པེ་ཅིན་དུ་བོད་ཀྱི་ཡིག་གཟུགས་དུས་ཆེན་ལ་རྟེན་འབྲེལ་ཞུས་པ།
 
༄༅།།སྤྱི་ལོ་༢༠༡༧ལོའི་ཟླ་༤ཚེས་༣༠ཉིན་གྱི་ཕྱི་དྲོར་ཀྲུང་དབྱང་མི་རིགས་སློབ་གྲྭ་ཆེན་མོའི་རིག་གཞུང་སྙན་ཞུའི་ཚོགས་ཁང་དུ་བོད་ཀྱི་ཡིག་གཟུགས་དུས་ཆེན་སྐབས་དང་པོ་ལ་རྟེན་འབྲེལ་ཞུ་བའི་རིག་གཞུང་གི་མཛད་སྒོ་གཟབ་རྒྱས་ཤིག་གཉེར། མཛད་སྒོའི་ཐོག་བོད་ཀྱི་ཡིག་མཁན་གྲགས་ཅན་རྒན་དགེ་མང་འཇམ་ལགས་གདན་དྲངས་པ་དང་། ཁོང་གིས་༼བོད་ཀྱི་ཡིག་གཟུགས་སྒྱུ་རྩལ་མྱོང་རོལ་༽ཞེས་པའི་བརྗོད་གཞིའི་ཐོག་ནས་དུས་ཡུན་ཆུ་ཚོད་གཅིག་དང་ཕྱེད་ཀ་ཙམ་གྱི་རིང་ལ་འཆད་ཁྲིད་གནང་། དེ་ཡང་རྒན་དགེ་མང་འཇམ་དཔལ་ལགས་ཀྱིས་ཐོག་མར་བོད་ཀྱི་ཡིག་གཟུགས་དུས་ཆེན་ཞེས་པ་ཇི་ལྟར་གཏན་ལ་ཕབ་ཚུལ་དང་། དེའི་དགོས་པ་དང་དོན་སྙིང་སོགས་སྙན་སྒྲོན་ཞུས་པ་དང་། དེ་ནས་བོད་ཀྱི་ལོ་རྒྱུས་སུ་བྱུང་བའི་ཡིག་གཟུགས་རྣམས་དུས་ཀྱི་སྔ་ཕྱིའི་གོ་རིམ་བཞིན་པར་རིས་དང་བཅས་ཏེ་མཚམས་སྦྱོར་གནང་། མཐའ་མར་ཁོང་སྐུ་སྒེར་གྱི་ཉམས་མྱོང་དངོས་དང་སྦྱར་ནས་བོད་ཀྱི་ཡིག་གཟུགས་སྒྱུ་རྩལ་འདི་འཛམ་བུ་གླིང་གི་ཡིག་གཟུགས་སྒྱུ་རྩལ་གྱི་འཕེལ་འགྲོས་ལ་བསྟུན་དགོས་ཤིང་། བོད་ཀྱི་སྲོལ་རྒྱུན་ཡི་གེ་འབྲི་ཚུལ་གྱི་རྩ་བ་ཡལ་བར་མ་དོར་བའི་ཐོག་ནས་སྒྱུ་རྩལ་གྱི་ཉམས་འགྱུར་དང་ལྡན་པའི་ཡིག་གཟུགས་བརྩམས་ཆོས་གསར་པ་གང་མང་འབྱུང་བའི་རེ་བ་གནང་ལ། ཁོང་རང་ཉིད་ཀྱིས་འདས་པའི་ལོ་ངོ་སུམ་ཅུ་ལྷག་ཙམ་གྱི་རིང་སྐུ་ངལ་ལ་མ་འཛེམས་པར་གསར་རྩོམ་མཛད་པའི་ཡིག་གཟུགས་ཀྱི་བརྩམས་ཆོས་༼གྲོགས་པོ་༽དང་༼པད་མ་༽ཞེས་པ་སོགས་མཛད་སྒོར་བཞུགས་པའི་དགེ་སློབ་བརྒྱ་ཕྲག་གཅིག་ཙམ་ལ་ངོ་སྤྲོད་གནང་ཞིང་། བོད་པ་ཞིག་ཡིན་ན་བོད་ཀྱི་ཡི་གེ་འབྲི་ཤེས་པ་བྱ་རྒྱུ་ནི་གལ་ཆེན་ཡིན་པ་དང་། བོད་ཀྱི་རིག་གནས་ལ་བསླབས་ན་སྤྱི་སྒེར་གཉིས་ཀར་ཕན་པ་ཤིན་ཏུ་ཆེ་ཚུལ་རང་དཔེ་གཞན་སྟོན་གྱི་ཚུལ་དུ་གསུངས།
