བརྗེད་དཀའ་བའི་འཚོ་བ།
བེ་མིག༼རྨ་ལྷོ༽
གསོལ་འདེབས་ཐོག་རྒོད་མ། ༼མུ་འགོད༽
ཙན་དན་ལོ་མ་སེར་པོ་གང་སར་གཏོར།།
ཞོགས་པའི་ཉི་ཟེར་ཁང་རྩེག་ཚང་དུ་ཡུབ།།
འདི་ཕྱི་བདེ་སྡུག་རྒྱལ་བའི་ཞིང་ལ་འདེབས།།
སྒོ་གསུམ་གུས་པའི་རྐྱང་ཕྱག་ཞིང་ལ་འཚལ།།
རྒྱལ་བ་བློ་བཟང་གྲགས་པའི་གདོང་མདུན་ནས།།
ལྟོག་སྒོམ་འདྲེས་མའི་འཚོ་བ་རོལ་མྱོང་བྱས།།
རྒྱ་བོད་འདྲེས་མའི་གྲོགས་འགར་གྲོཊ་ལ་བསྟེན།།
བརྩོན་འགྲུས་ཆེན་པོ་ཐོབ་པའི་སྨོན་ལམ་གཏབ།།
གསེར་གདོང་ཆེན་པོ་མཇལ་བའི་སྨོན་པ་ཤོར།།
རྒྱལ་བའི་འཛད་པ་དྲན་ནས་དད་པ་སྐྱེས།།
སྒོ་གསུམ་རྐྱང་ཕྱག་འཚལ་ནས་ལུས་པོ་འདར།།
དང་པོའི་སྨོན་པ་རྗོགས་པའི་སྨོན་ལམ་འདེབས།།
ལ་དང་ལུང་བ་བརྒྱུད་ནས་ཞིང་འདིར་མཇལ།།
དང་པོ་མཇལ་བའི་དགའ་བ་ཚད་མེད་སྐྱེས།།
བར་དུ་རྐྱང་ཕྱག་ཕུལ་བའི་ཨ་ཐང་ཆད།།
མཐའ་མར་ཨ་གསར་ཡལ་བའི་གསོལ་བ་བཏབ།།
དེ་རིང་གི་སེམས་ཚོར། ༢༠༡༣ལོའི༨པའི་༡༩ཉིན་སྐུ་འབུམ་ནས།
རྒྱང་གི་འཚོ་བ། ༼མུ་འགོད༽
སྦྲང་དཀར་རྩམ་པའི་བྲོ་བ་མེད།།
ཤ་མར་ཇ་ཡིས་མཆོད་པ་མེད།།
རྣམ་པར་དག་པའི་སྨོན་ལམ་འདིས།།
ཞིང་འདིར་མཇལ་བའི་སྐལ་བཟང་ཐོབ།།
མི་རིགས་མི་འདྲ་མང་པོ་གདའ།།
ཆོས་ལུགས་མི་འདྲ་མང་པོ་གནས།།
སྐུ་འབུམ་རྒྱལ་བའི་གདོང་མདུན་ནས།།
འདི་ཕྱིའི་ལེགས་ཚོགས་ཞིང་འདིར་བཅོལ།།
རྒྱ་གོར་དཀར་བོ་ཁ་ལ་ཞིམ།།
ཆུ་རྐྱང་ཞིམ་པོ་སྐོམ་ལ་དྲིན།།
བརྐྱངས་ཕྱག་ཕུལ་བའི་དགེ་བ་ཡིས།།
ངན་ངོན་འཚོ་བ་སྐྱིད་དུ་ཤར།།
ཕ་ཡུལ་བསྐྱུར་ནས་རྒྱང་ལ་བཞུད།།
བྱམས་པར་བྲལ་ནས་ཞིང་འདིར་མཇལ།།
རྒྱལ་བའི་ཞིང་ལ་སྒོ་གསུམ་གུས།།
བློ་བཟང་གྲགས་པར་གསོལ་བ་འདེབས།།
༢༠༡༣/༨/༢༠ཉིན་སྐུ་འབུམ་བྱམས་པ་གླིང་ནས་སྦྱར།
སྐུ་མདུན་གྱི་མཐོང་པ།༼མུ་འགོད༽
