མགོ་ལོག་པདྨ་རྫོང་བོད་ཡིག་བྱམས་སྐྱོང་སློབ་གྲྭའི་༢༠༡༦ལོའི་དམའ་གཅིག་འཛིན་གྲྭའི་རྩོམ་བསྡུས།
ཆར་བ།
པདྨ་རྫོང་བོད་ཡིག་བྱམས་སྐྱོང་སློབ་གྲྭའི་སློབ་གཙོ་ལགས་ལ་ཕུལ་བའི་སྙན་ཐུང་།
རྣོ་ཟུར།
གནམ་ངོ་དྭངས་ངེར སྤྲིན་པ་ཅི་ཡང་མེད
ཚ་བ་དང་ཐན་པའི་བར་དུ
སེམས་ཅན་མང་པོ་ཞིག་སྐྱོ་བས་མནར
སྐབས་དེར སྐབས་དེར
བསེར་བུ་འཇམ་པོ་ཞིག་གི་ལག་པས
ནམ་མཁའ་གཡུག་གཅིག་ཏུ་བསྒྲིབས
ང་ཚོས་བཤད་མྱོང་བའི་སྦྲང་ཆར་དེ
རྩྭ་སྐྱ་དག་གི་རྩ་བར་བབས་དུས
རློན་ཤུགས་ཤུགས་ཀྱིས་བཟུང་བའི་
དབུགས་ཐེར་ཐེར་གྱིས་འགུལ་བའི་
མྱ་ངན་ཐང་དུ་ས་བོན་ཞིག་ཡང་བསྐྱར་སྨིན
ལོ་དེ་ནས ཆར་བས་འབབ་མཚམས་མ་ཆད
འཇམ་སིལ་སིལ་གྱི་ཆར་བ་དེ
ཁྱོད་ཡིན གསར་བུ་ཁྱོད་ཡིན
ད་དུང་ཁྱེད་འབབ་དགོས
སྦྲང་ཆར་བསིལ་མའི་ཟོལ་གྱིས
ཡིད་ཀྱི་གཏིང་ཀ་རུ་བཞུར་དགོས
བརྩེ་བའི་ཆར་བ་ལགས
༢༠༡༦--༡༢--༢༨ཉིན།
བོད་མོ་ཚོ།
རིག་བྱེད་དབང་མོ།
རང་ས་སྐྱིད་པོ་ཞིག་དང་བྲལ་ནས་ཤེས་རིག་སྦྱོང་སའི་གླིང་ག་འདིར་ཡོང་བ་ནི་ངའི་མི་ཚེ་འདིའི་ཐོག་གི་རྨི་ལམ་ཡག་པོ་དེ་ཡིན།
ཞིང་ཁར་ནོར་རྗེས་འདེད་པའི་བོད་མོ་ཚོ།།
ཁངས་ཆར་གདོང་དུ་བབས་པའི་བོད་མོ་ཚོ།།
དཀའ་ལས་སྡུག་ལས་བྱས་པའི་བོད་མོ་ཚོ།།
ཤེས་རིག་བསླབ་པའི་གནས་ལ་འགྲོ་ཐབས་བྱོས།།
ནོར་གྱི་རྗེས་ནས་རིག་པ་དར་བ་དཀའ།།
ཞིང་ཚུགས་བར་ནས་ཡོན་ཏན་སློབ་པ་དཀའ།།
གནས་ཡུལ་བར་ནས་བསམ་བློ་གཏོང་བ་དཀའ།།
དཀའ་བ་འདི་དག་རྒྱང་དུ་གཡུག་དགོས་སོ།།
བོད་ཁམས།
དཀོན་མཆོག་རྒྱལ་མཚན།
ང་ནི་ནོར་ལུག་གི་རྫི་མཐའ་ནས་ཤེས་རིག་གི་མེ་ཏོག་འཐུ་བའི་ལམ་དུ།
གསུབ་མེད་ཡལ་མེད་དུ་དྲིན་གྱིས་བརྐྱངས་པ་དག་ནི་བརྗེད་དུ་མེད་དོ།
འཇིག་རྟེན་ཧྲིལ་པོའི་ཐོག་གི།
སྐྱིད་སྡུག་གཉིས་ཀྱིས་གྲུབ་པའི།།
ཁ་བ་གངས་ཀྱི་ལྗོངས་འདི།།
ང་ཡི་ལྟེ་ཁྲག་འཕོ་ས།།
མཛའ་ཞིང་མཐུན་པའི་མི་རིགས།།
དགེ་ཞིང་བྱམས་པའི་མི་རིགས།།
དུང་ཞིང་བརྩེ་བའི་ཕུ་ནུ།།
ཡིད་ཀྱི་གཏིང་གི་མེ་ཏོག།
