ས་སྐྱ་ལེགས་བཤད། ༼༡༠༽
མཁས་པ་ཡོན་ཏན་ཀུན་བསླབས་པ།
།
མཐར་ཕྱིན་གཅིག་གིས་འཇིག་རྟེན་གསལ།
།
བློ་ངན་ཤེས་པ་མང་ན་ཡང།
།
རྒྱུ་སྐར་བཞིན་དུ་གསལ་མི་ནུས།
།
གདུལ་བྱའི་འཇིག་རྟེན་གྱི་བློའི་མུན་པ་སེལ་བ་ལ།
སེལ་པོ་རང་ཉིད་ཤེས་བྱ་ཐམས་ཅད་ཕྱིན་ཅི་མ་ལོག་པ་ཇི་བཞིན་ཤེས་པ་ཞིག་དགོས་པར་བསྟན་ཡོད།
མཁས་པ་ཤེས་བྱའི་ཡོན་ཏན་ཀུན་མ་ལུས་པར་མཐར་ཕྱིན་པ་སྟེ་ཇི་བཞིན་ཤེས་པ་ཞིག་བྱུང་ན་ཉི་མ་གཅིག་གིས་འཇིག་རྟེན་གྱི་མུན་པ་སེལ་བ་བཞིན་དུ།
མཁས་པ་གཅིག་གིས་སེམས་ཅན་འཇིག་རྟེན་གྱི་ཁམས་མོས་པ་དང་མཐུན་པའི་སྒོ་ནས་བླང་དོར་གྱི་གནད་བསྟན་ཏེ་བློའི་མུན་པ་གསལ་བར་ནུས་ལ།
བློ་ངན་ཏེ་ཤེས་བྱའི་ཕྱོགས་རེ་བ་དང་དེ་ཡང་ཇི་བཞིན་མི་ཤེས་པ་མང་དུ་ཚོགས་ན་ཡང་། རྒྱུ་སྐར་མང་པོས་ས་སྟེང་གི་མུན་པ་སེལ་བར་མི་ནུས་པ་བཞིན་དུ་འཇིག་རྟེན་གྱི་བློའི་མུན་པ་སེལ་བར་མི་ནུས་སོ།
ཞེས་པའོ། །
རང་གིས་ཤེས་བྱ་མ་ལུས་པ་ཇི་བཞིན་ཤེས་པས་འགྲོ་བའི་ཡིད་ཀྱི་མུན་པ་སེལ་ནུས་པའི་ཚུལ་ནི། སྔོན་ཤཱཀྱ་དགའ་བྱེད་ཟེར་བ་ཤི་ནས།
ཀུན་ཏུ་རྒྱུ་རྣམས་ཀྱིས་གཤིན་ཆོས་བྱེད་སྐབས།
གཤིན་པོ་དེ་བཀུག་ནས་གཟུགས་དངོས་སུ་སྟོན་པ་ལ་བཟའ་བཏུང་སྟེར་བ་སོགས་བྱེད་སྲོལ་ཡོད་པ་དེ་བཞིན་བྱས་ཏེ།
ཉེ་དུ་རྣམས་ཀྱིས་དེ་ཤཱཀྱ་དགའ་བྱེད་དངོས་ཡིན་བསམས་པ་ན། སྟོན་པས།
དྲི་ཟ་ཁྱབ་བྱེད་དང་གནོད་སྤྱིན་གཏོགས་འདོད་རྣམས་ཀྱིས་གཤིན་པོར་བརྫུས་པ་ཡིན་གསུངས་པ་ལ།
དེ་དག་ཡིད་མ་ཆེས་པས།
སྟོན་པས་ཤཱཀྱ་བ་རྣམས་ལ་འབྲུའི་ཐུམ་པོ་ཁྱིམ་སོ་སོའི་མིང་བྱང་བཅུག་པ་རེ་ཁྱེར་ནས་ཤོག་གསུངས་པས།
ཤཱཀྱའི་མི་ཁྱིམ་ཧ་ཅང་མང་པོ་ཞིག་གིས་དེ་ལྟར་ཕུལ་བས།
འབྲུའི་ཐུམ་པོ་གླང་ཆེན་གྱི་རྒྱབ་ཁལ་ལོང་བ་ཙམ་བྱུང་བ་རྣམས།
སྟོན་པས་འདི་དང་འདི་ཡིན་ཞེས་གཅིག་ཀྱང་མ་ནོར་བར་ངོས་འཛིན་མཛད་པས་ཡིད་ཆེས་བྱུང་སྟེ།
སྟོན་པའི་རྗེས་སུ་འཇུག་པ་ལྟར་ལགས་སོ། །
| 