ཚན་རིག་པས་རྟགས་གསལ་གཏོང་བཞིན་པའི་ཀླད་པར་དངོས་སུ་བརྟག་དཔྱད་བྱེད་བཞིན་པ།

དབང་རྩ་ཚན་རིག་པ་དང་སེམས་ཁམས་རིག་པ་བ་སེམས་རྩེ་གཅིག་ཏུ་གནས་པའི་སྒོམ་གྱི་ཕྱོགས་ལ་ཆེད་ལས་མཉམ་ཞིབ་ཡུན་རིང་གནང་བའི་ཕྱིར་རྒྱལ་གྱི་ཚན་རིག་པ་ཁག་ཅིག བྱེས་ཀྱི་གདན་ས་ཆེན་མོ་སེར་བྱེས་གྲྭ་ཚང་དུ་ཆེད་དུ་ཕེབས་ཏེ། སེར་བྱེས་གྲྭ་ཚང་གི་ཚན་རིག་ཁང་དུ་འདི་གའི་གྲྭ་ཚང་གི་གཞུང་ཆེན་སློབ་གཉེར་བའི་ཀླད་པར་དེང་རབས་ཀྱི་ཀླད་པ་བརྟག་དཔྱད་འཕྲུལ་ཆས་བརྒྱུད་མཉམ་ཞིབ་དང་བརྟག་དཔྱད་བྱེད་འགོ་བཙུགས།

དེ་ཡང་བྱེས་གྲྭ་ཚང་གི་ཚན་རིག་ཁང་དུ་དགེ་འདུན་པ་ཁག་ཅིག་གདན་ཞུ་གནང་སྟེ། ཚན་རིག་པ་ཁོང་རྣམ་པ་དང་ལྷན་དུ་སེམས་དང་སེམས་ཀྱི་མྱོང་ཚོར་གྱི་འགྱུར་འགྲོས་དང། ཀླད་པ་དང་དབང་རྩའི་བྱེད་ལས་སོགས་ལ་ཕན་ཚུན་བསམ་ཚུལ་བརྗེ་རེས་དང་དྲི་བ་དྲི་ལན་སོགས་ཀྱི་སྒོ་ནས་བགྲོ་གླེང་གནང་བ་དང་། དེའི་རྗེས་སུ་དགེ་འདུན་པ་གཉིས་ཀྱི་དབུ་མགོར་དེང་དུས་ཀྱི་ཀླད་པར་བརྟག་དཔྱད་འཕྲུལ་ཆས་བཀོལ་ནས། གཅིག་དམ་བཅའ་ལ་བཞུགས་པ་དང་། གཅིག་ལ་རྟགས་གསལ་གཏོང་དུ་བཅུག་སྟེ། རྒྱུན་ལྡན་ཆོས་རྭའི་ནང་དུ་དཀའ་གནད་ལ་རྩོད་པའི་བརྒལ་བརྟག་བྱེད་པ་ལྟར་རྩོད་པ་རྩོད་པའི་སྐབས་དེར་ཁོ་གཉིས་ཀྱི་ཀླད་པ་དང་དབང་རྩའི་འགྱུར་འགྲོས་དང་མྱུར་ཚད། ཀླད་པའི་གནས་དང་དབང་རྩ་གང་དང་གང་འགུལ་བསྐྱོད་དང་འཕེར་ཆ་ཇི་འདྲ་ཡོང་གི་ཡོད་མེད་སོགས་ཀྱི་ཐད་ལ་བརྟག་དཔྱད་བྱས་པ་རེད།

སྤྱིར་བཏང་ནས་དབང་རྩ་ཚན་རིག་གིས་བསམ་བློ་དང་སེམས་ཚོར། གཤིས་སྤྱོད། ཀླད་པ་དང་སྒྱུངས་པ། དབང་རྩའི་བྱེད་ལས། དབང་རྩའི་འཁྲུག་སྐྱོན་སོགས་ལ་དཔྱད་པ་བྱེད་ལ། དེ་བཞིན་དུ་སེམས་གང་ཡིན་ནམ། འགྲོ་བ་མི་ལ་སེམས་ཚོར་ཇི་ལྟར་དང་ཅིའི་ཕྱིར་འབྱུང་ངམ། དབང་རྩའི་ནད་རིགས་དང་སེམས་ནད་ཀྱི་རྩ་བའི་གཞི་རྟེན་གང་ཡིན་ནམ་ལྟ་བུའི་གནད་དོན་མང་པོ་ཞིག་ལ་ཞིབ་འཇུག་དང་བརྟག་དཔྱད་བྱེད་བཞིན་པ་ཞིག་རེད། ནུབ་ཕྱོགས་པའི་སེམས་ཁམས་རིག་པ་དང་དབང་རྩ་ཚན་རིག་སོགས་དང་། ཟབ་ཅིང་བརླིང་བའི་ནང་པའི་སེམས་ཀྱི་འཇིག་རྟེན་དང་མྱོང་ཚོར། དེ་དག་གི་བློ་སྦྱོང་བྱེད་ཐབས་སོགས་ཀྱི་བར་ལ་མཉམ་ལས་དང་། བགྲོ་གླེང་། མཉམ་དཔྱོད་ཀྱི་བྱ་བཞག་སོགས་གོང་འཕེལ་དང་ཁྱབ་རྒྱ་ཆེ་རུ་གཏོང་བར་བརྒྱུད་ནས་གོ་རྟོགས་གསར་བ་ཞིག་དང་གསར་བརྗེ་གསར་བ་ཞིག་བསྐྲུན་པར་འབད་འབུངས་བྱེད་བཞིན་པ་རེད།