རྐང་ལམ་ཕྲ་མོ།
གླེགས་གཟའ་བདག་མོ།
མེ་ཏོག་སྐྱེས་སའི་རི་སྒང་ནས་འུར་ཆ་འཕེན་ཞོར།
སྙན་ངག་གམ་རྩོམ་ཡིག་ཅེས་པའི་གཅེས་ཕྲུག་ཅིག་ལ་གསོལ་ཇ་འདྲེན་བཞིན་ཡོད།
ཁྱེད་དང་འུ་གཉིས་འཕྲད་སའི།།
དུས་བཞིའི་རྐང་ལམ་ཕྲ་མོ།།
རེ་སྒུག་ཉི་ཤར་བར་དུ།།
ཁྱེད་ཉིད་མཐོང་རྒྱུ་མ་བྱུང་།།
རེ་བ་སེམས་ལ་བཟུང་ཡོད།།
དུང་བ་ལུས་ལ་བརྗོད་ཡོད།།
འུ་གཉིས་སེམས་ཀྱི་དགའ་ཚལ།།
གཉོམ་ཆུང་ཡུལ་དུ་བཏབ་ཡོད།།
ཉེས་མེད་དྭངས་གཙང་སེམས་པ།།
རྒྱ་མཚོའི་ཆུ་ཐིགས་འདྲ་བྱུང་།།
བུ་མོའི་སེམས་པ་ཕྲ་མོ།།
ཁྱེད་ཀྱིས་བསྒྱུར་ཐབས་མ་བྱུང་།།
སུན་པའི་སྟོན་མཇུག
ཧོར་རྣོ་ཆུ།
ཧོར་རུས་ལས་ང་ནི་ཆེས་ཁྱད་དུ་འཕགས་པའམ་ཆེས་ཡིད་དུ་འོང་བའི་གསར་བུ་ཞིག་ཏུ་འགྱུར་བ་ནི་རྨི་ལམ་ཐོག་མ་ཡིན།
གཞས་ར་དབྱར་གྱི་མེ་ཏོག།
ནུབ་ཀྱི་ལ་ཁར་གྱེས་སོང་།།
སྙན་འཇེབས་ཁུ་བྱུག་གཞོན་ནུ།།
མ་ངེས་ཡུལ་གཞན་ཆས་ཐ།།
ཤུགས་མེད་བྱེའུ་ཆུང་ཞིག་ལ།།
གྲང་འཁྱག་བཙག་གིས་བསྡམ་ཀྱང་།།
བྱམས་ལྡན་རྐང་རྗེས་འཚོལ་ཆེད།།
ལུས་ལྤགས་ཟེགས་ནས་འཁུམས་སོང་།།
སྟོན་མཇུག་དགུང་ལ་ཡལ་ཐལ།།
སྟོན་ལྡུམ་ས་ལ་འཐོར་ཐལ།།
ལྷ་བྱ་ལྷོ་ལ་བསྐྱོད་ཐལ།།
བྱམས་པ་གཞན་ལ་བསྒྱུར་ཐལ།།
གཞས་ཆུང་རི་ལ་གྱེར་སོང་།།
སྐད་ངག་མཚོ་ལ་བསྐུར་སོང་།།
ཆུང་གྲོགས་བྱམས་པའི་བརྩེ་བ།།
བརྟན་པའི་ཚིག་གསུམ་ཨེ་ཡོད།།
སྨྲ་དཀའ་བའི་གསང་གཏམ།
ཀརྨ་ཚེ་དབང་།
ལུ་གུ་ཆུང་ཆུང་དང་།
རྩྭ་ཐང་ཡངས་པོ་ནི་ང་ལ་མེད་དུ་མི་རུང་བའི་ཐ་སྙད་ཅིག་ཡིན།
ཡིད་འོང་རྨ་བྱ་ཡི་བུ་མོ།།
དགའ་བའི་སེམས་པ་དེ་གཏད་ཀྱང་།།
ཁ་ནས་འཛུམ་འཛུམ་ཞིག་བསྟན་ནས།།
སེམས་ལ་དགའ་བ་རང་རྒྱས་འདུག།
སྐུ་ལུས་མེ་ཏོག་གི་པད་མ།།
མེ་ཏོག་སྦྲང་རྩི་དེ་མངར་མོ།།
འདབ་ལྡན་སྦྲང་ཆུང་གི་སེམས་འདི།།
ཁྱེད་ཀྱི་ཕྱོགས་ལ་རང་འཁོར་འཁོར།།
བརྩེ་བའི་འདུན་པ་རང་ཆད་དེ།།
རང་རང་སོ་སོ་རུ་གྱེས་ན།།
སེམས་པའི་སྙིང་ཁམས་ཡི་ན་ཟུག།
སྡུག་ཀྱང་སྡུག་པ་རང་མི་འདུག།
བུ་མོའི་འཛུམ་མདངས་ཤིག་ངོམ་པ།།
