གངས་རི་དང་ཀེང་རུས།
མགར་དམག
གངས་རི་དེ་༼རྩྭ་གསེང་གི་ཀེང་རུས་ལས་ཅུང་ཙམ་མཛེས༽་མོད
གྲོག་མ་གཅིག་གི་གདུང་སེམས་ཀྱི་མེ་ལྕེ
གྱེན་ནས་གྱེན་དུ་འཕྱུར་ཏེ་ས་གཞི་འདིའི་ཕྱེད་ཀ་བསྲེགས་ཚར་དུས
ཀེང་རུས་དེ་བདག་སེམས་ཀྱི་གངས་རི་ལས་རབ་ཏུ་མཛེས
2014.10.8
གཙང་བོ་སྒུག་པ
མྱ་ངན་གྱིས་སྐྱེས་པའི་ཤིང་སྐམ་དེའི་སླད་དུ
རྨི་ལམ་དུ་ཡང་ཡང་འཁོར་མྱོང་བའི་ནགས་ཚལ་དང
རི་དྭགས་ཚོའི་སེམས་ཀྱི་ས་གཞི
ཁྱེད་ཀྱིས་ཡང་ཡང་བརྡར་ཏེ་ཤིན་ཏུ་ཕྲ་བའི་སྐུད་པ་སྦོམ་པོ་ཞིག་གྲུབ་རྗེས
ཨ་ཐང་ཆད་པའི་རང་ཉིད་ཀྱི་ལུས་པོ་འཚེམ་དུ་མ་གྲུབ་པ་པར་རྡུལ་དུ་ཟགས
གནམ་སའི་སྲུབས་བར་ནས་ལྡང་བའི་རླུང་བུས་གང་སར་སྤུར་ཏེ་ཅི་ཡང་མེད་པར་གྱུར
བར་སྣང་དུ་གཡོ་བའི་སྐར་མའི་ཡོལ་བ
ཁྱེད་ཀྱིས་ཅི་ཡང་ཡིན་པར་འདོད་དེ་སྙིང་ལ་ཉར
ཤམ་བྷ་ལའི་མཚན་མོ་སླར་བཞིན་འཕྱུར་དུས
བར་སྣང་ཞེས་པ་ནི་ཐག་རྡང་མེད་པའི་སྒེའུ་ཡོལ་ཐད་པོ་ཞིག
ཁྱེད་ཀྱི་ལུས་སྟེང་དུ་འབབ་ཀྱིན་པའི་ཚ་དུག་ཀྱང་འགོག་མི་ནུས
ཁྱེད་ཉིད་སླར་ཡང་ལམ་ལ་ཆས
ཕྱི་དྲོ་ཞིག་ལ་ཞེན་ཆགས་ཀྱི་རོ་བག་ཤིན་ཏུ་ཚ་བའི་དུར་ཁྲོད་ཅིག་ལ་སླེབས
2014.4.16
པོ་ཏ་ལ
ཁྱེད་ཀྱིས་རླུང་བུ་མཁྲེགས་པོ་དེ་གྱོན་ནས་མི་ལོ་ག་ཙམ་འདས་སོང
མེ་བཞིན་ཚ་བའི་འཁྱགས་རོམ་གྱི་བརྩིགས་པ་ཞིག་གིས་རང་ཉིད་ཡོངས་སུ་བསྐོར་ཏེ
བདག་མེད་ཀྱི་རྣམ་ཤེས་དང་ང་རྒྱལ་བརྩིགས་པའི་ནང་ལོག་དུ་འདྲུད་དུས
པོ་ཏ་ལ
བདག་གི་གྲིབ་མའི་ནང་དུ་སེང་གེ་ཞིག་ངུ་བཞིན་འདུག
2014.12.30
འཇིག་རྟེན་ན
འཇིག་རྟེན་ན
འཇིག་རྟེན་ན་སྤྱང་ཀི་དང་ལུ་གུ་ལས་ཅི་ཡང་མེད
