དེབ་གསར་གསུམ་དང་སྐད་ཆ་མདོར་བསྡུས་མ།
_____གྲོགས་པོ་གྲོགས་པོར་རྒྱུས་ལོན་ཟབ།
ཁམས་ཀྱི་ན་གཞོན་རིགས་པ་སྨྲ་བ་དང་སྙན་ངག་པ་སྟོང་རུ་ཆོས་སྐྱོང་འགྱུར་མེད་དམ་གངས་ཅན་དབྱངས་འཚོ་ལགས་ཀྱིས་བརྩམས་གནང་མཛད་པའི་དེབ་གསར་གསུམ་མི་འགྱངས་པར་བོད་ཀྱི་སྤྱི་ཚོགས་སུ་འགྲེམས་སྤེལ་བྱ་རྒྱུ་རེད།
གཅིག
དེ་དག་ལས<<བོད་ཀྱི་སྒྲ་སྦྱོར་རིག་པ>>འི་སྟོད་ཆ་ནི། བོད་ཀྱི་བརྡ་སྤྲོད་སུམ་ཅུ་བ་ལ་ཞིབ་འཇུག་གི་བྱེད་ཐབས་གསར་པ་སྤྱད་དེ་དོགས་སློང་དང་ཞིབ་འགྲེལ་གྱིས་དཀའ་གནད་མང་པོ་ཞིག་ལ་སྒོ་ཀུན་ནས་གསེད་འགྲོལ་དང་གསར་བཤད་མང་དུ་གནང་ཡོད། དེ་ཡང་རྩོམ་པ་བོས་བོད་ཀྱི་གནའ་དེང་ཟུང་གི་བརྡ་གཞུང་ཀུན་ལ་ཐོས་བསམ་ཟབ་མོ་བྱས་ཤིང་མི་རིགས་གཞན་པའི་སྒྲ་སྦྱོར་རིག་པ་ལ་ཞིབ་འཇུག་དང་གཤིབ་བསྡུར་གནང་སྟེ་རང་གི་ཤེས་རབ་ཀྱི་རྩལ་གྱིས་ལེགས་པར་དཔྱད་པའི་བགྱི་བ་དང་དུ་བླངས་ཏེ་བརྩམས་པ་ཞིག་ལས། གཞུང་ཚིག་དང་གསུང་སྒྲོས་མང་པོ་ཞིག་མགོ་བཅད་མཇུག་རྡུམ་དང་། དེའི་ཁར་རང་ཚིག་འགའ་བསྣན་ཏེ་དེབ་རྒན་དུ་བཟོས་རྗེས་རང་གིས་བརྩམས་པ་ཡིན་ཞེས་སྒྲོག་པ་དག་དང་བསྡུར་ཐབས་མེད། དེབ་འདི་ནི་སློབ་གྲྭ་ཆུང་འབྲིང་ཆེ་གསུམ་དང་། དགོན་སྡེ་ཁག་གི་བཤད་གྲྭ་དང་ཡིག་གྲྭ། དེ་མིན་བོད་ཡིག་དགེ་རྒན་དང་ཞིབ་འཇུག་དགེ་རྒན་སོགས་ཀྱི་སློབ་དེབ་དང་ཁྲིད་དེབ་ལ་ཤིན་ཏུ་མཁོ་གལ་ཆེ་བ་པར་ཐེངས་དང་པོར་མཇལ་མྱོང་མཁན་རྣམས་ཀྱིས་ཐུགས་ལ་ངེས་སོ།།
གཉིས།
<<སྒྲ་སྦྱོར་རིག་པའི་ལྷན་ཐབས>>ནི་བོད་ཁམས་སྤྱི་བཤད་དང་། བོད་ཡིག་བྱུང་འཕེལ། ཐོན་མིའི་ལོ་རྒྱུས། སུམ་ཅུ་བའི་བརྡ་འགྲེལ། ལེགས་བཤད་ལྗོན་དབང་གི་བསྡུས་འགྲེལ། ཚིག་ཕྲད་ཁ་སྐོང་སོགས་ཀྱིས་གྲུབ་པའི་དེབ་ཅིག་ཡིན་པས། བོད་ཀྱི་