གཡུང་དྲུང་བོན་གྱི་རྒྱལ་མཚན་ཐོབ་པའི་གཞི་བདག་བཞི།
མགར་རྒྱལ་སྲས། ༼ཁམས་པའི་འཛུམ་རིས།༽
དཔལ་ཡུལ་སྟོད་སྨད་སོགས་དེང་སྐབས་ཀྱི་མགར་ཐར་ཡུལ་སྡེ་སྤྱི་ལའང་བོད་ཀྱི་ཡུལ་གྲུ་གཞན་དག་དང་འདྲ་བར་སྔོན་དར་གཡུང་དྲུང་བོན་གྱི་བསྟན་པ་རིན་པོ་ཆེ་དར་ཞིང་རྒྱས་མྱོང་བ་དང་། ཁྱད་པར་དུ་བོན་གྱི་མངའ་བདག་དམ་པ་རང་གྲོལ་ཞེས་ཆོས་ཕྱོགས་ནས་རིག་འཛིན་གྱི་གྲུབ་པར་དབུ་བརྙེས་ཤིང་སྲིད་ཕྱོགས་ནས་ཡུལ་ཁམས་འདིའི་མངའ་བདག་ཏུ་གྱུར་པ་གང་དེས་ད་ལྟའི་རྟའུ་དམུ་རྗེ་ཉག་ག་མན་ཆད་དང་མི་ཉག་དཔལ་ལྷ་སྒང་ཡན་ཆད། རྒྱལ་རོང་རོང་བྲག་རྫོང་གི་ཚུན་ཆད་དུ་དབང་བསྒྱུར་བྱས་ཤིང་ཡུལ་གྲུ་འདིའི་སྤྱི་མིང་ལ་དཔལ་ཡུལ་དུ་གྲགས་ཤིང་ཆོས་སྲིད་ཀྱི་མཛད་པ་བསྐྱངས་ཡོད་ཚུལ་སོགས་ནི་ལོ་རྒྱུས་ཡིག་ཚང་འགའ་ལས་གསལ་བ་ལྟར་ལགས་ཤིང་། བོན་གྱི་ལུགས་སྲོལ་ལྟར་སྐྱེས་བུ་དམ་པའི་མཚན་དགོན་པར་ཐོག་པ་གང་མང་ཡོད་པ་ལྟར་དམ་པ་གང་དེའི་མཚན་དགོན་པར་ཐོགས་པ་དམ་པ་རང་གྲོལ་དགོན་ཞེས་དུས་འགྱུར་དང་སྲིད་དབང་འཕྲོག་རེས་སོགས་ཀྱི་དབང་གིས་ད་ལྟའི་དཔལ་སྨད་གྲོང་བརྡལ་ནས་ནུབ་ཕྱོགས་སུ་སྤྱི་ལེ་གཉིས་ཙམ་བསྐྱོད་པའི་མཚམས་ཀྱི་གཡོན་ཕྱོགས་སུ་ལྗོན་ཤིང་ནགས་ཚལ་ཚང་ཚིང་འཁྲིགས་པ་དབལ་སྲས་ལ་ཞེས་པའི་རི་བོ་ཉམས་དགའ་བ་ཞིག་ཡོད་པ་དེའི་རི་སྐེད་ཅིག་ན་ཆགས་ཡོད་པ་འདི་ག་ལགས་ཤིང་། དགོན་པ་འདི་ནི་ཡུལ་ཁམས་འདིའི་ལོ་རྒྱུས་ཆེས་རིང་ཤོས་ཤིག་ཡིན་པ་ནི་བསྙོན་དུ་མེད་ནའང་། གོས་སྨོས་ལྟར་དགོན་འདི་ཉིད་ཀྱི་གདན་ས་ལ་འགྱུར་ལྡོག་མང་པོ་བྱུང་བས་དེང་སྐབས་རྗེས་དཔག་བློ་ཡིས་གཞལ་ནས་ལོ་རྒྱུས་རེ་འབྲི་ན་མ་གཏོགས་ངག་རྒྱུན་དང་བཤད་སྲོལ་ཙམ་རེ་ཡིག་ཐོག་ཏུ་བཀོད་ཡོད་པ་ཙམ་ལས་དོན་དངོས་ཀྱི་ལོ་རྒྱུས་ཤིག་ནི་དུས་སྐབས་སོ་སོའི་སྨྱུག་ཐོགས་པ་དག་གིས་ཡིག་རིས་སུ་ཕབ་མ་མྱོང་བའམ་ཡང་ན་དུས་དང་སྐབས་གང་རུང་ཞིག་ནས་ནུབ་ཟིན་སོགས་གང་ཡིན་ཆ་མ་འཚལ་རུང་གང་ལྟར་ད་ལྟ་བདག་ཅག་གི་མཐོང་ཆོས་ཀྱི་ཡུལ་དུ་མ་གྱུར་པ་ནི་ལོ་རྒྱུས་ཀྱི་རིན་ཐང་ངོས་ནས་བཤད་ན་ཅི་འདྲའི་གྱོང་གུན་ཆེ་བ་ལ་ཨང་།
ཡུལ་ཁམས་འདིར་བོན་གྱི་བསྟན་པ་དར་བའི་སྐབས་སུ་གཡུང་དྲུང་བོན་གྱི་རྒྱལ་མཚན་ཐོབ་པའི་གཞི་བདག་བཞི་ཞེས་ཀུན་གྱི་ཁ་ན་རླུང་ལྟར་གྲགས་ཤིང་། དེ་དག་ནི་ཀ་ར་རྡོ་རྗེ་རྒྱལ་མཚན་དང་། ཉ་ར་གཡུང་དྲུང་རྒྱལ་མཚན། ལུག་གདོང་ཁྲོ་བོ་རྒྱལ་མཚན། ལ་ཁྲ་རྟ་ཁྲ་རྒྱལ་མཚན་བཅས་བཞིའོ། །
| 