ཁ་བ་སྙིང་ལྕགས་ལགས་རྗེས་དྲན་དང་ཁོང་ལ་སློབ་སྦྱོང་བྱེད་བཞིན་ཡོད།
  草原梦想欢迎你! དེ་རིང་ནི་སྤྱི་ལོ 2024 ལོའི་ཟླ 6 ཚེས 16 རེས་གཟའ་ཉི་མ་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། ནང་འཇུག འདི་ནས་ང་དང་གླེང་མོལ་བྱ།
གཙོ་ངོས།
ཆོས་ལུགས།
རྩོམ་རིག
ལོ་རྒྱུས།
རུས་རྒྱུད།
དམངས་སྲོལ།
སྒྱུ་རྩལ།
དཔལ་འབྱོར།
མི་སྣ།
སློབ་གསོ།
ཕྱོགས་སྟོན་་་་ གཙོ་ངོས།» གཙོ་ངོས།» བོད་ནང་གསར་འགྱུར། »ཁ་བ་སྙིང་ལྕགས་ལགས་རྗེས་དྲན་དང་ཁོང་ལ་སློབ་སྦྱོང་བྱེད་བཞིན་ཡོད
ཁ་བ་སྙིང་ལྕགས་ལགས་རྗེས་དྲན་དང་ཁོང་ལ་སློབ་སྦྱོང་བྱེད་བཞིན་ཡོད།
རྩོམ་སྒྲིག་པ།  ཁཱ་ཤེས་རབ་རྒྱ་མཚོ། སྤེལ་དུས། 2015/6/30ལྟ་ཀློག (5652)རྩོམ་ཁུངས: ངེད་དྲ་བ།པར་འདེབ།

ཁ་བ་སྙིང་ལྕགས་སྐུ་གཤེགས་པའི་ཡུལ་དངོས་དེར་གྲྭ་པ་རྣམས་འབྱོར་ནས་གསུར་དང་བསྔོ་བ་གནང་བཞིན་པ།

ཚེས་༢༩ཉིན་བོད་ཀྱི་རྩོམ་པ་པོ་ཞོགས་དུང་སོགས་ཁ་བ་སྙིང་ལྕགས་སྐུ་གཤེགས་པའི་ཡུལ་དངོས་དེར་འབྱོར་ནས་མྱ་ངན་དང་དྲན་གསོ་བྱེད་བཞིན་པ།

     མིག་སྔར་བོད་ཀྱི་ན་གཞོན་སྙན་ངག་པ། བྱིས་སྒྲུང་རྩོམ་པ་པོ། ཁ་བ་སྙིང་ལྕགས་ལགས་ཀྱིས་བོད་ཀྱི་སྐྱེས་ཁམས་ཁོར་ཡུག་སྲུང་སྐྱོབ་ཀྱི་ཆེད་དུ་རང་གི་ཚེ་སྲོག་ཤོར་བར་མྱ་ངན་དང་། ཁོང་ལ་མཚོ་སྔོན་པོའི་འགྲམ་ངོགས་ནས་དྲན་གསོའི་རྡོ་རིང་ཞིག་བཞེངས་པར་ས་གནས་འགོ་ཁྲིད་དང་སྲིད་གཞུང་ལ་རེ་བ་ཞུ་མཁན་གྱི་སྐད་འཕྲིན་ཚོགས་པ་མང་དུ་མཆིས་ཤིང་།  ད་དུང་ཁོང་གི་བརྩམས་ཆོས་རྣམས་འཚོལ་བསྡུ་བྱེད་མཁན་དང་ཁ་བ་སྙིང་ལྕགས་ཁོང་དྲན་གསོ་ཞུ་པ་དང་རྗེས་སུ་ཡི་རངས་བྱེད་མཁན་གྱིས་སྤྱི་ཚོགས་འདིར་ཁྲིག་ཆ་དོད་པོ་བྱུང་ཡོད།



