ས་སྐྱ་ལེགས་བཤད། ༼༨༽
རིག་པ་ནངས་པར་འཆི་ཡང་བསླབ། །
ཚེ་འདིར་མཁས་པར་མ་གྱུར་ཀྱང་། །
སྐྱེ་བ་ཕྱི་མར་བཅོལ་བ་ཡི། །
ནོར་ལ་རང་ཉིད་ལེན་དང་མཚུངས། །
རིག་པ་སང་འཆི་ཡང་དེ་རིང་བསླབ་དགོས་པའི་རྒྱུ་མཚན་སེམས་རྒྱུད་ཀྱི་ཡོན་ཏན་གྱིས་སྐྱེ་བ་ཕྱི་མར་ཕན་ངེས་སུ་བསྟན་པ་དེ་ཡིན།
ཤེས་བྱ་རིག་པའི་གནས་ལ་ཡུན་རིང་འཚོ་ན་སྨོས་ཅི་དགོས་ཏེ། ནངས་པ་སྟེ་སང་ཉིན་འཆི་ངེས་ཤིག་ཡིན་རུང་ལེ་ལོ་མེད་པར་བསླབ་དགོས་ཏེ། སང་ཉིན་འཆི་རྒྱུ་ཡིན་པས། ཚེ་འདིར་མཁས་པར་གྱུར་པའི་སྐབས་མ་མཆིས་ཀྱང་། སྐྱེ་བ་ཕྱི་མར་ཚེ་འདིར་སྦྱངས་པའི་ཡོན་ཏན་གྱིས་ཕན་པ་རང་གིས་བཅོལ་བའི་ནོར་ལ་རང་ཉིད་ལེན་པའི་དབང་དང་ལྡན་པ་བཞིན་ནོ། ཞེས་པའོ། །
ཚེ་འདིར་བསླབས་པས་ཕྱི་མར་རང་ནོར་རང་གིས་ལེན་པ་ལྟར་གྱུར་ཚུལ་ནི། འཇམ་མགོན་ས་པཎ་བལྟམས་ནས་གོག་ཐུབ་པ་ན། སྔ་མའི་བག་ཆགས་སད་པའི་སཾ་སྐྲི་ཏའི་སྐད་སྨྲ་བ་འགའ་རེ་བྱུང་། ཡུམ་གྱིས་འདི་ལ་གུ་བ་ཞིག་ཡོང་བ་མ་ལགས་སམ། གཏམ་གོ་རྒྱུ་མེད་པ་སྨྲ་ཡིན་གདའ་ཞུས་པས། རྗེ་པས་སཾ་སྐྲི་ཏ་མཁྱེན་པ་གཟིགས་ནས། ཁྱོད་ཀྱི་བུ་ལ་གུ་བ་བྱུང་དོགས་མེད་གསུངས་སྐད། གཞན་ཡང་ཕྱག་མཛུབ་ཀྱིས་ནཱ་ག་ར་དང་ལཉྫ་ལ་སོགས་པ་རྒྱ་གར་གྱི་ཨཱ་ལི་ཀཱ་ལི་ཚར་རེ་བྲིས་ནས་ཀློག་པའི་ཚུལ་མཛད། དེ་ལ་མི་འགོམ་པར་ཕྱག་གིས་ཕྱིས་ནས་གཏོང་བ་དང་། རྒྱ་ཀློག་བོད་ཀློག་མ་བསླབས་པར་མཁྱེན་པ་སོགས་ལས། ཚེ་འདིར་སྦྱངས་པས་ཕྱི་མར་ཕན་ཚུལ་ལགས་པས། ཕྱིར་མི་འབྲངས་པའི་ནོར་ལ་ཆགས་པ་སྤངས་ནས་གཏན་དུ་ཕན་པའི་ཐོས་བསམ་ལ་འབད་དགོས་པ་ལགས་སོ།
| 