མཛེས་པའི་དཀར་དམར་གྱིས་བརྒྱན་འདུག།
འཕྱོར་སྒེག་མེ་ལོང་དེའི་ཁྲོད་ནས།།
སེམས་པ་བུ་མོ་ལ་ཤོར་ཐ།།
གཤིས་འཇམ་ཁུ་བྱུག་གི་བུ་མོ།།
ཚིག་གསུམ་སྐད་ཆ་ཞིག་སྨྲ་འདོད།།
མགྲིན་པ་མཆི་མ་ཡིས་བརྣངས་ཏེ།།
སྨྲ་འདོད་རང་དབང་ཞིག་མི་འདུག།
བུ་ངའི་ཚིག་གསུམ་གྱི་གསང་གཏམ།།
སྙིང་གི་ཆུང་གྲོགས་ལ་བཅོལ་ཡོད།།
སྙིང་གྲོགས་འགྱུར་བ་རེ་མེད་ན།།
ཚིག་གསུམ་བོར་བ་རང་ཨེ་སྲིད།།
རྫ་མགོའི་སྨུག་པ་དེ་དྭངས་སོང་།།
སེམས་ཀྱི་འདུན་པ་རང་གྲོལ་སོང་།།
ང་རང་དགའ་ས་ཡི་བྱམས་པ།།
ཚེ་ཐག་རིང་ན་ཡང་བསམ་བྱུང་།།
དགའ་བའི་མིག་ཟུང་དེ་རྣོན་པོ།།
བུ་མོའི་སྙིང་ཁམས་ལ་བཏབ་ཡོད།།
ཕར་དགའ་ཚུར་དགའ་ཡི་བྱམས་པ།།
མི་འགྱུར་དམ་བཅའ་རེ་ཨེ་ཡོད།།
ང་རང་དགའ་ས་ཡི་བྱམས་པ།།
སེམས་བཟང་གཤིས་བཟང་གི་བུ་མོ།།
གང་ནས་བལྟས་ཀྱང་རེ་མཛེས་པ།།
གང་ལས་བསམ་ཀྱང་དེ་དྲན་པ།།
རྟ་ཕོ།
བཙའ།
སློབ་སྦྱོང་ལ་ཕྱོགས་པའི་གོམ་སྟབས་དེ་ཇི་འདྲ་ཐག་རིང་བ་འདྲ་ཡང་།
འབད་བརྩོན་ལ་བཟུང་བའི་འདུན་པ་ནི་ནམ་ཡང་རང་ཉིད་དང་ཐག་ཉེ་བར་ཡོད།
སྔོ་ལྗང་རྩྭ་ཐང་དེའི་ཐོག་གི།
རྫིག་རྫིག་གོམ་ལྡན་གྱི་རྟ་ཕོ།།
དབུ་འཕང་དགུང་སྔོན་དུ་བཏེགས་པ།།
ཉི་ཟླའི་རྣ་ཚར་དང་ཡིན་འདྲ།།
གཤོག་ལྡན་གྱི་ལིང་དེ་མཐོང་དུས།།
ཆུང་འདྲེས་རྩེད་རོགས་དེ་དྲན་བྱུང་།།
ཐོ་རུ་དར་མ་དེ་མཐོང་དུས།།
མཚན་མོའི་གཉིད་ཐབས་དེ་བཅག་སོང་།།
སེམས་ཀྱི་གསང་།
མཚོ་བྱུང་ལྷ་མོ།
རྩོམ་ཡིག་རེ་རེ་འབྲི་དུས་རྫུན་རེ་བཤད་ན།
སྤྱི་ཚོགས་ཀྱིས་ང་ལ་རྫུན་མ་རེད་མ་གསུང་རོགས།
འདས་ཟིན་པའི་ལོ་ཟླའི་ཁྲོད་ན།།
དུས་མེ་སྟག་འཚུབ་པ་འདྲ་བ།།
ཆུ་གཙང་བོའི་བཞུར་རྒྱུན་དུང་འདྲ།།
མདའ་མདུང་མོ་སྙིང་རྩར་འཛེར་འདྲ།།
ཕྱི་མཐུན་པའི་ཁྱོད་དང་འུ་གཉིས།།
སྐབས་ལ་རེ་མཐུན་པ་བྱུང་མོད།།
དེ་བརྗོད་མེད་ལས་དབང་ཀྱག་ཀྱོག།
མཐུན་འདོད་ན་མ་འོངས་སྒུག་དགོས།།
སྐབས་དེ་དུས་མཉམ་འཛོམས་བྱུང་ན།།
ཁྱོད་འུ་གཉིས་སྐལ་ལྡན་ཡིན་ནོ།།
སེམས་དུང་བའི་མཆོད་པ་ཡོད་ན།།