འཆད་ཁྲིད་ཀྱི་སྐབས་སུ་རྒན་དགེ་མང་འཇམ་དཔལ་ལགས་ཀྱིས་རྟེན་འབྲེལ་མཚོན་ཕྱིར་༼བོད་ཀྱི་ཡིག་གཟུགས་དུས་ཆེན་དབུ་བརྙེས་པར་བཀྲ་ཤིས་རྟེན་འབྲེལ་ཞུ་༽ཞེས་པ་ཕྱག་བྲིས་གནང་བ་དང་། གཞན་ཡང་སློབ་གྲྭ་དེ་གའི་བོད་རིག་པའི་ཚན་ཁག་ལ་སློབ་གླིང་གི་མཚན་བྱང་སུག་བྲིས་མཛད་པ་ཞིག་ཀྱང་ཕྱག་རྟགས་སུ་ཕུལ།
འཆད་ཁྲིད་ཀྱི་རྗེས་ལ་དགེ་སློབ་ཚོས་ལྷན་དུ་ཡིག་གཟུགས་འབྲི་སྦྱོང་གནང་བའི་ཚུལ་གྱིས་བོད་ཀྱི་ཡིག་གཟུགས་དུས་ཆེན་སྐབས་དང་པོའི་དགའ་སྟོན་དངོས་སུ་མཇུག་བསྡུས་སོ།།
ཞེས་ཀྲུང་དབྱང་མི་རིགས་སློབ་གྲྭ་ཆེན་མོའི་དགེ་མིང་ཤར་གཞོན་ཚེ་རིང་ཟླ་བས་སྤེལ།
ཀྲུང་དབྱང་མི་རིགས་སློབ་གྲྭ་ཆེན་མོའི་བོད་རིག་པའི་ཚན་ཁག་ལ་སློབ་གླིང་གི་མཚན་བྱང་སུག་བྲིས་མཛད་པ་ཞིག་གནང་བའི་ཚུལ།
༼བོད་ཀྱི་ཡིག་གཟུགས་སྒྱུ་རྩལ་མྱོང་རོལ་༽ཞེས་པའི་བརྗོད་གཞིའི་ཐོག་ནས་འཆད་ཉན་བྱེད་བཞིན་པའི་རྣམ་པ།
བོད་རིག་པའི་ཞིབ་འཇུག་གླིང་གི་གླིང་གཙོ་གཞོན་པ་བཀྲ་བྷ་ལགས་ཀྱིས་ཕྱག་བྲིས་གནང་བཞིན་པ།
བོད་རིག་པའི་ཞིབ་འཇུག་གླིང་གི་དགེ་རྒན་ཆེན་མོ་བཀའ་མགོན་ལགས་ཀྱིས་ཕྱག་བྲིས་གནང་བཞིན་པ།
བོད་རིག་པའི་ཞིབ་འཇུག་གླིང་གི་དགེ་མིང་ཤར་གཞོན་ཚེ་རིང་ཟླ་བས་ཡི་གེ་འབྲི་བཞིན་པ།
བོད་ཀྱི་བྲིས་པ་དགེ་མང་འཇམ་དཔལ་ལགས་ཀྱིས་ཡིག་གཟུགས་དུས་ཆེན་ལ་ཤིས་ཚིག་ཕྱག་བྲིས་གནང་བཞིན་པ།
བོད་ལྗོངས་བརྙན་འཕྲིན་ཁང་གི་རྒན་མཁར་རྒྱ་ཐར་ལགས་ཡིག་གཟུགས་དུས་ཆེན་ལ་མཉམ་ཞུགས་གནང་བ།
པར་རིས་མཁོ་འདོན་པ་འཆི་མེད་རབ་རྒྱས་ལགས།
བྲིས་རྩལ་ངོམ་བཞིན་པའི་སློབ་མ་རྣམས་ཀྱི་པར་རིས་ཁག
བོད་ཀྱི་ཡིག་གཟུགས་དུས་ཆེན་དབུ་བརྙེས་པའི་ཉིན་མོར་མཉམ་འཛོམས་བྱུང་བའི་དགེ་སློབ་ཡོངས་ཀྱི་འདྲ་པར། ༼པེ་ཅིན།༽
| 