད་ན་བསམ་ནས་ངས་ག་རེ་བྱས་ནས་ཤེས་གིན་རེད། ཁྱོད་རང་མཁས་པ་ཆེན་པོ་རེད། ཁྱོད་རང་གིས་ཤེས་གིན་རེད་ཅེས་པར། མ་རེད། མ་རེད། ཁྱོད་རང་བསམ་ན་བདེ་བ་ཅན་གྱི་ཞིང་ཡོད་པ་རེད་དམ་ཡོད་པ་མ་རེད་ཟེར། དེ་ཡོད་ཀྱིན་རེད། ཆོས་ལུགས་ལོ་རྒྱུས་དང་རྒྱལ་རབས་ལོ་རྒྱུས་གང་ལ་བལྟས་པ་ཡིན་ནའང་བདེ་བ་ཅན་གྱི་ཞིང་ཟེར་བ་དེ་ཡོད་པ་ཙམ་མ་ཟད། དེར་ཐག་རིང་ཐུང་། ཞེང་གི་རྒྱ་ཁྱོན་ཆེ་ཆུང་། མི་ཚང་མས་གསུང་འབུམ་ནང་གསལ་བོ་གསུང་འདུག ཁྱོད་རྦད་དེ་དགེ་བཤེས་ཆེན་པོ་ཞིག་གིས་ང་ལ་དྲིས་ནས། དེ་ཡོད་དང་ཡོད་ཅེས་པར། ཡ་ཡ། དེ་ཡོད་པ་ཡིན་ན་ང་དེ་ནས་སྐྱེས་གིན་རེད་ཟེར། ཁྱོད་རང་དེ་ནས་སྐྱེ་བའི་གདེང་ཚོད་ཡོད་དམ་ཞེས་པར། ང་ལ་གདེང་ཚོད་ཡོད་ཟེར། ཁྱོད་ལ་གདེང་ཚོད་ག་རེ་ཡོད་དམ་ཞེས་པར། ང་མཁས་པ་རེད། གལ་ཏེ་བདེ་བ་ཅན་གྱི་ཞིང་ཟེར་བ་ཞིག་ཡོད་པ་ཡིན་ན་མཁས་པ་དེར་སྐྱེས་གིན་རེད་མ་གཏོགས་བླུན་པོ་དེར་སྐྱེས་གིན་མ་རེད་ཟེར། ང་མཁས་པ་ཆེན་པོ་རེད། ང་དེར་སྐྱེས་གིན་རེད་ཟེར། ཁྱད་མཚར། དེ་ཁོས་ཏན་ཏན་དེ་ཟེར་གི དེང་སང་ངས་འདི་ལྟར་བསམ་བློ་བཏང་བའི་སྒང་ལ་ཨ་ཡ་མཚན། དངོས་གནས་རེད། གལ་ཏེ་བདེ་བ་ཅན་གྱི་ཞིང་ཁམས་ཟེར་བ་ཞིག་ཡོད་ན། མཁས་པ་དེར་སྐྱེ་གིན་རེད་མ་གཏོགས་བླུན་པོ་དེར་སྐྱེས་གི་མ་རེད་ཟེར། ཁྱད་མཚར། ཁོའི་སྐད་ཆ་དེ་ཚོར་དངོས་གནས་གོ་རྒྱུ་ཆེན་པོ་འདུག་བསམ་པ་འདྲ་ཞིག་དེང་སང་ངའི་བསམ་བློའི་ནང་འཁོར་ཡོང་གི ཁོ་འཆི་ཁ་དེར་སྐད་ཆ་དེ་བཤད་སོང་། གཞན་ལོ་རྒྱུས་གཞན་དང་གཞན་པའི་ནང་འཆི་ཁ་དེར་ད་ཅིག་དཔེ་ཆ་ཀློག་ཟེར་བ་འདྲ་བོ། འཇུ་མི་ཕམ་གྱིས་ཅིག་ཟེར་བ་འདྲ་བོ། རྗེ་རིན་པོ་ཆེའི་རྟེན་འབྲེལ་བསྟོད་པ་འདྲ་བོ། དེ་ལྟར་ཡོད་པ་མ་རེད། ང་དུས་རྒྱུན་དུ་ཁོའི་འཁྲིས་ལ་ཡོད་པ་རེད། ཁོའི་མཐའ་མ་མཐའ་མའི་སྐད་ཆ་དེ་དེ་རེད། བདེ་བ་ཅན་གྱི་ཞིང་ཟེར་བ་ཞིག་ཡོད་ན་དེ་མཁས་པ་སྐྱེས་ས་རེད་མ་གཏོགས་བླུན་པོ་སྐྱེས་ས་མ་རེད། ང་མཁས་པ་རེད། ང་དེར་སྐྱེས་གི་རེད་ཟེར། ཡང་ཉིན་ཞིག་ཁོས་ང་ལ་དེང་སང་ངའི་སེམས་འདི་ལ་སྐྱོ་སྣང་དང་ཕངས་སྣང་ཞེ་དྲག་འདུག ཕངས་པའི་བློ་དང་སྐྱོ་སྣང་ཞེ་དྲག་ཅིག་འདུག་ཟེར། ག་རེ་བྱས་པ་རེད་ཅེས་པར། ང་ཤི་གི་རེད་ཟེར། དེ་ནས་ཁྱོད་ཤི་བ་ལ་དེ་འདྲའི་ཞེད་སྣང་ཞིག་འདུག་གམ་ཞེས་པར། མ་རེད། མ་རེད། ཤི་རྒྱུ་རང་ལ་དེ་འདྲའི་ཞེད་སྣང་སྐྱེས་གིན་མ་རེད། ཨ་ཙི། ངའི་ཤེས་རབ་ཆེན་པོ་འདི་འཇིག་འགྲོ་གི་རེད་བསམས་ནས་ང་དེ་ལ་ཕངས་སྣང་འདུག་ཟེར། ང་ཤེས་རབ་ཤེས་ཆེན་པོ་རེད། དངོས་གནས་དྲང་གནས་ང་ཤེས་རབ་ཆེན་པོ་རེད། ང་འཇིག་པའི་སྒང་ལ་ངའི་བློ་དེའང་འཇིག་འགྲོ་བ་རེད། ང་དེ་ལ་ཕངས་སྣང་འདུག་ཟེར། ཁོའི་སྐད་ཆ་དེ་ཚོ་ལས་སླ་བོ་མ་རེད། རྟོགས་པ་འདྲ་བོ་མཐོན་པོར་སླེབས་པའི་སྐད་ཆ་ཞིག་མིན་འགྲོ་བསམ་གི

དྲི་བ། དགེ་འདུན་ཆོས་འཕེལ་གྲོངས་པའི་ཉིན་མོར་རྒན་ལགས་མཉམ་པོར་ཡོད་པ་རེད་དམ་ཡོད་པ་མ་རེད།

ལན། གྲོངས་པའི་ཉིན་མོར་ང་མེད།

དྲི་བ། དགེ་འདུན་ཆོས་འཕེལ་གྲོངས་དུས་ཙམ་ལ་རྒན་ལགས་གང་ལ་ཡོད་པ་རེད་དམ།

ལན། ང་ལྷ་སར་ཡོད་པ་རེད། གྲོངས་པའི་ཉིན་མོར་ང་ཁོའི་ནང་ལ་མ་ཕྱིན་པ་རེད། ང་ཕྱིན་པའི་སྒང་ལ་ཁོ་རང་གྲོངས་ཚར་འདུག གྲོངས་པའི་སྐབས་ལ་སྤྱིར་བཏང་གི་ཕུང་པོ་ནང་བཞིན་རེད་མ་གཏོགས། དེང་སང་བླ་མ་ཚོ་ཅིག་ཙོག་ཙོག་འདྲ་ཞིག་བྱས་པ་དེ་འདྲ་གང་ཡང་ཡོད་པ་མ་རེད། མི་ཕལ་བ་ནང་བཞིན་རེད།

