ཁམས་པའི་འཛུམ་རིས།
༼
ཨོ་རྒྱན་གྱིས་བྲིས། ༽
སྤྱི་ལོ༢༠༡༦ལོའི་ཁམས་པའི་འཛུམ་རིས་འདོན་ཐེངས་གཉིས་པ་སྟེ་སྤྱིའི་འདོན་ཐེངས་བཅུ་གསུམ་པ༼མགར་ཐར་ཡུལ་གྱི་དམངས་སྲོལ་རིག་གནས༽ཆེད་བསྒྲིགས་དེ་ཟླ་འདིའི་ཚེས༢༧ཉིན་པར་དུ་བསྐྲུན་ཏེ་དངོས་སུ་སྒོར་ཐོན་ཡོད།
ད་ཐེངས་ཀྱི་ཆེད་བསྒྲིགས་འདི་མདོ་ཁམས་མི་ཉག་རིང་མོའི་ཡུལ་གྲུའི་ལྟེ་བར་གྱུར་པའི་མི་ཉག་མགར་ཐར་ཞེས་ཤར་སྟོད་བཞག་བྲ་ལྷ་རྩེའི་དབུ་འཕངས་ཀྱིས་དགུང་དུ་བཏེགས་ཤིང་མགར་ཆུ་སྔོན་མོ་ལྷུང་ལྷུང་དུ་འབབ་པའི་གཡས་གཡོན་ན་ལྷུན་ཆགས་ཀྱིས་གནས་པའི་གནའ་བོའི་ཡུལ་སྡེ་འདིའི་དམངས་སྲོལ་རིག་གནས་སྐོར་ཆེད་བསྒྲིགས་སུ་བྱས་པ་ཞིག་ཡིན།
ཡུལ་སྡེ་འདི་ནི་སྔོན་དུས་ནས་བོད་ཀྱི་ལོ་རྒྱུས་སྟེང་ནས་གོ་གནས་གལ་ཆེན་བཟུང་བའི་ཡུལ་སྡེ་ཞིག་ཡིན་པར་མ་ཟད།རྗེས་སོར་དུས་རབས་བཅུ་བདུན་པ་དང་བཅོ་བརྒྱད་པ་སོགས་ནས་ཡུལ་འདི་པའི་མཚན་སྙན་རླུང་རྟའི་རྒྱལ་མཚན་ཆོལ་གསུམ་གངས་རིའི་རི་ལུང་ཀུན་ཏུ་གྲགས་པའི་མྱོང་བའི་ཡུལ་ཁམས་ཁྱད་པར་ཅན་ཞིག་ཏུ་གྱུར།
དེ་ལྟ་བུའི་ཡུལ་སྡེ་མི་ཉག་མགར་ཐར་ཞེས་གྲགས་པའི་ཡུལ་གྲུ་འདི་རུ་ཡུལ་དུས་དང་འཚམས་ཤིང་ཡུལ་མི་རང་ཉིད་ཀྱི་བློ་གྲོས་ཀྱི་རྩལ་ལས་ཐོན་པའི་རང་ཁ་རང་གསོའི་ནུས་པ་བླ་ལྷག་ཏུ་མཐོ་བའི་དམངས་ཁྲོད་ཀྱི་ལག་ཤེས་བཟོ་རྩལ་དང་ཡུལ་སྲོལ་གོམས་གཤིས། ཆོས་ལུགས་དད་མོས།ལོ་རྒྱུས་ཀྱི་བདེན་དཔང་དུ་འགྲེང་བའི་གནའ་བོའི་རྡོ་རིང་སོགས་རིག་གནས་ལོ་རྒྱུས་དང་དམངས་ཁྲོད་སྐོར་གྱི་ཤེས་བྱའི་རྔམས་ཀ་མཐུག་པོ་ཡོད་པ་དག་ཆེད་བསྒྲིགས་སུ་བསྡེབས་པ་ཞིག་ལགས་ཤིང་། འདིས་བོད་ཡུལ་ལུང་པའི་དམངས་སྲོལ་རིག་གནས་རྒྱུད་འཛིན་དང་སྔོག་འདོན་གྱི་བྱ་གཞག་ལ་སྔ་ན་མེད་པའི་གྲུབ་འབྲས་གསར་པ་རེ་འཐོབ་ཐུབ་པའི་རེ་སྨོན་དང་བཅས།
དྲྭ་ཚིགས་གཙོ་གཉེར་བ། ཁཱ་ཤེས་རབ་རྒྱ་མཚོ།
| 
