དྲྭ་ཐོག་བཀོད་པའི་རྐྱེན་བྱས་ནས་དེ་རིང་འདིའི་སྐོར་རང་ཉིད་ཀྱིས་དམ་བཅའ་བཞག་དགོས་ཐུག་སོང་།

     རྣམ་འགྲེལ་འཛིན་གྲྭ་རྒས་པ་ཚང་གིས། ཞིག་པ་ལ་མངོན་དུ་ཕྱོགས་པའི་ཁང་པ་སྐད་ཅིག་ཐ་མ་ཆོས་ཅན། རང་གྲུབ་དུས་སྐད་ཅིག་གཉིས་པའི་དུས་སུ་མི་སྡོད་དེ། ཡུན་ཐུང་བའི་དངོས་པོར་ཡིན་པའི་ཕྱིར། ཞེས་པའི་རྟགས་འདི་ཡང་དག་ཡིན་ནམ། ཞེས་རྩོད། རང་གིས་རྫིག་ཉམས་ཅུང་ཟད་སྟོན་ཏེ། ཡིན་ཞེས་ལན་བཏབ་ཁ་བྱས། རྩོད་པ། སྐད་ཅིག་མའི་དོན་ལ། རང་གྲུབ་དུས་སྐད་ཅིག་གཉིས་པའི་དུས་སུ་མི་སྡོད་པ་འཇོག་གམ། གལ་སྲིད་མ་བཞག་ན། གཞུང་ཆེན་མོ་དང་འགལ་ལོ་ཞེ་ན། ལན། འཇོག་ཞེས་པ་ལ། རྩོད་པ། འོ་ན། ཕྱི་རྒོལ་ཡང་དག་གིས་བསྒྲུབ་བྱ་གྲུབ་པའི་ཚེར་མི་རྟག་པའི་དོན་གསར་དུ་གྲུབ་པར་མ་ཡིན་པར་ཐལ། སྐད་ཅིག་མ་རྟོགས་པའི་ཕྱིར་ཏེ། ཡུན་ཐུང་བའི་དངོས་པོ་སྐད་ཅིག་མར་རྟོགས་པའི་ཕྱིར་ཏེ། ཡུན་ཐུང་བའི་དངོས་པོ་རང་གྲུབ་དུས་སྐད་ཅིག་གཉིས་པའི་དུས་སུ་མི་སྡོད་པར་རྟོགས་པའི་ཕྱིར། ཁྱབ་པ་ཁས། ཞེས་པ་ལ། ལན། ཡུན་ཐུང་བའི་དངོས་པོ་སྐད་ཅིག་མ་རྟོགས་ནའང་སྐད་ཅིག་མ་རྟོགས་པའི་ངེས་པས། ཕྱི་རྒོལ་གྱིས་བསྒྲུབ་བྱ་གྲུབ་པའི་ཚེར་མི་རྟག་པའི་དོན་གསར་དུ་གྲུབ་པར་གནོད་པ་མེད། ཅེས་ལན་འདེབས། རྩོད་པ། འོ་ན། ཡུན་ཐུང་བའི་དངོས་པོ་སྐད་ཅིག་མར་རྟོགས་ན། སྐད་ཅིག་མ་རྟོགས་དགོས་པར་ཐལ། ཡུན་ཐུང་བའི་དངོས་པོའི་སྟེང་གི་མི་རྟག་པར་རྟོགས་ན། མི་རྟག་པ་རྟོགས་དགོས་པའི་ཕྱིར་ཏེ། དེའི་སྟེང་གི་དགག་བྱ་རྟག་པ་ཁེབས་ན། མི་རྟག་པ་ཡོངས་གཅོད་ལ་གྲུབ་དགོས་པའི་ཕྱིར། ཞེས་པ་ལ། ལན། ཡུན་ཐུང་བའི་དངོས་པོ་མི་རྟག་པར་རྟོགས་ཚུལ་དང་། དེའི་སྟེང་གི་མི་རྟག་པར་རྟོགས་ཚུལ་ལ་གནམ་སའི་ཁྱད་པར་ཡོད། ཅེས་པ་ལ། རྩོད་པ། དེ་གཉིས་ལ་ཁྱད་པར་མེད་པར་ཐལ། བུམ་པ་ཆོས་ཅན་དུ་གཟུང་བའི་ཚེ་ཁྱད་པར་མེད་པ་གང་ཞིག