དྲི་བ། ཁོ་རང་གྲོངས་པ་རྒན་ལགས་ཀྱིས་གང་འདྲ་བྱས་ནས་གོ་སོང་བ་དང་། དེ་ནས་གྲོངས་པའི་རྗེས་དེ་ལ་ག་རེ་བྱས་སོང་བའི་སྐོར་ཅིག་བཤད་རོགས།

ལན། ང་དེའི་ཕྱི་ཉིན་ཕྱིན་པ་རེད། སྔ་མོ་ནས་འགྲོ་གི་རེད། ཡིན་ནའང་ཁོ་དེའི་དགོང་མོ་གྲོངས་པ་རེད། ང་ཕྱིན་པའི་སྐབས་ལ་གྲོངས་ཚར་འདུག གྲོངས་ཚར་ནས་ཀླུ་འབུམ་ཁང་ཚན་མར་ཡོང་། ཧོར་ཁང་སྐབས་དེར་ཡོད་པ་མ་རེད། ཧོར་ཁང་ཆབ་མདོར་ཕྱིན་ཚར་ནས་ཡོད་པ་མ་རེད། ཧོར་ཁང་ཆབ་མདོ་མ་རེད། གང་ལ་ཕྱིན་སོང་བ་ཡིན་ན། དེ་ནས་ཀླུ་འབུམ་ཁང་ཚན་གྱི་གྲྭ་བ་འཇམ་དབྱངས་ལགས་ཟེར་བ་དེས་མགོ་ཁྲིད་ནས་ནང་གི་རྗེས་འཇུག ཞབས་བརྟན་གནང་དགོས་པ་རེད། དེའི་འགྲོ་གྲོན་ཚང་མ་གཏོང་མཁན་ཕལ་ཆེར་ཀླུ་འབུམ་ཁང་ཚན་མིན་འགྲོ་བསམ་གི དེ་ཡང་རྒྱ་ཆེན་པོ་ཞིག་བྱས་ཡོད་པ་མ་རེད། མི་གཉོམ་ཆུང་གི་བཟོ་འདྲ་ཞིག་བསྡུས་བསྡུས་ཞིག་བྱས་པ་རེད་མ་གཏོགས ཁོ་རང་གི་ཕུང་པོ་དེ་ཚུར་ལ་བཞག ཚུར་ལ་བཞག་ཕར་ཕྱིན་ནས་ ཕུང་པོ་གཏོར་ བཞག་པ་རེད། ཁོ་རང་གི་ ཀབ་ལེ་ དེ་ ལས་ཁུངས་རྣམ་བཞག ་གི་དྲུང་ཡིག་བསོད་རྡོར་ཁོ་རང་གིས་ཁྱེར་ཕྱིན་པ་རེད། ད་བསོད་རྡོར་ཁོ་རང་ཡང་གྲོངས་ཚར་ནས་ཡོད་པ་མ་རེད། ད་ཀབ་ལེ་དེ་ཡང་ཡོད་པ་མ་རེད། མི་གཉོམ་ཆུང་གི་འགྲོ་སྟངས་དེ་བྱས་པ་རེད་མ་གཏོགས་ཅིག་མཁས་པ་ཆེན་པོ་དགེ་འདུན་ཆོས་འཕེལ་གྱི་འགྲོ་སྟངས་རེད་ལ། མི་ཕལ་བ་རེད། དེ་འདྲ་བྱས་པ་རེད།

དྲི་བ། ང་ཚོས་སྐད་ཆ་འགའ་ཤས་དྲིས་པ་རེད། ད་ང་ཚོས་སྐད་ཆ་མ་དྲིས་པ་དེ་འདྲ་རྒན་ལགས་ཁྱོད་རང་གིས་བཤད་འདོད་ཡོད་པ་དེ་འདྲ་ཡོད་དམ། ཡོད་ན་ཅིག་ཤོད་དང་།