རྒྱལ་བའི་གསེར་གདོང་སྐུ་མདུན་ནས།།
རྒྱ་མོ་འགའ་ཡིས་གདུང་རབས་གླེང་།།
རྗེ་བོའི་རྣམ་ཐར་ཕྲན་ཙམ་གླེང་།།
ཉན་མཁན་འགའ་ལ་མགོ་སྐོར་ཕེབས།།
བློ་བཟང་བླ་མའི་གདུང་མདུན་ནས།།
རང་རིགས་སྤུན་ཟླ་ལྐུག་པ་རེད།།
རྗེ་བོའི་རྣམ་ཐར་བཤད་མཁན་མེད།།
རང་ལྕེ་གཞན་ལ་ཤོར་བའི་སྐྱོ།།
གསེར་གདོང་ཐོག་རིམ་གོང་མ་ན།།
སྟོང་མཆོད་མཆོད་པ་གྲལ་དུ་བསྒྲིགས། །
འདོན་མཁན་ཨ་ཁུ་ངོ་སོ་བསྟོད།།
མཆོད་རྗས་ཆད་པ་ཡིད་རེ་སྐྱོ།།
གྲྭ་ཤག་འགའ་ཡིས་སྒོ་འགྲམ་ན།།
སྒོ་སྲུང་བཙན་པོ་རྒྱ་ཁྱིའི་གཟུགས།།
ཅང་མེད་ང་ཡིས་གཉེན་དུ་གྱུར།།
སྒོ་སྲུང་འདི་ནི་གང་གི་སྤྲུལ།།
༢༠༡༣/༨/༢༡ཉིན་སྐུ་འབུམ་ནས།
སྐུ་འབུམ་ཡུལ་གྱི་བསྟོད་པ་ཐན་ཐུན།༼མུ་འགོད།༽
འཁོར་བཞི་ཁ་ལོ་སྒྱུར་མཁས་པ།།
སྐད་རིགས་སྣ་ཚོགས་བཤད་མཁས་པ།
སྒོ་སྲུང་བཙན་པོ་སྐྱོང་མཁས་པ།།
སྐུ་འབུམ་དགོན་པའི་གྲྭ་བཙུན་བསྟོད།།
རྒྱང་རིང་མགྲོན་པོ་ཕེབས་ལ་སྤྲོ།།
པར་ཆས་ཆེ་ཆུང་འདོགས་ལ་སྤྲོ།།
མཚམས་སྦྱོར་ཕྲན་ཙམ་གླེང་ལ་སྤྲོ།།
གནས་སྐོར་མི་སྣ་ཁྲིད་མཁན་བསྟོད།།
རྒྱལ་བའི་མཛད་རྗེས་འདི་ན་མང་།།
དད་ལྡན་སྐྱ་སེར་འདི་ན་མང་།།
སྦྲགས་སྐད་བཤད་མཁས་འདི་ན་མང་།།
སྐུ་འབུམ་དགོན་པའི་ཁོར་ཡུག་བསྟོད།།
རྒྱང་རིང་མགྲོན་པོ་བྱམས་པའི་བརྩེ།།
ཁ་བརྡ་ཐན་ཐུན་གླེང་བར་སྤྲོ།།
མགྲོན་པོ་མགྲོན་ལ་བསུ་པར་དགའ།།
གནས་ཚང་བདག་པོ་བདག་གིས་བསྟོད།།
༢༠༡༣/༨/༢༢ཉིན་སྐུ་འབུམ་དགོན་པའི་གནས་ཚང་ནས་བརྩེ་མིག་ནས་མུ་འབྲེལ་སེམས་ཚོར
ཐེངས་བཞི་བ་སྦྱར་བ་བོ།
མཚན་གུང་གི་མཐོང་བ་དངོས་བྲིས།༼མུ་འགོད།༽
གནས་ཚང་སྐུ་ལོའི་ངུར་བ་འདུ་རུ་རུ།།
སྒོ་སྲུང་བཙན་པོའི་སུག་སྐད་གྲག་ལྷང་ལྷང་།།
མདུན་གྱི་ཆུ་བོའི་བཞུར་སྒྲ་སྙན་ཤག་ཤག།
མཚན་རིང་ཡིད་ཀྱི་སེམས་ཚོར་ཐོལ་གྱིས་བྲིས།།
