སེམས་འགུལ་ཐེབས་པའི་གསར་འགྱུར་ཞིག
ཕྱིར་མིག་ཁྲོད་ཀྱི་བལ་བོའི་ས་འགུལ་དང་ཕ་མའི་བརྩེ་སེམས།
བལ་བོའི་ས་འགུལ་གྱིས་སྣོད་བཅུད་གཉིས་ལ་འཇིགས་སུ་རུང་བའི་ཆག་འཇིག་ཅིག་བསྐྲུན་ཅིང་། ས་འགུལ་ཁྲོད་རོགས་སྐྱོབ་མི་སྣས་ཁང་བ་ཞིག་རོའི་ཞིག་གི་ནང་ནས་བུད་མེད་ཅིག་དང་ལོ་ན་ཆུང་བའི་བྱིས་པ་ཞིག་རྙེད་པས་འཕྲལ་བཅོས་བྱས་པ་ལགས་ཀྱང་། ཨ་མ་དེར་དབུགས་ཆད་ལ་ཉེ་བའི་སྐབས་སུའང་ད་དུང་ཁོ་མོས་ངའི་བུ་ཕྲུག་ལ་ནུ་མ་བླུད་ན་འདོད་ཅེས་བཤད་པ་ཟུར་གྱི་སྐྱོབ་མཁན་དག་གིས་ཐོས་ཤིང་བུ་ཕྲུག་གིས་ཨ་མའི་ནུ་ཞོ་ནུ་བཞིན་པའི་སྐབས་དེར་ཨ་མ་འཇིག་རྟེན་འདི་ལས་ཁ་བྲལ་སོང་།
འདི་ནི་ཨ་མ་ཞིག་གིས་བུ་ཕྲུག་ལ་བཅང་བའི་བརྩེ་བ་ཡིན། འཁོར་བ་ཐོག་མ་མེད་པ་ནས་སེམས་ཅན་ཐམས་ཅད་ང་ཚོའི་མར་གྱུར་མྱོང་ལ་ཐམས་ཅད་ཀྱིས་ང་ཚོ་ལ་འདི་ལྟར་བཅོས་མིན་གྱི་བརྩེ་བས་བསྐྱངས་མྱོང། སྐུ་དྲིན་འདི་ང་ཚོས་གཏན་ནས་བརྗེད་ཐབས་མེད་ལ་བརྗེད་ཀྱང་མི་སྲིད།
ཕ་མའི་བརྩེ་བ་ནི་ཉི་མ་དང་མཚུངས་ཤིང་དུས་རིང་ཐུང་གང་དུ་སོང་ཡང་ཕ་མའི་དྲོད་ཁོལ་ནི་ནམ་ཡང་བུ་ཕྲུག་གི་སྟེང་ལ་འཕྲོས་ཡོད་པ་མི་ཚོར་རམ།
རྣམ་རྒྱལ་དང་ཁཱ་ཤེར།
|