ལན། ད་དེ་ག་རང་རེད། རོབ་ཙམ་ཞུས་ན་དེ་འདྲ་རེད། ད་དུང་ཡོད་པ་ཞེ་དྲག་ཡོད་པ་རེད། ཡོད་པ་རེད་དེ། ཕལ་ཆེར་ཆོས་ཀྱི་སྐོར་དེ་འདྲ་རེད། ད་འདི་དུས་རྒྱུན་དུ་ངེད་གཉིས་ཀྱི་འཚོ་བའི་ནང་གི་རག་བསྡུས་ཙམ་རེད། ཞེ་དྲག་ཞེ་དྲག་ལབ་ན་ཉག་གེ་ཉོག་གེ་མང་པོ་རེད། དགེ་འདུན་ཆོས་འཕེལ་ཁོ་རང་འབར་མ་དང་སང་ག་ལྰ་སོགས་ལ་ཕྱིན་པའི་ལོ་རྒྱུས་ཀྱང་ཞེ་དྲག་ཡོད་པ་རེད། དེ་ཚོ་རིང་པོ་རེད། ཉིན་གཅིག་ལ་དགེ་འདུན་ཆོས་འཕེལ་གྱིས་ངེད་གཉིས་སྤྲང་པོ་ནང་བཞིན་བྱས་ནས་ལྷ་སར་རྩམ་པ་སློང་གི་འགྲོ་ཟེར། ཁོ་རང་བཞིན་གྱིས་སྤྲང་པོ་དང་མི་སྐྱོ་བོ་ཡི་ལས་ཀ་བྱེད་པར་དགའ་བོ་ཞེ་བོ་ཞིག་ཡོད་པ་རེད། ཁྱོད་རྩམ་པ་སློང་གི་འགྲོ་བ་ཡིན་ན་ཁྱོད་ཀྱིས་སློང་ནུས་ཀྱིན་འདུག་གམ་ཟེར། ང་འགྲོ་ནུས་པ་མི་འདུག་ཅེས་པར། དེ་སྐྱིད་པོ་ཡོད་པ་རེད་ཟེར། ངས་རྩམ་པ་སློང་ནས་སྤྲང་པོ་བྱས་ནས་འདི་ལ་ འདའ་མ་ ཞིག་གཡར་ནས། ང་ལ་གཡོར་ས་ཡོད། མགོ་ཡི་ཞྭ་མོ་ཙོག་ཙོག་འདྲ་བོ་དེ་འདྲ་ཞིག་ངས་ཅིག་ལ་གཡར། མགོ་ལ་བཏུམས་རིལ་བརྒྱབས། ངེད་གཉིས་རྩམ་པ་སློང་གི་འགྲོ་བ་ཡིན་ན་སྐྱིད་པོ་ཞེ་བོ་ཡོད་པ་རེད་ཟེར། ངེད་གཉིས་ཀྱིས་ལྷ་སའི་ཤར་ཕྱོགས་ནས་རྩམ་པ་སླང་ནས་ཡོང་ན། ནང་ཞག་གི་དྲུང་ཡིག་བསོད་རྡོར་ལགས་ཟེར་བ་དེ་ལྷ་སའི་ཤར་ཕྱོགས་ན་ཁོ་རང་གི་མི་ཚང་དེར་ཡོད་པ་རེད། ཡིན་གཅིག་མིན་གཉིས་ཁོ་རང་གི་སྒོ་འགྲམ་ངེད་གཉིས་ཙམ་པ་སློང་གི་འགྲོ། ཁོ་རང་གིས་རྩམ་པ་ཞིག་ཁྱེར་ཡོང་གི་རེད། ད་དུང་ཡང་ཅིིག་གནང་རོགས་ཞེས་ཨུ་ཚུགས་རྒྱག་དགོས། ཁོས་སྟེར་གི་མ་རེད། ཡང་ངེད་གཉིས་ཀྱིས་ཨུ་ཚུགས་རྒྱག་དགོས། ཁོས་ངེད་གཉིས་གཤེ་གཤེ་གཏོང་གི་རེད། དེ་ཉོས་ཉོས་རེད། ཏན་ཏན་ངེད་གཉིས་གཅིག་འགྲོ་ནི་འགྲོ་ཟེར། ངས་དངོས་གནས་ཡིན་ནམ་ཞེས་པར། ཁོས་དངོས་གནས་ངེད་གཉིས་ཅིག་འགྲོ་ཟེར། དེའི་རྗེས་དེ་ལ་དེ་ག་རེད། ང་ཡང་ཅིག་འགྲོ་འདོད་མེད་པ་ཡིན་ན། དེ་ལྟར་ཡལ་སོང་། ཉིན་གཅིག་ཡང་ངེད་གཉིས་ཀྱིས ་སྒྱིག་གེ་ རེ་ཁྱེར། སྤྲང་པོ་ཚང་མས་སྒྱིག་གེ་རེ་ཁྱེར་ཡོད་པ་རེད། ཁམས་པའི་གནས་སྐོར་བ་དེ་ཚོས་ནང་ལ་རྩམ་པ་བླུགས་ནས་སྒྱིག་གེ་རེ་ཁྱེར་ཡོང་གི་འདུག་ག ངེད་གཉིས་ཀྱིས་དེ་འདྲ་ཞིག་ཁྱེར། ཧ་ཡངས་ཀྱི་ གདུ་བུ་ འདྲ་བོ་དེ་འདྲ་ཆུང་ཆུང་ཞིག་ཁྱེར། ལྕང་ལྡིང་སྣ་ཁ་ སྐབས་དེར་ཆ་ཚང་སྤང་རེད། ཚང་མ་སྤང་མ་གཏོགས་མི་རྡོག་གཅིག་ཀྱང་ཡོད་པ་མ་རེད། ད་ངེད་གཉིས་དེ་གར་ཕྱིན་ནས་ཇ་སྐོལ ཞིང་ཇ་ཞིག་འཐུང་བ་ཡིན་ན། ཨ་ཧོ། ཅི་འདྲའི་སྐྱིད་པོ་ཞེ་བོ་ཞིག་ཡོད་པ་རེད་ཟེར། རྩམ་པ་སླང། དེ་ནས་ཇ་སྐོལ་དེ་འདྲ་བྱས་ན་སྐྱིད་པོ་ཞེ་བོ་ཞིག་ཡོད་པ་རེད་ཟེར། ཡིན་ནའང་དེར་འགྲོ་ཐུབ་མ་སོང་། དེ་ཁོ་རང་གི་ལྟ་བ་རེད། སྤྱོད་པ་འདྲ་བོ་དེ་རེད། ད་ཅིག་སྤྲང་བོ། མི་ཆུང་ཆུང་གི་གོམས་གཤིས་དང་འཚོ་བར་སྤྱོད་སྟངས་ལ་དགའ་པོ་ཞེ་བོ་ཅིག་ཡོད་པ་རེད། མི་ཆེན་པོ་ཡི་འཚོ་བ་སྤྱོད་སྟངས་དང་གོམས་གཤིས་དེར་ཁོ་རང་དོ་སྣང་ཡོད་པ་མ་རེད། དགའ་པོ་བྱེད་གིན་མ་རེད། སྐད་ཆ་ཡིན་ནའང་དེ་རེད་མི་རྦད་དེ་སྐྱོ་བོ་དང་མཐུན་པའི་སྐད་ཆ་དང་དེ་དང་སྤྱོད་པ་མཉམ་པའི་གཏམ་བཤད་གིན་རེད་མ་གཏོགས་དེ་ལ་སྐད་ཆ་བཤད་མ་འདོད་པ་དང་། དེ་ལ་མཐོང་ཆུང་འདྲ་བོ་ཁྱོན་ནས་ཡོད་པ་མ་རེད། ཁོའི་རང་བཞིན་དེ་འདྲ་ཅིག་ཡོད་པ་རེད། མིའི་རང་བཞིན་ཡག་པོ་ཞེ་བོ་ཅིག་ཡོད་པ་རེད། མི་དྲང་པོ་དང་ཁ་རུ་ཁ་ཐུག དྲང་པོ་དྲང་པོ་རེད། སྐད་ཆ་གཅིག་བཤད་ན་ཁོ་ལམ་སེང་ཡིད་ཆེས་གིན་རེད། ཁོ་དེ་འདྲའི་མི་དྲང་པོ་ཞིག་རེད། ཁོ་རང་གིས་ཟེར་གི་རེད་ང་ཚོ་བོད་པས་དྲང་པོ་བྱེད་དགོས་ས་དང་མི་དགོས་ས་ཧ་གོ་གི་མ་རེད་ཟེར། ཕྱི་རྒྱལ་གྱི་མི་ཡིན་ན་དྲང་པོ་བྱེད་དགོས་ས་དང་མི་དགོས་ས་ཧ་གོ་གི་རེད། ཕྱི་རྒྱལ་གྱི་མི་གཅིག་ལ་ཁོའི་ནང་གི་འཚོ་བ་སྤྱོད་སྟངས་དང་རྒྱུ་མཚན་འདྲ་བོ་དྲིས་པ་ཡིན་ན། ཁོས་དྲང་པོར་བཤད་གི་རེད། ཁ་རུ་ཁ་ཐུག་གི་སྐད་ཆ་དེ་དྲང་པོར་བཤད་གི་རེད་མ་གཏོགས་ཁོས་དཀྱོགས་དཀྱོགས་བྱས་ནས་བཤད་གི་མ་རེད། དངོས་གནས་དྲང་གནས་ཅིག་ཕྲ་མའི་གཡོ་སྒྱུ་ཡི་སྐད་ཆ་དེ་འདྲ་ཕྱི་རྒྱལ་ལ་བཤད་པ་ཡིན་ན་ཁོས་ལམ་སེང་ཧ་གོ་འགྲོ་གི་རེད། ལམ་སེང་ང་ཚོས་ཁོ་ལ་ག་རེ་དྲིས་པ་ཡིན་ན་ཁོས་ལམ་སེང་ཧ་གོ་འགྲོ་གི་རེད། ཁོས་ལམ་སེང་དེ་ལ་ལན་ཞིག་སློག་གི་རེད། ང་ཚོ་བོད་པ་དེ་མ་རེད། དྲང་པོ་བྱེད་དགོས་ས་ལ་དྲང་པོ་བྱེད་གི་མ་རེད། དྲང་པོ་བྱེད་མི་དགོས་པར་སྤྱོད་པ་སློག་ས་ལ་སྤྱོད་པ་སློག་ཐུབ་གི་མ་རེད། ང་ཚོ་བོད་པ་ལ་དེ་འདྲའི་སྐྱོན་ཞིག་ཡོད་པ་རེད། ཁོས་དུས་རྒྱུན་དུ་དེ་འདྲ་བཤད་གིན་འདུག་མོད། ཡིན་ནའང་ཁོ་རང་གི་རང་བཞིན་དེ་མི་དྲང་པོ་ཞེ་དྲག་ཡོད་པ་རེད། མི་ལ་མགོ་སྐོར་གཏོང་བ་འདྲ་བོ་ཕྲ་མའི་གཡོ་སྒྱུ་རྩ་བ་ཉིད་ནས་ཡོད་པ་མ་རེད།