ལས་རླུང་རྟ་མཁའ་རུ་མཆོད་དོ།།
ངའི་གསང་བ་བཤད་ས་ཤོག་བུ།།
དེ་གསལ་བོར་རྗོད་བྱེད་སྨྱུ་གུ།།
ཤོག་སྨྱུ་གུ་མཉམ་འཛོམས་བྱུང་ན།།
ལས་ཅི་དགར་དེ་གཉིས་བསྟན་ཡོང་།།
ལས་རིང་ཐུང་ཡོད་ན་སྒུག་དགོས།།
ཚེ་རིང་ཐུང་ཡོད་ན་ལས་ཡིན།།
འགྱུར་སོང་ན་མི་སེམས་མེད་ནི།།
སེམས་འདང་བརྩེ་གོར་མོ་རྡོ་ཡིན།།
རྨི་ལམ་ལས་བྱུང་བའི་ཉོག་གཏམ།
རྣོ་བཙའ་མེད།
ངས་སྙན་མོ་དག་གཞས་སུ་གྱེར་དུས།
ང་ནི་སྙན་མོ་ཞིག་གི་བརྗོད་བྱ་རྨ་མེད་པ་དེ་ཡིན་ནམ།
ལོ་ཟླའི་གར་ཁང་ཆེན་མོ།།
མདང་གི་རྨི་ལམ་རེད་སྙམ།།
རྨི་ལམ་ཡིན་ན་བསམ་ཡང་།།
འཚོ་བའི་ཟུར་གཅིག་རེད་འདུག།
སེམས་ཀྱི་ཁྲུང་ཁྲུང་དཀར་མོ།།
རྒྱང་དུ་འཕུར་བའི་གཏམ་རྒྱུད།།
མཛེས་པའི་འཛུམ་མདངས་དྲན་ཚེ།།
ཡིད་སེམས་སྐྱོ་བས་མནར་གི།
ཁྱོད་འདྲར་དཀར་པའི་བརྩེ་བ།།
མཚོ་མོའི་འགྲམ་དུ་ཡོད་རེད།།
མཚོ་མོ་དར་གྱིས་བཟུང་འདུག།
བརྩེ་བ་བཟུང་ཡོད་ཨེ་སྲིད།།
རི་བོའི་ཕར་རྒྱབ་ཚུར་རྒྱབ།།
དྲན་པ་སེམས་ཀྱི་མདངས་ཡིན།།
དུང་བའི་གཅེས་ཚིག་བརྗོད་རུང་།།
སྒུག་པའི་ཨ་ལན་ཆ་མེད།།
མཚོ་ཆེན་ནོར་བུ་ཅན་པོ།།
རྒྱང་ནས་རྒྱང་དུ་བཞུར་དུས།།
བཅོས་མེད་དུང་བའི་ཤུལ་རྗེས།།
ཁྱེད་ཀྱི་རྒྱུན་དང་མ་འདྲེས།།
སང་ལོའི་དཔྱིད་ནས་ཚེས་ཏེ།།
སླར་ཡང་སྟོན་གྱི་བར་དུ།།
འུ་གཉིས་འཛོམས་པ་བྱུང་ན།།
མེ་ཏོག་མཇལ་ཁ་ལོས་ཞུ།།
གང་ནས་གང་དུ་བཤད་ཀྱང་།།
ཅིས་ཀྱང་རྨིས་པ་རྟག་མེད།།
ཡིན་ཡང་ཞེ་ལ་ཐོགས་ན།།
ཁོག་གི་གློ་སྙིང་འཁུམ་འགྲོ།།
ཨ་མ།
རྡུལ།
 རང་ཉིད་ཀྱི་དུང་བ་དང་བརྩེ་བ་ནི་ནམ་ཡང་ཕ་ཡུལ་གྱི་རི་ཆུ་ནགས་གསུམ་ལས་བྱུང་བ་ཞིག་ཡིན།
བྱམས་བརྩེའི་འདབ་མ་རྒྱས་པའི་དྲོད་ཁོལ་གྱི་པང་ན།།
ལྷག་བསམ་ཚོམ་བུའི་དཀར་མདངས་བུ་ཆུང་ལ་སྟེར་ནས།།
སྙིང་གི་སེམས་པའི་གཏིང་ནས་རང་ཚུགས་དེ་སྐྱོང་ནས།།
མ་ལོའི་བུ་ལ་བཅང་བའི་རེ་བ་དེར་འབད་འགྲོ།།
གདོང་ལ་གཉེར་མ་ཆགས་པ་ཕ་རོལ་ལ་ཞོགས་ཅིག།
མགོ་བོའི་སྐྲ་ལོ་དཀར་ཡང་རྒས་ཉམས་དེ་མ་སྟོན།།
