འཇང་ཚ་འཁྱམ་པོ།

ཁེར་རྐྱང་གིས་སེམས་པ་གཅུན་ན་

ཁྱོད་ཀྱིས་

སྒྲ་མི་དག་པའི་བརྩེ་གླུ་ཞིག་སྣ་གླུ་རུ་གྱེར་སྲིད་དམ།

དེ་སྲིད་ན་

མཛེས་པའི་མི་

ངའི་དུང་བ་བརྩེ་གླུ་དེ་ཡིན་པར་སྨོན་

ཁེར་རྐྱང་གི་སྐྱོ་ངལ་སེལ་བའི་

སྒྲ་མི་དག་པའི་བརྩེ་གླུ་དེ་ཡིན་པར་སྨོན།

དྲ་རྒྱ་ཡིས་སྙིང་གཏམ་བསྐྱལ་ན་

ཁྱོད་ཀྱིས་

མངོན་མི་གསལ་བའི་འཛུམ་མདངས་ཤིག་ཞལ་ངོ་རུ་ཤར་ཡོད་དམ།

དེ་ཡོད་ན་

དམར་བའི་མི་

ངའི་དུང་བ་དེ་སྙིང་གཏམ་རང་ཡིན་པར་སྨོན་

ཞལ་ངོ་རུ་འཛུམས་མདངས་སློང་བའི་

ཚགས་མི་དམ་པའི་སྙིང་གཏམ་རང་ཡིན་པར་སྨོན།

ཚིག་ཚོགས་ཀྱི་རྩེད་རྡོ་བསྒྲིགས་ན་

ཁྱོད་ཀྱིས་

ཅི་མི་སྙམ་པར་༼སྙན་ངག་༽དེ་མིག་གིས་འདེད་མྱོང་ངམ།

དེ་མྱོང་ན་

བརྩེ་བའི་མི་

ངའི་དུང་བ་༼སྙན་ངག་༽དེ་ཡིན་པར་སྨོན་

མིག་འབྲས་ཀྱི་ཡུལ་དུ་བཟུང་བའི་

ཡི་མ་རིང་བའི་༼སྙན་ངག་༽དེ་ཡིན་པར་སྨོན།