ཉེན་རྟོག་པ་དང་རྔམ་སྟོན་མི་སྣ་ཕན་ཚུན་ཁ་གཏད་དུ་ལངས་པའི་རྣམ་པ།

   ཟླ་ ༩ པའི་ཚེས་ ༡༦ ཉིན། མ་ལེ་ཞི་ཡའི་རྒྱལ་ས་ཁལ་ལུང་ཕུ་ནས་གཞི་རྒྱ་ཆེ་བའི་ཁྲོམ་སྐོར་བྱ་འགུལ་སྤེལ་བ་དང་། མ་ལེ་ཞི་ཡའི་མི་འབོར་ཁྲི་ ༣ ལྷག་ལ་ཉེ་བ་གྲོང་གི་དཀྱིལ་དུ་འདུས་ཏེ། གཞུང་རྒྱུ་ཧམ་བཟའི་མིང་རྟགས་ངན་པ་ཐོབ་པའི་ཙུང་ལི་ན་ཅི་པུ་ལ་ངག་ཐོག་ནས་རྒྱབ་སྐྱོར་བྱས་པ་རེད། ཁོ་ཚོས་ཕྱིར་སྡོད་ཀྲུང་གོ་བའི་སྲིད་ཏང་གིས་ཟླ་སྔོན་མའི་ཟླ་མཇུག་ཏུ་ན་ཅི་པུ་ལ་ངོ་རྒོལ་བྱེད་པའི་གཞི་རྒྱ་ཆེ་བའི་འོས་ལངས་སྤེལ་བ་དེར་རྒོལ་གཏམ་བཏང་། མ་ལེ་ཞི་ཡའི་ནང་ཁུལ་གྱི་འཐབ་རྩོད་དེ་མིག་སྔར་རྒྱ་བསྐྱེད་དེ་སྤྱི་ཚོགས་རང་བཞིན་གྱི་གནད་དོན་ཞིག་ཏུ་གྱུར་འདུག་པ་དང་། གསར་ལམ་ཁ་ཤས་སུ། མ་ལེ་ཞི་ཡའི་རྒྱལ་ནང་དུ་ཡང་བསྐྱར་ཀྲུང་གོར་རྒོལ་བའི་རྦ་རླབས་དྲག་པོ་འཕྱུར་ཏེ། མ་ལེ་ཞི་ཡའི་རིགས་རྒྱུད་འགལ་བའི་རྣམ་པ་དེ་སྔར་ལས་ཛ་དྲག་ཅན་དུ་འགྱུར་སྲིད་པ་བསྟན་འདུག

ཁྲོམ་སྐོར་གྱི་ཡུལ་དངོས།

     དེ་སྔོན་གསར་ལམ་ཁ་ཤས་སུ་སྒྲོག་སྤེལ་བྱས་པ་ལྟར་ན། ན་ཅི་པུ་ཡིས་མ་ལེ་ཞི་ཡའི་བདག་དབང་མ་དངུལ་གྱི་སྟེང་ཨ་སྒོར་དུང་ཕྱུར་ ༧ ལྷག་གསོག་ཉར་བྱས་ཡོད་པའི་མི་སྒེར་གྱི་རྩིས་ཚན་བཙུགས་ཡོད་པ་དང་། ཕྱི་ཕྱོགས་ནས་མི་མང་པོས་ཁོས་གཞུང་དངུལ་ལྐོག་ཟོས་བྱས་ཡོད་མེད་ལ་དོགས་འདྲི་བྱེད་བཞིན་འདུག་པ་རེད། ན་ཅི་པུ་ཁོ་རང་ཉིད་ནས་དེའི་ལན་དུ་དེ་ནི་ཆབ་སྲིད་ཀྱི་ཞལ་འདེབས་མ་དངུལ་ཡིན་ཟེར་བ་ལས་ཁ་གསལ་བའི་རྩིས་སྤྲོད་གང་ཡང་བྱས་མི་འདུག

    བདེ་སྲུང་ཉེན་རྟོག་པས་ཁལ་ལུང་ཕུའི་ཀྲུང་གོ་བའི་འདུས་སྡོད་ཁུལ་དུ་ལྭ་དམར་གྱོན་མཁན་གྱི་ཕྱོགས་སུ་ཆུ་མདའ་འཕེན་པའི་ཚུལ།

མ་ལེ་ཞི་ཡའི་གསར་ལམ་ཁག་ཏུ་སྒྲོག་སྤེལ་བྱས་པ་ལྟར་ན། ལུས་ལ་ལྭ་བ་མདོག་དམར་གྱོན་པའི་རྔམ་སྟོན་མི་སྣ་བརྒྱ་ཕྲག་འགས་ཐེངས་མང་པོར་ཁལ་ལུང་ཕུའི་ཐང་མིའི་ཁྲོམ་དུ་འཛུལ་རྩིས་བྱས་ལ། ཁོ་ཚོས་ན་ཅི་པུའི་སྐུ་པར་ལ་རྡོག་བརྫིས་གཏོང་མཁན་དག་ཕྱིར་འདོན་བྱེད་རྒྱུ་ཡིན་པ་བསྒྲགས་པ་དང་། དེར་ཉེན་རྟོག་པས་བཀག་འགོག་བྱས་པ་རེད། ཡིན་ཡང་རྔམ་སྟོན་མི་སྣས་ད་དུང་མཚམས་མ་བཞག་པར་ཏོན་ཁྲིན་ཀྲེན་ལུའུ་སྲང་ལམ་བཙན་བཟུང་བྱས་པས་རྣམ་པ་ཛ་དྲག་ཆེ་བར་གྱུར།