ཁ་བ་སྙིང་ལྕགས་ལ་དྲན་གསོ་ཞུ་སྟངས་ཤིག

སྒོ་ཤེར།

       སྐྱེ་འཆི་གཉིས་ནི་ཚེ་སྲོག་རེ་རེས་མ་བརྒྱུད་ཐུ་མེད་ཀྱི་ཆོས་ཉིད་ཅིག་ཡིན་པས། འཇིག་རྟེན་ཁམས་ཆེན་པོའི་ཁྱོན་གྱི་གྲོག་ཚང་ཁ་བརྡོལ་བ་འདྲ་བའི་སྐྱེ་བོའི་ཚོགས་ལས། ཉིན་ལྟར་གང་ཟག་མང་པོ་ཞིག་འཆི་བདག་གིས་ཞགས་པས་ཟིན་པ་ལྟ་ཅི། བདག་ལ་ངོ་ཤེས་ཀྱི་མི་ཚོགས་ཆུང་ངུ་ཞིག་མཆིས་པ་དེའི་ནང་ནས་ཀྱང་། རྒན་གཞོན་གྱི་གོ་རིམ་མེད་པར་རེ་རེ་བཞིན་གློ་བུར་དུ་མེ་སྟག་ཡལ་ཡལ་བྱས་ཏེ། ཕྱི་མའི་ལམ་དུ་ཆས་ཟིན་པའི་སྐད་ངན་སྐབས་དང་སྐབས་སུ་ཐོས་ཡོང་།

      དྲང་མོར་བཤད་ན། མི་རེ་རེ་གསོན་དུས་ཀྱི་ཕྱག་རྗེས་མི་འདྲ་བ་དང་། འཆི་བའི་རྒྱུ་རྐྱེན་མི་འདྲ་བ། རང་དང་འགྲོགས་འདྲིས་ཆེ་ཆུང་མི་འདྲ་བ་སོགས་ཀྱིས། ཁོང་ཅག་འཆི་བའི་གཏམ་གྱིས་སེམས་ལ་ན་ཟུག་འབྱིན་སྟངས་དང་། སེམས་སྡུག་ཆེ་ཆུང་ཡང་མི་འདྲ་བ་འོང་གི་འདུག

     མདང་དགོང་གློ་བུར་གཤེགས་པའི་ཁ་བ་སྙིང་ལྕགས་ནི། ཁོ་བོ་སྒེར་ལ་མཚོན་ན། ཕན་ཚུན་ངོ་ཤེས་ཤིང་མཉམ་དུ་ཁ་བརྡ་རེ་བྱེད་མྱོང་བ་ཙམ་ལས་འགྲོགས་འདྲིས་ཟབ་པའི་གྲོགས་པོ་དེ་འདྲ་གང་ཡང་མིན། འོན་ཏེ། ཁོང་གློ་བུར་འདས་པའི་གསར་འགྱུར་དེས་ངའི་ཡིད་ལ་ན་ཟུག་དམིགས་བསལ་བ་ཞིག་བྱིན་སོང་། དེ་རིང་ཉིན་གང་བོར་གནས་ཚུལ་དེ་ཡིད་ལ་ཡང་ཡང་འཆར་སོང་།

     རེད། ཁོང་ནི་རེ་བ་ཤིན་ཏུ་ཆེ་བའི་བོད་ཀྱི་ན་གཞོན་ཤེས་བརྩོན་ཉིས་ལྡན་ཞིག་ལགས་པས། ཕངས་སེམས་ཆེ་བ་ལྟ་ཅི་སྨོས་ཀྱང་རེ་ཞིག་དེའི་སྐོར་མི་གླེང་བར་བྱ། གལ་ཏེ་གླེང་ཚེ། "ཤི་བོར་བསྟོད་ཅིང་གསོན་པོར་སྡང་བ་བོད་མིའི་རང་བཞིན་རེད"སོགས་ཟེར་ནས་འགའ་རེས་སྡིགས་མོ་བྱེད་ཀྱང་སྲིད།

