ཨན་ཏུང་ཉི་ཟི་སུའུ་མ་ལ་ཅི་ཟི་ཡིས་བརྩམས།
རུ་མང་ཀླུ་མཁར་རྒྱལ་གྱིས་བསྒྱུར།
ལོ་གཉིས་དང་ཕྱེད་ཀའི་ཡར་སྔོན་དུ་རྒྱལ་ཁབ་འདིར་དམག་འཁྲུག་བྱུང་སོང་། དེ་ནས་བཟུང་དམག་འཁྲུག་གི་མེ་ལྕེ་ནི་རྒྱལ་ཁབ་འདིའི་གྲུ་ཁ་སོ་སོར་མཆེད་ཀྱིན་གདའ།
གནས་འདི་ནི་ནུབ་བརྒྱུད་ཀྱི་ནགས་ཁུལ་ཡིན། ཡངས་ཤིང་རྒྱ་ཆེ་བའི་འཛིན་མའི་སྟེང་དུ་ནགས་ཚལ་སྟུག་པོས་ཡོངས་སུ་བཀླུབས་ཤིང་ཁོད་ཆེ་བའི་གཙང་བོ་ཞིག་ལྷུང་ལྷུང་དུ་འབབ་བཞིན་ཡོད། གཟའ་འཁོར་གསུམ་གྱི་ཡར་སྔོན་དུ་རུ་ཤོག་གཅིག་གི་དམག་མི་གཙང་བོའི་ཚུར་རོལ་ནས་བསྡད་བྱུང་། དེར་མཐུད། དགྲ་དམག་གི་རུ་ཤོག་གཉིས་ཀྱིས་གཙང་བོའི་ཕ་རོལ་ནས་སྒར་བཏབ་བྱུང་། འོན་ཀྱང་ཁོ་ཚོས་འཛིང་རེས་བྱས་མ་སོང་བས་ཡང་སྙིང་ཅི་ཞིག་བྱེད་འདོད་ཡོད་པ་མི་རྟོགས། དེ་བཞིན་དུ་ཕྱོགས་གཉིས་ཀའི་སོ་དམག་གཙང་བོའི་འགྲམ་གཉིས་ཀྱི་ནགས་གསེབ་ཏུ་བསྐུངས་ནས་དམག་འཐབ་ཀྱི་གོ་སྐབས་ལ་བསྒུག་ཡོད།
དམག་དཔུང་གཙང་འགྲམ་དུ་འབྱོར་དུས་ནམ་ཟླ་ཧ་ཅང་འཁྱག ཡིན་ཡང་ཉིན་འགའི་སྔོན་གནམ་གཤིས་དྭངས་ཤིང་དཔྱིད་ཀྱི་དཔལ་ཡོན་ཤར་ཡོད།
གནམ་གཤིས་ཀྱི་བརྗེ་འགྱུར་གྱིས་འཐབ་མོ་བ་རྣམས་ཀྱི་ལུས་པོ་ཚ་བས་གཟེར། མ་ཟད་ལོ་འདི་གཉིས་དང་ཕྱེད་ཀའི་རིང་ཁོ་ཚོས་ལུས་པོ་ཁྲུས་ཐེངས་གཅིག་ཀྱང་བྱས་མ་མྱོང་བར་ལུས་སྟེང་ནས་དྲི་ངན་འཐུལ་འོང་བས་གཙང་བོ་དེ་ནི་ཁོ་ཚོ་དབང་མེད་དུ་བསླུ་བྱེད་ཅིག་ཏུ་གྱུར་སོང་། ཉིན་ཞིག་གི་ཞོགས་པར་དམག་མི་ཞིག་ཁ་རོག་གེར་དམག་སྒར་ལས་ཕྱིར་བུད་དེ་གཙང་བོའི་ནང་ལ་ཞུགས། ཁོ་རང་ཏག་ཏག་རང་བྱུང་ཁམས་ཆེན་པོའི་པང་ནས་དགའ་བདེའི་ངང་ཁྲུས་ལ་རོལ་བཞིན་པའི་སྐབས་སུ། སྐག་སྐག་གི་སྒྲ་དང་བཅས་གཙང་བོའི་ཕ་རོལ་ནས་བརྩེ་མེད་ཀྱི་མདེའུ་གཉིས་ཐོན་བྱུང་། ཁྲག་དམར་གྱིས་གཙང་བོའི་ཁ་དོག་བསྒྱུར་ཞིང་ཅང་མ་འགོར་བར་དམག་མི་དེ་རང་ཕྱོགས་ཀྱི་གཙང་འགྲམ་དུ་བུད་མཐར་ཆུ་ཚོད་འགའི་རྗེས་དབུགས་ཆད།