དྲིན་ལན་ལྡོག་པ་མེད་པ་ཨ་མ་ཡི་སེམས་ཀྱི།།
ཤེལ་གྱི་བུམ་པ་འདྲ་བ་ང་རང་དེ་ཡིན་སོང་།།
གཡུ་མཚོ། ཞར་བཀོད་གཅིག
ལུག་རྫི་བུ་མོ།
ང་ལ་སྨྱུ་གུ་འཛིན་པའི་རྨི་ལམ་སྐྱེས་པ་ནས་ང་ལ་མདུན་ལམ་ཡོད་པའི་སྣང་བ་རྒྱུན་དུ་འཆར་མྱོང་།
སྤང་གཡུ་ལོ་སྔོ་ལྗང་གོས་ཀྱི་སྟེང་།།
མདོག་དཀར་དམར་མེ་ཏོག་སྣ་ཚོགས་བཞད།།
དགུང་ཉི་མའི་དྲོད་ཁོལ་གླིང་བཞིར་ཁྱབ།།
མཚོ་སྔོན་མོ་ལྡེམ་ལྡེམ་འོད་དུ་འཁྱུག།
ཕ་ཡུལ།
སྔོ་ཚོད་མ་སྔོན་དུ་འཇོག་དུས།།
ཟས་རྩམ་པའི་བྲོ་བ་དྲན་གི།
དབྱར་མེ་ཏོག་ཁྲ་ཆིལ་བཞད་དུས།།
ངའི་ཕ་ཡུལ་ཡིད་ལ་དྲན་གི
སྐྱིད་པའི་གནས་མཆོག
རྫི་མོ།
རང་ཉིད་སོང་མྱོང་བའི་གནས་མཆོག་གིས་ང་ལ་ཐོབ་བྱ་མི་དམན་པ་ཞིག་བསྩལ་ཡོད།
རབ་མཛེས་གངས་དཀར་ལྷུན་པོའི་འདབས་རོལ་ན།།
ཡིད་འཛིན་དབང་བོ་འཕྲོག་པའི་རུ་སྡེ་ཞིག།
ཅོལ་ཆུང་བུ་མོ་ང་ཡི་ཕ་ཡུལ་ཡིན།།
ཕ་ཡུལ་བསིལ་ལྡན་ལྗོངས་འདི་སྐྱིད་པའི་ཡུལ།།
མ་ཡུམ་སློབ་གྲྭའི་ར་བའི་སྐྱེད་ཚལ་དུ།།
ཤེས་རིག་བགྲང་བྱ་འཐོབ་པའི་སློབ་གྲོགས་ཤིག།
ཉམ་ཆུང་རིག་ལྡན་ང་ཡི་སློབ་གྲོགས་ཡིན།།
མ་ཡུམ་སློབ་གྲྭའི་གླིང་ཀ་སྐྱིད་པའི་གནས།།
མ་ཡུམ་གཡང་ཁྱིམ་གྲུ་བཞིའི་ནང་རོལ་དུ།།
རབ་དཀར་འོ་ཇ་བཞེས་པའི་དྲིན་ཆེན་མ།།
བརྩེ་ལྡན་བུ་མོ་ང་ཡི་མ་ལོ་ཡིན།།
དྲོད་ལྡན་གཡང་ཁང་གྲུ་བཞི་སྐྱིད་པའི་ཁྱིམ།།
སྐྱོ་སྣང་གི་མཆི་མ། ཞར་བཀོད་གཅིག
ཆེ་གེ་མོ།
རྩོམ་རིག་གི་ཞིང་ས་ནས་ལོ་རྒྱུས་ཀྱི་མེ་ཏོག་བཞད་དུས།
ང་ནི་རྩོམ་རིག་ཅེས་པའི་གཞུང་ཆེན་པོ་ཞིག་ཏུ་འཛུལ་ནས་ཡོད་ཨང་།
སྐྱོ་སྣང་སེམས་པས་བཟུང་བའི་མི་ཡུལ་འདི་ནས།།
ཁེར་རྐྱང་སེམས་པའི་རྣམ་ཤེས་གང་དུ་སོང་ཡོད།།
དུངས་བ་སེམས་ལ་བཞག་པའི་ན་གཞོན་བུ་ལོ།།
ཁྱོད་ཞལ་གཞོན་པའི་ལང་ཚོ་ནམ་རྒྱུན་དྲན་གི།
མ་ལོའི་དྲིན་ལན།
ཚེ་བསྐལ་བ་ཡག་པའི་དུས་ལ།།
དྲིན་མ་ལོའི་བྱམས་སེམས་མེད་སོང་།།
གཞོན་ང་ལ་སྔོན་ལས་མེད་པས།།
དྲིན་མ་ལོ་གར་སོང་མ་ཤེས།།
སྤང་ཐང་གི་གཡུ་ལོ།
འཇུ་ལྷ་མོ།
