ལས་རྒྱུ་འབྲས་ཡོད་པ་ཚན་རིག་གིས་ར་སྤྲོད་བྱས་འདུག

རྩོམ་སྒྱུར་བ། བདེ་ལྷ་མོ།

           ཨ་རིའི་ཚེ་སྲོག་རིག་པའི་མཁས་དབང་དགེ་རྒན་ཆེན་མོ་བ་སེ་ཏ་ཧྥིན་ཕོ་སི་ཐྲི་(Stephen Post)སོགས་ཀྱིས་དེང་རབས་ཚན་རིག་དང་གསོ་བ་རིག་པའི་ཐབས་ལམ་སྤྱད་ནས་གཞན་ལ་རོགས་བྱེད་པ་དང་། སྦྱིན་པ་གཏོང་བ་སོགས་བྱ་བཟང་སྤྱོད་བཟང་སྒྲུབ་པ་ཡིས་མིའི་ལུས་ཁམས་དང་སེམས་ཁམས་ལ་འགྱུར་བ་གང་འབྱུང་གི་སྐོར་ལ་ལོ་མང་རིང་ཞིབ་འཇུག་བྱས་མཐར། ཞིབ་འཇུག་འབྲས་བུ་ཧང་སང་པ་ཐོབ་ཡོད་པ་སྟེ། མིས་བྱ་བཟང་སྤྱོད་བཟང་བསྒྲུབས་རྗེས། སྤྲོ་སྣང་ངམ་རང་ལ་ཡིད་ཚིམ་པའི་ཚོར་སྣང་འབྱུང་བ་མ་ཟད།  ལུས་ཕུང་ནང་ཕྲ་ཕུང་གི་བདེ་ཐང་ལ་ཕན་པ་ཆེ་བའི་རྫས་ཁྱད་པར་བ་ཞིག་འབྱེད་ཅིང་། རྫས་དེས་ནད་འགོག་ཕྲ་ཕུང་ལ་སྟོབས་ཤུགས་བསྩལ་བ་དང་། ནད་འགོག་ཕྲ་ཕུང་སྟོབས་དང་ལྡན་པར་གྱུར་བ་ཡིས་མི་དེར་ནད་ཕོག་མི་སླ་བར་འགྱུར་ལ། དེ་མིན་རྫས་དེས་ད་དུང་སེམས་ཁམས་ཀྱི་བདེ་ཐང་ལའང་ཕན་པ་བསྐྱེད་པ་རེད། མིས་བྱ་ངན་སྤྱོད་ངན་སྒྲུབ་པའམ་སེམས་པ་ངན་པ་བཅངས་ན། དེ་ལས་ལྡོག་སྟེ་ཁྲག་ནང་བདེ་ཐང་ལ་གནོད་པའི་དུག་དང་ལྡན་པའི་རྫས་ཤིག་འབྱུང་བ་དང་། རྫས་དེས་ལུས་པོའི་བདེ་ཐང་ལ་གནོད་སྐྱེལ་བ་མ་ཟད། སེམས་ཁམས་ཀྱི་བདེ་ཐང་ལའང་གནོད་བྱེད་དོ།།

          དེ་མིན་གཞན་ཨ་རིའི་སྙིང་དང་ཁྲག་རྩ་རིག་པའི་ཆེད་མཁས་པ་འབུམ་རམས་པ་ཝེ་ལེམ་སེ་（Williams）ཡིས་༡༩༥༨ལོ་ནས་བཟུང་སློབ་མ་༥༠༠སེམས་དཀར་ཅན་དང་སེམས་ནག་ཅན་རིགས་གཉིས་སུ་བཀར་ནས་ལོ་༢༥ཡི་རིང་རྗེས་འདེད་བརྟག་དཔྱད་བྱས་པར། སེམས་པ་ནག་པོ་ཅན་རྣམས་སེམས་པ་དཀར་པོ་ཅན་ལས་ནད་ཕོག་སླ་བ་མ་ཟད། སེམས་ནག་ཅན་རྣམས་ཤི་ཚད་ཀྱང་བརྒྱ་ཆའི་༩༦ཙམ་ཟིན་པའི་ཞིབ་འཇུག་འབྲས་བུ་ཐོབ་འདུག

          ཞིབ་འཇུག་འབྲས་བུ་དེ་དག་གིས་རྒྱུ་འབྲས་ཞེས་པའི་བཤད་སྲོལ་དེ་མིག་མཐོང་ལག་ཟིན་ལྟ་བུར་བསྒྱུར་ཞིང་། ལས་རྒྱུ་འབྲས་ཞེས་པ་ཚེ་ཕྱི་མ་མི་དགོས་པར་ཚེ་འདི་ངོགས་ནས་ཀྱང་མཐོང་ཐུབ་པ་ཚན་རིག་གིས་ར་སྤྲོད་བྱས་སོ།།