ས་སྐྱ་ལེགས་བཤད། ༼༣༡༽

དེ་ཡང་། གུང་ཐང་འཇམ་པའི་དབྱངས་ཀྱིས། མཐོ་རིས་ཐར་པའི་ལམ་འདོད་ན། །ལམ་སྟོན་བཤེས་གཉེན་ལ་བསྟེན་དགོས། །ཕྱི་ལྡིར་ནང་སྟོང་གིས་ཆོག་ན། །གྲགས་སྐམ་བླ་ཆེན་རེར་འཇུས་ཤིག །ཅེས་གསུངས་པ་ལྟར། སྙིགས་དུས་འདིར། སྐད་གྲགས་གང་ཆེའི་གང་ཟག་རེའི་རྗེས་སུ་འབྲང་མོད། གང་ཟག་ལ་མི་རྟོན་ཆོས་ལ་རྟོན་པ་ཞིག་ཡིན་ན། ལེགས་པར་བཤད་པ་ཞིག་ཡིན་ཕྱིན། གསུང་བ་པོ་མཁས་པར་གྲགས་པ་ལྟ་ཅི། ཐ་ན་བྱིས་པ་དག་ལས་ཀྱང་མཁས་པ་རྣམས་ནི་ཡོངས་སུ་ལེན་པར་བྱེད་དེ། དཔེར་ན། འབྱུང་ཁུངས་བཟང་པོ་ལས་བྱུང་བའི་མ་ཡའི་ཙན་དན་སོགས་ལེན་པར་མ་ཟད། དྲི་བཟང་པོ་བྱུང་ན་འབྱུང་གནས་དམན་པ་རི་དྭགས་ཀྱི་ལྟེ་བ་གསང་གནས་ལས་ཀྱང་གླ་རྩི་ལེན་པ་ལ་འཇུག་པ་བཞིན་ནོ། ཞེས་པའོ། །

མཁས་པས་ལེགས་བཤད་བྱིས་པ་ལས་ལེན་པའི་ཚུལ་ནི། དེ་ཡང་སློབ་དཔོན་ཆེན་པོ་ཙནྡྲ་གོ་མི་འཁྲུངས་མ་ཐག་ཏུ། མ་ལ་ཕྱག་བྱས་ཏེ། ཟླ་བ་བཅུར་འོ་བརྒྱར་བར་མ་གྱུར་ཏམ་ཞེས་སྨྲས་པ་ན། བྱིས་པ་བཙས་མ་ཐག་པ་ངག་སྨྲ་བ་མི་རིགས་པས་ཁ་རོག་སྡོད་བྱས་པས། དེ་ནས་ལོ་བདུན་གྱི་བར་དུ་བྱིས་པ་དེ་ཁ་གྲགས་པར་མ་གྱུར་ཏོ། ནམ་ཞིག་ན་མུ་སྟེགས་པའི་པཎྜི་ཏ་ཞིག་གིས། དོན་འགྲེལ་དཀའ་བའི་ཚིགས་བཅད་གཅིག་བྲིས་ནས། ཡུལ་དེའི་རྒྱལ་པོ་ལ་བསྐུར་ཏེ། ཁྱོད་ཀྱི་མངའ་འོག་ན་འདིའི་དོན་འགྲེལ་ནུས་པ་ཡོད་ན་ལེགས། གལ་ཏེ་མེད་ན་ང་ལ་གུས་པར་གྱིས་ཤིག་ཅེས་སྤྲིངས་པས། རྒྱལ་པོ་དེས་ཀྱང་ཡི་གེ་དེ་མཁས་པའི་ཚོགས་སུ་བྲིམས་སུ་བཅུག་པས། རིམ་གྱིས་ཙནྡྲ་གོ་མིའི་ཡབ་ཀྱི་ཁྱིམ་དུ་བྱུང་བ། ཡབ་ཀྱིས་ཅི་ཙམ་དཔྱད་ཀྱང་དེའི་དོན་བཀྲལ་དཀའ་བར་དགོངས་བཞིན་པར། བྱ་བ་ཞིག་གི་དོན་དུ་ཕྱིར་སོང་བའི་ཤུལ་དུ། བྱིས་པ་ལོ་བདུན་པ་དེས་ཚིག་དེའི་དོན་ལེགས་པར་བཀྲམ་ནས་ལན་གྱི་ཚིགས་བཅད་གཅིག་ཀྱང་བྲིས་ནས་བཞག་པ། སླར་ཡབ་ཀྱིས་མཐོང་ནས། ཡི་གེ་འདི་སུས་དྲིས་ཞེས་ཁྱིམ་ཐབ་ལ་དྲིས་པ་ན། ཡུམ་གྱིས་བུ་ལྐུགས་པ་འདིས་བྲིས་སོང་ཞེས་སྨྲས་པ་ན། ཡབ་ཀྱིས་བུ་ལ་ཡི་གེ་འདི་ཁྱོད་ཀྱིས་བྲིས་སམ་སྨོས་ཤིག་ཅེས་དྲིས་པ་ན། ཨ་མའི་གདོང་ལ་བལྟས་ནས་ཅང་མི་སྨྲ་བར་འདུག་པའི་ཚེ། ཨ་མས་སྨོས་ཤིག་བྱས་པས། བདག་གི་བྲིས་སོ་ཞེས་ཁས་བླངས་ནས། རྒོལ་བ་དེ་ཡང་བདག་གིས་ཕམ་པར་ནུས་སོ་ཞེས་སྨྲ་བ་བཞིན། རྒྱལ་པོ་ལ་གསོལ་བས་རྒྱལ་པོས་ཞག་བདུན་ན་རྩོད་པའི་དུས་བཏབ་ཅིང་། རྩོད་པའི་ཚེ་ན། མུ་སྟེགས་ཀྱི་པཎྜི་ཏ་ན་རེ། པཎྜི་ཏ་ཆེན་པོས་ཀྱང་ཁོ་བོའི་རྩོད་ཟླར་མི་འོང་ན། བྱིས་པ་ཆུང་ཆུང་ཁྱོད་ཇི་ལྟར་འོས། དེ་བས་ཁྱོད་ཕར་སོང་དང་། རྩོད་ཟླ་གཞན་ཞིག་ཁྲིད་ཤོག་བྱས་པས། བུ་ཆུང་ན་རེ། ལྕགས་ཀྱུས་གླང་པོ་བཏུལ་བས་ལྕགས་ཀྱུ་གླང་ཆེན་ཙམ་མམ་ཅི། །མར་མེས་མུན་པ་འཇོམས་མོད་མར་མེ་མུན་པའི་ཚད་དམ་ཅི། །རྡོ་རྗེས་རི་བོ་འབིགས་ཀྱང་རྡོ་རྗེར་རི་བོའི་གཏོས་སམ་ཅི། །བློ་ཡི་སྟོབས་ཡོད་དེའི་ཚེ་རགས་པའི་ལུས་ལ་སུ་ཡིད་རྟོན། །ཞེས་ཐོགས་མེད་དུ་གསུངས་པ་ན། མུ་སྟེགས་ཀྱི་པཎྜི་ཏ་ངོ་མཚར་ཞིང་ཡ་མཚན་ཏེ་གུས་པས་བཏུད་དེ་བྱིས་པ་ལོ་ཆུང་ལོ་བདུན་པ་དེ་སློབ་དཔོན་དུ་བསྟེན་ཏེ་ལེགས་བཤད་ཀྱི་སྐྱེས་ངོམས་མེད་དུ་བླངས་པ་བཞིན་ནོ། །