དྲི་བ། ང་ཚོ་ཐེངས་དང་པོར་ཡོང་དུས་རྒན་ལགས་ཀྱིས་དགེ་འདུན་ཆོས་འཕེལ་དངོས་གནས་ཐོག་མཁས་པ་གསུམ་ཡོད་པ་རེད་ཟེར། འབྲི་བ་དང་རྩོད་པ་རྒྱག་པ་དེ་འདྲའི་ནང་ལ་རེད་ཟེར། དེ་ནས་དེའི་ནང་ལ་མི་མ་འདྲ་བ་དེ་འདྲ་ཡོད་པ་ཡིན་ན་དོ་སྣང་གཅིག་ཀྱང་བྱེད་གི་མ་རེད། ཡང་བུད་མེད་ཀྱི་སྐོར་ནས་སྐད་ཆ་འདྲ་བཤད་པ་ཡིན་ན་དོ་སྣང་བྱེད་གི་རེད་ཟེར།

ལན། ཁོས་བཟའ་ཚང་གི་སྐོར་དང་། བཤང་བཙོང་མ་དེ་འདྲའི་སྐོར་དང་། དེ་ནས་བུ་མོ་ཚོའི་གཟུགས་པོ་ཡག་མིན་གྱི་སྐོར་དེ་འདྲ་ལ་ཞེ་དྲག་གི་དོ་སྣང་བྱེད་གི་རེད། དགེ་འདུན་ཆོས་འཕེལ་གྱིས་འདོད་པའི་བསྟན་བཅོས་བརྩམས་ཡོད་པ་རེད་ལ། འདོད་པའི་བསྟན་བཅོས་ཀྱི་ནང་ལ་བལྟས་པའི་སྒང་ལ་དེ་ག་རང་ཁོ་རང་གི་ཉམས་མྱོང་འདྲ་བོ་བསགས་བཞག་འདུག ཁོ་བུད་མེད་ལ་དགའ་པོ་ཞེ་བོ་ཞིག་རེད། ཁོ་ལ་བུད་མེད་སྙིང་རྗེ་བོ་དགོས་པ་མ་རེད། ཁོ་རང་མིའི་རང་བཞིན་འདྲ་བོ་དེ་འདྲ་རེད། ང་ལ་ལོ་བདུན་ཅུ་བརྒྱད་ཅུ་དེ་འདྲ་ཡིན་ན་འགྲིག་ག་ཟེར་གི་རེད། དངོས་གནས། ཁོ་ལ་འགྲིག་ག་ཟེར་གི་རེད། མཚམས་མཚམས་ལ་ཁོས་ཆང་འདྲ་བོ་འཐུང་། དགོང་མོ་མཚན་ལ་རྦད་དེ་ཨ་ལྕག་ཁྲིད་ཤོག་ཅེས་ཁོས་ཞེ་དྲག་བྱེད་གི་རེད། ད་ཨ་ལྕག་ཡོད་པ་མ་རེད། མཚན་ཚང་ནས་ད་ལམ་ཕྱེད་ལ་སླེབས་ཚར་སོང་། ད་གཙུག་ལག་ཁང་གི་འགྲམ་དེ་ལ་སྤྲང་པོ་འདྲ་བོ་སྤོ་བོ་རྨོ་མོ་དེ་འདྲ་ཡོད་པ་རེད་མ་གཏོགས་གཞན་ཁྱོན་ནས་ཡོད་པ་མ་རེད་ཅེས་ལབ་ན། དེ་ཡིན་ནའང་ང་ལ་ཁྲིད་ཤོག ང་ལ་དགོས་ཟེར་གི་རེད། ཁྲིད་ཡོང་མཁན་ཡོད་པ་མ་རེད་དེ་ཁོ་རང་གིས་དེ་འདྲ་ཟེར་གི་རེད། སྔོན་མ་འཛམ་གླིང་གི་བུད་མེད་ཚང་མ་འཚོགས་འདུ་འཚོགས་གི་རེད། འཚོགས་འདུ་འཚོགས་པའི་སྒང་ལ་ཁོ་ཚོའི་ཚོགས་འདུ་དེའི་གྲོས་གཞི་འདྲ་བོ་སྐྱེས་པ་དང་བུད་མེད་བཟའ་བ་བྱེད་པའི་སྐབས་ལ་བདེ་བ་ཅིག་ཡོད་པ་རེད། བདེ་བ་དེ་མྱོངས་སྟངས་གང་འདྲ་ཡིན་མིན། ཁོ་ཚོས་དེ་ཞིབ་འཇུག་བྱེད་གི་རེད། ཧྥ་རན་སིའི་ཨ་ལྕག་ཅིག་ཡོད་པ་རེད། དེ་འཛམ་བུ་གླིང་གི་བུད་མེད་ཀྱི་འཚོགས་འདུའི་སྒང་ལ་མོ་རང་ཕྱིན་པ་རེད། ཕྱིན་ནས་ཚོགས་འདུ་དེའི་ནང་ནས་བུད་མེད་རེ་རེ་ཡིས་བསམ་ཚུལ་རེ་རེ་བཤད་གི་རེད། ད་ཁ་ཤས་ཀྱིས་རྦད་དེ་ཁྱོ་ག་སྙིང་རྗེ་བོ་ཡོད་ན་སྐྱིད་པོ་འདུག་ཟེར་བ་འདྲ་བོ། ཁ་ཤས་ཀྱིས་འདྲ་མི་འདྲ་མང་པོ་བཤད་གི་རེད། བདེ་བ་བཙལ་བའི་སྒང་ལ་རྒྱུན་རིང་ན་སྐྱིད་པོ་འདུག་ཟེར་བ་འདྲ་བོ། ཁ་ཤས་ཀྱིས་རྒྱུན་ཐུང་ན་སྐྱིད་པོ་འདུག་ཟེར་བ་འདྲ་བོ། ཁ་ཤས་ཀྱིས་ལོ་ཆུང་ན་སྐྱིད་པོ་འདུག་ཟེར་བ་འདྲ་བོ། ཁ་ཤས་ཀྱིས་ལོ་ཆེ་ཆུང་དེ་ང་ལ་ཁྱད་མི་འདུག་འོག་གི་མཚན་མ་གཙོ་བོ་གཙོ་བོ་དེ་ལ་ཐུག་འདུག དེ་ཡག་ན་བདེ་བ་འདུག་ཟེར་བ་འདྲ་བོ་འདྲ་མི་འདྲ་མང་པོ་བཤད་པ་རེད། ཧཌྱ་རན་སིའི་ཨ་ལྕག་ཅིག་གིས་ང་ལ་ཁྱོ་ག་ཅིག་ཡོད། ངེད་གཉིས་ལན་པོ་རེད། ཁྱོ་ག་སྙིང་རྗེ་བོ་ཞེ་དྲག་འདུག གདོང་བ་སྙིང་རྗེ་བོ་རེད། ངེད་གཉིས་ཀྱིས་འདོད་པ་བྱེད་དུས་མཚན་ལ་བྱེད་གི་མེད། ཉིན་གུང་། ཉིན་གུང་ཁ་ལག་བཟས་ཚར་ནས་ངེད་གཉིས་འདོད་པ་བྱེད་གི་ཡོད། དེ་སྐྱིད་པོ་ཞེ་དྲག་འདུག མཚན་མོར་ཡག་པོ་མི་འདུག ཉིན་གུང་དེ་ཡག་པོ་རེད་ཅེས་ད་རྦད་དེ་སྐྱིད་པོའི་མཐར་ཐུག་པ་དེ་བུད་མེད་དམར་ཧྲེངས་ལ་བུད། སོ་སོའང་དམར་ཧྲེངས་བྱས་ནས་ཉལ་སའི་ནང་ཕྱིན་དེ། གཅིག་གཅིག་ལ་བྱིལ་བྱིལ་བྱས། ཁྱོ་ག་དེ་རྦད་དེ་རང་དབང་མེད་པར་ཁོ་རང་ལ་འདོད་ཆགས་སྐྱེས་ནས། འདོད་ཆགས་སྐྱེས་པའི་སྒང་ལ་ཁྱོ་ག་ཡི་ཕོ་རྟགས་དེ་ཕར་སླེབས་གྲབ་སླེབས་གྲབ་བྱེད་དུས། ཡང་ཕར་ཕུད་རྒྱག་བཏང་ནས་མི་དགོས་ཟེར་ནས་ཕུད་རྒྱག་བཏང་། དེ་ནས་ཡང་བསྐྱར་བྱིལ་བྱིལ་བྱས་པ་སོགས་བར་ལམ་ཞིག་ནས་ཁྱོ་ག་ཡིས་རྦད་དེ་བཟོད་མི་ཐུབ་པ་ཞིག་ཡོང་གི དེའི་སྐབས་དེར་ཁྱོ་ག་རྦད་དེ་གློད་བཞག་ན་དེའི་སྐབས་ཀྱི་འདོད་པ་བྱེད་པ་དེ་ལས་སྐྱིད་པ་ཞིག་མི་འདུག ཧྥ་རན་སིའི་ཨ་ལྕག་གིས་དེ་ལྟར་ལབ་སྐབས་ཚང་མ་གད་མོ་ཤོར་པ་རེད་ཟེར། དེ་གྲོས་གཞིའི་ནང་གི་གྲོས་གཞི་ཡག་ཤོས་དེར་ཚད་མར་བཟུང་བ་རེད་ཟེར།