     འོན་ཏེ། ཅིས་ཀྱང་མ་གླེང་ཐུ་མེད་ཀྱི་གནད་གལ་བོ་ཆེ་ཞིག་ཡོད་པ་ནི། བགྲང་བྱའི་ཉག་མ་སོ་དྲུག་ལས་མ་སོན་པའི་ན་གཞོན་ཁོང་གི་ཚེ་སྲོག་རིན་པོ་ཆེ་དེ། མཚོ་སྔོན་པོའི་སྐྱེ་ཁམས་ཁོར་ཡུག་སྲུང་སྐྱོབ་ཀྱི་ཕྱིར་དུ་ཕུལ་བ་དེ་རེད།

      དེ་ཡང་མདོ་དབུས་མཐོ་སྒང་གི་སྣོད་བཅུད་ཀྱི་མ་ལག་ནི་མ་གཞི་ནས་གཉོམ་ཞིང་འཇིག་སླ་བའི་སྟེང་། ཕྱོགས་ཟུར་ཀུན་ནས་གཏོར་བརླག་བྱས་ན། དེ་ནི་བོད་ཙམ་དུ་མ་ཟད། ཨེ་ཤ་ཡའི་གླིང་སྤྱིའི་འབྱུང་འགྱུར་གྱི་ཕན་བདེ་དང་འབྲེལ་བའི་དོན་གནད་གལ་བོ་ཆེ་ཞིག་ཡིན་ནོ་ཞེས་ད་ལྟ་གཞུང་སྒེར་གཉིས་ཀའི་ཁ་ནས་མ་ཎི་ལྟར་ཟློ་བཞིན་ཡོད། དེ་ལྟར་ཟློ་བཞིན་ཟློ་བཞིན་མདོ་དབུས་མཐོ་སྒང་གི་རི་བོ་དང་སྤང་ལྗོངས། མཚོ་དང་མཚེའུ། རི་སྐྱེས་སྲོག་ཆགས། ནགས་ཚལ་དང་ཆུ་བོ་སོགས་ལ་ཁྲིམས་འགལ་གྱི་གཏོར་སྐྱོན་གཏོང་མཁན་ཕྱོགས་སོ་སོ་ན་ཉིན་རེ་བཞིན་ཇེ་མང་དུ་འགྲོ་དོན་ཅི་ཡིན་ནམ།

     བོད་ཀྱི་ཡུལ་གྲུ་སོ་སོ་རུ། མ་ཡུམ་ས་གཞི་ཆེན་པོའི་སྙིང་བཏོན། མིག་འབྲུས། ཡན་ལག་བྲེགས་པའི་གནས་སྐབས་དག་ཏུ། སྐྱེ་ཁམས་སྲུང་སྐྱོབ་ཀྱི་ཁྲིམས་གང་དུ་ཡོད་དམ། ཁོར་ཡུག་སྲུང་སྐྱོབ་ཀྱི་ལས་ཁུངས་རྣམས་གང་དུ་ཕྱིན་ནམ། ཉེན་རྟོག་པ་དང་བདེ་སྲུང་མི་སྣ་གང་དུ་བྲོས་སམ། གང་དུའང་ཕྱིན་མི་འདུག་སྟེ། མ་གཞི་ནས་སྐྱེ་ཁམས་ཁོར་ཡུག་ལ་གནོད་པའི་ལས་ཀྱི་སྦྱོར་བ་འཇིགས་སུ་རུང་བ་དག་ནི། ཞིབ་ཏུ་བལྟས་དུས། ས་ཁུལ་སོ་སོའི་དཔོན་པོ་ཤེད་ཅན་རྣམས་དང་ཚོང་པ་ཧམ་ཅན་ཚོའི་ལག་གདང་མཉམ་སྦྲེལ་གྱིས་བསྒྲུབས་པ་ཤ་སྟག་ཡིན་ཨང་།

     རྒྱུ་མཚན་དེའི་ཕྱིར། རང་རེ་གངས་ཅན་པའི་བྲང་གཞུང་དུ་འཛུམ་པའི་གཡུ་ཡི་མེ་ལོང་དྭངས་མོ་སྟེ། མཚོ་སྔོན་ཁྲི་ཤོར་རྒྱལ་མོ་ཞེས་གྲགས་པ་གང་དེའི་ནང་དུའང་། གང་འདོད་དུ་ཉ་རྒྱ་བཀྲམ་ནས་གསེར་ཉ་འཛིན་པ་སོགས་ཁྲིམས་འགལ་གྱི་བྱ་སྤྱོད་སྣ་ཚོགས་ཀྱང་ལོ་ལྟར་བསྟུད་མར་བྱུང་དང་འབྱུང་བཞིན་པའོ། །

