ས་སྐྱ་ལེགས་བཤད། ༼༦༽
བློ་གྲོས་ཆེན་པོ་རྒུད་ན་ཡང་། །
ལྷག་པར་བློ་གྲོས་སྟོབས་ལྡན་འགྱུར། །
རི་དྭགས་རྒྱལ་པོ་བཀྲེས་པ་ན། །
གླང་ཆེན་སྤྱི་བོ་མྱུར་དུ་འགེམས། །
བློ་གྲོས་ཆེན་པོར་གཏམ་སྙན་སོགས་རྒུད་པའི་རྐྱེན་དང་ཕྲད་པ་ན། སྔར་གྱི་དེ་བས་ཀྱང་བློ་གྲོས་སྟོབས་ལྡན་སྐྱེ་བ་དེ་བསྟན་ནོ།།
བློ་གྲོས་ཆེན་པོ་མ་རྒུད་ན་ལྟ་ཅི་རྒུད་པར་འགྱུར་ན་ཡང་སྔར་གྱི་བས་ལྷག་པར་བློ་གྲོས་སྟོབས་དང་ལྡན་པར་འགྱུར་ཏེ་དཔེར་ན། རི་དྭགས་རྒྱལ་པོ་སེང་གེ་བཀྲེས་པའི་ཚེ་ན་དེ་བས་སྟོབས་རྩལ་བསྐྱེད་དེ་གླང་པོ་ཆེའི་སྤྱི་བོ་འགེམས་པ་སྟེ་བཅོམ་པ་བཞིན་ནོ། །ཞེས་པའོ། །
རྗེ་བཙུན་མི་ལ་རས་པར་ཨ་ཁུ་ཨ་ནེས་གཙོ་བྱས་པའི་གཉེན་ཉེ་རྣམས་ཀྱིས་ཡབ་ཀྱི་ཤུལ་བཞག་རྒྱུ་ནོར་ཐམས་ཅད་འཕྲོགས་ཤིང་སྡུག་སྣ་རྒུ་བཅོལ་བའི་ཐོག་ནས་འཕྲལ་དུ་རྒུད་ན་ཡང། མཐུ་སྦྱངས་ནས་དགྲ་བོ་བཏུལ་བ་དང་། ཆོས་བྱས་ནས་གྲུབ་པ་ཐོབ་སྟེ་ཀུན་གྱི་བཀུར་འོས་སུ་གྱུར་པ་རྒུད་པའི་རྐྱེན་ལས་བྱུང་བ་ལྟར་ལགས་པས། འཕྲལ་རྐྱེན་རྒུད་པ་དང་ལྡན་པའི་ཚེ་ཞུམ་པ་མི་སྐྱེ་བར་འགྱེལ་ས་ནས་ལངས་ཐུབ་པ་ཞིག་བྱ་དགོས་སོ། །
| 