མཚུངས་པའི་ཕྱིར། ཞེས་པ་ལ། ལན། མི་མཚུངས་ཏེ། ཡུན་ཐུང་བའི་དངོས་པོ་མི་རྟག་པར་རྟོགས་ཚུལ་རགས་པའི་མི་རྟག་པར་རྟོགས་ཚུལ་ཡིན་པ་འཇིག་རྟེན་གྲགས་ཚུལ་གྱི་དབང་གིས་ཡིན་གྱི། གཅིག་ཤོས་ལ་དེ་ལྟར་མི་དགོས་པའི་ཕྱིར། ཞེས་པ་ལ། རྩོད་པ། གད་མོ་སློང་གིན་དེ་གཉིས་གཅིག་པ་ཡིན་པའི་ཕྱིར་ཞེས་འབད་བརྩོན་གནང་འདུག་པས་ཚར་ཡང་དག་པ་འགའ་ཞིག་རག་སོང་། དེ་ནས། ཡང་བསྐྱར་རྩ་བའི་དམ་བཅའ་ལ། དེ་འདྲའི་རྟགས་དེ་རྟགས་ཡང་དག་མ་ཡིན་པར་ཐལ། རྗེས་ཁྱབ་མ་གྲུབ་པའི་ཕྱིར་ཏེ། ཕྱི་རྒོལ་གྱིས་རྟགས་ཆོས་དོན་གསུམ་ཚད་མས་མ་ངེས་པའི་ཕྱིར་ཏེ། ཞིག་པ་ལ་མངོན་དུ་ཕྱོགས་པའི་ཁང་པ་སྐད་ཅིག་ཐ་མ་ཚད་མས་མ་ངེས་པའི་ཕྱིར། ཞེས་གསུངས། ལན། རྟགས་མ་གྲུབ་ཅེས་པ་ལ། རྩོད་པ། ཞིག་པ་ལ་མངོན་དུ་ཕྱོགས་པའི་ཁང་པ་སྐད་ཅིག་ཐ་མ་ཆོས་ཅན། སྐབས་ཀྱི་ཕྱི་རྒོལ་གྱིས་ཚད་མས་མ་གྲུབ་པར་ཐལ། ཁྱོད་དུས་མཐའི་སྐད་ཅིག་མ་ཡིན་པའི་ཕྱིར། ཞེས་གསུངས། ལན། ཁྱབ་པ་མ་བྱུང་ཞེས་པ་ལ། རྩོད་པ། ཁྱབ་པ་ཡོད་པར་ཐལ། ཁྱོད་དུས་མཐའི་སྐད་ཅིག་མ་ཡིན་ན། ཁྱོད་མངོན་སུམ་དུ་རྟོགས་པའི་ཚུར་མཐོང་མེད་དགོས་པའི་ཕྱིར། ཞེས་པ་ལ། ལན། ཡང་ཁྱབ་པ་མ་བྱུང་སྟེ། ཁྱོད་དུས་མཐའི་སྐད་ཅིག་མ་ཡིན་ན། ཁྱོད་མངོན་སུམ་དུ་རྟོགས་པའི་ཚུར་མཐོང་མེད་ཀྱང་། ཚུར་མཐོང་གི་རྒྱུད་ལ་ཁྱོད་རྟོགས་པའི་ཚད་མ་མེད་མི་དགོས། ཞེས་པ་ལ། རྩོད་པ། འོ་ན། དེ་འདྲའི་ཕྱི་རྒོལ་ཡང་དག་གི་རྒྱུད་ལ་སྐད་ཅིག་རྟོགས་པའི་ཚད་མ་ཡོད་པར་ཐལ། ཞིག་པ་ལ་མངོན་དུ་ཕྱོགས་པའི་ཁང་པ་སྐད་ཅིག་ཐ་མ་རྟོགས་པའི་ཚད་མ་ཡོད་པ་གང་ཞིག