     ལར་ཁྲིམས་འགལ་གྱི་ལས་སྦྱོར་དེ་དག་འགོག་རྒྱུ་ནི། ལག་ཏུ་སྙུ་གུ་ལས་མེད་པའི་རྩོམ་པ་པོ་ཞིག་གི་འོས་འགན་མ་ཡིན་པར། མིང་བྱང་རྫིག་པོ་བཀལ་བའི་ལས་ཁུངས་ག་གེ་མོ་དག་གི་གཡོལ་ཐབས་མེད་པའི་འགན་འཁྲི་ཡིན་ཏེ། ལས་ཀ་དེ་རིགས་བསྒྲུབ་པའི་ཕྱིར་དུ་ང་ཚོས་སྤྲད་པའི་ཁྲལ་དངུལ་གྱིས་ཁོ་བ་དག་གསོ་བཞིན་པ་མ་རེད་དམ།

     འོན་ཀྱང་ཁ་སང་དགུང་མོར། མཚོ་སྔོན་པོའི་གསེར་ཉ་རྐུ་མཁན་ཚོས་ལྕགས་ཀྱི་དྲ་རྒྱ་སྣ་ཚོགས་གང་འདོད་དུ་བཀྲམ་སྟེ། མཐོ་སྒང་གི་མེ་ལོང་ལྟ་བུའི་མཚོ་སྔོན་པོར་བཙན་འཛུལ་དང་དཔུང་འཇུག་བྱེད་ཀྱིན་པའི་དུས་སུ། རྟག་ཏུ་ཁྲལ་དངུལ་གྱིས་གསོས་པའི་འབྲེལ་ཡོད་ལས་ཁུངས་ཀྱི་མི་ཚོ་ནི། ཆང་གིས་མྱོས་ཤིང་ཤ་ཡིས་འགྲངས་པས། སྔུར་བ་འཐེན་གྱི་ཡོད་ས་རེད། རྨི་ལམ་གཏོང་གི་ཡོད་ས་རེད། གར་སོང་ཆ་མེད་དུ་གྱུར་འདུག

      སྐབས་དེར། རང་གི་ཕ་གཞིས་དང་མ་ཁྱིམ་ལ་ཞེན་ཆགས་ཟབ་ཅིང་། མཚོ་སྔོན་པོའི་སྣོད་བཅུད་ཀྱི་འཇིག་རྟེན་ལ་གནོད་སྐྱོན་གཏོང་གིན་པ་བློས་མ་བཟོད་པའི་ན་གཞོན་ཞིག་གིས། མཚོ་སྔོན་པོའི་གསེར་ཉའི་ཚེ་སྲོག་བསྐྱབ་པའི་ཆེད་དུ། གསེར་ཉ་ཁྲི་འབུམ་གྱིས་མི་ཁུག་པའི་རང་ཉིད་ཀྱི་ཚེ་སྲོག་རིན་དོད་དུ་ཕུལ་ནས། གཏན་དུ་མཚོ་འོག་ལ་འཛུལ་སོང་།

    ན་གཞོན་དེ་ཡི་མིང་ལ་ཁ་བ་སྙིང་ལྕགས་ཟེར། ཁོང་ནི་བོད་ཀྱི་ན་གཞོན་སྙན་ངག་པ་དང་། བྱིས་སྒྲུང་རྩོམ་མཁན་ཞིག་ཡིན་པར་མ་ཟད། སྐྱེ་ཁམས་ཁོར་ཡུག་སྲུང་སྐྱོབ་ཀྱི་ཉམས་ལེན་རྣལ་མ་ལྡན་པའི་བོད་མི་ཞིག་ཏུ་ཡང་གྱུར་པ་རེད།