དྲི་བ། མི་མང་པོ་ཞིག་གིས་དགེ་འདུན་ཆོས་འཕེལ་མཁས་པ་ཆེན་པོར་བཻ་གིན་ཡོད་པ་རེད་ལ། རྒན་ལགས་ཁྱེད་རང་གིས་བལྟས་ན་གང་གི་ཕྱོགས་ནས་མཁས་པ་རེད།

ལན། ངས་དགེ་འདུན་ཆོས་འཕེལ་ལ་བལྟ་སྟངས་ཤིག་ཡོད་པ་རེད་ལ། ངའི་ལྟ་སྟངས་བྱས་པ་ཡིན་ན་དགེ་འདུན་ཆོས་འཕེལ་ཕྱོགས་ཐམས་ཅད་ནས་མཁས་པ་རེད་བསམ་གི ཁོ་ང་ཚོའི་ནང་པ་སངས་རྒྱས་པའི་ཆོས་ཀྱི་ལུགས་སྲོལ་ལ་དངོས་གནས་མཁས་པ་རེད། མཁས་པའི་ནང་གི་མཁས་པ་རྩེར་སོན་པ་དེ་རེད། མཁས་པའི་ནང་གི་ཨང་དང་པོ་དེ་རེད། དེ་མ་ཡིན་པའི་ཁོ་རྦད་དེ་རིག་བྱེད་ཀྱི་རིགས་མཐའ་དག་ལ་མཁས་པ་རེད་བསམ་གི ཁོ་རི་མོ་ལའང་མཁས་པོ་རེད། ཁོ་མི་ལ་བལྟས་ནས་འབྲི་བ་དེ་འདྲ་ལ་མཁས་པ་རེད། ཁོ་མདུན་མདུན་ནས་མ་རེད་དེ་ཁོས་ཡག་པོ་འབྲི་གི་རེད། ཁོས་རི་མོ་སྦྱོང་བརྡར་བྱས་མེད་པས་ཞེ་དྲག་ཞེ་དྲག་ཤེས་གིན་མ་རེད། དེ་ག་སུ་ལག་བསྟར་བྱས་ནས་བྲིས་པ་རེད། ཁོས་ང་ལ་ཟེར་གི་ཟེར། བྱམས་པ་ཁྱོས་རི་མོ་བྲིས་པའི་སྒང་ལ་ཁྱོས་རི་མོ་འབྲི་བ་ཡི་མི་དེར། དང་པོར་མི་དེ་ལ་ལྟ་དགོས་པ་རེད། རི་མོ་འབྲི་བའི་མི་དེ་ཧོབ་དེ་མཐོང་མ་ཐག་ཁོའི་མི་དེའི་རྣམ་འགྱུར་གང་འདྲ་ཡིན་མིན་དེ་གཞི་ལ་བཞག་ནས་བྲིས་ན་ལམ་སེང་ཁོ་འདྲ་བོ་ཡོང་གི་རེད་ཟེར། མཐོང་མ་ཐག་གི་མི་དེའི་ཉམས་འགྱུར་འདྲ་བོ། ཡང་ན་སྐྲ་སོབ་སོབ་འདྲ་བོ། ཡང་ན་གདོང་སྐམ་པོ་འདྲ་བོ། ཡང་ན་ཤ་རྒྱགས་པ་འདྲ་བོ་དེ་འདྲ། མཐོང་མ་ཐག་གི་མི་དེ་གཞི་ལ་བཞག་ནས་རི་མོ་གང་བྲིས་ནའང་ཡག་པོ་ཡོང་གི་རེད་ཟེར། དེ་རི་མོ་འབྲི་སྟངས་ཀྱི་ཡུལ་ལ་ལྟ་སྟངས་ཀྱི་རྒྱུ་མཚན་འདྲ་བོ་ཁོར་ཞེ་དྲག་གི་བཤད་རྒྱུ་འདུག ལྷག་པར་དུ་མི་རྒན་པོ་དང་མི་ཆུང་ཆུང་གཉིས་འབྲི་སྟངས་རྦད་དེ་ལོགས་ཀ་རེད། མཚོན་ལོགས་ཀ་རེད་ཟེར། མི་རྒན་པོ་འབྲི་སྟངས་དེར་ཡིན་གཅིག་མིན་གཉིས་མཚོན་དེ་མཚོན་གྱི་ནང་གི་དམར་པོ་ཟངས་སཋརྨ་དེ་མང་པོ་ཡོད་ན་རྒན་པོ་དེར་རྒན་ཉམས་ཀྱི་རྟགས་དེ་ཡོང་གི་རེད་ཟེར། མི་གཞོན་པ་ཡིན་ན་ཡིན་གཅིག་མིན་གཉིས་ཁོ་མཚོན་གྱི་ནང་གི་ལྗང་ཁུ་དགོས་པ་རེད། ལྗང་ཁུ་ག་ཚོད་མང་ན་ཁོ་གཞོན་པའི་རྣམ་འགྱུར་དེ་གསོན་པོར་ཐོན་གི་རེད་ཟེར། ང་བླ་བྲང་ན་ཡོད་དུས་ཁོ་རང་གི་དགེ་རྒན་གུང་ཐང་ཨ་ཁུ་བློ་གྲོས་རེད། གུང་ཐང་བློ་གྲོས་ཀྱི་པར་ཞིག་ངས་བྲིས་པ་ཡིན། ངས་གདོང་ལ་བལྟས་ནས་འབྲི་ཐུབ་གི་མ་རེད་དེ་གདོང་དེ་ངའི་ཡིད་ལ་འཆར་གི་རེད། ངས་བསམ་བློ་བཏང་ནས་བྲིས་པ་དེ་མི་ཚོར་བསྟན་པའི་སྒང་ལ་གུང་ཐང་ཨ་ཁུ་བློ་གྲོས་རེད་ཟེར་གི་འདྲ་བོ་བྱུང་འདུག་དེ་འདྲ་ཟེར་གི་ཟེར། དེ་ངས་ཀྱང་ཤེས་གིན་ཡོད། ང་བླ་བྲང་ན་ཡོད་དུས་དགེ་འདུན་ཆོས་འཕེལ་གྱིས་གུང་ཐང་བློ་གྲོས་བྲིས་པ་རེད་ཟེར་བ་དེ་འདྲ་བླ་བྲང་ན་བཤད་ཆ་ཤོད་མཁན་དེ་འདྲ་ཞིག་འདུག རི་མོའང་ཁོས་དེ་འདྲ་ཤེས་གིན་འདུག ལྷག་པར་དུ་ཡང་ཁོ་ཅིག་དེང་རབས་ཀྱི་འཕྲུལ་ཆས་ཀྱི་སྐོར། སྔོན་མ་ཁོ་བླ་བྲང་ན་ཡོད་དུས་ཁོའི་བསམ་བློ་འཁོར་ཕྱོགས་ཤིག་གིས་མོ་ཥྱ་ཟེར་བ་འདྲ་བོ། གྲུ་གཟིངས་རྒྱ་མཚོའི་ནང་འགྲོ་བ་ཟེར་བ་འདྲ་བོ་དེ་འདྲ་བཟོ་བ་ཡི་བསམ་བློ་ཞིག་རང་བཞིན་གྱིས་ཁོ་རང་ལ་འཁོར་ནས། ཁོ་རང་གིས་ཤིང་གི་གྲུ་གཟིངས་ཆེ་ཆུང་ཚད་རན་པོ་འདྲ་ཞིག་བཟོས། དེའི་ནང་ལ་ཆུ་ཚོད་འཁོར་ལོའི་ནང་གི་རྒྱུ་མ་འདྲ་བོ་དེ་ཕར་འཐེན་ཚུར་འཐེན། ཁོ་རང་གིས་བསམ་བློ་བཏང་གིན་བཏང་གིན་གྲུ་གཟིངས་ཤིག་བཟོས་འདུག གྲུ་གཟིངས་དེ་བཟོས་ནས་བླ་བྲང་དགོན་པའི་མཐའ་དེར་མཚོ་འཁྱིལ་ཟེར་བའི་མཚོ་ཆུང་ཆུང་ཞིག་ཡོད་པ་རེད། ད་ཆུ་འཁྱིལ་བཞག་པ་ཞིག་རེད། མཚོ་འཁྱིལ་ནང་ལ་གྲུ་གཟིངས་གློད་པའི་སྒང་ལ་ དགའ་ཆེན་ འགྲོ་གི་ཟེར། དགའ་ཆེན་འགྲོ་ནས་ལམ་སེང་མར་ལྡིབ་འགྲོ་གི་ཟེར། ཁོས་དེའི་བར་དུ་བཟོ་ཐུབ་པ་རེད་ལ། ལྷག་པར་དུ་ཁོ་རྦད་དེ་འཛམ་བུ་གླིང་གི་འཕྲུལ་ཆས་ཚང་མ་བཟོ་སྟངས། ངས་ང་བཙུགས་ནས་ཁོ་ལ་སྐད་ཆ་དྲིས་ཡོད་པ་མ་རེད་དེ། ཁོའི་ཞོར་ཞོར་ལ་སྐད་ཆའི་ནང་ཤོར་འགྲོ་གི