 སློབ་གྲྭའི་གླིང་དུ་ཡོད་པའི་སྐབས་སུ་ཐ་སྙད་རེ་རེ་བསོག་པ་དེ་བསོད་ནམས་ཡིན་ལ།
སློབ་གྲྭ་ནས་གྱེས་སོང་སྐབས་ང་ནི་ཅི་ཞིག་ཡིན་ནམ།
ཆུ་སྐྱེས་སྐྱེད་ཚལ་གྱི་བར་ན།།
ཁྱེད་འདྲའི་གསེར་མིག་དེ་མེད་དོ།།
འཁྱུག་རྩལ་ལྡེམ་མྱུར་གྱི་ཉ་མོ།།
ཡིད་ཀྱི་གཏིང་མཐའ་རུ་མཛེས་སོང་།།
དགེ་རྒན་དམ་པ་ཡི་ཁྲོད་ནས།།
ཁྱེད་འདྲའི་བྱམས་ལྡན་ཞིག་མེད་དོ།།
སྤང་ཐང་མེ་ཏོག་གི་ཁྲོད་ན།།
སེམས་ཀྱི་འདབ་ལྡན་དེ་ཡག་པ།།
གྱེས་བྲལ་གྱི་རྨ་ཁ།
དུང་སྒྲ་ལྷ་མོ།
དུང་བ་མེ་ཏོག་གི་ཟེའུ་འབྲུའི་སྟེང་གི་སྦྲང་རྩི་ལྟར་ཞིམ་ན། སྙན་ངག་ནི་མེ་ལོང་ནང་གི་ཡོལ་བ་ཞིག་ཨེ་ཡིན།
མུན་ནག་གི་མཚན་མོ་ཡི་དུས་སུ།།
འཇིག་རྟེན་འདི་ལྷིང་འཇགས་ཀྱིས་ཁེངས་སོང་།།
བརྩེ་འཛུམ་གྱི་གྲོགས་ཞལ་དེ་འཛོམས་པ།།
ལས་དབང་གིས་ཁ་ཁ་ཞིག་མ་གཏོང་།།
མུན་ནག་གི་མཚན་མོ་ཡི་དུས་སུ།།
སེམས་ཁམས་ལ་ན་ཟུག་གིས་ཁེངས་སོང་།།
ཕན་ཚུན་གྱི་བརྩེ་བ་དེ་མི་འགྱུར།།
བརྩེ་བ་འདི་མི་འགྱུར་གྱི་རྡོ་རིང་།།
ལས་དབང་།
མ་ཡུམ་སློབ་གྲྭའི་སྐྱེད་ཚལ་གྱི་གླིང་ནས།།
རིག་གནས་འབྲུ་དྲུག་ས་བོན་དེ་སྦྱང་བཞིན།།
གཤོག་རྩལ་ལྡན་པའི་བྱ་རྒྱལ་ཅིག་བྱ་འདོད།།
བརྩོན་པས་སྐུལ་མ་རང་ཉིད་ལ་གདམས་ཡོད།།
འདས་སོང་ལོ་ཟླ་སྒྱུ་མ་ཡི་རང་མདངས།།
འཇིག་རྟེན་སྣང་བ་སྐད་ཅིག་དང་ཉིན་གཅིག།།
བྲལ་དགོས་བྱུང་ཀྱང་འཇིག་རྟེན་གྱི་ཆོས་ཉིད།།
དམ་ཚིག་མི་འགྱུར་རྡོ་བརྐོས་ཀྱི་རི་མོ།།
ལམ་དུ་ཆས།
ཟིལ་བ།
བློས་གཏོང་དཀའ་བ་སྙན་ངག་ཐུང་ཐུང་འདི་དག་ཡིན་ལ།
ད་དུང་རྟག་ཏུ་སེམས་སུ་དྲན་པ་ནི་རང་གི་དྲིན་ཆེ་བའི་མ་ལོ་ཡིན།
འདས་པའི་ལོ་ཟླ་འདི་དག་གི་རིང་ལ།
ཁེར་རྐྱང་གི་གྲིབ་གཟུགས་དང་འགྲོགས་ཏེ།
ལམ་དུ་ཆས།
སྐྱོ་བ་དང་སྡུག་བསྔལ་གྱིས་མནར་རུང་།
སྤོབས་སེམས་དང་ང་རྒྱལ་གྱིས།
ལམ་དུ་ཆས།
མིག་ཆུ་ཞིག་ཁོག་ཏུ་མིད་དེ།
ངའི་སྙན་ངག་འདི་འབྲི་འགོ་བརྩམས།
ཡོད་ཚད་ནས་ཡོད་ཚད།
སྙན་ངག་ལ་གཏད་དེ།
ལམ་དུ་ཆས།
སྨག་རིམ་གྱི་མཚན་ལྗོངས་འདིར།