གློག་སྒྲོན་སྣ་བརྒྱའི་འོད་མདངས་ཆ་ལམ་ལམ།།
འདོན་བཟང་ཨ་ཁུའི་དྲིལ་སྒྲ་སིལ་ལི་ལི།།
མཚམས་བཅོད་གཅོང་སྒྲའི་སྒྲ་སྙན་སྙན་ལྷང་ལྷང་།
མཚན་གུང་མཐོང་བ་ཤོག་དཀར་ཐང་ལ་ཕབ།།
དགོང་གི་སྐར་མའི་ཚོགས་རྣམས་སྟོང་སང་སང་།།
བརྒྱད་པའི་སྟོང་རླུང་རྒོད་པོ་ལྡང་འུར་འུར།།
འབུམ་ཕྱག་བྲེལ་བའི་མི་བུ་ཚང་ཤུག་ཤུག།
གསེར་གདོང་མདུན་གྱི་མཐོང་པ་ཐོལ་གྱིས་ཤོར།།
རྐྱང་ཕྱག་ཕུལ་བའི་མི་བུ་ཐང་ཆད་ཆད།།
སྐོམ་གྱིས་མནར་བའི་ཆུ་རྐྱང་དྲོ་ཞིམ་ཞིམ།།
ཨ་ཐང་ཆད་པའི་ལུས་པོ་འདར་སུག་སུག།
བརྗེད་མེད་མི་ཚེའི་དྲན་ཤིང་འདི་ན་གདའ།།
༢༠༡༣/༨/༢༣ཉིན་གསེར་གདོང་ཆེན་མོའི་མདུན་ནས་ཐོལ་གྱིས་ཤོར།
ཙོང་ཁ་བདེ་མོ་བྱོས།༼མུ་འགོད༽
ཕ་མའི་བཀའ་ཆད་ཐོན་ནས་འགྲོ་ལ་རན།།
བཙན་པོའི་བཀས་བཅད་ཐོན་ནས་འགྲོ་ལ་རན།།
གནས་སྐབས་བྱ་བའི་དབང་གི་འགྲོ་ལ་རན།།
འདིར་འཛོམས་གྲོགས་པོ་ཚང་མ་བདེ་མོ་བྱོས།།
རྒྱ་ལྕང་ལོ་མ་སེར་པོ་གང་སར་གཏོར།།
ཕྱོགས་ཡོང་སྐུ་མགྲོན་ཚང་མ་ཡུལ་ལ་བྲེལ།།
ཟང་ཟིང་གྲོང་ཁྱེར་འདི་ནས་རང་ཡུལ་དྲན།།
ང་ཡང་མི་འདུག་བདེ་མོ་འཇོག་ལ་རན།།
གནས་ཚང་བདག་པོའི་སྐུ་དྲིན་བརྗེད་མེད་ཡིན།།
རྐྱང་ཕྱག་ཕུལ་བའི་འཚོ་བ་བརྗེད་མི་སྲིད།།
ཙོང་ཁའི་ཡུལ་ནས་འཕྲད་པའི་གྲོགས་པོ་ཚོ།།
བརྩེ་མིག་མི་འདུག་ཡུལ་ལ་འགྲོ་རན་སོང་།།
མི་ཚེའི་བརྗེད་མེད་དྲན་ཤིང་འདི་ན་གདའ།།
དད་ལྡན་སྐྱ་སེར་ཁྲི་སྟོང་འདི་ན་གདའ།།
བདག་གི་མུ་འབྲེལ་ཟིན་བྲིས་འདི་ན་གདའ།།
དེ་རིང་མུ་འབྲེལ་ཟིན་བྲིས་རྗོགས་པར་བྱས།།
མཐར་གསེར་གདོང་ཆེན་མོའི་མདུན་གྱི་ཆུ་རྐྱང་འཐུང་རོགས་ཀྱི་གྲོགས་པོ་ཡོངས་ཀྱི་སྨོན་འདུན་མྱུར་མོར་འགྲུབ་པའི་སྨོན་ལམ་འདེབས།
༢༠༡༣/༨/༢༤
ཉིན་སྐུ་འབུམ་གྱི་ཟིན་བྲིས་རྗོགས་སོ། །
| 