དེ་དག་ཀྱང་གཟུགས་འགྱུར་བའི་བྱ་ཚིགས་རྐྱང་རྐྱང་ཡིན
2013.9.23
ལོག་པར་རྟོག་པའི་སྙན་ངག
རབ་ཏུ་འཁྱག་པའི་རྡོའི་སེང་གེའི་མིག་ཆུ
ལོ་ཟླ་འདིའི་ཆེད་དུ་སུ་ཞིག་གིས་ཐེངས་མང་འཐུང་མྱོང
སྐམ་ལ་རུད་པའི་གངས་འདབས་ཀྱི་སྦྲ་ནག
མཚན་མོ་འདིའི་ཆེད་དུ་བདག་གིས་ཐེངས་མང་སྲུང་མྱོང
ཤ་གསེང་ན་དགོད་ལ་ངུ་བའི་རླུང་དང་ཁ་བ
མེ་ནང་ན་འཕྱོ་ལ་ལྡིང་བའི་རི་རབ་དང་ནགས་ཚལ
ཁྱོད་ཀྱིས་གུ་ཡངས་མཛོད་ཅིག
མཐའ་ན་རང་གི་དགྲ་བོ་ལ་ཡང
རྨས་ཟིན་པའི་མེ་ཏོག་ལྡུམ་ར་འདི་བདག་ལ་དབང་ཆོག་པར་ཞུ
འདི་ལས་ཅི་ཡང་མི་དགོས
མཐའ་ན་གསེར་གྱི་གཟེབ་དྲ་དེ་ཡང
ང་ནི་མི་སེར་གྱི་བུ་ཡིན
ཁ་ཆེམས་ལྟ་བུའི་བསྔོ་ཡིག
རི་རྩེ་ནས་སྤྲིན་པར་བསྙེས་ཏེ་ཁྱེད་ལ་བལྟས་ཀྱང
ངལ་རྩོལ་གྱི་རྔུལ་ནག་ཁྲག་ལ་འདྲེས་ཏེ་རྡོའི་བརྩིགས་པ་བརྒྱུད་དེ་མར་མར་བྱེར
ལམ་རིང་མོ་རབ་རུབ་དུ་གྱུར་རྗེས
མི་རྣམས་གཞི་ནས་ལྐུག་སོང་ངམ
ཚངས་མགུར་གྱི་མཉེན་ལྕུག་ཀྱང་སྲ་མཁྲེགས་ཀྱིས་བཅངས་ཏེ
རྡོ་རིང་སྟོང་བ་ཞིག་གི་མིག་ཀོང་ནས་ཟགས
གངས་རི་ཟེར་སའི་ངམ་ངམ་བརྗིད་བརྗིད་ཅིག་ཀྱང་མེད་པར་གྱུར
ལམ་འགྲོ་བ་དབུལ་བོ་ཚོས་རྩམ་སྐྱ་འགམ་བཞིན་རྩྭ་ཐང་ཆེན་པོ་ཞིག་རུམ་ནས་འགྲོ
རྡོའི་སེང་གེ་ཞིག་གི་འཁྱག་སོང་བའི་མིག་ཆུ་དེ
དུར་ཁྲོད་དང་ཕ་བོང་ལས་ཀྱང་འཁྱག་པའི་དེ་རིང་གི་ལོ་ཟླ
ལྕགས་པོ་རིའི་རི་རྩེ་ནས་ངས་ཕ་ཡུལ་དྲན་བྱུང
ས་རུབ་དུས
ཐང་ཆད་པའི་ལུས་པོ་ཤིང་སྐམ་ལྟར་གྱོང་ཡང
སྐམ་ལ་རུད་པའི་ཀེང་རུས་ཀྱི་ལྷུ་ལག་ཤུགས་ཀྱིས་སྒྲུམ
2015- 1—16དགོང་མོ།
|