བོད་ཀྱི་ཡིག་གཟུགས་ཀུན་འདུས་ཞལ་ཐང་རིང་མོ།

藏文书法艺术大观

བོད་ཀྱི་ཡིག་གཟུགས་ཀུན་འདུས་ཞལ་ཐང་རིང་མོ།

藏文书法艺术大观

དགེ་མང་འཇམ་དཔལ།

        སྤྱི་ཟླ་བརྒྱད་པའི་ཚེས་བཅུ་གཉིས་ཉིན། བོད་ཀྱི་ཡིག་གཟུགས་སྒྱུ་རྩལ་པ་ཆེན་མོ་དགེ་མང་འཇམ་དཔལ་ལགས་ཀྱིས་ལོ་ངོ་གཉིས་ལྷག་གི་རིང་དཀའ་སྤྱད་འབད་བརྩོན་དང་ཧྲག་ཇུས་འཆར་འགོད་ལ་བརྟེན་ནས་སྨར་ཆེན་དང་སྨར་ཆུང་། ལྷ་བབ་ཡི་གེ། གཟི་ཡིག་སོགས་བཙན་པོའི་རྒྱལ་རབས་ཡར་སྔོན་གྱི་ཡིག་གཟུགས་ཁག་དང་། འབྲུ་ཆེན་དང་འབྲུ་མ་སོགས་ཡིག་གཟུགས་མི་འདྲ་བ་༡༩༠་དང་། རིང་ཚད་ལ་རྨི༢༦༧ཅན་གྱི་བོད་ཀྱི་ཡིག་གཟུགས་ཀུན་འདུས་ཞལ་ཐང་རིང་མོ་ཞེས་པ་བོད་རང་སྐྱོང་ལྗོངས་དངོས་མང་རྟེན་མཛོད་བཤམས་སྟོན་ཁང་དུ་འགྲེམ་སྤེལ་བྱེད་ཐུབ་པ་བྱུང་། དེའི་ཁྲོད་དུ་ཐོན་མིས་མཛད་པའི་སུམ་ཅུ་བ་དང་རྟགས་ཀྱི་འཇུག་པ། ཁྱུང་པོ་གཡུ་ཁྲིས་མཛད་པའི་སྟོང་ཐུན་སྨྱུ་གུའི་བསྟན་བཅོས་སོགས་བྲིས་ཡོད་ཅིང་། མིག་སྔར་ཆེས་རིང་བའི་བོད་ཀྱི་ཡིག་གཟུགས་སྒྱུ་རྩལ་བརྩམས་ཆོས་སུ་ཆགས་པ་མ་ཟད་རྒྱལ་སྤྱིའི་ཅི་ནི་སིའི་ཟིན་ཐོར་ཚུད་ཅིང་དཔང་ཡིག་ཐོབ། འགྲེམ་སྟོན་བྱེད་ཡུན་རིང་ལྷ་སའི་བརྙན་འཕྲིན་ཁང་དང་། བོད་ལྗོངས་བརྙན་འཕྲིན་ཁང་། དབུས་གཞུང་བརྙན་འཕྲིན་ཁང་གཙོས་བོད་ལྗོངས་ཉིན་རེའི་ཚགས་པར། ལྷ་སའི་ཉིན་རེའི་ཚགས་པར། ལྷ་སའི་དགོང་དྲོ་ཚགས་པར། ལྷ་སའི་ཚོང་འཕྲིན་ཚགས་པར་སོགས་དང་། གཞན་ཡང་དྲ་ཚིགས་ཆིག་བརྒྱ་ལྷག་གིས་བརྡ་འཕྲིན་ཕྱོགས་བཅུར་སྤེལ་བས་རྒྱལ་ཕྱི་ནང་གི་ལས་རིགས་ཁག་གི་ཤེས་ཡོན་པ་དང་ལྗོངས་རྒྱུ་བ་སོགས་མི་འབོར་ཁྲི་ལྔ་ལྷག་གི་བསམ་བློའི་ནང་ལ་བོད་ཀྱི་ཡིག་གཟུགས་སྒྱུ་རྩལ་གྱི་ལོ་རྒྱུས་དང་རིན་ཐང་། བེད་སྤྱོད་སོགས་ཀྱི་འདུ་ཤེས་དང་བག་ཆགས་ཟབ་མོ་བཞག་ལ།

        ཐེངས་འདིའི་བོད་ཀྱི་ཡིག་གཟུགས་ཀུན་འདུས་ཞལ་ཐང་རིང་མོ་འགྲེམས་སྟོན་བྱས་པ་འདིས་བོད་ཀྱི་རིག་གནས་ཀྱི་ལོ་རྒྱུས་རྒྱུན་རིང་ཞིང་སྲོལ་རྒྱུན་གྱི་རིན་ཐང་གཞལ་དུ་མེད་པ། བོད་ཀྱི་ཡིག་གཟུགས་སྒྱུ་རྩལ་འཛམ་གླིང་ལ་ཁ་ཕྱོགས་པ། དེ་བས་ཀྱང་བོད་ཀྱི་ཡིག་གཟུགས་སྒྱུ་རྩལ་འཛིན་སྐྱོང་སྤེལ་གསུམ་གྱི་ཐད་ལ་སྔ་ན་མེད་པའི་ཐོད་བརྒལ་རང་བཞིན་གྱི་འགྲེམ་སྟོན་ཞིག་ཏུ་བརྩིས་ཆོག་པས་འདི་ལ་དུས་རབས་རང་བཞིན་དང་། ལོ་རྒྱུས་རང་བཞིན་གྱི་དཀྱོགས་མཚམས་ལྟ་བུ་ཞིག་ལ་ངོས་བཟུང་ནའང་འུད་བསྟོད་ཁྱོན་ནས་མ་ཡིན་སྙམ།

        ཟུར་གཙང་གཡང་འབུམ་གྱིས་བྲིས་པ་དགེ་བར་གྱུར་ཅིག