བསིལ་རླུང་ཞིག་དལ་གྱིས་ལྡིང་།
ཡོད་ཚད་རླུང་བུ་ལ་གཏད་དེ།
ལམ་དུ་ཆས།
སྨྲེང་བ་སློང་བའི་མཚན་ལྗོངས་འདིར།
བསིལ་རླུང་དང་ལྷིང་འཇགས།
མདོར་ན།
གྲིབ་གཟུགས་དང་སྐྱོ་གདུང་།
སྙན་ངག་དང་རླུང་བུ།
ཡོད་ཚད། ལམ་གྲོགས་སུ་གྱུར།
ཁྱེད།
ལྷ་ལྕམ།
ཤུག་སྡོང་ལྟ་བུའི་དྲི་ཞིམ་ཞིང་གཙང་བ་ནི་རང་གི་སྙན་ངག་ཏུ་བྲིས་པའི་རྩོམ་ཐུང་འདི་དག་ཡིན།
ཟླ་འོད་དང་གློག་འོད་མེད་པའི་མཚན་མོ་འདིར།
འོད་ཕྲན་ཙམ་ཡང་མི་གསལ་པའི།
སྒེའུ་ཁུང་གི་ཕྱི་རོལ་ན།
ཆར་བ་ཤག་ཤག་འབབ་བཞིན་འདུག
སྐབས་འདིར། ཚོར་སྣང་དུ།
རྡོག་སྒྲ་ཞིག་དང་འུར་སྒྲ་ཞིག
སྐྲག་འདར་ཅིག
ཕྱི་རོལ་གྱི་མཆོད་རྟེན་དུ།
འཇའ་ཚོན་ལྟ་བུའི་འོད་ཟེར་ཅིག
ལམ་ལམ་འཚེར།
སྤྲིན་ནག་ཐར་ཐོར་གྱིས།
སྤྲིན་དཀར་གྱི་ཡོལ་བ་ཤུགས་ཀྱིས་འཐེན་ནས།
ང་ལ་འཇིགས་སྣང་སྐུལ།
འཆི་འཕོ།
འདྲེ་རུས་དཀར།
རང་ས་རང་ཡུལ་གྱི་ལྗོན་ཤིང་དང་མེ་ཏོག་ལས།
གཞན་གྱི་ཚེ་སྲོག་གི་མེ་ལོང་དུ་འཆར་བར་རེ་བའི་འདུན་མ་བཅང་ཡོད།
ཅི་ལ་རྟག་ཏུ་ང་ལ་ཐུབ་ཚོད་བྱ།
ང་ལ་བག་ལྷོད་ཀྱི་དུས་ཚོད་ཅིག་སྟེར་རོགས།
ང་ལམ་དུ་བུད་དེ་ཡོད་ཚད་ལ་རྒྱུས་ལོན་ཞིག་བྱ་འདོད།
ད་དུང་འགྱུར་དཀའ་བའི་བརྩེ་དུང་ལ་རྒྱུས་ལོན་བྱ་མ་ཐུབ།
ཁྱོད་ཀྱིས་ང་ཡུལ་གྲུ་གཞན་དུ་འགྲོ་བར་ཆོག་མཆན་མ་བཏབ།
ཁྱོད་ལ་འདྲ་མཉམ་ཟེར་བ་ཞིག་ཡོད་དམ།
ན་ཚ་དེས་ཀྱང་ང་ལ་སྤོབས་པ་ཞིག་མི་སྟེར།
ང་ལ་ཆེས་དངངས་འཚབ་ཀྱི་ལོ་བདུན་དང་བཅུ་ཡི་དུས་ཚོད་མཁོ།
ངས་ཀྱང་དེ་ལ་མཆོད་པ་དང་སྨོན་ཚིག་འབུལ་རྒྱུ་ཡིན།
མ་མཐའ་ཡང་ང་ལ་དུས་ཚོད་དེ་ཕྱིར་གནང་རོགས།
ང་ལ་ལེགས་གྲུབ་ཀྱི་ཉི་མ་མཁོ།
དཔྱིད་ཟླ།
གཞོན་ནུ་མ།
གཞོན་པའི་ལང་ཚོ་ནི་མི་རྟག་པར་ཡིན་མོད།
རིག་གནས་ཡོན་ཏན་ནི་རྟག་པ་ཞིག་ཏུ་ངོས་བཟུང་ཡང་མི་ཆོག་པ་ཅི་ཡོད་ཨང་།
དྲོད་འཇམ་གྱི་རླུང་བུ།
ཕ་གཞིས་ཀྱི་དྲོད་ཁོལ།
དེ་དག་ནི་དཔྱིད་ཟླ་ཡི་རུམ་ཡིན།
དཔྱིད་ཟླ་དེ།
ལྗང་ལོ་གསར་བ།
སྦྲང་ཆར་གྱི་ཟེགས་མ།
བདེ་སྐྱིད་ཀྱི་འཚོ་བ་གསར་བ།