དེ་སྐད་ཅིག་མ་རྟོགས་པའི་ཚད་མ་ཡིན་པའི་ཕྱིར། ཞེས་པ་ལ། ལན། རྟགས་མ་གྲུབ་སྟེ། ཞིག་པ་ལ་མངོན་དུ་ཕྱོགས་པའི་ཁང་པ་སྐད་ཅིག་ཐ་མ་རྟོགས་ཚུལ་ལ་རགས་པ་དང་འབྲེལ་བར་རྟོགས་ཚུལ་གཅིག་དང་། ཕྲ་མོ་དང་འབྲེལ་བར་རྟོགས་ཚུལ་གཉིས་ཡོད་པས་གང་རྟོགས་ནའང་རྟོགས་པའི་གོ་ཆོད་པའི་ཕྱིར། ཞེས་པ་ལ། རྩོད་པ། མེད་པར་ཐལ། ཁྱོད་མི་རྟག་པ་ཕྲ་མོ་ཡིན་པའི་ཕྱིེར། ཞེས་པ་ལ། ལན། ངོ་མ་དེ་ཅུང་ཟད་དཀའ་ཁུ་ཡ། ཞེས་པ་ལ། དེ་ནས། རྩོད་པ་བས་ཅུང་ཟད་འཕག་འཚག་རྒྱག་གིན་རྩོད་པ་མང་བོ་སློང་སོང་བས་ཚར་ཡང་མང་བོ་ཞིག་རག་སོང་། རང་གི་སེམས་ལ་འཆར་ཚུལ་རྣམས་ཡག་པོ་ཞིག་བཤད་ས་རག་མ་སོང་། འདི་ལྟར། དཔེར་ན། གང་ཟག་རང་དབང་བ་ཆོས་ཅན། རང་བཞིན་གྱིས་མེད་དེ། ཕུང་བོ་དང་རང་བཞིན་གཅིག་དང་ཐ་དད་གང་དུ་ཡང་མེད་པའི་ཕྱིར་ཞེས་པའི་རྟགས་དེའི་རྟགས་ཆོས་དོན་གསུམ་ཚད་མས་ངེས་ཚུལ་དང་། བསྒྲུབ་བྱ་ཚད་མས་ངེས་ཚུལ་ལ་གནམ་སའི་ཁྱད་པར་ཡོད་པ་བཞིན་དུ། སྔར་གྱི་རྟགས་དེའི་རྟགས་ཆོས་དོན་གསུམ་ཚད་མས་ངེས་ཚུལ་དང་། བསྒྲུབ་བྱ་ཚད་མས་ངེས་ཚུལ་ལ་ཁྱད་པར་ཡོད་པ་འདོད།

    གསལ་ཁ་བཤད་ན། གང་ཟག་རང་དབང་བ་ཆོས་ཅན། ཞེས་པའི་རྟགས་དེའི་རྟགས་ཆོས་དོན་གསུམ་ཚད་མས་ངེས་ཚུལ། གང་ཟག་རང་དབང་བའི་དོན་སྤྱི་ཚད་མས་ངེས་ཚུལ་སོགས་ཡིན་པ་བཞིན། གཅིག་ཤོས་ལའང་ཞིག་པ་ལ་མངོན་དུ་ཕྱོགས་པའི་ཁང་པ་སྐད་ཅིག་ཐ་མ་ཚད་མས་ངེས་ཚུལ་ནི། འཇིག་རྟེན་གྲགས་ཚུལ་གྱི་དབང་གིས་རགས་པ་ངེས་ཚུལ་ཡིན་བསམ་བཞིན་ཡོད།

    དོན་བསྡུས་ན། ཞིག་པ་ལ་མངོན་དུ་ཕྱོགས་པའི་ཁང་པ་སྐད་ཅིག་ཐ་མ་རྟོགས་ཚུལ་འཇིག་རྟེན་གྲགས་ཚུལ་གྱི་དབང་གིས་རགས་པ་རྟོགས་ཚུལ་ཡིན་ཀྱང་། དེ་རང་གྲུབ་དུས་སྐད་ཅིག་གཉིས་པ་མི་སྡོད་པར་རྟོགས་ཚུལ་དངོས་ཡོད་གནས་ཚུལ་གྱི་དབང་གིས་ཕྲ་བའི་སྐད་ཅིག་མ་རྟོགས་ཚུལ་ཡིན་པས། ཡུན་ཐུང་བའི་དངོས་པོ་དང་མི་མཚུངས་སོ་སྙམ་ཡང་ད་རུང་དཔྱད་དགོས་ཡ།

    བློ་སྦྱིན་གྱིས། སྤྱི་ལོ། ༢༠༡༥ ༦ ༤ ཉིན་ཞོགས་པ་སྔ་མོར་ཤར་མར་བྲིས།