ཉིན་གཉིས་པར། ཡང་དམག་མི་གཉིས་བུད་སོང་། ཡིན་ཡང་ཁོ་ཚོ་སླར་ཡར་ཕྱིར་ལོག་རྒྱུ་མ་སོང་། མི་རྣམས་ཀྱིས་གཙང་བོའི་ཕ་རོལ་ནས་སྦགས་སྦགས་མེ་མདའི་སྒྲ་ཞིག་གྲགས་རྗེས་འཇམ་ཅག་གེར་གྱུར་བ་ཐོས།
ཉིན་འདིར། དམག་སྒར་ཧྲིལ་བོའི་དམག་མི་ནགས་འགྲམ་གྱི་ཐང་སྟོང་དུ་བསྡུས། བཀའ་འཛིན་ཁང་གིས་དམག་དཔོན་ཞིག་མངགས་ཏེ་དམག་མི་ཡོངས་ལ་འདི་འདྲའི་བཀའ་ཡིག་ཅིག་སྒྲོག་འདོན་བྱས། གཙང་བོའི་ནང་ནས་ཁྲུས་ལ་རོལ་མི་ཆོག་པར་མ་ཟད་གཙང་བོ་དང་བར་ཐག་སྨི་ཉིས་བརྒྱའི་མཚམས་ནས་མི་སུ་ཞིག་ཀྱང་ཉེ་བར་བཏུད་མི་ཆོག བཀའ་ཡིག་འདི་དང་འགལ་མཁན་ཡོད་ན་དམག་དོན་ཁྲིམས་ཁང་དུ་བསྐྱལ་རྒྱུ་ཡིན།
བཀའ་འཛིན་ཁང་གི་བཀའ་ཡིག་ལ་དགོད་བྲོ་བ་ལ་ཨང་། དམག་མི་ཡོངས་ཀྱིས་ཀྱི་འདི་ལྟར་སྐད་མོས་ལེ་བདའ་བྱས།
ཉིན་འདིའི་ཞོགས་པར། དམག་མི་ཞིག་དམག་སྒར་ལས་བྲོས་ཏེ་གཙང་འགྲམ་དུ་སོང་། ཁོས་རང་ཉིད་ཀྱི་ལྭ་བ་གཙང་བོའི་འགྲམ་ངོགས་ཀྱི་སྡོང་བོའི་གམ་ནས་བསྐྱུར་ཞིང་བོའུ་རིང་སྡོང་བོའི་སྟེང་དུ་ཁེན་ནས་ཡར་བསླངས།
ལོ་གཉིས་རིང་ལ་འཐབ་པའི་དམག་འཁྲུག་འདིས་ཁོའི་ལུས་སེམས་གཉིས་ཀར་མནར་གཅོད་བཏང་ཡོད། ཁོའི་ལུས་སྟེང་དུ་ད་དུང་རྨ་ཁ་གཉིས་ཀྱང་ཡོད། དེའི་ཕྱིར་ཁོའི་དམར་མདོག་གི་ལུས་ཕུང་ཆུ་ལ་ཞུགས་མ་ཐག་ཚོར་བ་ལ་རང་ཉིད་བྱིས་པ་ཞིག་ཏུ་གྱུར་བའམ་མི་གསར་བ་ཞིག་ཏུ་གྱུར་བའི་སྣང་བ་བྱུང་། དེ་མིན་བརྩེ་བ་དང་ཤེད་ཤུགས་ཀྱིས་ཁེངས་པའི་ལག་ཟུང་གིས་འགྱིག་སོབ་བཀོལ་ཏེ་རང་ཉིད་ཀྱི་ལུས་ཡོངས་ལ་ཕུར་ན་ལོ་ངོ་གཉིས་དང་ཕྱེད་ཀའི་ནང་གི་སྡུག་བསྔལ་ཡོད་ཚད་ཧ་ལམ་ཡོངས་སུ་ཕྱིས་པ་དང་འདྲ་བྱུང་།