     ངའི་རེ་བ་ལ། སྔར་ཨ་ཆེན་གངས་རྒྱུད་དུ་གཙོད་སྲུང་སྐྱོབ་ཀྱི་ཕྱིར་སྐུ་གཤེགས་པའི་དཔའ་པོ་རྒྱས་བཟང་བསོད་ནམས་དར་རྒྱས་དང་འདྲ་བར། ཁོང་ལ་ཡང་མཚོ་སྔོོན་པོའི་འགྲམ་དུ་དྲན་རྟེན་རྡོ་རིང་ཞིག་བཞེངས་ན་ཅི་མ་རུང་སྙམ་གྱི་འདུག

    ཡུལ་དེའི་རི་དང་། སྤང་ལྗོངས། མཚོ་དང་གསེར་ཉ་བཅས་པ་མཐོང་ས་ཞིག་ཏུ། མཚན་བྱང་རྡོ་ལ་བརྐོས་ནས་དྲན་རྟེན་ཞིག་བཞེངས་ན། ཁོང་ཡང་རང་གི་རྨི་ལམ་གྱི་རྒྱུན་བསྐྱངས་ནས་ལྷོད་པོར་བཞུགས་ཆོག་ལ། རང་རེའི་བུ་རབས་ཚ་རྒྱུད་རྣམས་ལ་སྐྱེ་ཁམས་ཁོར་ཡུག་སྲུང་སྐྱོབ་ཀྱི་འདུ་ཤེས་སད་པའི་གསལ་འདེབས་ཤིག་ཏུ་ཡང་འགྱུར་སྲིད་སྙམ།

༢༠༡༥/༦/༢༧/གྱི་ནུབ་མོར།


གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ།
རྩོམ་སྒྲིག་པ། མགར་ཚེ་རིང་བཀྲ་ཤིས།

འདྲེན་བཀོལ:
61.4K

  དཔྱད་གཏམ ( 2 )ཡོད།
དཔྱད་གཏམ་སྤེལ་ས།
སྤེལ་མཁན།
བཤེར་གྲངས།
urkx བཤེར་གྲངས་ཁ་སྐོང་བྱོས། ཡིག་འབྲི་བཞི་ལས་མང་མི་རུང་། ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་། ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།    
 སྤེལ་མཁན: མདོ་སྨད་ཆུ་འཁྱགས། སྤེལ་དུས:2015/6/30
སྤྱིར་འདི་ལྟར་མྱ་ངན་ཞུ་བ་ཧ་ཅང་བཟང་།ཡིན་ནའང་མི་ཞིག་འདས་རྗེས་སུ་བསྟོད་བསྔགས་བྱེད་པ་འདི་བོད་མི་ཚང་གི་ཆོས་ཉིད་ཞིག་ལས་མ་འདས།གསོན་པའི་ཚེ་ན་ཕྲག་དོག་དང་དམའ་འབབ་མ་བྱེད་ན་ཧ་ཅང་བཟང་།དེ་དེའི་རྒྱབ་སྐྱོར་གནང་ན་ཧ་ཅང་བཟང་་་་་ཤི་རྗེས་ཨ་ཧོ་ཟེར་དུས་ཚར་འདུག་་་
 སྤེལ་མཁན: དབྱར་སྤྲིན་དམར་པོ། སྤེལ་དུས:2015/6/30
ངས་ནི་རྒྱང་རིང་ཞིག་ནས་ཁོང་ལ་སྐྱེལ་མ་དང་བསྔོ་སྨོན་ད་དུང་ཡུལ་དངོས་སུ་འབྱོར་བའི་རྩོམ་པ་པོ་དག་ལ་ཡིད་སྨོན་བྱ་བཞིན་ཡོད།
  པར་ངོས 1/1 པར་ཡོད།
ལྟ་ཀློག་གྲངས་ཀ
42908090
དྲ་ཚིགས་བཟོ་སྐྲུན།
 
འབྲེལ་གཏུག་བྱ་ཡུལ།   ཁ་པར།  草原梦想15283703999    E-mail:tbmgar@163.com
པར་དབང་བཙན་པོའི་མགར་གྱི་དྲ་བ་ལས་གཞན་ལ་མེད།
蜀ICP备13002975号-1