ལངས་ཕྱོགས།༽ལོས་ཤོན་གྱིས་བརྩམས།
ལེགས་གྲུབ་ཀྱིས་བསྒྱུར།
ངའི་རྨི་ལམ་དུ་རང་ཉིད་སློབ་ཆུང་གི་སློབ་ཁྲིད་དུ་རྩོམ་ཡིག་གྲ་སྒྲིག་བྱེད་ཀྱིན་མཆིས་ཏེ། རྩོམ་ཡིག་ཕྱོགས་ཀྱི་ལྟ་ཚུལ་དང་ལངས་ཕྱོགས་ག་འདྲ་དགོས་པར། དགེ་རྒན་ལ་མཛུབ་སྟོན་བྱེད་དུ་ཞུས་པས། དགེ་རྒན་གྱི་མིག་ཤེལ་ལས་༼དཀའ་༽ཞེས་པའི་མིག་མདངས་ཤིག་ཕྱི་ལ་འཕྲོས་ཡོང་ཞིང་།
ཁོང་གིས་ང་ལ་བལྟས་ཏེ། “ངས་ཁྱོད་ལ་དོན་དག་ཅིག་བཤད།”ཟེར།
"ཁྱིམ་ཚང་ཞིག་ཏུ་བུ་ཆུང་ཞིག་བཙས་པས། ཁྱིམ་གང་ཧ་ཅང་དགའ་སྐྱིད་དང་དགོད་སྒྲས་བཟི་ཞིང་། ཟླ་བ་ཉ་གང་བའི་དུས་ན་ཁྱིམ་དུ་ཡོང་བའི་མགྲོན་པོ་དག་ལ་བསྟན།
མགྲོན་པོ་གཅིག་གིས་"བྱིས་པ་འདི་མ་འོངས་པར་ཕྱུག་བདག་ཏུ་འགྱུར་ངེས་སོ"ཞེས་བཤད་པས། ཁྱིམ་གང་གིས་དེ་ལ་བཀའ་དྲིན་ཞུས།
གཅིག་གིས"འདི་དཔོན་དུ་གནས་པར་འགྱུར་ངེས་སོ"ཞེས་བཤད་པས་ཀུན་གྱིས་དེ་ལ་གུས་ཚིག་ཕུལ།
གཅིག་གིས"འདི་མ་འོངས་པར་འཆི་བར་ངེས་སོ་"ཞེས་བཤད་པས་ཐམས་ཅད་ཀྱིས་རྡུང་རྡེག་ཡིད་ཚིམ་པ་ཞིག་བྱས་སོ།།
དོན་དུ་"འཆི་བར་ངེས་"ཞེས་བཤད་པ་ནི་དོན་དངོས་དང་། ཕྱུག་པོར་ཆགས་པ་དང་དཔོན་དུ་གནས་ཞེས་པ་ནི་རྫུན་དུ་འདུག་མོད། འོན་ཀྱང་རྫུན་ལ་བཟང་བསྟོད་དང་། དྲང་གཏམ་ལ་ཉེས་རྡུང་བབས་སོང་། ཁྱོད་ཀྱིས........"
"རྒན་ལགས། ངས་རྫུན་ཡང་བཤད་མི་འདོད་ལ་ཉེས་རྡུང་ཡང་རག་མི་འདོད་པས་ཇི་ལྟར་བྱེད་དགོས་སམ།"
"འོ་ན། ཁྱོད་ཀྱིས་"བྱིས་པ་འདི། ཁྱོད་ཀྱིས་ལྟོས་དང་། ཇི་འདྲའི.....ཨ་ཨོ། ཧཧ། ཧུཧུཧུ hehehe!ཞེས་བཤད་དགོས་སོ"ཞེས་སྨྲས།
1925.7.8
| 