ཁོ་རང་སྐབས་འགར་ཆུ་ལ་རྐྱལ་ཞིང་སྐབས་འགར་ཆུ་ཁར་གན་རྐྱལ་དུ་བསྡད། གཙང་བོའི་འགྲམ་གཉིས་སུ་མིང་མི་ཤེས་པའི་མཛེས་སྡུག་ཡི་གར་འོང་བའི་བྱིའུ་སྣ་ཚོགས་འཕུར་བཞིན་འདུག བྱིའུ་དེ་དག་ཁོའི་མགོ་ཐོག་ཏུ་བབས་ཏེ་ཁོ་དང་མཉམ་དུ་རྩེད་འཇོར་རོལ་བ་དང་འདྲ།
སྐབས་འདིར། སྡོང་བོའི་ཡལ་ག་ཞིག་གཙང་བོའི་རླབས་ནང་དུ་ལྷུང་། ཁོ་རང་དབང་མེད་དུ་ཆུ་བོའི་ནང་ཞུགས་ཏེ་དུས་ཚོད་ཡུན་རིང་བའི་དིམ་རྐྱལ་ཞིག་བྱས་ནས་ཚེ་སྲོག་མེད་ཀྱང་གཙང་བོའི་རླབས་ནང་དུ་བཏུམས་པའི་སྡོང་བོའི་ཡལ་ག་དེ་རང་ཉིད་ཀྱི་ལག་ནང་དུ་འཛིན་འདོད་བྱུང་། ཁོས་དངོས་གནས་འདི་ལྟར་བསྒྲུབས་བྱུང་། ཆུ་ཁར་བུད་དུས་ཏག་ཏག་སྡོང་བོའི་ཡལ་ག་དེའི་གམ་དུ་ཡོད། སྐབས་འདིར་ཁོ་རང་དངངས་ཤིང་སྐྲག རྒྱུ་མཚན་ཁོས་མདུན་ཕྱོགས་ཀྱི་སྨི་སུམ་ཅུའི་མཚམས་ནས་མི་ཞིག་གི་མགོ་མཐོང་བྱུང་།
ཁོ་རང་ཁ་མལ་དུ་བསྡད་དེ་གསལ་བོ་ཞིག་ལྟ་འདོད་སྐྱེས།
ཆུ་ལ་རྐྱལ་མཁན་གཞན་པ་དེས་ཀྱང་ཁོ་རང་མཐོང་སྟེ་བསྡད་བྱུང་། ཁོ་གཉིས་ཀྱིས་ཕན་ཚུན་ལ་མིག་ཅེར་གྱིས་བལྟས་ཏེ་རང་ཉིད་ལ་གཏད་པའི་མི་དེ་ནི་རང་ཕྱོགས་ཀྱི་མི་ཡིན་ནམ་དགྲ་ཕྱོགས་ཀྱི་མི་ཡིན་པ་གསལ་བོར་མ་ཤེས། ཁོ་གཉིས་ཀྱིས་ཆུ་ནང་ནས་ཕན་ཚུན་ལ་མིག་ཅེར་རེར་བལྟས་ཏེ་ཡུད་ཙམ་འགོར། གློ་བུར་དུ། མི་དེ་མགྱོགས་མྱུར་གྱིས་གཙང་བོའི་ཕར་ངོགས་སུ་རྐྱལ་ཞིང་དུས་མཉམ་དུ་མི་འདི་ཡང་ཧ་ལམ་རང་ཕྱོགས་ཀྱི་གཙང་བོའི་ཚུར་ངོགས་སུ་རྐྱལ་བྱུང་། སྐད་ཅིག་མའི་དུས་དེར་ཚུ་རོལ་གྱི་མི་དེ་ཆུ་ཁར་བུད་ཅིང་མེ་མདའི་ཕྱོགས་སུ་བརྒྱུགས་ནས་ལག་ལ་མེ་མདའ་བཟུང་། ཡིན་ཡང་ཕ་རོལ་གྱི་མི་དེ་སྐབས་ཏག་ཏག་འདིར་ཆུ་ཁར་བུད་དེ་མེ་མདའ་ཕྱོགས་སུ་རྒྱུག་བཞིན་འདུག
ཁོས་མེ་མདས་དམིགས་འབེན་ལ་གསལ་བོར་གཏད། ཁོ་ལ་མཚོན་ནས་བཤད་ན་མདེའུ་ཞིག་ཕ་རོལ་གྱི་མི་དེའི་ཀླད་པའི་ནང་རྫོང་རྒྱུ་ནི་སླ་མོ་ཞིག་ཡིན། རྒྱུ་མཚན་མི་དེ་སྨི་ཉི་ཤུའི་མཚམས་སུ་ཡོད་པར་མ་ཟད་དམར་ཧྲེང་ཧྲེང་དུ་དམིགས་འབེན་ཧ་ཅང་གསལ།