ན་ཆུང་གི་ལང་ཚོ་གསར་བ།
དཔྱིད་ཟླ་ནི་གསར་བ་གསར་རྐྱང་ཞིག་རེད།
དཔྱིད་ཟླ།
འཛམ་གླིང་གི་དུས་ཆེན་ཉིན་མོ།
མི་ཚེ་ཡི་ལོ་ཟླ་གསར་བ།
སྙན་མོ་གླུ་ཡི་འགྱུར་ཁུགས།
བཀྲ་ཤིས་སྨོན་ཚིག་བརྗོད་དགོས།
བརྩེ་བའི་བདག་མོ།
འོད།
ཤེས་འཇོན་གཉིས་ལས་ང་ནི་འཇོན་ཐང་གཙིགས་སུ་འཛིན་པའི་སྙུག་ཐོགས་པ་ཞིག་ཡིན།
ཟླ་འོད་གསལ་ལ་མི་གསལ་བའི་ལམ་ཕྲན་ཞིག་གི་འོག་ཏུ།
མི་བུ་ཁེར་རྐྱང་ཞིག་གི་བརྩེ་བའི་བདག་མོ་དྲན་བཞིན།
མིག་ཆུ་རྡོག་གཅིག་པོའི་དེའི་གྱེས་ཕྱག་འཚལ་བ་བཞིན།
བརྩེ་དུང་ལ་བདེ་སྐྱིད་ཡོད་པར་སྨོན་ལམ་འདེབས།
དུང་བ་ནི་ངག་སྒྲོས་ལ་ཡོད་པ་ཞིག་ཡིན།
མཛའ་བརྩེ་ནི་དུས་རབས་ལ་མཁོ་བ་ཞིག་ཡིན།
འོན་ཀྱང་།
ལས་དབང་བཙན་པོའི་བདག་མོ་འདིས།
ངེད་གཉིས་བདེ་སྐྱིད་ཀྱི་དྲི་བསུང་འདི
བརྩེ་བའི་བདག་མོས་གཞན་ལ་མི་སྟེར་རོགས།
དུས་དེར།
མུན་ནག་ཀློང་གི་མཚན་མོ་དེར།
ཐེ་ཚོམ་མེད་པའི་ཟླ་འོད་དྲུད་དེ།
སེམས་པ་རླུང་བུ་ལ་བསྐུར་ཡོད།
གར་འགྲོ་མེད་པའི་གོམ་ཁ་དེ་ནས།
མ་འོངས་འཚོ་བའི་ལམ་ཡིག་བཙལ་བཞིན།
མིག་ཆུ་མང་པའི་བདག་མོ་ཞིག་དྲན་བྱུང་།
ཨ་མ་ལགས། ཁྱེད་རང་དྲན།
དྷི་ཀརྨ་སིདྡྷི།
གྲོག་རོང་གི་རི་མོ་དེ་དག་སྙན་ངག་གི་བརྗོད་བྱ་རུ་འཐིམ་དུས།
ང་ནི་སྤྱིར་སྟངས་ཀྱི་མི་ཞིག་མིན་པ་ཧ་གོ་ཡོད།
ཨ་མ་ལགས།
ཁྱེད་དང་ཁ་བྲལ་བ་ནས་བཟུང་།
ངའི་སེམས་སུ་དྲན་གདུང་དང་།
སྐྱོ་གདུང་གིས་ཁེངས་ཡོད།
ཨ་མ་ལགས།
ཟླ་བ་དང་ཉི་མ་རེ་རེ།
ཐ་ན་དུས་ཚོད་རེ་རེ་ལའང་ཁྱེད་རང་དྲན།
མེ་ཏོག་གི་སྐར་ཚོགས་སུ་ཅེར་ནས།
ཁྱེད་ཀྱི་འཛུམ་མདངས་དྭངས་མོ་དེ་དྲན།
དྲོད་འཇམ་གྱི་ཉི་གཞོན་འོག་ནས།
ཁྱེད་ཀྱི་རུམ་ཁ་དྲོན་མོའང་དྲན།
ཁུ་བྱུག་གི་གསུང་སྐད་ཐོས་ནས།
ཁྱེད་ཀྱི་བསླབ་བྱ་དྲོན་མོ་དེ་དྲན་བྱུང་།
ཁ་བ་འབབ་བཞིན་པའི་བུ་ཡུག་ཁྲོད་ནས།
ཁྱེད་ཀྱི་ལྷག་བསམ་དང་བྱམས་བརྩེ་དྲན།
ཨ་མ་ལགས།
དྲན་གདུང་གི་འདུན་པ་དེ།
ཇི་ལྟར་གསུབ་ཀྱང་དག་ཐབས་མི་འདུག
མཛུབ་ཁྲིད་དགེ་རྒན། དཀོན་མཆོག
| 