མེ་འཁོར་བཟོ་མཁན་དབྱིན་ཇི་ཞིག་ཡོད་པ་རེད། ཁོས་ཚེ་མཇུག་ལ་སྐྱིད་པོ་ཞེ་དྲག་བྱས་འདུག ཁོས་མེ་འཁོར་བཟོ་བའི་སྒང་ལ་ཁོ་སྤྲང་པོ་གང་ཡང་མི་འདུག ཁོ་ལ་ཆ་རྐྱེན་གང་ཡང་མེད་སྐབས་ཆ་རྐྱེན་ཚང་མ་སློང་བར་ཕྱིན། དབྱིན་ཇི་ཟེར་བ་དེ་སྐབས་དེར་རྦད་དེ་ཉམས་ཆེན་པོ། ཁོ་སྐུ་དྲག་གི་རང་བཞིན་བཅས་ཡུ་རོབ་ཀྱི་ནང་ནས་ཉམས་ཆེ་ཤོས་དེ་དབྱིན་ཇི་རེད་ཟེར། ད་སློང་གི་འགྲོ་མཁན་དེས་ངས་མེ་འཁོར་ཞིག་བཟོ་གིན་ཡོད་ཀྱང་ང་ལ་དངུལ་ཁྱོན་ནས་མི་འདུག ང་ལ་ཞལ་འདེབས་ཤིག་སྟེར་རོགས་ཞེས་སློང་སྐབས་དེ་ཚོས་ཁྱོན་ནས་ཡག་པོ་སྤྲད་མི་འདུག་ཟེར། སྐབས་དེར་དབྱིན་ཇི་གང་ཡིན་ན་ཅིག་ལ་སློང་གི་ཕྱིན་འདུག སློང་གི་ཕྱིན་ནས་དེའི་དངུལ་དེ་ལ་བལྟས་བཞག་དུས་ད་ཁོ་དེ་ཉམས་ཕྱིན་ནས་ཁོ་དེར་བློ་ཕམ་པོ་ཞེ་དྲག་བྱུང་འདུག ཁོ་རང་དབྱིན་ཇིའི་དཔོན་པོ་དེའི་རྩིབ་ལ་འགྲོ་བའི་སྒང་ལ། དེ་ཚོ་ཁ་ལག་བཟའ་བའི་སྒང་ལ་འདོན་པའང་མང་པོ་འདོན་གི སློང་མཁན་དེ་ཁོ་ག་དུས་ཡིན་ཀྱང་མེ་འཁོར་དེ་ལ་བསམ་བློ་འཁོར་ནས། ཁོའི་བསམ་བློའི་ནང་ལ་མེ་འཁོར་དེ་མ་གཏོགས་ཁྱོན་ནས་ཡོད་པ་མ་རེད། ཁ་ལག་མདུན་ལ་བཞག་པ་རེད། ལམ་སེང་རྦད་དེ་ཁོ་རང་ཚོས་འདོན་པ་མ་ཚར་གོང་ལ་ཁ་ལག་དེ་བཟས་བཞག་པ་རེད། ཁོ་ཚོས་ཁོར་སྤྲང་པོ་རེད་ཅེས་གཤེ་གཤེ་ཞེ་དྲག་བཏང་འདུག ལྟོ་ཡང་བཟའ་ཤེས་གིན་མི་འདུག་ཅེས། རྗེས་ལ་དངུལ་ཏོག་ཙམ་སྤྲད་འདུག མེ་འཁོར་བཟོ་མཁན་དེས་དང་པོ་དང་པོ་དེར་ཤིང་གི་མེ་འཁོར་བཟོས་པ་རེད། ཤིང་གི་མེ་འཁོར་དེའི་ནང་དབྱིན་ཇིའི་རྒྱལ་མོ་གདན་འདྲེན་ཞུས་ནས་རྒྱལ་མོ་དེ་མེ་འཁོར་ནང་ནས་ཕྱིན་ཏེ་ཁོ་ལ་དངུལ་རྦད་དེ་ཁ་མེད་མིག་མེད་ཅིག་སྤྲད་འདུག ཁོ་སྐྱིད་པོ་བྱུང་འདུག དེ་མ་གཏོགས་འཛམ་བུ་གླིང་གི་འཕྲུལ་ཆས་ཀྱི་རིགས་བཟོ་མཁན་མཐའ་དག་སྐྱོ་བོ་རེད། ཚང་མ་སྐྱོ་བོ་བྱས་ནས་ཤི་འདུག་ཅེས་འདི་འདྲ་བོ་མང་པོ་བཤད་རྒྱུ་ཡོད་པ་རེད། འཕྲུལ་འཁོར་གྱི་རིགས་མཐའ་དག་རྒྱ་གར་གྱི་ལོ་རྒྱུས་ལ་ཉམས་ཞིབ་ལེན་བྱས་ནས་མི་སེར་གྱི་དཔྱད་པ་བྱུང་བ། རྒྱ་གར་ནས་ཁོ་སིང་ག་ལ་ཕྱིན་པ་ཡིན་ཟེར། སིང་ག་ལར་ཕྱིན་དུས་རྒྱ་མཚོའི་ནང་ནས་འགྲོ་དགོས་ཀྱི་འདུག་ཟེར། བལ་ཡུལ་ནས་ཡིན་པའི་བུ་ཞིག་ངའི་མཉམ་དུ་ཕྱིན་པ་ཡིན་ཟེར། བལ་ཡུལ་གྱི་བུ་དེས་ང་ལ་དབྱིན་ཇིའི་སྐད་རྒྱག་གི དེ་ནས་ངས་ཀྱང་ཕར་དབྱིན་ཇིའི་སྐད་བརྒྱབས་པ་ཡིན་ཟེར། ངའི་དབྱིན་ཇིའི་སྐད་ཆའི་སྒྲ་་དེ་བུ་དེས་དབྱིན་ཇིའི་སྒྲ་་དང་བསྡུར་ན་ངས་ཁོ་ལ་དོ་ཡི་མི་འདུག་ཟེར། ཁོ་རང་གི་སྒྲ་་དེ་ཞེ་དྲག་གི་ཡག་གི ང་ལོ་ཆེན་པོ་ཡིན་དུས་དབྱིན་ཇིའི་སྐད་སླབས་པ་ཡིན་སྐབས་སྒྲ་་དེ་ཞེ་དྲག་ཡག་པོ་མི་འདུག། ངེད་གཉིས་གྲུ་གཟིངས་ནང་ནས་ཕར་རྒྱ་མཚོའི་ནང་འགྲོ་དུས་ང་ལ་རྒན་ལགས། ཁྱོད་རང་གིས་དབྱིན་ཇི་སློབ་སྦྱོང་གནང་ནས་ལོ་ག་ཚོད་བསྡད་པ་ཡིན་ཞེས་ང་ལ་ཚུར་སྐད་ཆ་འདྲི་གི ངས་སྐད་ཆ་དྲང་པོ་བཤད་པ་ཡིན། ང་དབྱིན་ཇིའི་སློབ་གྲྭའི་ནང་མ་བསྡད། ངས་མ་གཞི་སློབ་སྦྱོང་རི་མོ་སློབ་སྦྱོང་བྱས་པ་ཡིན། དེའི་ཞོར་ལ་དབྱིན་ཇི་ཟླ་བ་དྲུག་ལ་སྦྱངས་པ་ཡིན་ཞེས་པར། རེད་རེད། རྒན་ལགས་ཀྱིས་ང་ལ་ཞལ་རྩེད་གནང་གིན་ཡོད་པ་འདྲ་ཟེར། མ་རེད། མ་རེད། དེ་འདྲ་མ་རེད། ཁྱོད་ཞེ་དྲག་གི་དབྱིན་ཇི་མཁས་པོ་རེད་འདུག་ཟེར། ཁྱོད་རང་གིས་ཞེས་ན་ངའི་དབྱིན་ཇིའི་སློབ་སྦྱོང་གི་ཚད་ག་འདྲ་འདུག་ཅེས་པར། ངས་བྱས་ན་ཁྱོད་ལོན་གྲོན་གྱི་སློབ་གྲྭ་ཆེན་མོ་ཞིག་གི་ནང་ནས་སློབ་སྦྱོང་བྱས་པའི་མི་ཞིག་རེད་འདུག་ཅེས་དེ་འདྲ་ཟེར་གི་ཟེར། ཡང་ཉིན་གཅིག་ཕར་འགྲོ་བའི་སྐབས་ལ་གྲུ་གཟིངས་ནང་ཁམས་པ་ཞིག་ཡོད། ཁོས་དབྱིན་ཇི་ཤེས་གིན་མི་འདུག ད་ཁོས་དབྱིན་ཇི་ཤེས་གིན་ཡོད་མདོག་བྱས་ནས་རྦད་དེ་འགྲོ་གི་ཟེར། འདུག་སྟེགས་ གི་ཡི་གེ་འདྲ་བོ་དེ་དུས་ཚང་མ་དབྱིན་ཇི་རེད། ཁོས་ཁ་མུག་མུག་ཀློག་གི ཁོའི་ཀློག་སྟངས་འགྲིག་གི་མི་འདུག དབྱིན་ཇིར་ཡི་གེ་མང་པོ་ཡོད་ནའང་དོན་ལ་ཚིག་གཅིག་ལ་འདུས་པའང་ཡོད་པ་རེད། ཁོ་རང་གིས་ཡི་གེ་མང་པོ་ཡོད་ཙང་དོན་དག་ཀྱང་མང་པོ་ཅིག་བཤད་པའམ་ཁ་མང་པོ་སྡེབ་གི ཡ་་་་་ད་འདིས་ཧ་གོ་གི་མེད་པ་འདྲ་ཞེས་ཚོད་དཔག་བྱས་ནས་ཧ་གོ་སོང་། རྗེས་ནས་ཁོས་དངོས་གནས་ཧ་གོ་གི་མི་འདུག་ཟེར། དེ་ནས་ང་སིང་ག་ལ་ཕྱིན་པ་ཡིན། ཨ། ད་དངོས་གནས་དྲང་གནས་ནང་པ་སངས་རྒྱས་པའི་ཆེས་ཀྱི་བསྟི་གནས་ཧ་ལས་པ་ཞིག་རེད། གྲྭ་བ་དེ་དག་གི་ལྟ་བ་དང་སྤྱོད་པ་དངོས་གནས་དྲང་དངོས་ཡ་མཚན་པོ་འདུག ང་སིང་ག་ལར་ཕྱིན་ནས་མ་གཞི་ང་གྲྭ་བ་བྱས་འདོད་གི་བསམ་པ་ཡོད་དེ། སིང་ག་ལ་ནས་དགེ་སློང་བྱེད་ཐུབ་གི་མི་འདུག དགེ་སློང་གི་འདུལ་ཁྲིམས་དེ་རྦད་དེ་གཙང་མ་དང་དམ་པོ་ཡོད་ཙང་། ངས་དེ་ཡོང་གི་མི་འདུག ང་དགེ་བསྙེན་བྱས་པ་ཡིན། དགེ་སློང་ཚང་མའི་གཟན་སོགས་སེར་པོ་རེད། དགེ་བསྙེན་ཚང་མས་ཕྱུ་བའི་བཟོ་འདྲ་ཞིག་གྱོན་གི གཟན་མ་རེད། རྫ་མདོག་དང་རྒྱ་སྨུག་བཟོ་འདྲ་དེ་འདྲ་རེད། དེ་གྱོན་ནས་ལོ་གཉིས་ཡིན་ན་གསུམ་ཡིན་ན་ཅིག་བསྡད་པ་ཡིན། དེ་དངོས་གནས་ཧ་ལས་པ་རེད། དགེ་འདུན་གྱི་འདུལ་ཁྲིམས་དེ་གཙང་བ་ལ། གཙང་བ་ལ། ལྷག་པར་དུ་དེ་ཚོར་སིང་ག་ལའི་མི་ཚང་ཆེན་པོ་འདྲ་བོ་དེ་འདྲ་ཡིས་ཉིན་གུང་དག་དག་ལ་དགེ་འདུན་ཉི་ཤུ་སུམ་ཅུ་དང་། བཞི་བཅུ་ལྔ་བཅུ། དྲུག་ཅུ་བདུན་ཅུསྡེབ་གཅིག་ལ་གསོ་ཉམས་ལ་གདན་འདྲེན་ཞུ་མཁན་འདུག དགེ་སློང་སོང་ཙང་ཉིན་གུང་མ་གཏོགས་ཁ་ལག་བཟའ་ཆོག་གི་མ་རེད་པ། ཉིན་གུང་གི་ཁ་ལག་ལ་གདན་འདྲེན་ཞུ་མཁན་འདུག ཁོ་ཚོ་ཁྱིམ་ལ་མ་སླེབས་པའི་སར་དེར་དགེ་འདུན་པ་རྣམས་ཕེབས་སའི་ལམ་ཁ་ལ་རས་དཀར་པོ་བཏིངས། ཕྱོགས་ཕྱོགས་ནས་སྒང་ལ་འཐེན་པའི་བལ་བྲེ། རས་ཀྱིས་བཟོས་པའི་བལ་བྲེ་འཐེན་ཞིང་ཕྱོགས་ཕྱོགས་ནས་སྒྱུགས་པ་ཡིས་ཡར་གཏད། ཡང་སྨྱུག་་མ་ཡིས་བཟོས་པའི་གཟེབ་འདྲ་བོ་དེ་འདྲའི་ནང་ལ་མེ་ཏོག་ཁྱེར་ཡོང་ནས་དགེ་འདུན་པ་རྣམས་བང་སྒྲིག་ནས་ཁྱིམ་གྱི་ཉེ་འདབས་ལ་ཐོན་པའི་སྐབས་སུ། ཚང་མས་སྐད་བརྒྱབས་ཤིང་མེ་ཏོག་གི་ཆར་བ་གཏོར། ཨ། ད་དེ་དངོས་གནས་སྔར་སྟོན་པ་ཐུགས་རྗེ་ཅན་སངས་རྒྱས་བཞུགས་ཡོད་དུས་འདི་འདྲ་ཞིག་ཡིན་རྒྱུ་རེད་བསམས་ནས་མིག་ཆུ་རང་དབང་མེད་པར་ཡོང་གི རང་དབང་མེད་པར་མིག་ཆུ་ཡོང་གི དེའི་ལྟ་བ་དང་སྤྱོད་པ་སོགས་ཧ་ལས་པ་ཞིག་རེད དེར་བལྟས་ནས་ངས་རྦད་དེ་སྟོན་པ་ཐུགས་རྗེ་ཅན་སངས་རྒྱས་ཟེར་བ་དེ་ངས་ཞེ་དྲག་དྲན་གི སངས་རྒྱས་ཟེར་བ་དེ་གང་འདྲ་ཞིག་ཡོད་མེད་ངས་ཞེ་དྲག་དྲན་གི སངས་རྒྱས་ཟེར་བ་དེས་བསྟན་པ་དེ་དངོས་གནས་དྲང་གནས་སེམས་ཅན་ལ་ཕན་ཐོགས་པ་དང་སྙིང་རྗེའི་བསྟན་པ་ཡིན་ཟེར་གི་ཡོད་པ་རེད་ལ། ཡིན་ཐག་ཆོད་རེད། དེ་ཡིན་པའི་རྒྱུ་མཚན་སྟོན་པ་ཐུགས་རྗེ་ཅན། གཉན་ཡོལ་གྱི་གྲོང་ཁྱེར་ན་བཞུགས་པའི་སྐབས་ལ། ཁོང་ཁྱིམ་ན་བཞུགས་པའི་གནས་སྐབས་ཀྱི་བཙུན་མོ་གྲགས་འཛིན་མ་ཡི་སྲས་སྒྲ་་གཅན། སྲས་སྒྲ་་གཅན་ཟེར་བ་དེ་སྟོན་པ་ཐུགས་རྗེ་ཅན་གྱི་སྲས་རེད་ལ། སྟོན་པ་ཐུགས་རྗེ་ཅན་དགུང་ལོ་ ༢༩ ཡི་སྟེང་རབ་ཏུ་བྱུང་བ་རེད། བཙུན་མོ་གྲགས་འཛིན་མ་ཡིས་སྲས་སྒྲ་་གཅན་ཁྲིད་ནས་བཅོམ་ལྡན་འདས་ཀྱི་སྐུ་མདུན་ལ་བཅར་འདུག དེ་ནས་སྲས་སྒྲ་་གཅན་གྱིས་ཨ་མ་རང་དེ་དགོང་ལོགས་སོང་། ང་དེ་དགོང་བཅོམ་ལྡན་འདས་ཀྱི་སྤྱན་སྔ་ནས་ཉལ་གི་ཡིན་ཞེས་སྲས་སྒྲ་་གཅན་དགོང་མོ་དེར་བསྡད་འདུག བསྡད་པ་སོང་ཙང་སྟོན་པས་དེ་གསུངས་པ་རེད། ང་དགེ་སློང་རབ་ཏུ་བྱུང་བ་ཞིག་རེད། ཁྱོད་ཁྱིམ་པ་རེད། ངེད་གཉིས་ལྷན་གཅིག་ཏུ་ཉལ་ན་འགྲིག་གི་མ་རེད། སྒྲ་་གཅན་འཛིན་དགོང་མོ་དེར་སྟོན་པ་བཅོམ་ལྡན་འདས་ཀྱི་ཆབ་གསང་གནང་ས་དེར་དགོང་མོ་ཉལ་དུ་བཅུག་པ་རེད། དགེ་སློང་དང་ལྷན་གཅིག་ཏུ་ཉལ་མ་ཆོག་པ་སོང་ཙང་སྟོན་པ་་་་་་་་་་་་་་་་་་