འོན་ཀྱང་ཁོས་མདེའུ་གཏོང་ཐབས་མི་འདུག གཙང་བོའི་ཕ་རོལ་གྱི་མི་དེ་ཨ་མའི་བུམ་ལས་ལྷུང་མ་ཐག་པ་ནང་བཞིན་དམར་ཧྲེང་ཧྲེང་དུ་ཡོད། ཚུར་རོལ་གྱི་མི་དེ་ཡང་དམར་ཧྲེང་ཧྲེང་དུ་གཙང་འགྲམ་ན་འགྲེངས་ཡོད། ཁོ་གཉིས་ནི་ལྭ་བ་ཕུད་ཅིང་རུས་མིང་དོར། རྒྱལ་ཁོངས་དོར། རས་ཁ་ཆིབ་ཀྱི་དམག་ལྭ་དོར་ཏེ་དམར་ཧྲེང་ཧྲེང་དུ་ཡོད། མེ་མདའི་མཆུ་འོག་གི་གཙང་བོ་འདིས་ཁོ་གཉིས་ཁ་ཁར་མ་བཏང་བར་མཉམ་གཅིག་ཏུ་སྦྲེལ་ཡོད།
ཁོས་མེ་མདའ་ས་རུ་བཞག་སྟེ་མགོ་བོ་སྒུར་བྱུང་། སྐབས་འདིར་གཙང་བོའི་ཕ་རོལ་ནས་མེ་མདའི་སྒྲ་ཞིག་མཆེད་བྱུང་། ཁོའི་མིག་མདུན་ནག་དུབ་བེར་གྱུར་ཏེ་ཅི་ཡང་མཐོང་རྒྱུ་མ་བྱུང་།བྱིའུ་འགའ་མེ་མདའི་སྒྲས་དཀྲོགས་ཏེ་ནགས་རྫོབ་ལས་ཕྱིར་འཕུར་འོང་། ཁོ་རང་པུས་ཚུགས་སུ་བསྡད་དེ་དངངས་སྐྲག་གིས་ཁེངས་པའི་ངོ་གདོང་ས་ཐོག་ཏུ་འགྱེལ།
༢༠༡༦ ༦ ༡༨ཉིན་གྱི་ཞོགས་པར་ཙོང་ཁ་གྱི་ཐང་ནས་བསྒྱུར།
མཆན།
༡ རྩོམ་འདིའི་ཁ་བྱང་ལ་མ་གཞིར༼གཙང་བོ༽ཟེར་ཞིང་བརྩམས་ཆོས་ལས་མིའི་རིགས་ཀྱིས་རང་བྱུང་ཁམས་ལ་དད་མོས་བྱེད་པའི་རྩལ་ནུས་དང་དམག་འཁྲུག་གི་མནར་གཅོད་ཟབ་མཚོན་བྱས་ཡོད།
༢ ཨན་ཏུང་ཉི་ཟི། སུའུ་མ་ལ་ཅི་ཟི་ནི་ཀེ་རི་སིའི་བཀུར་བསྟི་ཆེས་ཆེར་ཐོབ་ཡོད་པའི་རྩོམ་པ་པོ་ཞིག་ཡིན། ཁོ་རང་ཆབ་སྲིད་ཤོག་ཁག་གང་ལའང་མི་གཏོགས་ཤིང་ཁོའི་ཕུགས་བསམ་ནི་ཞི་བདེ་དང་རང་དབང་། སྤྱི་ཚོགས་དྲང་བཞག་ཡོང་རྒྱུ་ཡིན། ཁོའི་སྒྲུང་ཐུང་སྐད་རིགས༣༠ལྷག་ལ་བསྒྱུར་ཡོད་པར་མ་ཟད་བྱ་དགའ་ཡང་ཐེངས་མང་ཐོབ་ཡོད། དེའི་ཁྲོད་ཀེ་རི་སིའི་ཟླ་བཅུ་གཉིས་པའི་གཟེངས་རྟགས་དང་ཧྥ་རན་སིིའི་རྩོམ་རིག་གཟེངས་རྟགས། ཡོ་རོབ་གླིང་གི་རྩོམ་རིག་གཟེངས་རྟགས་ཆེན་མོ་སོགས་འདུ།
|