བརྡ་སྤྲོད་ཀྱི་གཞུང་ལ་གསར་དུ་ཐོས་བརྩོན་བྱེད་བཞིན་པའི་ལས་དང་པོ་བ་ཞིག་གམ། གཞན་དུ་བོད་ཀྱི་ལོ་རྒྱུས་དང་། བོད་ཡིག་ཇི་ལྟར་བཟོས་པ། ཐོན་མིའི་འཁྲུངས་གཞིས། ཐོན་མིའི་གོང་དུ་བོད་ཡིག་ཡོད་མེད་སོགས་ལ་དཔྱད་པ་གནང་འདོད་མཁན་ཞིག་ལ། ཚིག་ཉུང་དོན་འདུས་ཀྱི་སྒོ་ནས་གོ་བ་རྣལ་མ་ཞིག་དང་རྒྱུ་ཆ་གསར་པ་རེ་མཁོ་འདོན་བྱ་ངེས།
གསུམ།
<<མེ་ཏོག་སིལ་ཕྲེང>>ནི་ཚིགས་བཅད་རྐྱང་པ་བརྒྱ་ཕྲག་གཅིག་དང་ཟུར་བཀོད་སྙན་ངག་འགས་གྲུབ་པའི་དེབ་ཆུང་ཞིག་ཡིན་ལ། རྩོམ་པ་བོ་ཁོ་རང་གི་བསམ་བློ་དང་སྒྱུ་རྩལ་གྱི་ལྟ་གྲུབ། སྒེར་གྱི་རྩོམ་གཤིས་སོགས་འབུར་དུ་ཐོན་པའི་སྙན་ངག་རེ་རེས་ང་ཚོ་ཚོར་བས་མི་ཆུམས་པའི་འཆར་ཡན་གྱི་སྨུག་པ་ལང་ལོང་དང་། གསེད་དུ་མི་གཏུབ་པའི་སྒྱུ་འཕྲུལ་གྱི་སླུ་བྲིད་རབ་རིབ། རོལ་བས་མི་ཚིམས་པའི་སྒྱུ་རྩལ་གྱི་དྲི་ངད་སྟུག་པོའི་ཀློང་ཡངས་པོར་རང་དབང་མེད་པར་ཁྲིད་འགྲོ་ངེས་པས། སྙན་ངག་གི་དེབ་གསར་འདི་ནི་ཚེར་མ་དང་རྩྭ་ལྡུམ་མང་པའི་བོད་ཀྱི་རྩོམ་རིག་གི་ཞིང་ས་རུ་གསར་དུ་འབུས་པའི་མེ་ཏོག་ཁྱད་པར་བ་ཞིག་ཡིན་པའི་ཡིད་ཆེས་ཡོད།
བཞི།
དེབ་གསུམ་པོར་རྒྱལ་ནང་ནས་འགྲེམས་སྤེལ་བྱེད་ཆོག་པའི་དཔེ་རྟགས་ཚད་ལྡན་ཡོད་ལ།
<<བོད་ཀྱི་སྒྲ་སྦྱོར་རིག་པ>>དང་<<སྒྲ་སྦྱོར་རིག་པའི་ལྷན་ཐབས>>གཉིས་སློབ་གྲྭ་དང་དགོན་སྡེ་འགར་སློབ་དེབ་དུ་སྤྲད་རྗེས་ཀྱི་དེབ་ལྷག་རྣམས་དང་། <<མེ་ཏོག་སིལ་ཕྲེང>>བཅས་སྤྱི་ཚོགས་ཀྱི་དཔེ་ཁང་སོ་སོ་དང་དགོན་སློབ་ཚང་མར་སྡེབ་འཚོང་དང་སིལ་འཚོང་གི་ལམ་ནས་མཁོ་སྤྲོད་བྱ་རྒྱུ་ཡིན་པས་ལྷན་རྒྱས་ནས་རྒྱབ་སྐྱོར་དང་མཉམ་འབྲེལ་ཡོད་པའི་རེ་བའང་ཆེ།
ཞེས་ལྡོང་འཆི་དབང་གིས་ཁམས་ཀྱི་བྱང་སྡེ་ཉི་མ་རྫ་ཆུ་ཁ་ནས་སྦྱར།