———
གོང་གསལ་བཅར་འདྲི་འདི་བཞིན་བོད་ཡིག་གི་ཡིག་གཟུགས་རྙིང་པ་ནས་གསར་པར་བསྒྱུར་སྐབས་ འགྱུར་ནོར་ཤོར་བ་ཡོད་སྲིད་པས། མ་དཔེ་ལ་གཟིགས་ན་འདིར་ནོན། AmdoChampaTib


དྲྭ་ཚིགས་གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ།
འདྲེན་བཀོལ:
61.4K

  དཔྱད་གཏམ ( 0 )ཡོད།
དཔྱད་གཏམ་སྤེལ་ས།
སྤེལ་མཁན།
བཤེར་གྲངས།
rogu བཤེར་གྲངས་ཁ་སྐོང་བྱོས། ཡིག་འབྲི་བཞི་ལས་མང་མི་རུང་། ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་། ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།    
མིག་སྔར་འདི་རུ་དཔྱད་གཏམ་སྤེལ་མཁན་མ་བྱུང་།
ལྟ་ཀློག་གྲངས་ཀ
15327078
དྲ་ཚིགས་བཟོ་སྐྲུན།
 
འབྲེལ་གཏུག་བྱ་ཡུལ།   ཁ་པར།  15283703999 13909418876 QQ:516617821    E-mail:tbmgar@163.com
པར་དབང་བཙན་པོའི་མགར་གྱི་དྲ་བ་ལས་གཞན་ལ་མེད།
网站备案号:蜀ICP备13002975号